Hebreos 12 - Triqui de San Juan Copala

Se̱ caꞌneꞌ rá níꞌ ga̱ suun nocoꞌ man Yaꞌanj a

¹ Ri̱i̱ uxrá nij síí amán rá niꞌya̱j man Yaꞌanj, nij síí ma̱n ga̱a naá, ne̱ nicu̱nꞌ nij soꞌ nu̱ꞌ anica̱j rej ma̱n níꞌ tihaa̱n nij soꞌ man níꞌ suun noco̱ꞌ xraan man Yaꞌanj a. Cheꞌé dan ta̱náj xco̱ níꞌ nu̱ꞌ se vaa ca̱ráán chrej rihaan níꞌ, ne̱ ta̱náj xco̱ níꞌ nu̱ꞌ chrej chiꞌi̱i̱ na̱nj á. ꞌO̱ se sayu̱u̱n ndoꞌo vaa ta̱náj xco̱ níꞌ chrej chiꞌi̱i̱ yoꞌ ado̱nj. Ne̱ dan me se ꞌo̱ quiꞌya̱j níꞌ nu̱ꞌ suun vaa rihaan níꞌ á. Dan me se ase vaa síí unánj tico tuviꞌ roꞌ, da̱nj ga̱a̱ níꞌ, ne̱ se̱ caꞌneꞌ rá níꞌ caꞌa̱nj níꞌ rej rihaan níꞌ maꞌ.

² Ma̱an se ꞌo̱ ni̱ꞌyaj níꞌ man Jesús á. Maꞌa̱n soꞌ me se síí cuchruj tucuáán amán rá niꞌya̱j man Yaꞌanj ado̱nj. Ne̱ veé soꞌ me síí quisíj quiꞌyaj ya̱ nu̱ꞌ suun cheꞌé rej canoco̱ꞌ níꞌ man Yaꞌanj ado̱nj. Dan me se neꞌen soꞌ se vaa rej riha̱a̱n gu̱un niha̱ꞌ uxrá rá nimán soꞌ sese quiꞌya̱j soꞌ se vaa me rá Yaꞌanj, ne̱ cheꞌé dan guun nucua̱j soꞌ caviꞌ soꞌ rihaan rcutze̱, ne̱ ne cara̱yaꞌa̱nj soꞌ se vaa caꞌngaꞌ naco̱o̱ yuvii̱ niꞌya̱j yuvii̱ man soꞌ maꞌ. Síj ga̱a ne̱ caꞌanj ca̱yáán soꞌ rej nuva̱ꞌ xrúún Yaꞌanj, chruun xlá sa̱ꞌ uxrá ado̱nj.

³ Cheꞌé dan me nuchru̱j ra̱a̱ soj se vaa ase vaa ta̱j riꞌyunj yuvii̱ tumé cacunꞌ man soj roꞌ, da̱nj táá riꞌyunj yuvii̱ tumé cacunꞌ man Jesucristó, tza̱j ne̱ ne caꞌne̱ꞌ rá soꞌ maꞌ. Ne̱ veé da̱nj quiꞌya̱j gue̱e̱ soj, ne̱ nuchru̱j ra̱a̱ soj, ne̱ se̱ ninaj nimán soj maꞌ.

⁴ Dan me se ꞌyaj ndoꞌo nij síí tumé cacunꞌ sayuun man soj, tza̱j ne̱ a̱j neꞌenj se vaa naꞌvej uxrá rá soj quiꞌya̱j soj cacunꞌ ga̱ nij soꞌ maꞌ. Ne̱ nda̱ꞌ se sayuun ꞌyaj nij soꞌ man nij soj, tza̱j ne̱ ne cavi̱ꞌ nij soj, quiꞌyaj nij soꞌ maꞌ.

⁵ Ne̱ a̱j niꞌyón soj chrej nucua̱j no̱ rihaan Danj Yaꞌanj, raj a. Dan me se ase vaa taꞌníí Yaꞌanj vaa soj, taj nana̱ yoꞌ chugua̱nj. Ne̱ nihánj me taj nana̱ yoꞌ a: Taꞌníj neꞌej, cu̱nó so̱ꞌ caꞌmi̱j á. Se̱ guun nachri̱ꞌ so̱ꞌ chrej nucua̱j tucuꞌyón Yaꞌanj Si̱j ꞌNi̱j Raꞌa man níꞌ mán so̱ꞌ maꞌ. Ne̱ se̱ quiriꞌ rá so̱ꞌ asa̱ꞌ caxríj yuva̱a̱ soꞌ mán so̱ꞌ maꞌ.

