Hebreos 6 - Triqui de San Juan Copala

¹ Cheꞌé dan se̱ guun rá níꞌ tu̱cuꞌyón uún níꞌ tucuáán a̱j nariꞌ níꞌ ga̱a guun cheꞌe̱ níꞌ canocoꞌ níꞌ man Cristó maꞌ. Tana̱nj ꞌo̱ gu̱un rá níꞌ nari̱ꞌ níꞌ nana̱ chij doj nana̱ cachi̱in rihaan níꞌ canoco̱ꞌ sa̱ꞌ níꞌ man Cristó ado̱nj. Dan me se a̱j nariꞌ níꞌ nana̱ se vaa nuchra̱nꞌ nimán níꞌ ta̱náj níꞌ tucuáán chiꞌi̱i̱ noco̱ꞌ níꞌ asi̱j rque̱ na̱nj ado̱nj. Ne̱ a̱j nariꞌ níꞌ nana̱ se vaa cuchuma̱n rá níꞌ ni̱ꞌyaj níꞌ man Yaꞌanj ado̱nj.

² Ne̱ a̱j nariꞌ níꞌ tucuáán se vaa cata̱ꞌ ne níꞌ do̱ꞌ, se vaa cuta̱ꞌ níꞌ raꞌa níꞌ raa̱ tinúú níꞌ do̱ꞌ, se vaa cunu̱u iꞌna̱ꞌ uún nij síí caviꞌ do̱ꞌ, se vaa caꞌne̱ꞌ Yaꞌanj cacunꞌ cheꞌé yuvii̱ da̱j quira̱nꞌ yuvii̱ nu̱ꞌ cavii nu̱ꞌ caꞌanj do̱ꞌ ado̱nj.

³ Dan me se quisíj tucuꞌyón níꞌ nana̱ nihánj, ne̱ cache̱n níꞌ tu̱cuꞌyón níꞌ nana̱ noco̱o doj, sese caꞌve̱j rá Yaꞌanj quiꞌya̱j níꞌ da̱nj á.

⁴ ꞌO̱ se sese a̱j xcaj níꞌ cuentá cheꞌé snana̱ Yaꞌanj do̱ꞌ, sese a̱j nica̱j níꞌ nu̱ꞌ nij se sa̱ꞌ rqué Yaꞌanj rihaan níꞌ do̱ꞌ, sese a̱j cayáán Nimán Yaꞌanj ga̱ níꞌ do̱ꞌ,

⁵ sese a̱j nariꞌ níꞌ se vaa taj snana̱ Yaꞌanj cheꞌé níꞌ do̱ꞌ, sese a̱j neꞌen níꞌ suun sa̱ꞌ quiꞌya̱j Yaꞌanj naquiꞌya̱j sa̱ꞌ Yaꞌanj chumii̱ nihánj do̱ꞌ,

⁶ ga̱a ne̱ sese cunu̱u ino̱ nimán níꞌ ne̱ ta̱náj rmaꞌa̱n níꞌ stucua̱nj Cristó, ga̱a ne̱ daj chiha̱a̱ míj se̱ guun nucua̱j níꞌ ca̱nica̱j uún nimán níꞌ canoco̱ꞌ uún níꞌ chrej sa̱ꞌ a̱ maan chugua̱nj. Ma̱an se síí ꞌyaj da̱nj roꞌ, me rá soꞌ cavi̱ꞌ uún Taꞌníí Yaꞌanj rihaan rcutze̱, ne̱ me rá soꞌ caꞌnga̱ꞌ naco̱o̱ yuvii̱ ni̱ꞌyaj yuvii̱ man Cristó ado̱nj.

⁷ ꞌO̱ se ase vaa yoꞌóó vaa níꞌ rihaan Yaꞌanj, ne̱ sese amanꞌ uxrá maa̱n rihaan yoꞌóó, ne̱ sese sa̱ꞌ uxrá avii naa̱ do̱ꞌ, cuêj do̱ꞌ, rihaan yoꞌóó yoꞌ cha̱ nij síí quiꞌyaj suun yoꞌóó yoꞌ, ne̱ cavi̱i̱ sa̱ꞌ uxrá yoꞌóó yoꞌ, quiꞌya̱j Yaꞌanj ado̱nj.

