Hechos 5 - Triqui de San Juan Copala

Quiꞌyaj Ananías ga̱ nica̱ soꞌ Safira cacunꞌ rihaan Nimán Yaꞌanj a

¹ Dan me se vaa ꞌo̱ síí cuꞌna̱j Ananías, ne̱ cutuꞌvéj soꞌ ꞌo̱ yoꞌóó ga̱ nica̱ soꞌ Safira a.

² Ga̱a ne̱ caraa sa̱ꞌ soꞌ taꞌa̱j saꞌanj quiriꞌ soꞌ, ne̱ neꞌen nica̱ soꞌ da̱j quiꞌyaj soꞌ a. Ne̱ da̱j ꞌó taꞌa̱j saꞌanj nica̱j soꞌ ne̱ cuchruj soꞌ tacóó nij síí ata̱ suun caꞌa̱nj nata̱ꞌ snana̱ Jesús a.

³ Ga̱a ne̱ caꞌmii Pedró rihaan Ananías, cataj soꞌ a: ―Me cheꞌé catúj Síí Chre̱e nimán so̱ꞌ, ne̱ caꞌmii ne̱ so̱ꞌ nda̱a rihaan Nimán Yaꞌanj, ne̱ taꞌaa so̱ꞌ taꞌa̱j saꞌanj quiríꞌ so̱ꞌ ga̱a cutuꞌvéj so̱ꞌ yoꞌóó yoꞌ ga̱.

⁴ Dan me se da̱j guun rá so̱ꞌ, ne̱ caꞌmii ne̱ so̱ꞌ ga̱. Né toꞌo̱j ma̱ꞌán so̱ꞌ cutuꞌvéj so̱ꞌ ne̱ ga̱a cutuꞌvéj so̱ꞌ man yoꞌ ne̱ ne nó xcúún so̱ꞌ qui̱ꞌyáá so̱ꞌ nda̱a vaa me rá ma̱ꞌán so̱ꞌ qui̱ꞌyáá so̱ꞌ ga̱ se‑saꞌa̱nj so̱ꞌ naꞌ. Me cheꞌé cavii raá so̱ꞌ qui̱ꞌyáá so̱ꞌ se vaa quiꞌyáá so̱ꞌ nihánj ga̱. Né rihaan yuvii̱ u̱u̱n caꞌmii ne̱ so̱ꞌ maꞌ. Nda̱a rihaan maꞌa̱n ya̱ Yaꞌanj caꞌmii ne̱ so̱ꞌ na̱nj ado̱nj ―taj Pedró rihaan Ananías yoꞌ a.

⁵ Ga̱a cuno Ananías nana̱ caꞌmii Pedró rihaan soꞌ, ne̱ naxruꞌ soꞌ, ne̱ caviꞌ soꞌ a. Ga̱a ne̱ cuchuꞌviꞌ ndoꞌo cunuda̱nj nij síí cuno nda̱a vaa quiranꞌ soꞌ a.

⁶ Ga̱a ne̱ canicunꞌ nij síí tachru̱u̱, ne̱ nacutáj nij soꞌ yatzíj man cúú man síí caviꞌ, ga̱a ne̱ caꞌanj nica̱j nij soꞌ man soꞌ xeꞌ, ga̱a ne̱ cachinꞌ nij soꞌ man soꞌ a.

⁷ Dan me se cachén vaꞌnu̱j orá ta̱ꞌ asuun, ga̱a ne̱ catúj nica̱ síí caviꞌ yoꞌ rá veꞌ, ne̱ ne queneꞌe̱n noꞌ da̱j quiranꞌ nica̱ noꞌ maꞌ.

⁸ Ga̱a ne̱ cataj Pedró rihaan noꞌ a: ―Cata̱j xnaꞌanj so̱ꞌ rihanj sese nu̱ꞌ saꞌanj taꞌaa ro̱j so̱j cheꞌé yoꞌóó cutuꞌvéj ro̱j so̱j me nihánj á ―taj Pedró rihaan noꞌ a. ―Veé cunuda̱nj ya̱ saꞌanj taꞌaa rój cheꞌé yoꞌóó me yoꞌ chugua̱nj ―taj noꞌ a.