⁶ ꞌO̱ se Síí ꞌNi̱j Raꞌa man níꞌ me se tucuꞌyón soꞌ chrej nucua̱j man ta̱ranꞌ níꞌ si̱j ꞌe̱e̱ rá soꞌ man, ne̱ ayuun ta̱ranꞌ nij síí nacaj soꞌ gu̱un taꞌni̱j soꞌ ado̱nj. Nu̱ꞌ nana̱ yoꞌ me aꞌmii Danj Yaꞌanj ado̱nj.

⁷ Dan me se sese gu̱un nucua̱j soj ga̱a axríj yuva̱a̱ Yaꞌanj man soj, ne̱ cuna̱j ndoꞌo vaa yoꞌ na̱nj á. Dan me se ase ꞌyaj nij síí ma̱n chumii̱ nihánj ga̱ taꞌníí soꞌ roꞌ, da̱nj ꞌyaj Yaꞌanj ga̱ soj chugua̱nj. Ne̱ me xnii me ꞌo̱ soꞌ sese ne tucuꞌyón rej soꞌ chrej nucua̱j man soꞌ ga̱.

⁸ ꞌO̱ se rej níꞌ Yaꞌanj me se a̱j goꞌ soꞌ chrej nucua̱j man cunuda̱nj taꞌníí soꞌ cheꞌé cacunꞌ quiꞌyaj nij soꞌ ado̱nj. Sese ne yuva̱a̱ Rej níꞌ Yaꞌanj man soj, ne̱ né taꞌni̱j Yaꞌanj me soj ga̱a a̱ maꞌ. Dan me se ase vaa xnii scu̱ꞌ vaa soj ga̱a na̱nj á.

⁹ Dan me se vaa rej níꞌ síí ya̱nj rihaan chumii̱ nihánj, ne̱ tucuꞌyón nij soꞌ chrej nucua̱j man níꞌ da̱j quiꞌya̱j níꞌ, ne̱ aráj cochro̱j níꞌ rihaan nij soꞌ ado̱nj. Cheꞌé dan táá a̱ doj sese cuno̱ sa̱ꞌ níꞌ rihaan Yaꞌanj na̱nj ado̱nj. ꞌO̱ se Rej nimán ya̱ níꞌ me Yaꞌanj chugua̱nj. Dan me se ꞌo̱ ga̱a̱ iꞌna̱ꞌ nimán níꞌ, quiꞌya̱j soꞌ ado̱nj.

¹⁰ Dan me se ga̱a me níꞌ xnii roꞌ, do̱j tiempó me yoꞌ, ne̱ tiempó yoꞌ me se tucuꞌyón rej níꞌ man níꞌ da̱j quiꞌya̱j níꞌ cavi̱i̱ sa̱ꞌ níꞌ, nda̱a vaa me rá maꞌa̱n soꞌ ga̱ níꞌ na̱nj á. Tza̱j ne̱ Yaꞌanj roꞌ, sa̱ꞌ uxrá doj cavi̱i̱ sa̱ꞌ níꞌ, quiꞌya̱j se‑chre̱j soꞌ chrej sa̱ꞌ chugua̱nj. Dan me se ase vaa Yaꞌanj, sa̱ꞌ ina̱nj vaa soꞌ roꞌ, da̱nj ga̱a̱ sa̱ꞌ nimán maꞌa̱n níꞌ, quiꞌya̱j Yaꞌanj ado̱nj.

¹¹ Tza̱j ne̱ ya̱ uxrá, ne̱ ga̱a tiha̱j tucuꞌyón nii chrej nucua̱j man níꞌ, ne̱ sayu̱u̱n uxrá vaa nari̱ꞌ níꞌ da̱j quiꞌya̱j níꞌ, ne̱ ne niha̱ꞌ uxrá rá níꞌ maꞌ. ꞌO̱ se nanó rá níꞌ, ga̱a sayu̱u̱n vaa yoꞌ ado̱nj. Tza̱j ne̱ achén do̱j, ne̱ nuu nica̱ nimán níꞌ ꞌyaj chrej nucua̱j yoꞌ, ne̱ nuu xe̱j nimán níꞌ, ꞌyaj yoꞌ ado̱nj.

