Hebreos 11 - Triqui de San Juan Copala

Da̱j ꞌyaj síí amán rá niꞌya̱j man Yaꞌanj a

¹ Sese ya̱ amán rá níꞌ niꞌya̱j níꞌ man Yaꞌanj, ne̱ uun ya̱ rá níꞌ se vaa quisi̱j ya̱ nana̱ cataꞌ tuꞌva soꞌ do̱ꞌ, se vaa ya̱ vaa rasu̱u̱n ne ruviꞌ niꞌya̱j níꞌ do̱ꞌ chugua̱nj.

² Ne̱ nij síí ma̱n ga̱a naá roꞌ, amán rá nij soꞌ niꞌya̱j nij soꞌ Yaꞌanj, ne̱ cheꞌé dan caranꞌ rá Yaꞌanj niꞌya̱j Yaꞌanj man nij soꞌ ado̱nj.

³ Xa̱ꞌ maꞌa̱n níꞌ, tza̱j ne̱ cheꞌé se amán rá níꞌ niꞌya̱j níꞌ Yaꞌanj roꞌ, cheꞌé dan xcaj níꞌ cuentá se vaa caꞌmii Yaꞌanj, ga̱a ne̱ guun nu̱ꞌ chumii̱ ga̱ xta̱ꞌ, quiꞌyaj soꞌ ado̱nj. ꞌO̱ se nica̱j Yaꞌanj rasu̱u̱n ne ruviꞌ, ne̱ quiꞌyaj Yaꞌanj nu̱ꞌ rasu̱u̱n ruviꞌ niꞌya̱j níꞌ ado̱nj.

⁴ Xa̱ꞌ síí cuꞌna̱j Abel, tza̱j ne̱ cheꞌé se amán rá soꞌ niꞌya̱j soꞌ Yaꞌanj roꞌ, cheꞌé dan sa̱ꞌ doj vaa se rqué soꞌ rihaan Yaꞌanj rihaan se vaa rqué tinúú soꞌ Caín ado̱nj. Ne̱ cheꞌé nij rasu̱u̱n rqué Abel rihaan Yaꞌanj roꞌ, cataj Yaꞌanj se vaa sa̱ꞌ vaa nimán Abel niꞌya̱j Yaꞌanj a. Dan me se cheꞌé se amán rá Abel niꞌya̱j soꞌ Yaꞌanj roꞌ, nda̱ꞌ se caviꞌ soꞌ, tza̱j ne̱ nda̱a cuano̱ aꞌmii soꞌ rihaan níꞌ na̱nj ado̱nj.

⁵ Xa̱ꞌ síí cuꞌna̱j Enoc, tza̱j ne̱ cheꞌé se amán rá soꞌ niꞌya̱j soꞌ Yaꞌanj roꞌ, cheꞌé dan vaa iꞌna̱ꞌ soꞌ cavii soꞌ caꞌanj soꞌ rej xta̱ꞌ rej ya̱nj Yaꞌanj, ne̱ ne caꞌve̱j rá Yaꞌanj cavi̱ꞌ soꞌ maꞌ. Dan me se nanoꞌ ndoꞌo nii man soꞌ, tza̱j ne̱ ne nari̱ꞌ nii man soꞌ a̱ maꞌ. Ma̱an se naxca̱j nu̱ꞌ Yaꞌanj man soꞌ caꞌanj soꞌ rej xta̱ꞌ na̱nj ado̱nj. ꞌO̱ se ga̱a ataa cavi̱i̱ soꞌ rej xta̱ꞌ, ne̱ cataj xnaꞌanj Yaꞌanj cheꞌé soꞌ se vaa aranꞌ uxrá rá Yaꞌanj niꞌya̱j Yaꞌanj man soꞌ ado̱nj.

⁶ Tza̱j ne̱ síí ne amán rá niꞌya̱j man Yaꞌanj roꞌ, daj chiha̱a̱ míj se̱ caranꞌ rá Yaꞌanj ni̱ꞌyaj Yaꞌanj man soꞌ a̱ maꞌ. ꞌO̱ se síí me rá cuchi̱ꞌ rihaan Yaꞌanj roꞌ, no̱ xcúún soꞌ cuchuma̱n rá soꞌ se vaa ya̱ vaa Yaꞌanj, ne̱ na̱ruꞌvee maꞌa̱n Yaꞌanj rihaan nij síí nano̱ꞌ ya̱ man Yaꞌanj na̱nj á.