⁹ Ga̱a ne̱ cataj Pedró rihaan noꞌ a: ―Me cheꞌé cuya̱a̱n guun rá ro̱j so̱j tiha̱ꞌ yuꞌunj ro̱j so̱j man Nimán Síí ꞌNi̱j Raꞌa man níꞌ ga̱. Ni̱ꞌyaj so̱ꞌ á. Nij síí cachinꞌ man nica̱ so̱ꞌ roꞌ, nicunꞌ taꞌyaa, ne̱ nihánj me se ca̱ta̱ nij soꞌ mán so̱ꞌ, caꞌa̱nj ni̱caj nij soꞌ mán so̱ꞌ xeꞌ cuano̱ na̱nj ado̱nj ―taj Pedró rihaan noꞌ a.

¹⁰ Ga̱a ne̱ ta̱j niꞌyo̱n naxruꞌ noꞌ rihaan yoꞌóó rej nicu̱nꞌ Pedró, ne̱ nu̱ꞌ caviꞌ noꞌ a. Ga̱a ne̱ catúj uún nij síí tachru̱u̱ rá veꞌ, ne̱ queneꞌen nij soꞌ se vaa a̱j caviꞌ noꞌ a. Ga̱a ne̱ caꞌanj nica̱j nij soꞌ cúú man noꞌ xeꞌ, ga̱a ne̱ cachinꞌ nij soꞌ man noꞌ xꞌnúú nica̱ noꞌ a.

¹¹ Ga̱a ne̱ cuchuꞌviꞌ ndoꞌo nu̱ꞌ xꞌneꞌ nij síí noco̱ꞌ man Jesús do̱ꞌ, cunuda̱nj nij síí cuno nana̱ da̱j quiranꞌ ro̱j ni̱ca̱ ro̱j soꞌ do̱ꞌ a.

Quiꞌyaj ndoꞌo nij síí ata̱ suun caꞌa̱nj nata̱ꞌ snana̱ Jesús suun sa̱ꞌ noco̱o a

¹² Ga̱a ne̱ quiꞌyaj ndoꞌo nij síí ata̱ suun caꞌa̱nj nata̱ꞌ snana̱ Jesús suun sa̱ꞌ noco̱o quiꞌyaj se vaa caꞌanj rá nij yuvii̱ ya̱nj chumanꞌ Jerusalén a. Ne̱ ꞌo̱ vaa rá nij síí noco̱ꞌ man Jesús, ne̱ cunuu chre̱ꞌ nij soꞌ rej ya̱nj nuvií noco̱o rá veꞌ cheꞌe̱e̱ cuꞌna̱j Corredor Salomón a.

¹³ Tza̱j ne̱ ꞌó nij yuvii̱ roꞌ, ne quisi̱j rá nij soꞌ cunu̱u chre̱ꞌ nij soꞌ ga̱ nij síí noco̱ꞌ man Jesús maꞌ. Tza̱j ne̱ cunuda̱nj nij yuvii̱ cataj se vaa sa̱ꞌ uxrá quiꞌyaj nij síí noco̱ꞌ man Jesús a.

¹⁴ Cuchumán rá queꞌe̱e̱ ndoꞌo nij snóꞌo do̱ꞌ, nij chana̱ do̱ꞌ, niꞌya̱j nij soꞌ man Jesús Si̱j ꞌNi̱j Raꞌa man níꞌ, ne̱ cheꞌé dan guun ri̱i̱ doj nij yuvii̱ noco̱ꞌ man soꞌ a.

¹⁵ Ne̱ dan me se rihaan chruun do̱ꞌ, rihaan yuvéé do̱ꞌ, táá nij síí ranꞌ, rii nij yuvii̱ man nij síí ranꞌ yoꞌ xeꞌ a. Cuchruj nii man nij síí ranꞌ rá callé rej cache̱n Pedró, cheꞌé se sese scachu̱nꞌ Pedró cano̱ xráá nij síí ranꞌ ne̱ nahu̱un nij soꞌ, rá nij yuvii̱ a.