¹² Cheꞌé dan ase ꞌyaj síí naquiꞌyaj nica̱ raꞌa do̱ꞌ, tacóó do̱ꞌ, da̱nj quiꞌya̱j soj, naquiꞌya̱j nica̱ soj nimán soj sese vaa vi̱j nimán soj á.

¹³ Ne̱ ase ꞌyaj síí naquiꞌyaj sa̱ꞌ chrej cache̱e̱ yuvii̱ roꞌ, da̱nj quiꞌya̱j soj, nuchru̱j ra̱a̱ soj da̱j quiꞌya̱j nimán soj na̱nj á. Asa̱ꞌ quisíj quiꞌyaj soj da̱nj, ga̱a ne̱ caꞌve̱e se né si̱j noco̱ꞌ sa̱ꞌ chrej sa̱ꞌ me soj, tza̱j ne̱ se̱ tanáj nu̱ꞌ soj chrej sa̱ꞌ maꞌ. Tana̱nj cunu̱u sa̱ꞌ soj ado̱nj.

¹⁴ Dan me se te̱rquee̱ soj ga̱a̱ dínj ca̱yáán soj ga̱ cunuda̱nj yuvii̱ á. Ne̱ te̱rquee̱ soj cunu̱u sa̱ꞌ nimán soj nda̱a vaa maꞌa̱n Yaꞌanj na̱nj á. Taj a̱ ꞌó síí queneꞌe̱n Síí ꞌNi̱j Raꞌa man níꞌ sese se̱ cunu̱u sa̱ꞌ nimán soꞌ maꞌ.

¹⁵ Ne̱ tu̱mé soj man soj, ga̱a ne̱ se̱ gaa na̱nj ta̱náj ꞌo̱ tinúú soj se lu̱j quiꞌyaj Yaꞌanj ga̱ níꞌ á. Dan me se se̱ guun nachri̱ꞌ ꞌo̱ tinúú soj ni̱ꞌyaj soꞌ tinúú soꞌ maꞌ. Ta̱dó uxrá soj cheꞌé se ꞌo̱ síí nachriꞌ niꞌya̱j tinúú roꞌ, quiꞌya̱j quiri̱ꞌ rá queꞌe̱e̱ tinúú soj na̱nj ado̱nj.

¹⁶ Ne̱ se̱ gaa síí otoj ga̱ ꞌó yuvii̱ né ni̱ca̱ nij soꞌ me do̱ꞌ, síí taj se vaa taj se uun snana̱ Yaꞌanj do̱ꞌ maꞌ. ꞌO̱ se ase vaa síí cuꞌna̱j Esaú síí cayáán ga̱a naá vaa síí ꞌyaj da̱nj chugua̱nj. Dan me se síí chava̱ꞌ me síí cuꞌna̱j Esaú, tza̱j ne̱ nu̱ꞌ rasu̱u̱n sa̱ꞌ ta̱náj rej soꞌ rihaan soꞌ me se cutuꞌvéj soꞌ nu̱ꞌ rasu̱u̱n sa̱ꞌ yoꞌ rihaan tinúú soꞌ, cheꞌé se guun rá soꞌ rque̱ tinúú soꞌ do̱j se chá cha̱ soꞌ chugua̱nj.

¹⁷ Ne̱ a̱j neꞌen soj se vaa cachén doj, ga̱a ne̱ guun rá uún síí cuꞌna̱j Esaú cata̱j rej soꞌ se vaa naca̱j uún soꞌ se sa̱ꞌ yoꞌ, tza̱j ne̱ quináj u̱u̱n soꞌ na̱nj á. ꞌO̱ se taj se qui̱ꞌyáꞌ tu̱cuaꞌanj niꞌya̱ soꞌ nana̱ caꞌmii soꞌ a̱ maꞌ. Nda̱ꞌ se nda̱a taꞌvee maꞌa̱n soꞌ cheꞌé yan guun rá soꞌ quiri̱ꞌ soꞌ se sa̱ꞌ yoꞌ, tza̱j ne̱ ne quiri̱ꞌ soꞌ daj chiha̱a̱ míj a̱ maꞌ.