⁸ Tza̱j ne̱ sese quixra̱ꞌ uxrá coj tanj u̱u̱n do̱ꞌ, tanj yaꞌa̱a u̱u̱n do̱ꞌ, rihaan yoꞌóó yoꞌ, ne̱ quira̱nꞌ uxrá yoꞌóó yoꞌ sayuun, quiꞌya̱j Yaꞌanj, ne̱ caca̱a̱ nu̱ꞌ yoꞌóó yoꞌ, quiꞌya̱j Yaꞌanj na̱nj á.

⁹ Tinu̱j, nocoj, nda̱ꞌ se nana̱ nucua̱j caꞌmii ꞌu̱nj rihaan soj nihánj, tza̱j ne̱ guun ya̱ rá ꞌu̱nj se vaa sa̱ꞌ uxrá doj quiꞌya̱j soj, nda̱a vaa ꞌyaj nij síí a̱j nanii rihaan chrej chiꞌi̱i̱ uun chij nimán ado̱nj.

¹⁰ ꞌO̱ se né si̱j chiꞌi̱i̱ me Yaꞌanj maꞌ. Si̱j vaa nica̱ rá me Yaꞌanj, ne̱ ꞌo̱ cu̱nuû rá Yaꞌanj ta̱ranꞌ nij suun sa̱ꞌ quiꞌyaj soj ga̱a canocoꞌ soj man soꞌ na̱nj á. Ne̱ ꞌo̱ cu̱nuû rá Yaꞌanj se vaa ꞌyaj soj cheꞌé se aráj cochro̱j soj rihaan soꞌ na̱nj chugua̱nj. Dan me se quiꞌyaj uxrá soj suun racuíj man nij síí noco̱ꞌ man Cristó ga̱a rque̱, ne̱ ꞌo̱ da̱nj ꞌyaj ya̱ soj na̱nj ado̱nj.

¹¹ Tza̱j ne̱ me uxrá rá ꞌu̱nj se vaa ꞌo̱ cuya̱a̱n gu̱un ya̱ rá ꞌo̱ ꞌo̱ nij tinu̱j soj se vaa cavi̱i̱ sa̱ꞌ ya̱ uxrá soj quiꞌya̱j Cristó, ne̱ gu̱un niha̱ꞌ rá soj canoco̱ꞌ xraan soj man soꞌ nda̱a se quisi̱j güii caꞌna̱ꞌ uún soꞌ á.

¹² Ne̱ se̱ gaa rmi̱i̱ soj maꞌ. Ma̱an se veꞌé xca̱j soj cuentá da̱j ꞌyaj nij síí amán sa̱ꞌ rá niꞌya̱j man Yaꞌanj, ne̱ ase vaa ꞌyaj nij soꞌ roꞌ, da̱nj quiꞌya̱j uún soj chugua̱nj. Dan me se nij síí amán sa̱ꞌ rá me se ne aꞌneꞌ rá nij soꞌ maꞌ. ꞌO̱ se ꞌo̱ nocoꞌ nij soꞌ man Cristó, ga̱a ne̱ vaa güii naca̱j nij soꞌ nu̱ꞌ se sa̱ꞌ cataꞌ tuꞌva Yaꞌanj se vaa rque̱ Yaꞌanj man níꞌ si̱j noco̱ꞌ man Yaꞌanj ado̱nj.

Da̱j quiꞌyaj Yaꞌanj ga̱a cataꞌ tuꞌva Yaꞌanj rihaan síí cuꞌna̱j Abraham da̱j quiꞌya̱j Yaꞌanj cheꞌé soꞌ a

¹³ Dan me se quisíj cataꞌ tuꞌva Yaꞌanj rihaan síí cuꞌna̱j Abraham, síí cayáán ga̱a naá, da̱j quiꞌya̱j Yaꞌanj cheꞌé soꞌ, ga̱a ne̱ guun rá Yaꞌanj cuta̱ꞌ Yaꞌanj raa̱ ꞌo̱ síí sa̱ꞌ doj, cheꞌé yan cuchuma̱n rá Abraham se vaa ya̱ vaa nana̱ cataꞌ tuꞌva Yaꞌanj rihaan soꞌ a. Tza̱j ne̱ ne nano̱ꞌ Yaꞌanj ꞌó soꞌ maꞌ. Ma̱an se maꞌa̱n ya̱ Yaꞌanj cataꞌ tuꞌva se vaa ya̱ da̱nj quiꞌya̱j Yaꞌanj ado̱nj.