¹⁶ Ga̱a ne̱ caꞌnaꞌ ndoꞌo yuvii̱ cavii nij chumanꞌ na̱j nichru̱nꞌ chumanꞌ Jerusalén, ne̱ nuu chre̱ꞌ nij soꞌ a. Dan me se ata̱ nij soꞌ síí ranꞌ do̱ꞌ, síí ranꞌ ndoꞌo sayuun ꞌyaj nana̱ chre̱e nu̱u̱ nimán nij soꞌ do̱ꞌ, ne̱ nahuun sa̱ꞌ cunuda̱nj nij soꞌ a.

Quiꞌyaj nii sayuun man nij síí ata̱ suun caꞌa̱nj nata̱ꞌ snana̱ Jesús a

¹⁷ Dan me se guun xco̱j ruva̱a̱ rá nij tuvi̱ꞌ xrej ata̱ suun noco̱o doj niꞌya̱j nij soꞌ man nij síí ata̱ suun caꞌa̱nj nata̱ꞌ snana̱ Jesús a. Dan me se nij tuvi̱ꞌ xrej me se síí noco̱ꞌ stucua̱nj nij síí saduceo me nij soꞌ a.

¹⁸ Dan me se caꞌnéé nij soꞌ tanuu ta̱ꞌaa man nij síí ata̱ suun caꞌa̱nj nata̱ꞌ snana̱ Jesús, ga̱a ne̱ caxríj nij soꞌ tagaꞌ man nij soꞌ a.

¹⁹ Tza̱j ne̱ rej nii̱ me se caꞌnaꞌ ꞌo̱ se‑mo̱zó Yaꞌanj Si̱j ꞌNi̱j Raꞌa man níꞌ, ne̱ caꞌnúj soꞌ taꞌyaa tagaꞌ yoꞌ, ne̱ caꞌanj nica̱j soꞌ man nij soꞌ xeꞌ a. Ga̱a ne̱ cataj se‑mo̱zó Yaꞌanj yoꞌ rihaan nij soꞌ a:

²⁰ ―Cavi̱i̱ soj, ne̱ caꞌa̱nj soj canicu̱nꞌ soj rej ya̱nj nuvií noco̱o, ne̱ nata̱ꞌ soj rihaan nij yuvii̱ nu̱ꞌ nana̱ nihánj nana̱ taj xnaꞌanj da̱j quiꞌya̱j nij yuvii̱ ne̱ caꞌve̱e ga̱a̱ iꞌna̱ꞌ nimán nij yuvii̱ rihaan Yaꞌanj á ―taj se‑mo̱zó Yaꞌanj yoꞌ rihaan nij soꞌ a.

²¹ Síj cuno nij soꞌ nana̱ vaa da̱nj, ga̱a ne̱ rej síj güii catúj nij soꞌ rej ya̱nj nuvií noco̱o, ne̱ tucuꞌyón nij soꞌ snana̱ Jesús rihaan nij yuvii̱ a. Ma̱an orá dan naquiꞌyaj chre̱ꞌ nij tuvi̱ꞌ xrej ata̱ suun noco̱o doj man Xꞌneꞌ Nij Síí Ata̱ Suun Noco̱o Doj do̱ꞌ, cunuda̱nj nij síí uun chij rihaan nij yuvii̱ israelitá do̱ꞌ, ne̱ quiꞌya̱j nij soꞌ juntá a. Ga̱a ne̱ caꞌnéé nij soꞌ tanuu caꞌa̱nj tagaꞌ, ne̱ caꞌna̱ꞌ ni̱caj nij soꞌ man nij síí ata̱ suun caꞌa̱nj nata̱ꞌ snana̱ Jesús rihaan yuvii̱ rihaan nij soꞌ, rá nij soꞌ a.

²² Dan me se cuchiꞌ nij tanuu caꞌnéé nij síí uun chij yoꞌ tagaꞌ, ga̱a ne̱ ne nari̱ꞌ tanuu man nij síí ata̱ suun caꞌa̱nj nata̱ꞌ snana̱ Jesús rque tagaꞌ a̱ maꞌ. Cheꞌé dan me canica̱j nij tanuu yoꞌ rej ma̱n nij síí uun chij yoꞌ, ne̱ nataꞌ nij tanuu yoꞌ se vaa guun tagaꞌ a.

