Hebreos 7 - Triqui de San Juan Copala

Ase vaa xrej cuꞌna̱j Melquisedec vaa Cristó, ne̱ xrej sa̱ꞌ uxrá me Cristó cheꞌé níꞌ a

¹ Dan me se xa̱ꞌ xrej cuꞌna̱j Melquisedec, síí cayáán ga̱a naá, tza̱j ne̱ síí nica̱j suun rey uun chij rihaan chumanꞌ cuꞌna̱j Salem me soꞌ, ne̱ xrej me uún soꞌ rihaan Yaꞌanj Si̱j Uun Chij Doj ado̱nj. Ga̱a nanica̱j síí cuꞌna̱j Abraham ꞌnaꞌ nique soꞌ ga̱a quisíj quiꞌyaj canaán soꞌ man nij síí nica̱j suun rey síí cunuꞌ ga̱ soꞌ, ne̱ dan me se caꞌanj cara̱nꞌ síí cuꞌna̱j Melquisedec man soꞌ chrej ꞌnaꞌ nique soꞌ, ne̱ veꞌé cataj Melquisedec se vaa me rá soꞌ quiꞌya̱j Yaꞌanj se lu̱j ga̱ síí cuꞌna̱j Abraham yoꞌ a.

² Ga̱a ne̱ xa̱ꞌ nij rasu̱u̱n quiꞌyaj canaán Abraham roꞌ, rqué soꞌ ꞌo̱ rasu̱u̱n rihaan da̱j a̱ chi̱ꞌ rasu̱u̱n rihaan Melquisedec, ne̱ diezmo cuꞌna̱j yoꞌ a. Ne̱ se‑chuvi̱i Melquisedec me raj cata̱a rey ꞌyaj ina̱nj se sa̱ꞌ, ne̱ rey chumanꞌ Salem me uún soꞌ, ne̱ yoꞌ me raj cata̱a rey ꞌyaj mán dínj yuvii̱ a.

³ Ne̱ xa̱ꞌ soꞌ, tza̱j ne̱ taj va̱j a̱ ꞌó nana̱ aꞌmii cheꞌé rej soꞌ do̱ꞌ, nii soꞌ do̱ꞌ, xi̱i soꞌ do̱ꞌ maꞌ. Ne̱ taj va̱j a̱ ꞌó nana̱ aꞌmii me güii caꞌngaa soꞌ do̱ꞌ, me güii caviꞌ soꞌ do̱ꞌ a̱ maꞌ. Dan me se ase vaa maꞌa̱n Taꞌníí Yaꞌanj vaa soꞌ, ne̱ xrej me soꞌ nu̱ꞌ cavii nu̱ꞌ caꞌanj na̱nj ado̱nj.

⁴ Dan me se xa̱ꞌ síí cuꞌna̱j Abraham, tza̱j ne̱ xi̱i ta̱ranꞌ níꞌ si̱j israelitá me soꞌ, ne̱ rqué soꞌ diezmo rihaan síí cuꞌna̱j Melquisedec cheꞌé nij rasu̱u̱n quiꞌyaj canaán maꞌa̱n soꞌ ado̱nj. Cheꞌé dan me xca̱j soj cuentá da̱j si̱j me Melquisedec yoꞌ, se vaa si̱j noco̱o uxrá me soꞌ na̱nj ado̱nj.

⁵ Dan me se xa̱ꞌ nij taꞌníí taꞌnij siꞌno̱ síí cuꞌna̱j Leví, tza̱j ne̱ cuneꞌ Yaꞌanj man nij soꞌ gu̱un nij soꞌ xrej cheꞌé nij yuvii̱ israelitá ado̱nj. Ne̱ aꞌnéj nij soꞌ diezmo man nij síí israelitá, nda̱a vaa taj suun caꞌneꞌ Yaꞌanj no̱ rihaan stucua̱nj Moisés yoꞌ ado̱nj. Ne̱ ase vaa tinúú nij yuvii̱ israelitá vaa nij soꞌ, nda̱ꞌ se taꞌníí taꞌnij siꞌno̱ síí cuꞌna̱j Abraham me nij soꞌ ga̱ ꞌó nij yuvii̱ israelitá ado̱nj.

