Hebreos 9 - Triqui de San Juan Copala

Cunuu sa̱ꞌ nimán níꞌ rihaan Yaꞌanj, quiꞌyaj ton man Cristó a

¹ Dan me se ga̱a caꞌmii Yaꞌanj rihaan Moisés asino ya̱a̱n, ne̱ caꞌneꞌ Yaꞌanj suun da̱j quiꞌya̱j nij yuvii̱ israelitá ga̱a aráj gue̱e̱ nij soꞌ rihaan Yaꞌanj, ne̱ caꞌneꞌ Yaꞌanj suun da̱j ga̱a̱ nuvií gue̱e̱ cune̱ꞌ nij yuvii̱ israelitá rihaan chumii̱ nihánj a.

² Dan me se cuneꞌ nij yuvii̱ israelitá nuvií mantá, ne̱ vaa vi̱j cuartó rque nuvií yoꞌ a. Ne̱ rque cuartó atúj xrej asino ya̱a̱n roꞌ, nuû agaꞌ ta̱j agaꞌ yaꞌan do̱ꞌ, chruun mesá cutaꞌ nii rachrúún rihaan Yaꞌanj do̱ꞌ, ne̱ cuartó cuꞌna̱j Rej Gue̱e̱ me cuartó yoꞌ a.

³ Ne̱ vaa ꞌo̱ yatzíj mantá cortiná canocoꞌ rej xco̱ cuartó gue̱e̱ yoꞌ, ne̱ rej xco̱ cortiná yoꞌ ne ꞌó cuartó cuꞌna̱j Rej Gue̱e̱ Doj a.

⁴ Ne̱ rá cuartó gue̱e̱ doj yoꞌ nicunꞌ mesá altar agaꞌ oró míí, ne̱ agaꞌ acaa squíí xlá rihaan Yaꞌanj me agaꞌ oró míí tuꞌve̱e̱ ndoꞌo yoꞌ a. Ne̱ vaa se‑chru̱nj Yaꞌanj chrúún gue̱e̱ quiꞌyaj Moisés, chrúún tihaa̱n se vaa ya̱ guun Yaꞌanj Taꞌanj nij yuvii̱ israelitá a. Ne̱ nu̱ꞌ xráá chrúún yoꞌ nó agaꞌ oró míí a. Ne̱ rque chrúún yoꞌ roꞌ, nuû xruj oró, ne̱ rque xruj oró cunuû se chá cuꞌna̱j maná a. Ne̱ xꞌnúú xruj oró yoꞌ roꞌ, naj xrúún síí cuꞌna̱j Aarón chruun vará, ne̱ chruun xraꞌ maꞌa̱n coj rihaan me yoꞌ, ne̱ xꞌnúú chruun vará yoꞌ roꞌ, naj yahij no̱ chi̱ꞌ suun noco̱o caꞌneꞌ Yaꞌanj quiꞌya̱j nij síí israelitá a.

⁵ Ne̱ xráá chrúún gue̱e̱ yoꞌ roꞌ, táá vi̱j agaꞌ, ne̱ ase vaa se‑mo̱zó Yaꞌanj cuꞌna̱j querubines roꞌ, da̱nj vaa curuviꞌ ro̱j agaꞌ yoꞌ a. Dan me se caráán xcóó ro̱j yoꞌ xráá chrúún gue̱e̱ yoꞌ, rej niꞌndaj ya̱ sa̱ꞌ chuguu̱n Yaꞌanj, rej tinavij Yaꞌanj cacunꞌ tumé yuvii̱ a. Tza̱j ne̱ se̱ nataj doj cheꞌé rasu̱u̱n yoꞌ cuano̱ a̱ maꞌ.

⁶ Dan me se nu̱ꞌ nij rasu̱u̱n yoꞌ mán rque nuvií mantá a. Ne̱ da̱j a̱ güii atúj nij xrej rá cuartó gue̱e̱, ꞌyaj suun nij xrej rihaan Yaꞌanj cheꞌé nij yuvii̱ a.