²³ Dan me se cataj nij tanuu yoꞌ a: ―Dan me se ga̱a cuchiꞌ núj tagaꞌ, ne̱ vaa xraan tagaꞌ, ne̱ nicu̱nꞌ nij tanuu rihaan taꞌyaa, tumé nij tanuu taꞌyaa a. Tza̱j ne̱ ga̱a caꞌnúj núj taꞌyaa, ne̱ ne nari̱ꞌ núj a̱ ꞌó yuvii̱ rá tagaꞌ a̱ maꞌ ―taj nij tanuu rihaan nij síí uun chij yoꞌ a.

²⁴ Dan me se ga̱a cuno tanuu uun chij rihaan nij tanuu tumé nuvií noco̱o do̱ꞌ, ga̱a cuno nij xrej ata̱ suun noco̱o do̱ꞌ, nana̱ vaa da̱nj, ne̱ caꞌanj rá nij soꞌ, ne̱ ne queneꞌe̱n nij soꞌ da̱j gu̱un rej rihaan nij soꞌ a.

²⁵ Ga̱a ne̱ cuchiꞌ ꞌo̱ soꞌ rihaan nij síí uun chij, ga̱a ne̱ nataꞌ soꞌ rihaan nij soꞌ, cataj soꞌ a: ―Xa̱ꞌ nij síí caxríj nij soj tagaꞌ man, tza̱j ne̱ cuano̱ nihánj me se nicu̱nꞌ nij soꞌ rej ya̱nj nuvií noco̱o, tucuꞌyón nij soꞌ rihaan nij yuvii̱ na̱nj á ―taj síí caꞌnaꞌ rihaan nij soꞌ a.

²⁶ Ga̱a ne̱ cavii tanuu uun chij rihaan nij tanuu tumé nuvií noco̱o cavii nij tanuu cavii, caꞌanj nij soꞌ nuvií noco̱o, ne̱ caꞌanj naca̱j nij soꞌ man nij síí ata̱ suun caꞌa̱nj nata̱ꞌ snana̱ Jesús rihaan yuvii̱ rihaan nij síí uun chij yoꞌ a. Tza̱j ne̱ taj sayuun quiꞌyaj nij soꞌ man nij síí cuneꞌ Jesús man maꞌ. ꞌO̱ se cuchuꞌviꞌ nij tanuu niꞌya̱j nij soꞌ man nij yuvii̱ se vaa go̱ꞌ nij yuvii̱ yahij xráá maꞌa̱n nij soꞌ a.

²⁷ Dan me se caꞌnaꞌ nica̱j nij soꞌ man nij síí cuneꞌ Jesús rej nuu chre̱ꞌ Xꞌneꞌ Nij Síí Ata̱ Suun Noco̱o Doj rihaan nij yuvii̱ israelitá a. Ga̱a ne̱ xnáꞌanj xrej ata̱ suun noco̱o doj man nij soꞌ,

²⁸ cataj soꞌ a: ―Né se a̱j cataj xnaꞌanj núj rihaan nij soj se vaa caꞌne̱ꞌ rá soj ga̱ suun tucuꞌyón rihaan nij yuvii̱ cheꞌé síí nataꞌ soj cheꞌé a̱ naꞌ. Tza̱j ne̱ cuano̱ nihánj me se a̱j cuchiꞌ stucua̱nj soj rihaan cunuda̱nj nij síí ma̱n chumanꞌ Jerusalén nihánj, quiꞌyaj soj, ne̱ me rá soj cara̱a soj cacunꞌ xráá núj se vaa caviꞌ snóꞌo noco̱ꞌ soj quiꞌyaj núj á ―taj soꞌ rihaan nij síí cuneꞌ Jesús a.

²⁹ Ga̱a ne̱ cataj Pedró do̱ꞌ, ꞌó nij síí cuneꞌ Jesús do̱ꞌ a: ―Tza̱j ne̱ ꞌo̱ se no̱ xcúún níꞌ cuno̱ níꞌ asino ya̱a̱n nana̱ aꞌmii Yaꞌanj rihaan nana̱ aꞌmii yuvii̱ a.