¹⁴ Dan me se cataj Yaꞌanj rihaan Abraham a: “Ya̱ uxrá cavi̱i̱ sa̱ꞌ so̱ꞌ, qui̱ꞌyáj, ne̱ ya̱ uxrá xnaꞌa̱nj ndoꞌo nij taꞌníí taꞌnij siꞌno̱ so̱ꞌ, qui̱ꞌyáj na̱nj á”, taj Yaꞌanj rihaan Abraham a.

¹⁵ Ne̱ ya̱ da̱nj quiranꞌ síí cuꞌna̱j Abraham, gaa ina̱j nimán soꞌ, ꞌo̱ nocoꞌ soꞌ man Yaꞌanj, ne̱ cavii sa̱ꞌ uxrá ya̱ soꞌ, nda̱a vaa cataꞌ tuꞌva Yaꞌanj rihaan soꞌ na̱nj ado̱nj.

¹⁶ Dan me se xa̱ꞌ nij yuvii̱, ne̱ sese gu̱un rá ꞌo̱ soꞌ cata̱ꞌ tuꞌvaꞌ soꞌ cheꞌé ꞌo̱ nana̱, ne̱ cuta̱ꞌ soꞌ raa̱ ꞌo̱ rasu̱u̱n caꞌmi̱i̱ soꞌ, ga̱a ne̱ cuchuma̱n rá tuviꞌ soꞌ, quiꞌya̱j soꞌ chugua̱nj. Tza̱j ne̱ ina̱nj raa̱ ꞌo̱ rasu̱u̱n sa̱ꞌ doj rihaan maꞌa̱n yuvii̱ utaꞌ yuvii̱ ado̱nj.

¹⁷ Ne̱ ga̱a caꞌmii Yaꞌanj ga̱ nij síí naca̱j nu̱ꞌ se sa̱ꞌ rque̱ soꞌ, ne̱ guun rá soꞌ cuchuma̱n sa̱ꞌ doj rá nij soꞌ cheꞌé nana̱ cataꞌ tuꞌva soꞌ, ne̱ cheꞌé dan cutaꞌ maꞌa̱n ya̱ Yaꞌanj raa̱ ꞌo̱ rasu̱u̱n, caꞌmii Yaꞌanj a.

¹⁸ Dan me se asino cataꞌ tuꞌva Yaꞌanj, ga̱a ne̱ cutaꞌ Yaꞌanj raa̱ maꞌa̱n soꞌ a. Dan me se quisíj vi̱j nana̱ caꞌmii soꞌ, ne̱ daj chiha̱a̱ míj se̱ natuná Yaꞌanj snana̱ soꞌ maꞌ. ꞌO̱ se ne uun nucua̱j Yaꞌanj aꞌmii Yaꞌanj nana̱ ne̱ maꞌ. Cheꞌé dan me ndoꞌo rá níꞌ ra̱cuíj Yaꞌanj man níꞌ, ne̱ cheꞌé dan vaa cheꞌé ndoꞌo cuchuma̱n rá níꞌ, ne̱ gu̱un ya̱ rá níꞌ se vaa ya̱ cavi̱i̱ sa̱ꞌ níꞌ, nda̱a vaa cataꞌ tuꞌva Yaꞌanj rihaan níꞌ na̱nj ado̱nj.

¹⁹ Ne̱ sese ꞌo̱ gu̱un ya̱ rá níꞌ, ne̱ ga̱a̱ sca̱ꞌ nimán níꞌ, ne̱ xraan cuchuma̱n rá níꞌ ado̱nj. ꞌO̱ se ya̱ uxrá vaa nana̱ amán rá níꞌ, ne̱ cheꞌé nana̱ yoꞌ caꞌve̱e cache̱n níꞌ yatzíj mantá cortiná ne̱ catu̱u̱ níꞌ rej nicu̱nꞌ maꞌa̱n Yaꞌanj ado̱nj.

²⁰ Dan me se a̱j quitáá ya̱a̱n Jesús rihaan níꞌ quinanꞌ soꞌ rihaan Yaꞌanj cheꞌé níꞌ, ne̱ soꞌ me síí guun xrej ata̱ suun noco̱o doj, ne̱ ase vaa síí cuꞌna̱j Melquisedec síí cayáán ga̱a naá roꞌ, da̱nj ga̱a̱ gue̱e̱ soꞌ nu̱ꞌ cavii nu̱ꞌ caꞌanj ado̱nj.