Hechos 4 - Triqui de San Juan Copala

Caꞌmii Pedró ga̱ Juan rihaan xꞌneꞌ nij síí ata̱ suun noco̱o doj rihaan nij yuvii̱ israelitá a

¹ Dan me se ga̱a caꞌmii síí cuꞌna̱j Pedró ga̱ Juan rihaan nij yuvii̱, ne̱ cuchiꞌ nij xrej do̱ꞌ, tanuu uun chij rihaan nij tanuu israelitá tumé nuvií noco̱o do̱ꞌ, nij síí saduceo do̱ꞌ, rihaan ro̱j soꞌ a.

² ꞌO̱ se ne aranꞌ rá nij soꞌ se vaa tucuꞌyón Pedró ga̱ Juan man nij yuvii̱ do̱ꞌ, se vaa nataꞌ ro̱j soꞌ se vaa caꞌve̱e cunu̱u iꞌna̱ꞌ uún nij síí caviꞌ nda̱a vaa quiꞌyaj Jesús do̱ꞌ maꞌ.

³ Ne̱ dan me se taꞌaa nij soꞌ man ro̱j soꞌ, ne̱ caxríj nij soꞌ tagaꞌ man ro̱j soꞌ ꞌo̱ yanꞌ a. ꞌO̱ se a̱j tiꞌnuu me orá yoꞌ a.

⁴ Tza̱j ne̱ queꞌe̱e̱ ndoꞌo nij síí cuno snana̱ ro̱j soꞌ roꞌ, cuchumán rá nana̱ yoꞌ, ne̱ veé da̱nj quisíj ꞌu̱nꞌ míj snóꞌo canocoꞌ man Jesús ta̱ꞌ asuun a.

⁵ Ne̱ ꞌó güii me se cunuu chre̱ꞌ nij síí nica̱j suun do̱ꞌ, nij síí uun chij do̱ꞌ, nij síí naquiꞌyaj cu̱u stucua̱nj Moisés do̱ꞌ, chumanꞌ Jerusalén ga̱

⁶ síí cuꞌna̱j Anás síí guun xrej ata̱ suun noco̱o doj do̱ꞌ, síí cuꞌna̱j Caifás do̱ꞌ, síí cuꞌna̱j Juan do̱ꞌ, síí cuꞌna̱j Alejandró do̱ꞌ, ta̱ranꞌ nij tuvi̱ꞌ nij xrej ata̱ suun noco̱o do̱ꞌ a.

⁷ Dan me se canicunꞌ caya̱ Pedró ga̱ Juan tanu̱u̱ veꞌ ma̱n nij xrej, quiꞌyaj nij xrej, ne̱ xnáꞌanj nij xrej man ro̱j soꞌ, cataj nij xrej a: ―Me rej quiriꞌ ro̱j so̱j rej nucua̱j do̱ꞌ, me síí caꞌneꞌ suun rihaan ro̱j so̱j do̱ꞌ, ne̱ quiꞌyaj ro̱j so̱j da̱nj ga̱ ―taj nij soꞌ, xnáꞌanj nij soꞌ man ro̱j soꞌ a.

⁸ Dan me se nu̱u̱ ndoꞌo Nimán Yaꞌanj nimán Pedró, ne̱ cataj Pedró rihaan nij soꞌ a: ―Cuno̱ nij soj si̱j nica̱j suun rii taꞌngaꞌ rihaan nij yuvii̱ do̱ꞌ, cuno̱ soj si̱j uun chij do̱ꞌ, nana̱ cata̱j xnaꞌanj ꞌu̱nj rihaan nij soj á.

⁹ Nihánj me se naquiꞌya̱j cu̱u nij soj man rój cheꞌé se cunuu ꞌe̱e̱ rá rój niꞌya̱j rój ꞌo̱ síí rengo̱, ne̱ me rá nij soj queneꞌe̱n soj asa̱ꞌ caꞌvee nahuun sa̱ꞌ síí rengo̱ nihánj a.

¹⁰ Cheꞌé dan xca̱j nij soj do̱ꞌ, ta̱ranꞌ nij yuvii̱ israelitá do̱ꞌ, cuentá se vaa cheꞌé se‑chuvi̱i Jesucristó Si̱j Caꞌnéé Yaꞌanj síí cavii chumanꞌ Nazaret nahuun sa̱ꞌ síí rengo̱ nihánj ne̱ nicu̱nꞌ soꞌ rihaan soj nihánj cuano̱ a. Ne̱ nij soj roꞌ, me nij síí quiꞌyaj cachrón nii man Jesús rihaan rcutze̱, tza̱j ne̱ cunuu iꞌna̱ꞌ uún soꞌ, quiꞌyaj Yaꞌanj a.

