Hebreos 5 - Triqui de San Juan Copala

¹ ꞌO̱ se xa̱ꞌ nij xrej ata̱ suun noco̱o doj xrej narii nii scaꞌnúj nij yuvii̱, tza̱j ne̱ ata̱ nij soꞌ suun se vaa ra̱cuíj nij soꞌ man yuvii̱ me rá cunu̱u sa̱ꞌ rihaan Yaꞌanj ado̱nj. Dan me se racuíj nij soꞌ man nij yuvii̱ rque̱ yuvii̱ xcuu caca̱a̱ rihaan Yaꞌanj cheꞌé cacunꞌ tumé nij yuvii̱ a.

² Da̱nj ꞌyaj nij soꞌ, cheꞌé se na̱nj yuvii̱ me nij soꞌ, ne̱ cheꞌé dan ne uun nucua̱j nij soꞌ quiꞌya̱j nij soꞌ ina̱nj se sa̱ꞌ a̱ maan ado̱nj. Cheꞌé dan caꞌve̱e gu̱un ꞌe̱e̱ rá nij soꞌ ni̱ꞌyaj nij soꞌ man nij síí ne neꞌen do̱ꞌ, man nij síí va̱j chrej chiꞌi̱i̱ do̱ꞌ a. Ne̱ cheꞌé cacunꞌ tumé maꞌa̱n nij soꞌ roꞌ,

³ cheꞌé dan ase vaa utaꞌ nij soꞌ xcuu caca̱a̱ rihaan Yaꞌanj cheꞌé cacunꞌ tumé yuvii̱ roꞌ, ina̱nj da̱nj no̱ xcúún nij soꞌ cuta̱ꞌ nij soꞌ xcuu caca̱a̱ rihaan Yaꞌanj cheꞌé cacunꞌ tumé maꞌa̱n nij soꞌ uún ado̱nj.

⁴ Ne̱ taj síí uneꞌ man maꞌa̱n ca̱ta̱ suun noco̱o yoꞌ maꞌ. ꞌO̱ se ina̱nj síí nacúún Yaꞌanj me síí ca̱ta̱ suun noco̱o ado̱nj. Da̱nj quiranꞌ síí cuꞌna̱j Aarón síí cayáán ga̱a naá, ne̱ nacúún Yaꞌanj man soꞌ ca̱ta̱ soꞌ suun noco̱o yoꞌ ga̱a naá ado̱nj.

⁵ Ne̱ ase vaa quiranꞌ síí cuꞌna̱j Aarón roꞌ, da̱nj quiranꞌ Cristó chugua̱nj. Ne cune̱ꞌ soꞌ man maꞌa̱n soꞌ se vaa cavi̱i̱ sa̱ꞌ soꞌ gu̱un soꞌ xrej ata̱ suun noco̱o doj maꞌ. ꞌO̱ se Yaꞌanj cuneꞌ man soꞌ, cataj Yaꞌanj a: Taꞌníj mé so̱ꞌ á. Cuano̱ nihánj me se queneꞌe̱n yuvii̱ se vaa taꞌníj mé so̱ꞌ qui̱ꞌyáj na̱nj á, taj nana̱ no̱ rihaan Danj Yaꞌanj nana̱ caꞌmii Yaꞌanj rihaan Cristó a.

⁶ Ne̱ vaa ꞌó nana̱ uún nana̱ caꞌmii Yaꞌanj rihaan Cristó, ne̱ nana̱ yoꞌ taj a: Xrej mé so̱ꞌ nu̱ꞌ cavii nu̱ꞌ caꞌanj a. Dan me se ase vaa xrej cuꞌna̱j Melquisedec xrej cayáán ga̱a naá roꞌ, da̱nj vaa ma̱ꞌán so̱ꞌ na̱nj á, taj doj nana̱ no̱ rihaan Danj Yaꞌanj nana̱ caꞌmii Yaꞌanj rihaan Cristó a.

