Hebreos 3 - Triqui de San Juan Copala

Sa̱ꞌ doj vaa Cristó rihaan síí cuꞌna̱j Moisés síí cayáán ga̱a naá a

¹ Dan me se guun tuvi̱ꞌ soj ga̱ nij síí nacúún Yaꞌanj cheꞌé yan canoco̱ꞌ nij soj man Cristó, tinu̱j, nocoj. Cheꞌé dan xca̱j soj cuentá cheꞌé Jesús, ne̱ si̱j caꞌnéé Yaꞌanj rihaan níꞌ cataj xnaꞌanj soꞌ rihaan níꞌ nana̱ ya̱ cheꞌé Yaꞌanj, ne̱ ase vaa xrej ata̱ suun noco̱o doj vaa uún soꞌ, tinavij ya̱ soꞌ cacunꞌ tumé níꞌ rihaan Yaꞌanj ado̱nj. Ina̱nj da̱nj vaa nana̱ noco̱ꞌ níꞌ na̱nj á.

² Ne̱ veꞌé ꞌyaj Jesús nu̱ꞌ suun caꞌneꞌ Yaꞌanj rihaan soꞌ, nda̱ꞌ rá se vaa veꞌé quiꞌyaj síí cuꞌna̱j Moisés nu̱ꞌ suun caꞌneꞌ Yaꞌanj rihaan soꞌ quiꞌya̱j soꞌ cheꞌé nij yuvii̱ noco̱ꞌ man Yaꞌanj ado̱nj.

³ ꞌO̱ se sa̱ꞌ uxrá doj vaa Cristó rihaan Moisés na̱nj chugua̱nj. Dan me se neꞌen soj se vaa vaa se uun doj síí cuneꞌ veꞌ rihaan maꞌa̱n veꞌ yoꞌ ado̱nj. Ne̱ ase vaa síí cuneꞌ veꞌ vaa Jesús, ne̱ cavii sa̱ꞌ ta̱ranꞌ níꞌ ga̱ Yaꞌanj, quiꞌyaj soꞌ, ne̱ ase vaa veꞌ yoꞌ vaa níꞌ do̱ꞌ, vaa Moisés do̱ꞌ na̱nj á.

⁴ Dan me se vaa síí ꞌyaj da̱j a̱ nij veꞌ ado̱nj. Tza̱j ne̱ o̱rúnꞌ Yaꞌanj me síí quiꞌyaj da̱j a̱ rasu̱u̱n na̱nj á.

⁵ Ne̱ Moisés me se veꞌé ya̱ quiꞌyaj soꞌ nu̱ꞌ suun caꞌneꞌ Yaꞌanj rihaan soꞌ ado̱nj. Tza̱j ne̱ na̱nj mozó me soꞌ rihaan nij yuvii̱ tucua̱ Yaꞌanj, ne̱ cataj xnaꞌanj soꞌ rihaan nij yuvii̱ cheꞌé nij nana̱ nata̱ꞌ Yaꞌanj rihaan nij yuvii̱ rej rihaan nij yuvii̱ ado̱nj.

⁶ Tza̱j ne̱ Cristó me se né mo̱zó me soꞌ maꞌ. Tana̱nj taꞌníí síí tucua̱ ya̱ veꞌ me soꞌ ado̱nj. Ne̱ veé da̱nj ꞌyaj soꞌ nu̱ꞌ suun vaa rihaan soꞌ rá veꞌ, ne̱ dan me se maꞌa̱n ya̱ níꞌ me veꞌ yoꞌ, sese ꞌo̱ gu̱un ya̱ rá níꞌ se vaa cavi̱i̱ sa̱ꞌ níꞌ, quiꞌya̱j Yaꞌanj, ne̱ sese gu̱un niha̱ꞌ rá níꞌ cata̱j xnaꞌanj níꞌ cheꞌé yoꞌ rihaan tuviꞌ níꞌ, ne̱ sese se̱ cuchuꞌviꞌ níꞌ canoco̱ꞌ níꞌ man Yaꞌanj ado̱nj.

Se̱ gaa nichra̱j nimán níꞌ ni̱ꞌyaj níꞌ Yaꞌanj maꞌ

⁷ Cheꞌé dan cuno̱ níꞌ nana̱ nihánj nana̱ caꞌmii Nimán Yaꞌanj á: Cuanꞌ roꞌ, sese ya̱ cuno soj nana̱ caꞌmii Yaꞌanj,

⁸ ne̱ se̱ naquiꞌyaj nichra̱j soj nimán soj nda̱a vaa quiꞌyaj nij síí cumán ga̱a naá ga̱a cachéé nij soꞌ rej nacoo̱ ndoꞌo maꞌ. Dan me se tucuáá nij soꞌ ne̱ riꞌyunj nij soꞌ man Yaꞌanj a.