¹¹ Ne̱ xa̱ꞌ Jesús, tza̱j ne̱ soꞌ me yuvej quiriꞌíj nij soj si̱j cune̱ꞌ veꞌ, ne̱ ya̱j me se guun soꞌ yuvej vaa se uun doj rihaan ta̱ranꞌ nij yuvej ma̱n tacóó veꞌ na̱nj ado̱nj.

¹² Taj va̱j a̱ ꞌó síí gu̱un nucua̱j ti̱nanii man níꞌ rihaan sayuun, cheꞌé se rihaan chumii̱ nihánj roꞌ, o̱rúnꞌ se‑chuvi̱i soꞌ me se rqué Yaꞌanj man níꞌ cheꞌé yan nani̱i̱ níꞌ rihaan sayuun ne̱ cavi̱i̱ sa̱ꞌ níꞌ na̱nj ado̱nj ―taj Pedró rihaan nij síí uun chij yoꞌ a.

¹³ Dan me se queneꞌen nij soꞌ se vaa ne cuchuꞌvi̱ꞌ Pedró ga̱ Juan ne̱ sca̱ꞌ uxrá caꞌmii ro̱j soꞌ, ne̱ xcaj nij soꞌ cuentá se vaa né si̱j tucuꞌyón yanj me ro̱j soꞌ, tza̱j ne̱ sa̱ꞌ uxrá nariꞌ ro̱j soꞌ a. Cheꞌé dan caráyaꞌa̱nj nij soꞌ a. Ne̱ queneꞌen nij soꞌ se vaa ro̱j soꞌ me síí cachéé ga̱ Jesús a.

¹⁴ Ne̱ queneꞌen nij soꞌ man síí nahuun sa̱ꞌ yoꞌ nicu̱nꞌ ga̱ ro̱j soꞌ a. Ga̱a ne̱ ne quiri̱ꞌ nij soꞌ nana̱ caꞌmi̱i̱ nij soꞌ maꞌ.

¹⁵ Ga̱a ne̱ caꞌneꞌ nij síí uun chij suun rihaan Pedró ga̱ Juan ga̱ síí nahuun sa̱ꞌ yoꞌ se vaa cu̱riha̱nj vaꞌnu̱j nij soꞌ xeꞌ, ga̱a ne̱ caꞌve̱e nuchru̱j ra̱a̱ xꞌneꞌ nij síí ata̱ suun noco̱o doj da̱j quiꞌya̱j nij soꞌ, rá nij soꞌ a.

¹⁶ Dan me se cataj nij soꞌ a: ―Da̱j quiꞌya̱j níꞌ ga̱ ro̱j síí nihánj ga̱. ꞌO̱ se xcaj ta̱ranꞌ nij síí ya̱nj chumanꞌ Jerusalén nihánj cuentá se vaa ranga̱ꞌ quiꞌyaj ro̱j soꞌ ꞌo̱ suun sa̱ꞌ noco̱o, ne̱ se̱ caꞌvee cata̱j níꞌ se vaa ne quiꞌya̱j ro̱j soꞌ da̱nj maꞌ.

¹⁷ Tza̱j ne̱ tuchuꞌvi̱ꞌ níꞌ man ro̱j soꞌ ne̱ caꞌne̱ꞌ níꞌ suun rihaan ro̱j soꞌ se vaa se̱ caꞌmii ro̱j soꞌ cheꞌé se‑chuvi̱i Jesús rihaan a̱ ꞌó yuvii̱ maꞌ. Ga̱a ne̱ se̱ chaꞌnuu̱ doj nana̱ nihánj scaꞌnúj nij yuvii̱ maꞌ ―taj ta̱ranꞌ nij soꞌ a.

¹⁸ Ga̱a ne̱ canacúún nij soꞌ catu̱u̱ uún Pedró ga̱ Juan rej nu̱u̱ nij soꞌ, ga̱a ne̱ nagoꞌ nij soꞌ chrej nucua̱j man ro̱j soꞌ se vaa se̱ caꞌmii ro̱j soꞌ cheꞌé se‑chuvi̱i Jesús ne̱ se̱ tucuꞌyón ro̱j soꞌ snana̱ Jesús maꞌ.

¹⁹ Ga̱a ne̱ canica̱j Pedró ga̱ Juan cataj ro̱j soꞌ rihaan nij soꞌ a: ―Nuchru̱j ra̱a̱ nij soj sese gu̱un rá Yaꞌanj cuno̱ núj rihaan soj ne̱ ta̱náj xco̱ núj snana̱ Yaꞌanj na̱nj á.

²⁰ Se̱ caꞌvee caꞌne̱ꞌ rá núj ga̱ suun aꞌmii cheꞌé se vaa queneꞌen núj do̱ꞌ, cheꞌé nana̱ cuno núj do̱ꞌ a̱ maꞌ ―taj ro̱j soꞌ rihaan nij soꞌ a.