¹⁸ Dan me se cavii sa̱ꞌ soj doj rihaan nij síí israelitá vaa na̱nj chugua̱nj. Nij soꞌ me se cuchiꞌ nij soꞌ tacóó quij xca̱a̱n rej rqué Yaꞌanj snana̱ Yaꞌanj rihaan síí cuꞌna̱j Moisés, ne̱ queneꞌen nij soꞌ cacoꞌ yaꞌan raa̱ quij queneꞌen nij soꞌ rej rmi̱ꞌ ndoꞌo queneꞌen nij soꞌ nana̱ yuva̱a̱ queneꞌen nij soꞌ do̱ꞌ ado̱nj.

¹⁹ Da̱nj na̱nj uún, ne̱ cuno nij soꞌ chruun aꞌyánj do̱ꞌ, cuno nij soꞌ nana̱ caꞌmii maꞌa̱n Yaꞌanj rihaan nij soꞌ do̱ꞌ ado̱nj. Dan me se cuchuꞌviꞌ uxrá nij soꞌ, ne̱ rquee̱ nij soꞌ rihaan Yaꞌanj se vaa se̱ caꞌmii maꞌa̱n Yaꞌanj doj snana̱ Yaꞌanj rihaan nij soꞌ a.

²⁰ ꞌO̱ se nana̱ sayu̱u̱n ndoꞌo me nana̱ cataj xnaꞌanj Yaꞌanj rihaan nij soꞌ, rá nij soꞌ, ne̱ dan me se caꞌneꞌ Yaꞌanj suun rihaan nij soꞌ se vaa se yuvii̱ se nda̱a xcuu cache̱e̱ tacóó quij yoꞌ, ne̱ go̱ꞌ nij soꞌ yahij man yoꞌ nda̱a se cavi̱ꞌ yoꞌ cuaj, taj Yaꞌanj rihaan nij soꞌ a.

²¹ Dan me se cuchuꞌviꞌ ndoꞌo nij yuvii̱ niꞌya̱j nij yuvii̱ quij yoꞌ, ne̱ nda̱a maꞌa̱n Moisés cataj se vaa cuchuꞌviꞌ uxrá soꞌ ne̱ nda̱a riꞌíj maꞌa̱n man soꞌ, taj soꞌ a.

²² Tza̱j ne̱ ino̱ uxrá quiranꞌ nij soj ga̱ nij soꞌ na̱nj á. Dan me se xa̱ꞌ soj, tza̱j ne̱ caꞌve̱e cuchi̱ꞌ maꞌa̱n soj chumanꞌ Jerusalén chumanꞌ na̱j rej xta̱ꞌ na̱nj chugua̱nj. Ne̱ chumanꞌ Jerusalén na̱j rej xta̱ꞌ me se ase vaa chumanꞌ Jerusalén na̱j raa̱ quij cuꞌna̱j Sion rihaan chumii̱ nihánj roꞌ, vaa chumanꞌ yoꞌ ado̱nj. Ne̱ maꞌa̱n Yaꞌanj si̱j vaa iꞌna̱ꞌ yáán chumanꞌ Jerusalén na̱j rej xta̱ꞌ yoꞌ, ne̱ yoꞌ me rej ma̱n niꞌndaj ya̱ míj se‑mo̱zó Yaꞌanj, ne̱ navij ndoꞌo rá nij se‑mo̱zó Yaꞌanj chaꞌanj cheꞌé Yaꞌanj rej yoꞌ ado̱nj.