⁷ Tza̱j ne̱ rque ꞌó cuartó gue̱e̱ doj roꞌ, o̱rúnꞌ güii rque ꞌo̱ yoꞌ atúj xrej ata̱ suun noco̱o doj rá cuartó yoꞌ na̱nj ado̱nj. Ne̱ dan me se rej gue̱e̱ doj yoꞌ me se ina̱nj ton nica̱j xrej atúj xrej rej yoꞌ ado̱nj. Ne̱ ton yoꞌ me se yoꞌ me ton cheꞌé cacunꞌ tumé maꞌa̱n xrej do̱ꞌ, cheꞌé cacunꞌ quiꞌyaj nij yuvii̱ ga̱a ne xca̱j nij yuvii̱ cuentá se vaa cacunꞌ me se vaa quiꞌyaj nij soꞌ do̱ꞌ ado̱nj.

⁸ Cheꞌé tucuáán nihánj, tihaa̱n Nimán Yaꞌanj se vaa, ga̱a veé dan yáán nuvií mantá, ataa cano̱ xcúún yuvii̱ catu̱u̱ yuvii̱ Rej Gue̱e̱ Ya̱ Doj a.

⁹ Ne̱ ase vaa rej gue̱e̱ roꞌ, vaa ya̱j ado̱nj. Dan me se se̱ cunuu sa̱ꞌ ina̱nj yuvii̱ rihaan Yaꞌanj quiꞌya̱j rej gue̱e̱ yoꞌ maꞌ. Ne̱ ya̱j me se rqué yuvii̱ rasu̱u̱n do̱ꞌ, xcuu caca̱a̱ do̱ꞌ, rihaan Yaꞌanj, tza̱j ne̱ taj se quiꞌyáꞌ cunuu sa̱ꞌ ina̱nj nimán yuvii̱ rihaan Yaꞌanj quiꞌyaj rasu̱u̱n yoꞌ a̱ maꞌ.

¹⁰ Ma̱an se ase vaa tucuáán noco̱ꞌ yuvii̱ cheꞌé se chá yuvii̱ do̱ꞌ, cheꞌé se ꞌo yuvii̱ do̱ꞌ, cheꞌé da̱j ꞌyaj yuvii̱ naꞌyaꞌ yuvii̱ do̱ꞌ, vaa tucuáán cheꞌé rasu̱u̱n rque̱ yuvii̱ rihaan Yaꞌanj na̱nj á. Dan me se tucuáán noco̱ꞌ yuvii̱ ma̱n ya̱j me tucuáán yoꞌ, ne̱ taj xnaꞌanj nana̱ yoꞌ rihaan yuvii̱ da̱j quiꞌya̱j yuvii̱ ne̱ cunu̱u sa̱ꞌ nee̱ man yuvii̱ rihaan Yaꞌanj ado̱nj. Tza̱j ne̱ asa̱ꞌ quisíj nariꞌ yuvii̱ tucuáán naca̱ cuchruj Yaꞌanj, ga̱a ne̱ ino̱ uxrá quiꞌya̱j nij yuvii̱ canoco̱ꞌ nij yuvii̱ Yaꞌanj ado̱nj.

¹¹ Dan me se guun Cristó xrej ata̱ suun noco̱o doj, ne̱ cavii sa̱ꞌ uxrá níꞌ, quiꞌyaj soꞌ, ne̱ ꞌyaj soꞌ se-su̱u̱n soꞌ ꞌó rej gue̱e̱, tza̱j ne̱ né nu̱vií cuneꞌ yuvii̱ rihaan chumii̱ nihánj me ꞌó rej gue̱e̱ yoꞌ maꞌ.