⁷ Dan me se ga̱a chéé Jesús rihaan chumii̱ nihánj, ne̱ nacúún soꞌ rihaan Yaꞌanj ne̱ cachíín niꞌya̱j uxrá soꞌ se vaa ti̱nanii Yaꞌanj man soꞌ se̱ caviꞌ soꞌ, ne̱ cheꞌé dan nda̱a taꞌvee maꞌa̱n soꞌ a. Cheꞌé se si̱j aráj cochro̱j ya̱ rihaan Yaꞌanj me soꞌ, cheꞌé dan cuno ya̱ Yaꞌanj caꞌmii soꞌ,

⁸ tza̱j ne̱ nda̱ꞌ se Taꞌni̱j ya̱ Yaꞌanj me soꞌ, tza̱j ne̱ taj se quiꞌyáꞌ nani̱i̱ soꞌ rihaan sayuun a̱ maꞌ. Cheꞌé sayuun quiranꞌ soꞌ roꞌ, cheꞌé dan tana̱nj a̱ nariꞌ sa̱ꞌ soꞌ cuno̱ soꞌ ado̱nj.

⁹ Dan me se guun soꞌ síí uno nu̱ꞌ snana̱ rej, ne̱ cheꞌé dan guun soꞌ síí tinanii man ta̱ranꞌ níꞌ si̱j uno rihaan soꞌ rihaan sayuun, ne̱ dan me se cavi̱i̱ sa̱ꞌ níꞌ nu̱ꞌ cavii nu̱ꞌ caꞌanj, quiꞌya̱j soꞌ ado̱nj.

¹⁰ Ne̱ guun soꞌ xrej ata̱ suun noco̱o doj, quiꞌyaj Yaꞌanj, ne̱ ase vaa guun síí cuꞌna̱j Melquisedec xrej vaa uún soꞌ na̱nj ado̱nj.

No̱ xcúún níꞌ xca̱j uxrá níꞌ cuentá cheꞌé stucua̱nj Cristó a

¹¹ Vaa uxrá ꞌó nana̱ me rá ꞌu̱nj cata̱j xnaꞌanj ꞌu̱nj rihaan soj cheꞌé síí cuꞌna̱j Melquisedec yoꞌ, ne̱ sayu̱u̱n uxrá vaa cata̱j xnaꞌanj ꞌu̱nj nana̱ yoꞌ rihaan soj, cheꞌé se né si̱j niha̱ꞌ rá cuno̱ raꞌya̱nj me soj maꞌ.

¹² Dan me se guun queꞌe̱e̱ yoꞌ nocoꞌ soj man Cristó, ne̱ no̱ xcúún soj tu̱cuꞌyón soj stucua̱nj Cristó rihaan tuviꞌ soj, tza̱j ne̱ ne gu̱un nucua̱j soj quiꞌya̱j soj da̱nj maan asânj. ꞌO̱ se achiin ꞌo̱ síí tu̱cuꞌyón asi̱j tacóó snana̱ Yaꞌanj man soj, ne̱ cheꞌé dan ase vaa neꞌej vaa soj, ne̱ neꞌej me se ne neꞌen neꞌej cha̱ neꞌej se chá maꞌ. Tiha̱j utzii neꞌej na̱nj ado̱nj. Ne̱ taꞌngaꞌ da̱nj vaa soj, ne̱ tiha̱j nda̱a tacóó snana̱ Yaꞌanj gu̱un nucua̱j soj cuno̱ soj na̱nj ado̱nj.

¹³ Dan me se nij síí utzii too roꞌ, ase vaa neꞌej u̱u̱n vaa nij soꞌ, ne̱ ataa nari̱ꞌ nij soꞌ da̱j quiꞌya̱j nij soꞌ ne̱ cunu̱u sa̱ꞌ nij soꞌ rihaan Yaꞌanj ado̱nj.

¹⁴ Ne̱ ase vaa nij síí noco̱o síí chá nu̱ꞌ rasu̱u̱n sca̱ꞌ roꞌ, da̱nj vaa nij síí acaj ndoꞌo cuentá, ne̱ tucuꞌyón niga̱nj nij soꞌ nuchru̱j ra̱a̱ nij soꞌ cheꞌé rasu̱u̱n, ne̱ cheꞌé dan neꞌen nij soꞌ nuchru̱j ra̱a̱ nij soꞌ me se me se sa̱ꞌ do̱ꞌ, me se me se nij do̱ꞌ chugua̱nj.