⁷ Dan me se xa̱ꞌ síí cuꞌna̱j Noé, tza̱j ne̱ cheꞌé se amán rá soꞌ niꞌya̱j soꞌ Yaꞌanj roꞌ, cheꞌé dan, nda̱ꞌ se ataa queneꞌe̱n soꞌ da̱j ga̱a̱ sayuun quiꞌya̱j Yaꞌanj man chumii̱ nihánj, tza̱j ne̱ ma̱an cheꞌé se veꞌé cuno soꞌ nana̱ cataj xnaꞌanj Yaꞌanj rihaan soꞌ, ne̱ cheꞌé dan quiꞌyaj soꞌ rihoo xi̱j chéé rihaan na, ne̱ cheꞌé dan me nanii nij tucua̱ soꞌ rihaan sayuun yoꞌ ado̱nj. Ne̱ ma̱an cheꞌé se amán ya̱ rá soꞌ niꞌya̱j soꞌ Yaꞌanj, cheꞌé dan cutaꞌ soꞌ cacunꞌ ya̱ xráá nij yuvii̱ ma̱n rihaan chumii̱ se vaa ne caꞌve̱j rá nij yuvii̱ cuno̱ nij yuvii̱ snana̱ Yaꞌanj, ne̱ guun maꞌa̱n soꞌ síí sa̱ꞌ niꞌya̱j Yaꞌanj ado̱nj.

⁸ Dan me se síí cuꞌna̱j Abraham uún me se cheꞌé se amán rá soꞌ niꞌya̱j soꞌ Yaꞌanj roꞌ, cheꞌé dan cuno soꞌ rihaan Yaꞌanj ga̱a canacúún Yaꞌanj man soꞌ, ne̱ cavii soꞌ caꞌanj soꞌ rej rque̱ Yaꞌanj yoꞌóó gu̱un toꞌo̱j soꞌ vaa güii a. Dan me se a̱ doj ne queneꞌe̱n soꞌ me rej cuchi̱ꞌ soꞌ, tza̱j ne̱ ne gu̱un vi̱j rá soꞌ maꞌ. Ma̱an se cavii soꞌ caꞌanj soꞌ ado̱nj.

⁹ Dan me se ma̱an cheꞌé se amán rá soꞌ niꞌya̱j soꞌ Yaꞌanj roꞌ, ga̱a cuchiꞌ soꞌ rej cataꞌ tuꞌva Yaꞌanj se vaa gu̱un toꞌo̱j soꞌ, ne̱ toꞌo̱j ꞌó yuvii̱ me yoꞌóó yoꞌ, tza̱j ne̱ veé da̱nj quináj Abraham, ne̱ cutaꞌ soꞌ veꞌ mantá, ne̱ yáán soꞌ ga̱ taꞌníí soꞌ síí cuꞌna̱j Isaac do̱ꞌ, taꞌnij siꞌno̱ soꞌ síí cuꞌna̱j Jacob do̱ꞌ a. Ta̱ranꞌ nij soꞌ me síí gu̱un toꞌo̱j yoꞌ, cataj Yaꞌanj rihaan Abraham a.

¹⁰ Da̱nj quiꞌyaj Abraham, cuno soꞌ rihaan Yaꞌanj, cheꞌé se si̱j naꞌvi̱j ndoꞌo ca̱yáán ꞌó chumanꞌ noco̱o chumanꞌ na̱j rej xta̱ꞌ me soꞌ a. Ne̱ né ve̱ꞌ mantá u̱u̱n mán chumanꞌ yoꞌ maꞌ. ꞌO̱ se xraan ndoꞌo vaa tacóó nu̱ꞌ veꞌ na̱j chumanꞌ yoꞌ ado̱nj. ꞌO̱ se maꞌa̱n Yaꞌanj cuchruj chumanꞌ yoꞌ, ne̱ maꞌa̱n Yaꞌanj quiꞌyaj nu̱ꞌ chumanꞌ yoꞌ ado̱nj.

¹¹ Dan me se cheꞌé se amán rá Abraham niꞌya̱j soꞌ Yaꞌanj roꞌ, cheꞌé dan nda̱ꞌ se chana̱ itu̱un me nica̱ soꞌ chana̱ cuꞌna̱j Sará, ne̱ nda̱ꞌ se chii nga̱ me maꞌa̱n soꞌ, tza̱j ne̱ guun nucua̱j rá soꞌ man Yaꞌanj se vaa caꞌnga̱a̱ taꞌníí soꞌ a. ꞌO̱ se amán rá soꞌ se vaa Yaꞌanj me síí quiꞌya̱j nu̱ꞌ se vaa cataꞌ tuꞌva maꞌa̱n Yaꞌanj rihaan soꞌ ado̱nj.

¹² Dan me se nda̱ꞌ se da̱j doj cavi̱ꞌ síí chii nga̱ yoꞌ, tza̱j ne̱ xnaꞌanj ndoꞌo nij soꞌ, ne̱ ase vaa ri̱i̱ uxrá nij yatiꞌ ma̱n rej xta̱ꞌ roꞌ, da̱nj vaa guun ri̱i̱ uxrá nij tuvi̱ꞌ nij soꞌ, ne̱ dan me se ase vaa na̱j yoꞌóó chru̱u̱ tuꞌva na yaꞌa̱nj roꞌ, da̱nj vaa xnaꞌanj nij soꞌ na̱nj ado̱nj.

