Hechos 12 - Triqui de San Juan Copala

Tinanii Yaꞌanj man Pedró rihaan rey cuꞌna̱j Herodes a

¹ Ma̱an tiempó yoꞌ me se guun rá síí nica̱j suun rey cuꞌna̱j Herodes quiꞌya̱j chiꞌi̱i̱ soꞌ man xꞌneꞌ nij síí noco̱ꞌ man Jesucristó a. Cheꞌé dan caꞌneꞌ soꞌ suun rihaan tanuu ta̱ꞌaa nij tanuu man taꞌa̱j nij soꞌ a.

² Ne̱ raa̱ neê espadá ticaviꞌ tanuu man síí cuꞌna̱j Jacobo tinúú síí cuꞌna̱j Juan, quiꞌyaj Herodes a.

³ Dan me se xcaj Herodes cuentá se vaa guun niha̱ꞌ rá nij yuvii̱ israelitá se vaa caviꞌ Jacobo, ne̱ cheꞌé dan taꞌaa nij tanuu man Pedró, quiꞌyaj uún soꞌ a. Ga̱a canuû chaꞌanj chá nij yuvii̱ israelitá rachrúún ne atúj levadura me quiꞌyaj Herodes da̱nj a.

⁴ Dan me se caxríj nij tanuu tagaꞌ man Pedró, ne̱ caꞌneꞌ Herodes suun rihaan xnu̱ꞌ ya̱a̱n (16) tanuu se vaa tu̱mé nij tanuu man Pedró, ne̱ caꞌa̱nj ya̱ xꞌneꞌ me nij tanuu yoꞌ a. ꞌO̱ se guun rá Herodes se vaa nda̱a cache̱n Chaꞌanj Pascuá, ga̱a ne̱ quiri̱i̱ soꞌ man Pedró ne̱ ti̱haa̱n soꞌ man Pedró rihaan nij yuvii̱ israelitá, rá soꞌ a.

⁵ Dan me se Pedró roꞌ, ꞌni̱j soꞌ tagaꞌ rej tumé nij tanuu man soꞌ, tza̱j ne̱ ꞌo̱ na̱nj cachíín niꞌya̱j ndoꞌo xꞌneꞌ nij síí noco̱ꞌ man Jesucristó rihaan Yaꞌanj cheꞌé soꞌ a.

⁶ Dan me se rej nii̱ me yoꞌ, ne̱ aꞌyuj me güii quiri̱i̱ Herodes man Pedró tagaꞌ rihaan nij yuvii̱ a. Dan me se otoj Pedró rá tagaꞌ, ne̱ na̱j soꞌ scaꞌnúj vi̱j tanuu, ne̱ vi̱j agaꞌ ne̱ꞌ numi̱i soꞌ a. Ne̱ nicu̱nꞌ yavíj tanuu tumé taꞌyaa tagaꞌ a.

⁷ Ne̱ ta̱j niꞌyo̱n curiha̱nj ꞌo̱ se‑mo̱zó Yaꞌanj rá veꞌ na̱j Pedró, ne̱ chuguu̱n ndoꞌo rá tagaꞌ yoꞌ a. Ga̱a ne̱ tinasquiꞌ se‑mo̱zó Yaꞌanj xꞌnúú Pedró, tinanuû soꞌ man Pedró, ne̱ cataj soꞌ a: ―ꞌO̱ na̱xaga̱a̱ so̱ꞌ cuaj, Pedro ―taj soꞌ rihaan Pedró a. Dan me se naxaga̱a̱ Pedró, ne̱ agaꞌ ne̱ꞌ numi̱i raꞌa soꞌ roꞌ, naxraꞌ yoꞌ, ne̱ quinij yoꞌ rihaan yoꞌóó a.

⁸ Ga̱a ne̱ cataj se‑mo̱zó Yaꞌanj rihaan Pedró a: ―Naquiꞌya̱j xraan so̱ꞌ catuún so̱ꞌ, ne̱ caxri̱i̱ so̱ꞌ canj tacóó so̱ꞌ á ―taj se‑mo̱zó Yaꞌanj rihaan soꞌ a. Ne̱ quiꞌyaj Pedró nda̱a vaa cataj se‑mo̱zó Yaꞌanj rihaan soꞌ a. Ga̱a ne̱ cataj uún se‑mo̱zó Yaꞌanj a: ―Ni̱quee so̱ꞌ roto̱ so̱ꞌ, ne̱ ca̱nocóꞌ so̱ꞌ manj á ―taj uún se‑mo̱zó Yaꞌanj rihaan soꞌ a.

⁹ Dan me se canocoꞌ Pedró man se‑mo̱zó Yaꞌanj, ne̱ curiha̱nj soꞌ tagaꞌ, tza̱j ne̱ ne queneꞌe̱n soꞌ sese ya̱ curiha̱nj soꞌ tagaꞌ quiꞌyaj se‑mo̱zó Yaꞌanj yoꞌ maꞌ. ꞌO̱ se ma̱an se quiꞌyaj maꞌa̱n rihaan soꞌ quiꞌyaj Yaꞌanj nu̱ꞌ se vaa quiꞌyaj se‑mo̱zó Yaꞌanj yoꞌ, rá soꞌ a.