¹² Ne̱ o̱rúnꞌ yu̱u̱n catúj soꞌ rá Rej Gue̱e̱ Doj yoꞌ, ne̱ yu̱u̱n cheꞌe̱ navij cacunꞌ tumé níꞌ nu̱ꞌ cavii nu̱ꞌ caꞌanj, quiꞌyaj soꞌ na̱nj ado̱nj. Tza̱j ne̱ né na̱nj ton man tana do̱ꞌ, ton man scúj leꞌe̱j do̱ꞌ, me nica̱j soꞌ maꞌ. Tana̱nj ton man maꞌa̱n ya̱ soꞌ nica̱j soꞌ ga̱a catúj soꞌ rihaan Yaꞌanj, ne̱ quiꞌyaj canaán ya̱ soꞌ na̱nj ado̱nj.

¹³ Dan me se sese ton man tana do̱ꞌ, ton man scúj toró do̱ꞌ, yaj man nij scúj vacá cacaa do̱ꞌ, tama̱nꞌ xrej man nij yuvii̱, ne̱ cunu̱u sa̱ꞌ nee̱ man nij yuvii̱ yoꞌ rihaan Yaꞌanj,

¹⁴ ga̱a ne̱ táá a̱ ton man Cristó, ne̱ sa̱ꞌ doj vaa yoꞌ rihaan nu̱ꞌ nij rasu̱u̱n yoꞌ na̱nj chugua̱nj. Dan me se taj a̱ doj cacunꞌ tumé Cristó maꞌ. ꞌO̱ se nicu̱nꞌ Nimán Yaꞌanj nu̱ꞌ cachén nu̱ꞌ caꞌnaꞌ ne̱ nu̱ꞌ cavii nu̱ꞌ caꞌanj, ne̱ cayáán soꞌ ga̱ Cristó, ne̱ cheꞌé dan rqué Cristó man maꞌa̱n soꞌ rihaan Yaꞌanj chugua̱nj. Cheꞌé dan me doj a̱ cunu̱u sa̱ꞌ nimán níꞌ, quiꞌya̱j ton man Cristó, ne̱ navi̱j cacunꞌ tumé níꞌ cheꞌé se chiꞌi̱i̱ quiꞌyaj níꞌ asi̱j rque̱ doj a. ꞌO̱ se daj chiha̱a̱ míj se̱ cavii sa̱ꞌ níꞌ, quiꞌya̱j se ꞌyaj maꞌa̱n níꞌ maꞌ. Tza̱j ne̱ ya̱j roꞌ, quiꞌya̱j níꞌ nu̱ꞌ rasu̱u̱n rej rihaan níꞌ, ne̱ canoco̱ꞌ ina̱nj níꞌ man Yaꞌanj si̱j vaa iꞌna̱ꞌ ya̱j na̱nj á.

¹⁵ Dan me se Cristó me se caviꞌ soꞌ cheꞌé se queneꞌen soꞌ se vaa ne gu̱un nucua̱j yuvii̱ canoco̱ꞌ nij yuvii̱ nu̱ꞌ tucuáán cuchruj Yaꞌanj asino ya̱a̱n rihaan síí cuꞌna̱j Moisés maꞌ. Cheꞌé dan Cristó me síí narqué tucuáán naca̱ cheꞌé níꞌ da̱j quiꞌya̱j níꞌ cavi̱i̱ sa̱ꞌ níꞌ rihaan Yaꞌanj a. Cheꞌé dan níꞌ si̱j canacúún Yaꞌanj man roꞌ, naca̱j níꞌ nu̱ꞌ se sa̱ꞌ cataꞌ tuꞌva Yaꞌanj se vaa rque̱ soꞌ rihaan níꞌ nu̱ꞌ cavii nu̱ꞌ caꞌanj ado̱nj.

¹⁶ Dan me se sese vaa yanj actá taj se vaa rasu̱u̱n siꞌyaj ꞌo̱ soꞌ gu̱un siꞌya̱j ꞌó yuvii̱ asa̱ꞌ caviꞌ soꞌ, ne̱ asino ya̱a̱n cavi̱ꞌ soꞌ, ga̱a ne̱ caꞌve̱e gu̱un rasu̱u̱n yoꞌ siꞌyaj ꞌó yuvii̱ yoꞌ ado̱nj.