³⁰ ꞌO̱ se nij soj me síí tocoꞌ man Jesús rihaan rcutze̱, ne̱ caviꞌ soꞌ, quiꞌyaj soj a. Tza̱j ne̱ Yaꞌanj noco̱ꞌ xi̱i níꞌ asi̱j naá roꞌ, me síí quiꞌyaj cunuu iꞌna̱ꞌ uún soꞌ ado̱nj.

³¹ Ga̱a ne̱ maꞌa̱n Yaꞌanj quiꞌyaj cavii Jesús xta̱ꞌ, ne̱ nicu̱nꞌ Jesús rej xꞌnu̱j Yaꞌanj rej nuva̱ꞌ Yaꞌanj a. Ne̱ guun Jesús Síí Uun Chij Ndoꞌo, ne̱ Síí Tinanii man Yuvii̱ rihaan Sayuun guun soꞌ, cheꞌé rej caꞌve̱e ca̱nica̱j nimán níꞌ si̱j israelitá ga̱a ne̱ navi̱j cacunꞌ tumé níꞌ ado̱nj.

³² Ne̱ núj me síí nataꞌ nana̱ nihánj, ne̱ Nimán Yaꞌanj uún me se tihaa̱n soꞌ se vaa ya̱ vaa nana̱ nihánj ado̱nj. Ne̱ xa̱ꞌ Nimán Yaꞌanj, tza̱j ne̱ rqué Yaꞌanj Nimán soꞌ man nij yuvii̱ uno rihaan soꞌ a ―taj nij soꞌ rihaan nij síí uun chij rihaan nij yuvii̱ israelitá a.

³³ Dan me se ga̱a cuno nij síí uun chij nana̱ nihánj, ga̱a ne̱ cuyanj rá nij soꞌ, ga̱a ne̱ guun rá nij soꞌ ticavi̱ꞌ nij soꞌ man nij síí cuneꞌ Jesús a.

³⁴ Tza̱j ne̱ canicunꞌ caya̱ ꞌo̱ tuviꞌ xꞌneꞌ nij síí ata̱ suun noco̱o doj rihaan nij yuvii̱ israelitá, ne̱ ꞌo̱ síí fariseo cuꞌna̱j Gamaliel me soꞌ a. Síí naquiꞌyaj cu̱u stucua̱nj Moisés me soꞌ, ne̱ caráj cochro̱j cunuda̱nj nij yuvii̱ niꞌya̱j nij yuvii̱ man soꞌ a. Ga̱a ne̱ caꞌneꞌ soꞌ suun se vaa cu̱riha̱nj nij síí cuneꞌ Jesús orá nii xeꞌ a.

³⁵ Ga̱a ne̱ cataj Gamaliel rihaan ꞌó nij síí uun chij yoꞌ a: ―Cuno̱ soj si̱j israelitá nana̱ caꞌmi̱j rihaan nij soj cuano̱ á. Dan me se ta̱dó soj da̱j quiꞌya̱j soj ga̱ nij snóꞌo caꞌnaꞌ rihaan níꞌ nihánj á.

³⁶ ꞌO̱ se asi̱j rque̱ doj me se nachuma̱a̱n ꞌo̱ síí cuꞌna̱j Teudas, ne̱ soꞌ roꞌ, me síí cataj se vaa si̱j sa̱ꞌ uxrá me maꞌa̱n soꞌ, ne̱ canocoꞌ ꞌo̱ caꞌa̱nj cientó yuvii̱ xcó soꞌ ta̱ꞌ asuun a. Ga̱a ne̱ ticaviꞌ nii man soꞌ, ne̱ chaꞌnuu̱ cunuda̱nj nij síí cuno snana̱ soꞌ, ne̱ navij nu̱ꞌ snana̱ soꞌ na̱nj ado̱nj.