¹⁰ Dan me se cachén ro̱j soꞌ vi̱j rej nicu̱nꞌ tanuu tumé taꞌyaa, ga̱a ne̱ cuchiꞌ ro̱j soꞌ taꞌyaa aga̱ꞌ tagaꞌ yoꞌ, ne̱ rej xco̱ taꞌyaa yoꞌ roꞌ, naj maꞌa̱n chumanꞌ a. Ga̱a ne̱ xꞌnúj maꞌa̱n taꞌyaa yoꞌ, ne̱ curiha̱nj ro̱j soꞌ, ne̱ cachén ro̱j soꞌ ꞌo̱ scúj callé, ga̱a ne̱ caꞌanj niꞌya̱ se‑mo̱zó Yaꞌanj yoꞌ rihaan Pedró a.

¹¹ Dan me se cachríj rá Pedró se vaa ya̱ curiha̱nj soꞌ tagaꞌ, ga̱a ne̱ cataj soꞌ a: ―Nda̱a ya̱j guun ya̱ ya̱ raj se vaa Yaꞌanj Si̱j ꞌNi̱j Raꞌa mán ꞌu̱nj roꞌ, ya̱ caꞌnéé soꞌ man se‑mo̱zó soꞌ, ne̱ tinanii soꞌ mán ꞌu̱nj rihaan síí cuꞌna̱j Herodes, ne̱ nihánj me se se̱ quiránꞌ ꞌu̱nj nda̱a vaa me rá nij yuvii̱ israelitá qui̱ránꞌ ꞌu̱nj a̱ maꞌ ―taj Pedró a.

¹² Dan me se quisíj guun ya̱ ya̱ rá soꞌ, ga̱a ne̱ caꞌanj soꞌ veꞌ tucuá chana̱ cuꞌna̱j Mariá nii Juan síí tucuꞌnáj nii Marcos a. Ne̱ veꞌ yoꞌ me rej a̱j nuu chre̱ꞌ queꞌe̱e̱ yuvii̱, ne̱ achíín niꞌya̱j nij soꞌ rihaan Yaꞌanj a.

¹³ Dan me se cuchiꞌ Pedró ticaꞌmii soꞌ taꞌyaa chingá nu̱u̱ rihaan veꞌ, ga̱a ne̱ caꞌnaꞌ ꞌo̱ mozó cha̱na̱ cuꞌna̱j Rode taꞌyaa xca̱j noꞌ cuentá me síí caꞌnaꞌ a.

¹⁴ Ga̱a ne̱ cunuu ya̱a̱n Rode snana̱ Pedró a. Tza̱j ne̱ cheꞌé se guun niha̱ꞌ ndoꞌo rá noꞌ, ga̱a ne̱ cheꞌé dan ne caꞌnu̱u̱ noꞌ taꞌyaa maꞌ. Ma̱an se cunánj noꞌ catúj noꞌ rá veꞌ, ne̱ nataꞌ noꞌ rihaan ꞌó nij yuvii̱ se vaa nicu̱nꞌ Pedró taꞌyaa a.

¹⁵ Tza̱j ne̱ nij síí ma̱n rá veꞌ taj rihaan noꞌ a: ―Snúú so̱ꞌ á ―taj taꞌa̱j nij soꞌ rihaan noꞌ a. Tza̱j ne̱ taj se quiꞌyáꞌ caꞌne̱ꞌ rá noꞌ a. ꞌO̱ se ꞌo̱ cataj noꞌ se vaa ya̱ nicu̱nꞌ Pedró taꞌyaa a. Ga̱a ne̱ cataj ꞌó nij soꞌ rihaan noꞌ a: ―Na̱nj se‑mo̱zó Yaꞌanj tumé man Pedró me síí nicu̱nꞌ rihaan taꞌyaa na̱nj á ―taj ꞌó nij soꞌ rihaan noꞌ a.

¹⁶ Ne̱ Pedró roꞌ, ꞌo̱ nicunꞌ soꞌ xeꞌ ticaꞌmii soꞌ taꞌyaa a. Ga̱a ne̱ caꞌnaꞌ nij soꞌ, ne̱ caꞌnúj nij soꞌ, ne̱ queneꞌen nij soꞌ man Pedró, ga̱a ne̱ caꞌanj ndoꞌo rá nij soꞌ niꞌya̱j nij soꞌ man Pedró a.

¹⁷ Ga̱a ne̱ tucunó raꞌa Pedró cheꞌé rej cunu̱u dínj tuꞌva nij soꞌ a. Ga̱a ne̱ cataj xnaꞌanj soꞌ rihaan nij soꞌ nu̱ꞌ se vaa quiꞌyaj Yaꞌanj Si̱j ꞌNi̱j Raꞌa man níꞌ ga̱a tinanii soꞌ man Pedró tagaꞌ a. Ga̱a ne̱ cataj soꞌ a: ―Cata̱j xnaꞌanj nij soj rihaan tinúꞌ Jacobo ga̱ ꞌó nij tinúú níꞌ da̱j quiranj á ―taj soꞌ a. Ga̱a ne̱ cavii soꞌ caꞌanj soꞌ ꞌó rej yaníj a.