¹⁷ ꞌO̱ se asa̱ꞌ quisíj caviꞌ ꞌo̱ soꞌ, ga̱a ne̱ quisi̱j ya̱ nu̱ꞌ snana̱ soꞌ cheꞌé siꞌyaj soꞌ ado̱nj. Tza̱j ne̱ se̱ guun ta̱ꞌaa yuvii̱ siꞌyaj ꞌo̱ soꞌ sese ataa cavi̱ꞌ soꞌ maꞌ.

¹⁸ Cheꞌé dan ga̱a cuchruj Yaꞌanj nana̱ uun ya̱ caꞌmii soꞌ ga̱ nij yuvii̱ israelitá nana̱ quiꞌyaj soꞌ asino ya̱a̱n, ne̱ vaa xcuu caviꞌ, ne̱ cheꞌé ton cayanj man xcuu yoꞌ roꞌ, guun ya̱ nana̱ ado̱nj.

¹⁹ Dan me se quisíj cataj xnaꞌanj síí cuꞌna̱j Moisés rihaan nij yuvii̱ ꞌo̱ ꞌo̱ nij suun caꞌneꞌ Yaꞌanj rihaan nij yuvii̱ suun no̱ rihaan tucuáán cuchruj Yaꞌanj a. Ga̱a ne̱ nica̱j soꞌ ton man scúj leꞌe̱j nica̱j soꞌ ton man tana nica̱j soꞌ na nica̱j soꞌ cachij matzinj cachij mare̱e nica̱j soꞌ coj cuꞌna̱j hisopo nica̱j soꞌ, ga̱a ne̱ tamanꞌ soꞌ ton yoꞌ rihaan yanj no̱ stucua̱nj Yaꞌanj do̱ꞌ, rihaan ta̱ranꞌ nij yuvii̱ do̱ꞌ ado̱nj.

²⁰ Ne̱ cataj xnaꞌanj soꞌ rihaan nij yuvii̱ a: “Cheꞌé ton nihánj quisi̱j ya̱ nu̱ꞌ nij nana̱ cataj xnaꞌanj Yaꞌanj rihaan níꞌ da̱j quiꞌya̱j níꞌ cavi̱i̱ sa̱ꞌ níꞌ rihaan Yaꞌanj ado̱nj”, taj Moisés rihaan nij yuvii̱ a.

²¹ Ga̱a ne̱ tamanꞌ uún soꞌ ton yoꞌ rihaan nuvií mantá do̱ꞌ, rihaan nu̱ꞌ nij rasu̱u̱n rásuun nij xrej ga̱a ꞌyaj nij xrej se‑su̱u̱n Yaꞌanj do̱ꞌ a.

²² Dan me se ina̱nj ton me se vaa achiin cheꞌé rej nahu̱un sa̱ꞌ queꞌe̱e̱ uxrá rasu̱u̱n rihaan Yaꞌanj, taj stucua̱nj Moisés a. Ne̱ sese nuviꞌ ton, ne̱ se̱ tinavij Yaꞌanj cacunꞌ tumé yuvii̱ maꞌ.

²³ Dan me se xa̱ꞌ nij rasu̱u̱n tamanꞌ Moisés ton rihaan, tza̱j ne̱ ase vaa nij rasu̱u̱n ma̱n rej xta̱ꞌ rej nicu̱nꞌ Yaꞌanj vaa nij rasu̱u̱n yoꞌ, ne̱ achiin ton cheꞌé rej cunu̱u sa̱ꞌ nij rasu̱u̱n yoꞌ rihaan Yaꞌanj, ne̱ cheꞌé dan aviꞌ xcuu, ꞌyaj Moisés chugua̱nj. Tza̱j ne̱ sa̱ꞌ uxrá doj vaa maꞌa̱n nij rasu̱u̱n ma̱n rej xta̱ꞌ rihaan nij rasu̱u̱n ma̱n rihaan chumii̱ nihánj, ne̱ cheꞌé dan achiin se sa̱ꞌ doj rihaan ton man xcuu yan cunu̱u sa̱ꞌ nij rasu̱u̱n ma̱n rej xta̱ꞌ ado̱nj.

