Hebreos 2 - Triqui de San Juan Copala

No̱ xcúún uxrá níꞌ cuno̱ níꞌ snana̱ Cristó a

¹ Cheꞌé dan doj a̱ nó xcúún níꞌ cuno̱ sa̱ꞌ níꞌ nana̱ a̱j nariꞌ níꞌ ado̱nj. Sese se̱ quiꞌyaj níꞌ da̱nj, ne̱ do̱ꞌ do̱ꞌ ta̱náj níꞌ chrej sa̱ꞌ yoꞌ, ne̱ gu̱un yaníj níꞌ rihaan se‑chre̱j Yaꞌanj, ne̱ caꞌa̱nj niꞌya̱ níꞌ ga̱a na̱nj chugua̱nj.

² ꞌO̱ se ya̱ uxrá vaa snana̱ Yaꞌanj nana̱ cataj xnaꞌanj nij se‑mo̱zó Yaꞌanj rihaan síí cuꞌna̱j Moisés ga̱a naá na̱nj á. Tza̱j ne̱ nica̱ ya̱ quiꞌyaj Yaꞌanj sayuun man ꞌo̱ ꞌo̱ nij yuvii̱ ne cuno̱ nana̱ yoꞌ chugua̱nj.

³ Cheꞌé dan, asa̱ꞌ caꞌve̱e nani̱i̱ maꞌa̱n níꞌ rihaan sayuun ne̱ cavi̱i̱ sa̱ꞌ níꞌ, sese se̱ xcaj sa̱ꞌ níꞌ cuentá cheꞌé chrej sa̱ꞌ chrej quiꞌyaj naca̱ Yaꞌanj nani̱i̱ níꞌ rihaan sayuun, rá soj ga̱. Dan me se asino maꞌa̱n Síí ꞌNi̱j Raꞌa man níꞌ me síí cuchruj chrej sa̱ꞌ yoꞌ, ga̱a ne̱ nij síí cuno nana̱ caꞌmii soꞌ roꞌ, cataj xnaꞌanj nij soꞌ snana̱ soꞌ nana̱ sa̱ꞌ yoꞌ rihaan níꞌ, ne̱ nariꞌ sa̱ꞌ níꞌ nana̱ yoꞌ, quiꞌyaj nij soꞌ ado̱nj.

⁴ Tihaa̱n Yaꞌanj se vaa ya̱ vaa rej nani̱i̱ níꞌ rihaan sayuun cheꞌé se rqué Nimán Yaꞌanj se nucua̱j man nij síí noco̱ꞌ man Cristó, ne̱ quiꞌyaj nij soꞌ da̱j a̱ suun sa̱ꞌ noco̱o, da̱j se me rá maꞌa̱n Yaꞌanj a.

Nu̱ꞌ se vaa quiranꞌ Cristó cheꞌé níꞌ a

⁵ Dan me se cata̱j xnaꞌanj ꞌu̱nj rihaan soj cheꞌé güii gu̱un chij Yaꞌanj rihaan chumii̱ naca̱ a. Ne̱ ne cune̱ꞌ Yaꞌanj man nij se‑mo̱zó Yaꞌanj se vaa quiri̱i̱ taꞌngaꞌ nij soꞌ rihaan chumii̱ naca̱ maꞌ.

⁶ Ma̱an se vaa nana̱ no̱ rihaan Danj Yaꞌanj nana̱ caꞌmii ꞌo̱ soꞌ rihaan Yaꞌanj, ne̱ cataj soꞌ a: Taj yuꞌvee nó yuvii̱, ne̱ me cheꞌé nuû rá so̱ꞌ man soꞌ ga̱. Taj yuꞌvee nó taꞌníí yuvii̱, ne̱ me cheꞌé racuíj so̱ꞌ man soꞌ ga̱.