¹⁸ Dan me se ga̱a quisíj güii, ne̱ quinanó ndoꞌo rá nij tanuu nicu̱nꞌ tagaꞌ, cheꞌé se ne queneꞌe̱n uxrá nij soꞌ me rej va̱j Pedró a̱ maꞌ.

¹⁹ Ga̱a ne̱ caꞌneꞌ Herodes suun rihaan tanuu nano̱ꞌ tanuu man Pedró, tza̱j ne̱ ne caꞌve̱e nari̱ꞌ nij tanuu man Pedró maꞌ. Cheꞌé dan xnáꞌanj Herodes man nij tanuu tumé man Pedró me rej caꞌanj Pedró, tza̱j ne̱ ne queneꞌe̱n nij soꞌ a̱ maꞌ. Cheꞌé dan caꞌneꞌ Herodes suun se vaa ticavi̱ꞌ nii man nij tanuu tumé man Pedró, ga̱a ne̱ curiha̱nj Herodes estadó Judea, nanij soꞌ chumanꞌ Cesarea, ca̱yáán soꞌ a.

Caviꞌ Herodes, quiꞌyaj xlúú chá nee̱ man soꞌ a

²⁰ Dan me se caꞌmaan rá síí cuꞌna̱j Herodes niꞌya̱j soꞌ man nij síí ma̱n chumanꞌ Tiro do̱ꞌ, chumanꞌ Sidón do̱ꞌ a. Cheꞌé dan ꞌo̱ cuniha̱a̱n caꞌanj síí ma̱n ro̱j chumanꞌ yoꞌ nda̱a rej ya̱nj Herodes a. Ne̱ caꞌmii nij soꞌ ga̱ síí cuꞌna̱j Blasto síí tumé nu̱ꞌ veꞌ tucuá Herodes, ne̱ dan me se caꞌvej rá Blasto ra̱cuíj soꞌ man nij soꞌ cunu̱u rcuaꞌa̱a̱n nij soꞌ ga̱ Herodes, cheꞌé se caxríj yuve̱ nij soꞌ do̱j saꞌanj ston Blasto a. ꞌO̱ se nucua̱j rá nij soꞌ man Herodes se vaa cuchi̱ꞌ se chá avii rej uun chij soꞌ nda̱a chiháán nij soꞌ cha̱ nij soꞌ a.

²¹ Ne̱ güii cachrón Blasto caꞌmi̱i̱ nij soꞌ ga̱ Herodes me se nanuû Herodes yatzíj nu̱u̱ síí nica̱j suun rey, ne̱ caꞌanj quita̱j soꞌ chruun xlá sa̱ꞌ, ne̱ caꞌmii natáj ndoꞌo soꞌ rihaan nij síí ma̱n Tiro do̱ꞌ, ma̱n Sidón do̱ꞌ a.

²² Ga̱a ne̱ caguáj cunuda̱nj nij soꞌ, cataj nij soꞌ a: ―Né sna̱na̱ yuvii̱ me nana̱ avii raa̱ síí nihánj a̱ maꞌ. ꞌO̱ se snana̱ ꞌo̱ yaꞌanj avii tuꞌva soꞌ na̱nj á ―taj nij yuvii̱, niꞌya̱j nij yuvii̱ man Herodes a.

²³ Ga̱a ne̱ cuaj caxríj ꞌo̱ se‑mo̱zó Yaꞌanj chiꞌii̱ man Herodes, cheꞌé se ne cata̱j soꞌ se vaa o̱rúnꞌ Yaꞌanj me síí ꞌyaj avii raa̱ soꞌ a. Ma̱an se caꞌvej rá soꞌ cata̱j nij yuvii̱ se vaa yaꞌanj me maꞌa̱n soꞌ a. Dan me se cunu̱ꞌ nee̱ man soꞌ chá xlúú, ne̱ caviꞌ soꞌ, quiꞌyaj xlúú a.

²⁴ Tza̱j ne̱ cuaj chaꞌnuu̱ ndoꞌo snana̱ Yaꞌanj, ne̱ guun ri̱i̱ ndoꞌo doj nij yuvii̱ canocoꞌ nana̱ yoꞌ a.

²⁵ Ne̱ Bernabé ga̱ Saulo me se quisíj suun caxríj ro̱j soꞌ saꞌanj ston nij síí uun chij rihaan nij síí noco̱ꞌ man Jesucristó ya̱nj chumanꞌ Jerusalén, ne̱ canica̱j ro̱j soꞌ, quinanꞌ ro̱j soꞌ chumanꞌ Antioquía, ne̱ caꞌanj síí cuꞌna̱j Juan ga̱ ro̱j soꞌ, quiꞌyaj ro̱j soꞌ a. Ne̱ ꞌó se‑chuvi̱i Juan me Marcos a.