²⁴ ꞌO̱ se né nu̱vií cuneꞌ maꞌa̱n yuvii̱ me rej catúj Cristó maꞌ. ꞌO̱ se nuvií mantá yoꞌ roꞌ, ase vaa rej nicu̱nꞌ maꞌa̱n Yaꞌanj rej xta̱ꞌ vaa yoꞌ, tza̱j ne̱ né ya̱ ya̱ rej nicu̱nꞌ Yaꞌanj me yoꞌ maꞌ. Tza̱j ne̱ ya̱j me se catúj maꞌa̱n Cristó rej xta̱ꞌ yoꞌ, ne̱ cuano̱ nicunꞌ soꞌ rihaan maꞌa̱n Yaꞌanj, ne̱ achíín niꞌya̱j soꞌ rihaan Yaꞌanj cheꞌé níꞌ ado̱nj.

²⁵ Tza̱j ne̱ se̱ quiꞌyaj soꞌ nda̱a vaa ꞌyaj nij xrej ata̱ suun noco̱o doj ma̱n rihaan chumii̱ nihánj maꞌ. Nij xrej me se nica̱j nij xrej ton man xcuu atúj nij xrej rá Rej Gue̱e̱ Doj yoꞌ da̱j a̱ yoꞌ ado̱nj. Tza̱j ne̱ ne cachi̱in niga̱nj rque̱ Cristó ton man maꞌa̱n soꞌ rihaan Yaꞌanj maan ado̱nj.

²⁶ ꞌO̱ se sese vaa cheꞌé quiꞌya̱j soꞌ da̱nj, ne̱ no̱ xcúún soꞌ queꞌe̱e̱ ndoꞌo quira̱nꞌ soꞌ sayuun asi̱j ga̱a quiꞌyaj Yaꞌanj chumii̱ nihánj nda̱a cuano̱ ado̱nj. Tza̱j ne̱ ya̱j roꞌ, nichrunꞌ navi̱j chumii̱ nihánj, ne̱ nda̱a ya̱j caꞌnaꞌ Cristó rihaan chumii̱ nihánj, ne̱ o̱rúnꞌ yu̱u̱n caviꞌ soꞌ cheꞌé níꞌ, ne̱ navij nu̱ꞌ cacunꞌ tumé níꞌ na̱nj ado̱nj.

²⁷ Dan me se neꞌen níꞌ da̱j quira̱nꞌ ꞌo̱ ꞌo̱ níꞌ si̱j ma̱n rihaan chumii̱ nihánj, ne̱ dan me se neꞌen níꞌ se vaa o̱rúnꞌ yu̱u̱n cavi̱ꞌ ꞌo̱ ꞌo̱ níꞌ, ga̱a ne̱ canicu̱nꞌ níꞌ rihaan Yaꞌanj, ne̱ caꞌne̱ꞌ soꞌ cacunꞌ cheꞌé níꞌ na̱nj ado̱nj.

²⁸ Ne̱ dan me se cheꞌé se o̱rúnꞌ yu̱u̱n caviꞌ Cristó, ne̱ tinavij soꞌ cacunꞌ tumé queꞌe̱e̱ uxrá yuvii̱ roꞌ, vaa güii caꞌna̱ꞌ uún soꞌ rihaan chumii̱ nihánj ado̱nj. Tza̱j ne̱ né cheꞌe̱ rej cavi̱ꞌ uún soꞌ cheꞌé cacunꞌ tumé yuvii̱ me caꞌna̱ꞌ soꞌ maꞌ. ꞌO̱ se caꞌna̱ꞌ soꞌ, ne̱ níꞌ si̱j naꞌvi̱j ndoꞌo man soꞌ roꞌ, nani̱i̱ níꞌ ne̱ cavi̱i̱ sa̱ꞌ níꞌ rihaan Yaꞌanj, quiꞌya̱j soꞌ ado̱nj.