²³ Ne̱ dan me se cunu̱u chre̱ꞌ soj ga̱ ta̱ranꞌ nij taꞌníí Yaꞌanj, ne̱ ase vaa síí chava̱ꞌ vaa cunuda̱nj nij taꞌníí Yaꞌanj yoꞌ, ne̱ ya̱nj nij soꞌ ga̱ maꞌa̱n ya̱ Yaꞌanj rej xta̱ꞌ yoꞌ, ne̱ no̱ se‑chuvi̱i nij soꞌ rihaan yanj ta̱j rej xta̱ꞌ yoꞌ ado̱nj. Ne̱ caꞌve̱e cuchi̱ꞌ soj rihaan maꞌa̱n ya̱ Yaꞌanj si̱j aꞌneꞌ cacunꞌ cheꞌé cunuda̱nj yuvii̱ ado̱nj. Ne̱ caꞌve̱e cuchi̱ꞌ soj rej ya̱nj nimán nij síí a̱j cunuu sa̱ꞌ ina̱nj rihaan Yaꞌanj na̱nj á.

²⁴ Ne̱ caꞌve̱e gu̱un tuvi̱ꞌ soj ga̱ Jesús, ne̱ soꞌ roꞌ, me síí cuchruj tucuáán naca̱ cheꞌé níꞌ da̱j quiꞌya̱j níꞌ canoco̱ꞌ níꞌ man Yaꞌanj ado̱nj. Dan me se sa̱ꞌ a̱ doj aꞌmii ton cayanj man Jesús rihaan ton cayanj man síí cuꞌna̱j Abel quiꞌyaj tinúú soꞌ Caín na̱nj ado̱nj.

²⁵ Ta̱dó uxrá soj se̱ nachriꞌ soj ni̱ꞌyaj soj man Yaꞌanj si̱j narqué chrej sa̱ꞌ man soj maꞌ. ꞌO̱ se nij síí ne caꞌve̱j rá cuno̱ rihaan síí cataj xnaꞌanj snana̱ Yaꞌanj rihaan nij soꞌ rihaan chumii̱ nihánj ga̱a naá me se ne nani̱i̱ nij soꞌ maꞌ. Táá a̱ níꞌ si̱j ma̱n cuano̱, ne̱ aꞌmii síí nicu̱nꞌ rej xta̱ꞌ rihaan níꞌ, ne̱ sese nachri̱ꞌ níꞌ ni̱ꞌyaj níꞌ síí narqué chrej man níꞌ, ne̱ daj chiha̱a̱ míj se̱ nanii níꞌ a̱ maꞌ.

²⁶ Dan me se ga̱a caꞌmii Yaꞌanj ga̱a naá, ne̱ quinaa̱n ya̱ yoꞌóó, ne̱ cuano̱ nihánj me se ataꞌ tuꞌva soꞌ se vaa ꞌó yuún quina̱a̱n yoꞌóó a. Tza̱j ne̱ né ina̱nj yoꞌóó quina̱a̱n quiꞌya̱j soꞌ, tana̱nj rej xta̱ꞌ quina̱a̱n uún a.

²⁷ Ne̱ cheꞌé se “ꞌó yuún” quina̱a̱n yoꞌóó ga̱ xta̱ꞌ roꞌ, neꞌen níꞌ se vaa navi̱j rasu̱u̱n ruviꞌ, rasu̱u̱n quiꞌyaj Yaꞌanj, ne̱ quina̱j ina̱nj rasu̱u̱n ne ruviꞌ rasu̱u̱n xraan doj ado̱nj.

²⁸ Dan me se gu̱un níꞌ si̱j chiha̱nj rej sa̱ꞌ ndoꞌo rej gu̱un chij níꞌ ga̱ Yaꞌanj, ne̱ daj chiha̱a̱ míj se̱ quinaa̱n chumanꞌ yoꞌ a̱ maꞌ. Cheꞌé dan guun niꞌya̱j uxrá níꞌ rihaan Yaꞌanj, ne̱ cheꞌé dan ꞌo̱ quiꞌya̱j níꞌ se‑su̱u̱n Yaꞌanj, ne̱ cara̱nꞌ rá Yaꞌanj, quiꞌya̱j níꞌ á. Ne̱ cara̱a̱ gue̱e̱ uxrá níꞌ rihaan Yaꞌanj na̱nj á.

²⁹ ꞌO̱ se ase vaa ꞌo̱ yaꞌan vaa Yaꞌanj si̱j noco̱ꞌ níꞌ, ne̱ caca̱a̱ nu̱ꞌ se chiꞌi̱i̱, quiꞌya̱j soꞌ ado̱nj.