⁷ Síí noco̱ꞌ do̱j tzínꞌ rihaan nij se‑mo̱zó so̱ꞌ me soꞌ, quiꞌyáá so̱ꞌ a. Tza̱j ne̱ niꞌndaj ya̱ sa̱ꞌ vaa soꞌ do̱ꞌ, aráj cochro̱j nii rihaan soꞌ do̱ꞌ, quiꞌyáá so̱ꞌ ado̱nj. Ne̱ caꞌnéꞌ so̱ꞌ suun rihaan soꞌ se vaa tu̱mé soꞌ nu̱ꞌ rasu̱u̱n quiꞌyaj raꞌá so̱ꞌ a.

⁸ Quiꞌyáá so̱ꞌ se vaa rii taꞌngaꞌ soꞌ rihaan cunuda̱nj rasu̱u̱n ado̱nj. Da̱nj taj nana̱ no̱ rihaan Danj Yaꞌanj a. Ne̱ dan me se ya̱ quiri̱i̱ taꞌngaꞌ nij yuvii̱ rihaan cunuda̱nj rasu̱u̱n ado̱nj. Tza̱j ne̱ neꞌen níꞌ se vaa ya̱j me se ataa quiri̱i̱ taꞌngaꞌ nij yuvii̱ rihaan cunuda̱nj rasu̱u̱n a.

⁹ Tza̱j ne̱ niꞌya̱j níꞌ man Jesús, ne̱ nda̱ꞌ se ya̱ ya̱ si̱j noco̱ꞌ doj guun soꞌ rihaan nij se‑mo̱zó Yaꞌanj rque do̱j yoꞌ, tza̱j ne̱ ya̱j me se a̱j niꞌndaj ya̱ sa̱ꞌ cavii soꞌ, ne̱ veꞌé ndoꞌo aráj cochro̱j nii man soꞌ, quiꞌyaj Yaꞌanj a. Ne̱ da̱nj cavii sa̱ꞌ soꞌ, cheꞌé se caviꞌ soꞌ a. ꞌO̱ se sese ne cavi̱ꞌ soꞌ, ne̱ ne caꞌve̱e nayo̱n soꞌ rihaan cunuda̱nj níꞌ a̱ maꞌ. Tza̱j ne̱ ya̱j me se quiꞌyaj ndoꞌo Yaꞌanj se lu̱j cheꞌé níꞌ se vaa nayón Jesús rihaan níꞌ na̱nj ado̱nj.

¹⁰ Dan me se Yaꞌanj me síí quiꞌyaj nu̱ꞌ rasu̱u̱n cheꞌé maꞌa̱n ina̱nj soꞌ chugua̱nj. Dan me se vaa güii, ne̱ nucui̱ꞌ ndoꞌo nij taꞌníí Yaꞌanj rihaan Yaꞌanj rej xta̱ꞌ, quiꞌya̱j Yaꞌanj, ne̱ Jesús me síí narqué chrej sa̱ꞌ canoco̱ꞌ nij taꞌníí Yaꞌanj, ne̱ nani̱i̱ nij soꞌ rihaan sayuun, ne̱ cavi̱i̱ sa̱ꞌ nij soꞌ quiꞌya̱j soꞌ chugua̱nj. Cheꞌé dan caꞌvej Yaꞌanj quira̱nꞌ Jesús sayuun ado̱nj. Ne̱ ma̱an cheꞌé sayuun quiranꞌ soꞌ roꞌ, cheꞌé dan me uun chij ndoꞌo soꞌ ado̱nj.

¹¹ Dan me se Taꞌni̱j Yaꞌanj me Jesús si̱j naquiꞌyaj sa̱ꞌ nimán yuvii̱, ne̱ taꞌni̱j Yaꞌanj me níꞌ yuvi̱i̱ cunuu sa̱ꞌ nimán rihaan Yaꞌanj cheꞌé Jesús, ne̱ cheꞌé dan ne gu̱un naꞌa̱j Jesús cata̱j soꞌ se vaa tinúú soꞌ do̱ꞌ, raꞌvij soꞌ do̱ꞌ, me níꞌ maꞌ.