⁹ Guun rá nij xi̱i soj xca̱j nij soꞌ cuentá sese ya̱ qui̱ꞌyáá ꞌu̱nj sayuun man nij soꞌ a. Ne̱ queneꞌen nij soꞌ nu̱ꞌ nij suun sa̱ꞌ noco̱o quiꞌyáá ꞌu̱nj cheꞌé nij soꞌ vi̱j chiha̱a̱ ya̱ yoꞌ a.

¹⁰ Cheꞌé dan caꞌmaan raj niꞌya̱j ꞌu̱nj man nij soꞌ, ne̱ cataj ꞌu̱nj se vaa ne neꞌen uxrá nij soꞌ a̱ maꞌ. ꞌO̱ se ne queneꞌe̱n uxrá nij soꞌ canoco̱ꞌ nij soꞌ se‑chre̱j ꞌu̱nj a̱ maꞌ.

¹¹ Dan me se caꞌmaan raj, ne̱ cataꞌ tuꞌvá ꞌu̱nj se vaa daj chiha̱a̱ míj se̱ naránj ya̱ rá nij soꞌ ga̱ ꞌu̱nj a̱ maan chugua̱nj. Da̱nj taj nana̱ caꞌmii Nimán Yaꞌanj a.

¹² Dan me se tu̱mé uxrá soj man soj se̱ gaa na̱nj ga̱a̱ qui̱j nimán ꞌo̱ tuviꞌ soj, ne̱ se̱ caꞌvej rá soꞌ cuchuma̱n rá soꞌ ni̱ꞌyaj soꞌ Yaꞌanj, maan tinu̱j, maan nocoj. Ta̱dó soj se̱ gaa na̱nj ta̱náj xco̱ ꞌo̱ tuviꞌ soj man Yaꞌanj si̱j vaa iꞌna̱ꞌ ya̱ maꞌ.

¹³ Tana̱nj a̱ nago̱ꞌ soj chrej nucua̱j man tinúú soj da̱j a̱ güii ga̱a vaa yaꞌnúj rihaan soj á. Da̱nj quiꞌya̱j soj, se̱ gaa na̱nj gu̱un nichra̱j rá tinúú soj quiꞌya̱j nana̱ ne̱ chiꞌi̱i̱ a.

¹⁴ ꞌO̱ se ya̱j me se guun níꞌ síí cavi̱i̱ sa̱ꞌ ga̱ Cristó, ne̱ cavi̱i̱ sa̱ꞌ ya̱ níꞌ ga̱ soꞌ sese ꞌo̱ cuchuma̱n rá níꞌ cuno̱ níꞌ nana̱ ya̱, nda̱a vaa quiꞌyaj níꞌ ga̱a guun cheꞌe̱ níꞌ canocoꞌ níꞌ man Cristó chugua̱nj.

¹⁵ Dan me se Danj Yaꞌanj taj a: Cuanꞌ roꞌ, sese ya̱ cuno soj nana̱ caꞌmii Yaꞌanj, ne̱ se̱ naquiꞌyaj nichra̱j soj nimán soj nda̱a vaa quiꞌyaj nij síí cumán ga̱a naá maꞌ. Dan me se tucuáá nij soꞌ rihaan Yaꞌanj a, taj Danj Yaꞌanj a.

¹⁶ Ne̱ me síí ne caꞌve̱j rá cuno̱ snana̱ Yaꞌanj, ne̱ tucuáá nij soꞌ rihaan Yaꞌanj, rá soj ga̱. ꞌO̱ se veé ya̱ ta̱ranꞌ nij síí cavii yoꞌóó noco̱o cuꞌna̱j Egiptó ga̱ síí cuꞌna̱j Moisés me nij soꞌ chugua̱nj.

¹⁷ Ne̱ me síí caꞌmaan rá Yaꞌanj niꞌya̱j Yaꞌanj rque vi̱j chiha̱a̱ (40) ya̱ yoꞌ, rá soj ga̱. Ne̱ si̱j caꞌmaan rá Yaꞌanj niꞌya̱j Yaꞌanj me nij síí quiꞌyaj cacunꞌ, ne̱ caviꞌ nij soꞌ rihaan yoꞌóó taca̱an naco̱o̱ a.

¹⁸ Ne̱ me nij síí rihaan cataj Yaꞌanj se vaa daj chiha̱a̱ míj se̱ cachén nij soꞌ nara̱a̱n rá nij soꞌ ga̱ Yaꞌanj, rá soj ga̱. Rihaan nij síí ne caꞌve̱j rá cuno̱ rihaan soꞌ me yoꞌ naꞌ. Veé ya̱ nij soꞌ ado̱nj.

¹⁹ Ne̱ neꞌen níꞌ se vaa cheꞌé se ne cuchuma̱n rá nij soꞌ ni̱ꞌyaj nij soꞌ man Yaꞌanj roꞌ, cheꞌé dan ne gu̱un nucua̱j nij soꞌ nara̱a̱n rá nij soꞌ ga̱ Yaꞌanj chugua̱nj.