²¹ Ga̱a ne̱ doj a̱ caꞌmii yuva̱a̱ nij síí uun chij yoꞌ rihaan ro̱j soꞌ, tza̱j ne̱ ne quiri̱ꞌ nij síí uun chij yoꞌ da̱j quiꞌya̱j nij soꞌ sayuun man ro̱j soꞌ a̱ maꞌ. Cheꞌé dan naꞌnéé nij soꞌ chrej man ro̱j soꞌ a. ꞌO̱ se nij yuvii̱ me se cunuda̱nj nij soꞌ cataj se vaa sa̱ꞌ uxrá quiꞌyaj Yaꞌanj cheꞌé síí nahuun sa̱ꞌ yoꞌ a.

²² Ne̱ síí nahuun sa̱ꞌ quiꞌyaj suun sa̱ꞌ noco̱o yoꞌ me se va̱j soꞌ vi̱j chiha̱a̱ (40) yoꞌ táá doj a.

Cachíín niꞌya̱j nij síí noco̱ꞌ man Jesús rihaan Yaꞌanj a

²³ Dan me se naꞌnéé nii man Pedró ga̱ Juan, ne̱ cuchiꞌ ro̱j soꞌ rihaan tinúú ro̱j soꞌ, ga̱a ne̱ nataꞌ ro̱j soꞌ nu̱ꞌ nana̱ cataj nij xrej ata̱ suun noco̱o do̱ꞌ, nij síí uun chij do̱ꞌ, rihaan ro̱j soꞌ a.

²⁴ Ga̱a cuno nij soꞌ snana̱ ro̱j soꞌ, ga̱a ne̱ nu̱ꞌ guun rá ta̱ranꞌ nij soꞌ cachi̱nj niꞌya̱j nij soꞌ rihaan Yaꞌanj, ne̱ cheꞌé dan nucua̱j caꞌmii nij soꞌ, cataj nij soꞌ a: ―Síí ꞌNi̱j Raꞌa Cunuda̱nj mé so̱ꞌ á. Ma̱ꞌán so̱ꞌ me síí quiꞌyaj nu̱ꞌ rej xta̱ꞌ nu̱ꞌ chumii̱ nu̱ꞌ na yaꞌa̱nj nu̱ꞌ rasu̱u̱n nu̱ꞌ a.

²⁵ Ne̱ so̱ꞌ roꞌ, caꞌnéé so̱ꞌ Nimán so̱ꞌ rihaan xi̱i núj rey cuꞌna̱j David síí cunuu rihaan so̱ꞌ, ne̱ Nimán so̱ꞌ roꞌ, rqué nana̱ rihaan soꞌ caꞌmi̱i̱ soꞌ a. Ne̱ dan me se cataj soꞌ a: Me cheꞌé caꞌmaan ndoꞌo rá nij síí yaníj, ne̱ me cheꞌé guun nij rmaꞌa̱n rá nij yuvii̱ ga̱.

²⁶ Dan me se cavii nij síí nica̱j suun rey uun chij rihaan chumii̱ nihánj, ga̱a ne̱ cunuu chre̱ꞌ nij soꞌ, cheꞌé rej quiꞌya̱j nij soꞌ sayuun man Síí ꞌNi̱j Raꞌa man níꞌ do̱ꞌ, man Síí Caꞌnéé Yaꞌanj Ti̱nanii man Yuvii̱ rihaan Sayuun do̱ꞌ a, taj David ga̱a naá a.

²⁷ ’Dan me se ya̱ ya̱ cunuu chre̱ꞌ rey cuꞌna̱j Herodes do̱ꞌ, síí cuꞌna̱j Poncio Pilató do̱ꞌ, nij síí yaníj do̱ꞌ, nij yuvii̱ israelitá do̱ꞌ, rque chumanꞌ nihánj, cheꞌé rej quiꞌya̱j nij soꞌ sayuun man Taꞌníí so̱ꞌ síí sa̱ꞌ ina̱nj cuꞌna̱j Jesús, síí cunéꞌ so̱ꞌ man ti̱nanii man núj rihaan sayuun a.

²⁸ Tza̱j ne̱ quiꞌyaj nij soꞌ ina̱nj se vaa guun rá ma̱ꞌán so̱ꞌ asi̱j naá se vaa quiꞌya̱j nij soꞌ, ne̱ ma̱ꞌán so̱ꞌ me síí quiꞌyaj guun nu̱ꞌ nihánj a.