¹³ Dan me se ꞌo̱ amán rá ta̱ranꞌ nij soꞌ niꞌya̱j nij soꞌ Yaꞌanj nda̱a se caviꞌ ta̱ranꞌ nij soꞌ ado̱nj. Ne̱ ne quiri̱ꞌ maꞌa̱n nij soꞌ se vaa cataꞌ tuꞌva Yaꞌanj se vaa rque̱ Yaꞌanj rihaan nij tuvi̱ꞌ nij soꞌ maꞌ. Ma̱an se queneꞌen nij soꞌ se vaa vaa güii quiꞌya̱j Yaꞌanj cunuda̱nj yoꞌ, ne̱ cheꞌé dan guun niha̱ꞌ rá nij soꞌ na̱nj ado̱nj. Ne̱ cataj xnaꞌanj nij soꞌ se vaa né chiha̱nj nij soꞌ me chumii̱ nihánj maꞌ. Ma̱an se va̱j u̱u̱n nij soꞌ do̱j rihaan chumii̱ nihánj na̱nj ado̱nj.

¹⁴ Ne̱ síí aꞌmii da̱nj me se nataꞌ nij soꞌ se vaa nanoꞌ uxrá nij soꞌ ꞌó chumanꞌ gu̱un chiha̱nj nij soꞌ na̱nj ado̱nj.

¹⁵ Ne̱ sese guun rá nij soꞌ se vaa si̱j chiha̱nj chumii̱ nihánj me nij soꞌ, ne̱ gaa yaꞌnúj rihaan nij soꞌ na̱nica̱j nij soꞌ chiháán nij soꞌ chumanꞌ na̱j rihaan chumii̱ nihánj, tza̱j ne̱ ne gu̱un rá nij soꞌ da̱nj maꞌ.

¹⁶ ꞌO̱ se guun ndoꞌo rá nij soꞌ ca̱yáán nij soꞌ chumanꞌ sa̱ꞌ doj chumanꞌ na̱j rej xta̱ꞌ na̱nj á. Ne̱ cheꞌé dan ne naꞌa̱j Yaꞌanj ga̱a taj nij yuvii̱ yoꞌ se vaa Taꞌanj nij soꞌ me Yaꞌanj, cheꞌé se a̱j quiꞌyaj Yaꞌanj ꞌo̱ chumanꞌ noco̱o ca̱yáán nij soꞌ maꞌ.

¹⁷ Ne̱ cheꞌé se amán rá Abraham niꞌya̱j soꞌ Yaꞌanj roꞌ, cheꞌé dan ga̱a guun rá Yaꞌanj queneꞌe̱n Yaꞌanj sese xraan ya̱ nocoꞌ soꞌ man Yaꞌanj, ne̱ caꞌvej rá Abraham ticavi̱ꞌ soꞌ rihaan Yaꞌanj man o̱rúnꞌ taꞌníí soꞌ Isaac síí rqué maꞌa̱n Yaꞌanj man soꞌ a. Ne̱ Isaac me síí rqué Yaꞌanj guun taꞌni̱j Abraham, nda̱a vaa cataꞌ tuꞌva Yaꞌanj rihaan soꞌ se vaa ga̱a̱ taꞌníí soꞌ a.

¹⁸ Dan me se cataj xnaꞌanj Yaꞌanj rihaan Abraham se vaa cuma̱n ndoꞌo taꞌníí taꞌnij siꞌno̱ Abraham quiꞌya̱j Isaac yoꞌ a.

¹⁹ Ne̱ nda̱ꞌ se guun ndoꞌo rá Abraham caꞌnga̱a̱ taꞌníí taꞌnij siꞌno̱ soꞌ, tza̱j ne̱ caꞌvej rá soꞌ ticavi̱ꞌ soꞌ man Isaac rihaan Yaꞌanj na̱nj chugua̱nj. ꞌO̱ se guun rá soꞌ se vaa gu̱un nucua̱j Yaꞌanj cunu̱u iꞌna̱ꞌ uún yuvii̱ quiꞌya̱j Yaꞌanj asa̱ꞌ caviꞌ yuvii̱ a. Dan me se ya̱ uxrá, ne̱ da̱j doj se caviꞌ Isaac, quiꞌyaj Abraham, tza̱j ne̱ caráán Yaꞌanj rihaan soꞌ, ne̱ tanáj uún Yaꞌanj man Isaac rihaan Abraham a.

²⁰ Dan me se Isaac me se cheꞌé se amán rá soꞌ niꞌya̱j soꞌ Yaꞌanj roꞌ, cheꞌé dan cataj soꞌ se vaa quiꞌya̱j Yaