Hebreos 4 - Triqui de San Juan Copala

¹ Ga̱a rque̱ me se cataꞌ tuꞌva Yaꞌanj se vaa caꞌve̱e catu̱u̱ níꞌ rej caꞌa̱nj níꞌ nara̱a̱n rá níꞌ ga̱ Yaꞌanj, ne̱ veé da̱nj vaa yaꞌnúj rihaan níꞌ nda̱a cuano̱ ado̱nj. Cheꞌé dan tu̱mé uxrá níꞌ man níꞌ, ne̱ ta̱dó níꞌ se̱ gaa na̱nj ca̱ráán níꞌ xréé níꞌ rihaan nana̱ yoꞌ na̱nj á.

² Ne̱ ase vaa catúj snana̱ Yaꞌanj xréé nij síí cumán ga̱a naá roꞌ, da̱nj vaa gue̱e̱ catúj snana̱ Yaꞌanj xréé maꞌa̱n níꞌ cuano̱ ado̱nj. Ga̱a cuno nij soꞌ snana̱ Yaꞌanj me se cuno u̱u̱n nij soꞌ nana̱ yoꞌ, tza̱j ne̱ taj se gúnꞌ nana̱ yoꞌ rihaan nij soꞌ cheꞌé se ne cuchuma̱n rá nij soꞌ daj chiha̱a̱ míj nana̱ yoꞌ a̱ maan chugua̱nj.

³ ꞌO̱ se o̱rúnꞌ níꞌ si̱j cuchumán rá niꞌya̱j man Yaꞌanj me nij síí caꞌa̱nj nara̱a̱n rá ga̱ Yaꞌanj na̱nj ado̱nj. Ina̱nj da̱nj caꞌmii Yaꞌanj, cataj Yaꞌanj a: Dan me se caꞌmaan raj, ne̱ cataꞌ tuꞌvá ꞌu̱nj se vaa daj chiha̱a̱ míj se̱ naránj rá nij soꞌ ga̱ ꞌu̱nj a̱ maꞌ, taj Yaꞌanj a. Ne̱ dan me se ga̱a naá ga̱a quisíj quiꞌyaj Yaꞌanj chumii̱ nihánj, ne̱ navij suun rihaan Yaꞌanj a.

⁴ Ne̱ vaa nana̱ no̱ rihaan Danj Yaꞌanj nana̱ taj xnaꞌanj cheꞌé güii chi̱j, ne̱ taj nana̱ yoꞌ a: Ne̱ güii chi̱j naránj rá Yaꞌanj cheꞌé yan quisíj quiꞌyaj Yaꞌanj nu̱ꞌ suun quiꞌyaj soꞌ a, taj nana̱ yoꞌ a.

⁵ Ne̱ vaa nana̱ taj uún a: Daj chiha̱a̱ míj se̱ naránj ya̱ rá nij soꞌ ga̱ ꞌu̱nj a̱ maan chugua̱nj, taj uún Yaꞌanj a.

⁶ Dan me se ataa catu̱u̱ taꞌa̱j nij yuvii̱ nara̱a̱n rá ga̱ Yaꞌanj ado̱nj. Tza̱j ne̱ xa̱ꞌ nij síí a̱j cuno snana̱ Yaꞌanj ga̱a naá me se ne caꞌve̱j rá nij soꞌ cuno̱ nij soꞌ, ne̱ cheꞌé dan daj chiha̱a̱ míj se̱ naránj rá nij soꞌ ga̱ Yaꞌanj maꞌ.

⁷ Cheꞌé dan cachrón uún Yaꞌanj ꞌó güii canoco̱ꞌ yuvii̱ man soꞌ, ne̱ cuano̱ nihánj me güii yoꞌ ado̱nj. Ne̱ maꞌa̱n rey cuꞌna̱j David caꞌmii snana̱ Yaꞌanj nana̱ yoꞌ nana̱ a̱j cachrón ꞌu̱nj rihaan yanj nihánj, cataj soꞌ a: Cuanꞌ roꞌ, sese ya̱ cuno soj nana̱ caꞌmii Yaꞌanj, ne̱ se̱ naquiꞌyaj nichra̱j soj nimán soj maꞌ, taj David a.

⁸ Ne̱ cheꞌé se ne nara̱a̱n rá nij síí cumán ga̱a naá, quiꞌyaj síí cuꞌna̱j Josué roꞌ, cheꞌé dan me cachén ndoꞌo güii, ga̱a ne̱ caꞌmii David cheꞌé ꞌó güii canoco̱ꞌ yuvii̱ man Yaꞌanj, ne̱ nara̱a̱n rá nij yuvii̱ ga̱ Yaꞌanj ado̱nj.

⁹ Dan me se neꞌen níꞌ se vaa ya̱ uxrá vaa güii nara̱a̱n rá níꞌ si̱j noco̱ꞌ man Yaꞌanj ado̱nj.

¹⁰ ꞌO̱ se nij síí naránj rá ga̱ Yaꞌanj me se a̱j quisíj quiꞌyaj suun nij soꞌ, ne̱ navij suun rihaan nij soꞌ na̱nj ado̱nj. Ase vaa quiꞌyaj Yaꞌanj ga̱a navij se‑su̱u̱n Yaꞌanj rihaan Yaꞌanj roꞌ, da̱nj ꞌyaj nij soꞌ chugua̱nj.

¹¹ Nano̱ꞌ uxrá níꞌ da̱j quiꞌya̱j níꞌ nara̱a̱n rá níꞌ ga̱ Yaꞌanj, ga̱a ne̱ se̱ guun tu̱mé a̱ ꞌó tuviꞌ níꞌ cacunꞌ tumé nij síí cumán ga̱a naá maꞌ.

¹² ꞌO̱ se vaa iꞌna̱ꞌ ya̱ snana̱ Yaꞌanj ado̱nj. Ne̱ nucua̱j uxrá yoꞌ, ne̱ ase vaa ꞌo̱ neê espadá siha̱a̱ nu̱ꞌ niha̱ rihaan roꞌ, vaa yoꞌ, tza̱j ne̱ né ina̱nj cúú do̱ꞌ, nee̱ do̱ꞌ, me se aꞌneꞌ yoꞌ maꞌ. ꞌO̱ se aꞌneꞌ yoꞌ nda̱a nimán ya̱ níꞌ, ne̱ cheꞌé snana̱ Yaꞌanj yoꞌ roꞌ, uun nucua̱j Yaꞌanj xcaj Yaꞌanj cuentá da̱j uun rá níꞌ ne̱ da̱j uun nimán níꞌ chugua̱nj.

¹³ Ne̱ nu̱ꞌ nij rasu̱u̱n vaa yuve̱ roꞌ, ruviꞌ nu̱ꞌ nij yoꞌ rihaan Yaꞌanj chugua̱nj. ꞌO̱ se ranga̱ꞌ uxrá rihaan Yaꞌanj na̱nj á. Ne̱ ruviꞌ nu̱ꞌ rasu̱u̱n niꞌya̱j soꞌ, ne̱ ya̱ ruviꞌ sa̱ꞌ nu̱ꞌ rasu̱u̱n niꞌya̱j Yaꞌanj ado̱nj. Ne̱ veé rihaan maꞌa̱n ya̱ Yaꞌanj roꞌ, me caꞌa̱nj níꞌ nago̱ꞌ níꞌ cuentá ado̱nj.

Ase vaa xrej ata̱ suun noco̱o doj roꞌ, da̱nj vaa Jesús rihaan níꞌ a

¹⁴ Tza̱j ne̱ vaa ꞌo̱ xrej sa̱ꞌ xrej ata̱ suun noco̱o doj nica̱j yuꞌunj man níꞌ ado̱nj. Ne̱ si̱j cavii xta̱ꞌ doj rihaan rej xta̱ꞌ me soꞌ, ne̱ Jesús Taꞌníí Yaꞌanj ya̱ me soꞌ na̱nj chugua̱nj. Cheꞌé dan ni̱caj xraan níꞌ tucuáán noco̱ꞌ níꞌ á.

¹⁵ ꞌO̱ se né xre̱j ne neꞌen da̱j vaa sayuun ranꞌ níꞌ me soꞌ maꞌ. ꞌO̱ se a̱j neꞌen soꞌ da̱j vaa chrej chiꞌi̱i̱ ꞌnaꞌ rihaan níꞌ ado̱nj. Cheꞌé dan cunuu ꞌe̱e̱ rá soꞌ man níꞌ ga̱a nina̱j níꞌ rihaan sayuun ado̱nj. Dan me se ase vaa maꞌa̱n níꞌ roꞌ, vaa soꞌ, ne̱ ase vaa sayuun ꞌnaꞌ rihaan níꞌ roꞌ, da̱nj vaa sayuun caꞌnaꞌ rihaan soꞌ, tza̱j ne̱ ne quiꞌya̱j soꞌ a̱ ꞌó xcoꞌ cacunꞌ maꞌ.

¹⁶ Cheꞌé se xrej me soꞌ cheꞌé níꞌ roꞌ, cheꞌé dan se̱ cuchuꞌviꞌ níꞌ a̱ doj maꞌ. Tana̱nj nichru̱nꞌ níꞌ rihaan chrej sa̱ꞌ, ga̱a ne̱ caꞌve̱e cunu̱u ꞌe̱e̱ rá Yaꞌanj man níꞌ, ne̱ asa̱ꞌ ꞌnaꞌ sayuun rihaan níꞌ, ne̱ caꞌve̱e cata̱ꞌ tuꞌva níꞌ man soꞌ, ne̱ naca̱j soꞌ man níꞌ rihaan sayuun chugua̱nj. Dan me se ya̱ cunu̱u ꞌe̱e̱ rá Yaꞌanj man níꞌ, ne̱ asa̱ꞌ quiranꞌ níꞌ sayuun, ne̱ quiꞌya̱j soꞌ se lu̱j ga̱ níꞌ ado̱nj.