²⁹ ’Señor, nihánj me se xca̱j so̱ꞌ cuentá se vaa caꞌmii yuva̱a̱ ndoꞌo nij soꞌ rihaan núj, ne̱ ra̱cuíj so̱ꞌ man núj si̱j ꞌyaj se‑su̱u̱n so̱ꞌ se vaa se̱ cuchuꞌviꞌ núj caꞌmi̱i̱ núj snana̱ so̱ꞌ rihaan yuvii̱ maꞌ.

³⁰ Tu̱cuá so̱ꞌ raꞌá so̱ꞌ, ne̱ qui̱ꞌyáá so̱ꞌ se vaa nahu̱un sa̱ꞌ yuvii̱ do̱ꞌ, qui̱ꞌyáá so̱ꞌ da̱j a̱ suun sa̱ꞌ noco̱o do̱ꞌ, cheꞌé se‑chuvi̱i Taꞌníí so̱ꞌ Jesús síí sa̱ꞌ ina̱nj á ―taj ta̱ranꞌ nij soꞌ, cachíín niꞌya̱j nij soꞌ rihaan Yaꞌanj a.

³¹ Dan me se quisíj cachíín niꞌya̱j nij soꞌ rihaan Yaꞌanj, ga̱a ne̱ quinaa̱n nu̱ꞌ rej ma̱n nij soꞌ, ne̱ caraa ndoꞌo Nimán Yaꞌanj nimán cunuda̱nj nij soꞌ, ga̱a ne̱ ne cuchuꞌvi̱ꞌ nij soꞌ caꞌmi̱i̱ nij soꞌ snana̱ Yaꞌanj maꞌ.

ꞌO̱ cuya̱a̱n vaa nimán nij síí noco̱ꞌ man Jesús a

³² Dan me se ꞌo̱ cuya̱a̱n vaa rá nimán ri̱i̱ nij síí cuchumán rá niꞌya̱j man Jesús, ne̱ a̱ ꞌó nij soꞌ ne taj se vaa se‑siꞌya̱j o̱rúnꞌ me rasu̱u̱n maꞌ. Tana̱nj nu̱ꞌ rasu̱u̱n ma̱n rihaan ꞌo̱ ꞌo̱ nij soꞌ roꞌ, me siꞌyaj ta̱ranꞌ nij tuvi̱ꞌ nij soꞌ a.

³³ Ne̱ nij síí ata̱ suun caꞌa̱nj nata̱ꞌ snana̱ Jesús rihaan yuvii̱ me se nucua̱j ndoꞌo nataꞌ nij soꞌ se vaa cunuu iꞌna̱ꞌ uún Jesús Si̱j ꞌNi̱j Raꞌa man níꞌ a. Ne̱ quiꞌyaj ndoꞌo Yaꞌanj se lu̱j cheꞌé cunuda̱nj nij soꞌ a.

³⁴ Ne̱ taj va̱j a̱ ꞌó síí achiin rasu̱u̱n man ꞌni̱j scaꞌnúj nij soꞌ maꞌ. ꞌO̱ se cunuda̱nj tinúú nij soꞌ síí vaa toꞌóó do̱ꞌ, síí vaa veꞌ tucuá do̱ꞌ, cutuꞌvéj nij soꞌ siꞌyaj nij soꞌ, ne̱ nica̱j nij soꞌ saꞌanj quiriꞌ nij soꞌ,

³⁵ ne̱ caxríj nij soꞌ saꞌanj yoꞌ ston nij síí ata̱ suun caꞌa̱nj nata̱ꞌ snana̱ Jesús a. Ne̱ sese cachiin rasu̱u̱n rihaan ꞌo̱ tinúú nij soꞌ, ne̱ nij síí ata̱ suun yoꞌ me nij síí rqué nu̱ꞌ se vaa cachiin rihaan soꞌ a.

³⁶ Ne̱ ꞌo̱ soꞌ roꞌ, me síí cuꞌna̱j José, ne̱ nij síí ata̱ suun caꞌa̱nj nata̱ꞌ snana̱ Jesús me se tucuꞌnáj nij soꞌ Bernabé man soꞌ a. Ne̱ nana̱ Bernabé me raj cata̱a síí ꞌyaj nariꞌ nucuaj yuvii̱ a. Ne̱ ꞌo̱ taꞌníí taꞌnij siꞌno̱ síí cuꞌna̱j Leví síí cayáán ga̱a naá me soꞌ, ne̱ cavii soꞌ rej cuꞌna̱j Chipre a.

³⁷ Dan me se vaa ꞌo̱ toꞌóó soꞌ, ne̱ cutuꞌvéj soꞌ man yoꞌ, ne̱ nica̱j soꞌ saꞌanj quiriꞌ soꞌ cheꞌé yoꞌóó yoꞌ, ne̱ caxríj soꞌ ston nij síí ata̱ suun caꞌa̱nj nata̱ꞌ snana̱ Jesús a.