⁶ Tza̱j ne̱ né tuvi̱ꞌ nij soꞌ me síí cuꞌna̱j Melquisedec maꞌ. Tza̱j ne̱ soꞌ me síí caꞌnéj diezmo man Abraham chugua̱nj. Ne̱ nda̱ꞌ se si̱j cataꞌ tuꞌva Yaꞌanj se vaa cavi̱i̱ sa̱ꞌ me Abraham, tza̱j ne̱ cuno soꞌ snana̱ síí cuꞌna̱j Melquisedec se vaa quiꞌya̱j Yaꞌanj se lu̱j ga̱ soꞌ ado̱nj.

⁷ Dan me se neꞌen ta̱ranꞌ níꞌ se vaa síí aꞌmii nana̱ sa̱ꞌ se vaa quiꞌya̱j Yaꞌanj se lu̱j ga̱ tuviꞌ roꞌ, soꞌ me síí ata̱ suun noco̱o doj rihaan tuviꞌ soꞌ síí uno nana̱ sa̱ꞌ yoꞌ ado̱nj.

⁸ Ne̱ xa̱ꞌ nij taꞌníí taꞌnij siꞌno̱ síí cuꞌna̱j Leví, tza̱j ne̱ aꞌnéj nij soꞌ diezmo man yuvii̱, tza̱j ne̱ na̱nj yuvii̱ me nij soꞌ, ne̱ vaa güii cavi̱ꞌ nij soꞌ na̱nj á. Ne̱ xa̱ꞌ síí cuꞌna̱j Melquisedec, tza̱j ne̱ Danj Yaꞌanj taj se vaa ꞌo̱ vaa iꞌna̱ꞌ soꞌ na̱nj ado̱nj.

⁹ Ne̱ nda̱ꞌ se aꞌnéj nij taꞌníí taꞌnij siꞌno̱ Leví diezmo man yuvii̱, tza̱j ne̱ vaa cheꞌé cata̱j níꞌ se vaa ga̱a rqué Abraham diezmo rihaan síí cuꞌna̱j Melquisedec, ga̱a ne̱ rqué maꞌa̱n nij tuvi̱ꞌ Leví diezmo uún rihaan Melquisedec ado̱nj.

¹⁰ ꞌO̱ se maꞌa̱n Abraham roꞌ, a̱j me soꞌ caân cavi̱i̱ nij taꞌníí taꞌnij siꞌno̱ Leví ga̱a nariꞌ tuviꞌ soꞌ ga̱ síí cuꞌna̱j Melquisedec ado̱nj.

¹¹ Dan me se nij síí noco̱ꞌ xnaꞌanj tuvi̱ꞌ ga̱ Aarón me nij xrej, ne̱ taꞌa̱j nij taꞌníí taꞌnij siꞌno̱ Leví me nij soꞌ, ne̱ tucuꞌyón nij soꞌ stucua̱nj Moisés rihaan nij yuvii̱ israelitá, tza̱j ne̱ ne quisi̱j cunu̱u sa̱ꞌ ina̱nj nij yuvii̱ israelitá, quiꞌyaj nij soꞌ maꞌ. ꞌO̱ se Danj Yaꞌanj taj se vaa ase vaa síí cuꞌna̱j Melquisedec roꞌ, da̱nj ga̱a̱ ꞌó xrej cune̱ꞌ Yaꞌanj, tza̱j ne̱ né si̱j noco̱ꞌ xnaꞌanj tuviꞌ ga̱ Aarón me xrej naca̱ yoꞌ maꞌ.

¹² Ne̱ cheꞌé se nuu ino̱ doj xrej, cheꞌé dan nuu ino̱ tucuáán tu̱cuꞌyón xrej yoꞌ rihaan nij yuvii̱ canoco̱ꞌ nij yuvii̱ ado̱nj.

¹³ Ne̱ Danj Yaꞌanj taj se vaa xrej naca̱ yoꞌ roꞌ, me tuviꞌ ꞌó xꞌneꞌ nij yuvii̱ israelitá, ne̱ taj tuviꞌ nij soꞌ guun xrej rihaan Yaꞌanj ga̱a rque̱ maꞌ.