³⁷ Dan me se cachén doj, ga̱a ne̱ cavii ꞌó síí cuꞌna̱j Judas síí cavii estadó Galilea, ne̱ nachuma̱a̱n soꞌ ga̱a güii cachrón gobiernó se‑chuvi̱i cunuda̱nj nij yuvii̱ rihaan yanj a. Ga̱a ne̱ tihaꞌ soꞌ man yuvii̱, ne̱ canocoꞌ nij yuvii̱ xcó soꞌ a. Tza̱j ne̱ ticaviꞌ nii man soꞌ uún, ga̱a ne̱ cunuda̱nj nij yuvii̱ cuno snana̱ soꞌ chaꞌnuu̱ uún a.

³⁸ ’Ne̱ cuano̱ nihánj me se cata̱j xnaꞌanj ꞌu̱nj rihaan nij soj se vaa se̱ quiꞌyaj nij soj a̱ doj sayuun man nij síí caꞌnaꞌ rihaan níꞌ cuanꞌ maꞌ. ꞌO̱ se sese tucuáán cuchruj yuvii̱ u̱u̱n me stucua̱nj nij soꞌ, ne̱ sese ꞌyaj nij soꞌ nda̱a vaa avii raa̱ maꞌa̱n nij soꞌ, ne̱ quiri̱ꞌ nu̱ꞌ se vaa ꞌyaj nij soꞌ na̱nj ado̱nj.

³⁹ Tza̱j ne̱ sese Yaꞌanj me síí rqué snana̱ nij soꞌ, ne̱ sese ꞌyaj nij soꞌ se‑su̱u̱n Yaꞌanj, ne̱ daj chiha̱a̱ míj se̱ caꞌanj niꞌya̱ snana̱ nij soꞌ quiꞌya̱j soj maꞌ. Sese da̱nj gu̱un quiꞌya̱j nij soj, ne̱ síí unuꞌ ga̱ maꞌa̱n Yaꞌanj me nij soj ado̱nj ―taj síí cuꞌna̱j Gamaliel cuno ꞌó nij síí uun chij rihaan nij yuvii̱ israelitá a. Dan me se cuchumán rá nij soꞌ snana̱ síí cuꞌna̱j Gamaliel yoꞌ,

⁴⁰ ga̱a ne̱ canacúún nij soꞌ man nij síí cuneꞌ Jesús, ne̱ catúj nij síí cuneꞌ Jesús rej ma̱n nij soꞌ a. Ga̱a ne̱ goꞌ nii rutzii̱ xráá nij síí cuneꞌ Jesús, quiꞌyaj nij síí uun chij a. Ne̱ caꞌneꞌ nij soꞌ suun rihaan nij síí cuneꞌ Jesús se vaa se̱ caꞌmii nij soꞌ a̱ ꞌó nana̱ cheꞌé se‑chuvi̱i Jesús rihaan nij yuvii̱ a̱ maꞌ. Ga̱a ne̱ naꞌnéé nij síí uun chij yoꞌ chrej man nij síí cuneꞌ Jesús a.

⁴¹ Dan me se curiha̱nj nij síí cuneꞌ Jesús rej nuu chre̱ꞌ xꞌneꞌ nij síí ata̱ suun noco̱o doj rihaan nij yuvii̱ israelitá a. Ne̱ guun niha̱ꞌ uxrá rá nimán nij síí cuneꞌ Jesús cheꞌé se si̱j vaa sa̱ꞌ me nij soꞌ niꞌya̱j Yaꞌanj ne̱ cheꞌé dan caꞌvee quiranꞌ nij soꞌ sayuun cheꞌé se‑chuvi̱i Jesús a.

⁴² Ne̱ da̱j a̱ güii me se cunuu chre̱ꞌ nij síí cuneꞌ Jesús rej ya̱nj nuvií noco̱o do̱ꞌ, rá veꞌ tucuá nij soꞌ do̱ꞌ, ne̱ ꞌo̱ tucuꞌyón nij soꞌ man nij yuvii̱, ne̱ nataꞌ nij soꞌ nana̱ sa̱ꞌ se vaa Jesús me Síí Caꞌnéé Yaꞌanj Ti̱nanii man Yuvii̱ rihaan Sayuun a.