¹² Dan me se cataj soꞌ a: Nata̱ꞌ ꞌu̱nj rihaan nij tinúj cheꞌé so̱ꞌ, ne̱ cachra̱j chraꞌ veꞌé aꞌmii cheꞌé so̱ꞌ asa̱ꞌ cunuu chre̱ꞌ núj rihaan so̱ꞌ a, cataj soꞌ, taj nana̱ no̱ rihaan Danj Yaꞌanj a.

¹³ Ne̱ caꞌmii uún soꞌ, cataj soꞌ a: Ga̱a̱ nucua̱j raj ni̱ꞌyaj ꞌu̱nj man Yaꞌanj ado̱nj, taj soꞌ a. Ne̱ guun cheꞌe̱ uún soꞌ, cataj soꞌ a: Ni̱ꞌyaj soj manj ga̱ nij taꞌníí Yaꞌanj síí rqué Yaꞌanj manj vi̱j, taj uún Jesús a.

¹⁴ Dan me se cheꞌé se vaa nee̱ vaa ton man níꞌ si̱j taꞌníí Yaꞌanj roꞌ, cheꞌé dan ase vaa maꞌa̱n níꞌ roꞌ, da̱nj gaa gue̱e̱ Jesús, ne̱ caꞌnaꞌ soꞌ, ne̱ caviꞌ soꞌ a. Ne̱ ga̱a caviꞌ soꞌ me se quiꞌyaj canaán soꞌ rihaan síí ꞌyaj aviꞌ níꞌ a. Dan me se Síí Chre̱e me síí ꞌyaj aviꞌ níꞌ, ne̱ Jesús me síí caꞌvee quiꞌyaj canaán cheꞌé yan tiri̱ꞌ soꞌ man Síí Chre̱e ado̱nj.

¹⁵ Ne̱ guun nucua̱j soꞌ nacaj soꞌ man níꞌ si̱j chéé rihaan cacunꞌ, ne̱ ga̱a rque̱ me se nda̱a chéé chuꞌviꞌ cavi̱ꞌ rmaꞌa̱n níꞌ cheꞌé se ina̱nj cacunꞌ quiꞌyaj níꞌ chugua̱nj. Tza̱j ne̱ cheꞌé se vaa caviꞌ Jesús cheꞌé níꞌ, cheꞌé dan güéj sayuun yoꞌ xráá níꞌ ne̱ navij cacunꞌ tumé níꞌ ado̱nj.

¹⁶ ꞌO̱ se ne caꞌna̱ꞌ Jesús ti̱nanii soꞌ man nij se‑mo̱zó Yaꞌanj rihaan sayuun maꞌ. Ma̱an se caꞌnaꞌ soꞌ ti̱nanii soꞌ man níꞌ taꞌni̱j taꞌnij siꞌno̱ síí cuꞌna̱j Abraham síí cayáán ga̱a naá rihaan sayuun ado̱nj.

¹⁷ Cheꞌé dan me naquiꞌyaj soꞌ man soꞌ nda̱a rá se vaa gue̱e̱ nij tinúú ya̱ soꞌ ado̱nj. Da̱nj quiꞌyaj soꞌ cheꞌé rej caꞌve̱e cunu̱u ꞌe̱e̱ rá soꞌ man níꞌ, ne̱ gu̱un soꞌ xrej sa̱ꞌ rá ata̱ suun noco̱o doj rihaan Yaꞌanj cheꞌé níꞌ, ne̱ gu̱un nucua̱j rá níꞌ ni̱ꞌyaj níꞌ man soꞌ, ne̱ tinavi̱j soꞌ cacunꞌ tumé níꞌ si̱j noco̱ꞌ man Yaꞌanj ado̱nj.

¹⁸ ꞌO̱ se cheꞌé se quiranꞌ maꞌa̱n ya̱ soꞌ sayuun se vaa guun rá Síí Chre̱e caxri̱i̱ Síí Chre̱e chrej chiꞌi̱i̱ rque soꞌ roꞌ, cheꞌé dan gu̱un nucua̱j soꞌ ra̱cuíj soꞌ man níꞌ ga̱a uun rá Síí Chre̱e caxri̱i̱ Síí Chre̱e chrej chiꞌi̱i̱ rque maꞌa̱n níꞌ ado̱nj.