¹⁴ ꞌO̱ se neꞌen níꞌ se vaa Síí ꞌNi̱j Raꞌa man níꞌ roꞌ, soꞌ me síí noco̱ꞌ xꞌneꞌ síí cuꞌna̱j Judá, síí cayáán ga̱a naá, ne̱ a̱ doj ne cata̱j Moisés se vaa gu̱un taꞌníí taꞌnij siꞌno̱ síí cuꞌna̱j Judá yoꞌ ꞌo̱ xrej canicu̱nꞌ rihaan Yaꞌanj ga̱a rque̱ maꞌ.

¹⁵ Ne̱ doj a̱ neꞌen níꞌ nihánj cheꞌé se caꞌnaꞌ ꞌó xrej naca̱ ase vaa síí cuꞌna̱j Melquisedec ado̱nj.

¹⁶ Ne̱ ꞌó xrej naca̱ yoꞌ, tza̱j ne̱ ne gu̱un soꞌ xrej nda̱a vaa taj stucua̱nj Moisés se vaa ina̱nj taꞌníí taꞌnij siꞌno̱ síí cuꞌna̱j Leví gu̱un xrej maꞌ. Tana̱nj a̱ guun soꞌ xrej cheꞌé se gu̱un nucua̱j soꞌ ga̱a̱ iꞌna̱ꞌ soꞌ nu̱ꞌ cavii nu̱ꞌ caꞌanj, ne̱ daj chiha̱a̱ míj se̱ navij soꞌ maan ado̱nj.

¹⁷ ꞌO̱ se taj Danj Yaꞌanj cheꞌé xrej naca̱ yoꞌ a: Xrej mé so̱ꞌ nu̱ꞌ cavii nu̱ꞌ caꞌanj a. Dan me se ase vaa xrej cuꞌna̱j Melquisedec xrej cayáán ga̱a naá roꞌ, da̱nj vaa ma̱ꞌán so̱ꞌ á, taj Danj Yaꞌanj a.

¹⁸ ꞌO̱ se ne gu̱un nucua̱j tucuáán nga̱ yoꞌ ra̱cuíj yoꞌ man yuvii̱ a̱ maan chugua̱nj. Cheꞌé dan navij tucuáán nga̱ yoꞌ, quiꞌyaj Yaꞌanj na̱nj ado̱nj.

¹⁹ ꞌO̱ se taj va̱j a̱ doj rasu̱u̱n cunuu sa̱ꞌ quiꞌyaj stucua̱nj Moisés maꞌ. Dan me se navij tucuáán nga̱, ne̱ ꞌó tucuáán sa̱ꞌ naca̱ nocoꞌ níꞌ cuano̱, ne̱ uun ya̱ rá níꞌ se vaa cavi̱i̱ sa̱ꞌ níꞌ, quiꞌya̱j tucuáán naca̱ yoꞌ ado̱nj. ꞌO̱ se cheꞌé tucuáán naca̱ yoꞌ caꞌve̱e cuchi̱ꞌ maꞌa̱n níꞌ rihaan Yaꞌanj ado̱nj.

^20-21 Ne̱ xa̱ꞌ nij taꞌníí taꞌnij siꞌno̱ síí cuꞌna̱j Leví, tza̱j ne̱ taj raa̱ a̱ ꞌó rasu̱u̱n cutaꞌ Yaꞌanj ga̱a cuneꞌ Yaꞌanj man nij soꞌ a̱ maꞌ. Tza̱j ne̱ xa̱ꞌ Jesús me se vaa se cutaꞌ Yaꞌanj raa̱ ga̱a cuneꞌ Yaꞌanj man soꞌ ado̱nj. Dan me se Danj Yaꞌanj taj a: Cutaꞌ Síí ꞌNi̱j Raꞌa man níꞌ raa̱ maꞌa̱n soꞌ, ne̱ daj chiha̱a̱ míj se̱ nanica̱j snana̱ soꞌ, quiꞌya̱j soꞌ maꞌ. Dan me se cataj soꞌ se vaa xrej guún so̱ꞌ nu̱ꞌ cavii nu̱ꞌ caꞌanj a, taj Danj Yaꞌanj a. Ne̱ cheꞌé se cutaꞌ Yaꞌanj raa̱ maꞌa̱n soꞌ roꞌ,

²² cheꞌé dan neꞌen níꞌ se vaa Jesús roꞌ, me ya̱ síí ataꞌ tuꞌva se vaa sa̱ꞌ doj vaa tucuáán naca̱ ado̱nj.

²³ Ne̱ nij taꞌníí taꞌnij siꞌno̱ síí cuꞌna̱j Leví roꞌ, yuvii̱ cavi̱ꞌ vaa güii me nij soꞌ, ne̱ cheꞌé dan a̱ ꞌó nij soꞌ se̱ cayáán gu̱un xrej nu̱ꞌ cavii nu̱ꞌ caꞌanj maꞌ. Cheꞌé dan a̱j cayáán queꞌe̱e̱ ndoꞌo nij soꞌ a.

²⁴ Tza̱j ne̱ Jesús me se daj chiha̱a̱ míj se̱ caviꞌ soꞌ maꞌ. Cheꞌé dan o̱rúnꞌ soꞌ me xrej quiꞌya̱j se‑su̱u̱n Yaꞌanj cheꞌé níꞌ nu̱ꞌ cavii nu̱ꞌ caꞌanj ado̱nj.

²⁵ Dan me se ꞌo̱ vaa iꞌna̱ꞌ Jesús, ne̱ uun nucua̱j soꞌ ti̱nanii soꞌ rihaan sayuun nu̱ꞌ cavii nu̱ꞌ caꞌanj man nij síí uchiꞌ rihaan Yaꞌanj cheꞌé soꞌ ado̱nj. Da̱nj quiꞌya̱j soꞌ cheꞌé se ꞌo̱ vaa iꞌna̱ꞌ soꞌ, ne̱ achíín niꞌya̱j soꞌ rihaan Yaꞌanj cheꞌé nij soꞌ nu̱ꞌ cavii nu̱ꞌ caꞌanj ado̱nj.

²⁶ Dan me se vaa cheꞌé ndoꞌo guun soꞌ xrej ata̱ suun noco̱o doj cheꞌé níꞌ ado̱nj. ꞌO̱ se síí gue̱e̱ ya̱ me soꞌ, ne̱ taj va̱j a̱ doj cacunꞌ tumé soꞌ maꞌ. ꞌO̱ se síí sa̱ꞌ ina̱nj nimán me soꞌ, ne̱ ga̱nꞌ uxrá yáán soꞌ ga̱ níꞌ si̱j tumé cacunꞌ na̱nj ado̱nj. Dan me se xta̱ꞌ doj yáán soꞌ rihaan nu̱ꞌ rej xta̱ꞌ na̱nj ado̱nj.

²⁷ Ne̱ nij xrej ata̱ suun noco̱o doj ma̱n rihaan chumii̱ nihánj roꞌ, ꞌo̱ ꞌo̱ güii nó xcúún nij soꞌ caxri̱i̱ yaꞌan nij soꞌ xcuu rihaan Yaꞌanj cheꞌé cacunꞌ tumé maꞌa̱n nij soꞌ asino ya̱a̱n, ga̱a ne̱ caxri̱i̱ yaꞌan uún nij soꞌ xcuu rihaan Yaꞌanj cheꞌé cacunꞌ tumé nij yuvii̱ na̱nj chugua̱nj. Tza̱j ne̱ Jesús me se ne nó xcúún soꞌ quiꞌya̱j soꞌ da̱nj maꞌ. ꞌO̱ se xa̱ꞌ soꞌ, tza̱j ne̱ caꞌnéé nimán maꞌa̱n soꞌ cavi̱ꞌ soꞌ cheꞌé cacunꞌ tumé níꞌ na̱nj ado̱nj. Taj cheꞌé cavi̱ꞌ uún soꞌ cheꞌé níꞌ maꞌ.

²⁸ Ne̱ stucua̱nj Moisés taj se vaa cune̱ꞌ yuvii̱ man na̱nj yuvii̱ gu̱un nij soꞌ xrej, ne̱ cheꞌé dan na̱nj síí tumé cacunꞌ me nij xrej yoꞌ na̱nj ado̱nj. Tza̱j ne̱ navij tucuáán nga̱ yoꞌ, ga̱a ne̱ cutaꞌ Yaꞌanj raa̱ maꞌa̱n Yaꞌanj, ne̱ cuneꞌ Yaꞌanj man Taꞌníí Yaꞌanj, ne̱ síí sa̱ꞌ ina̱nj me soꞌ nu̱ꞌ cavii nu̱ꞌ caꞌanj na̱nj ado̱nj.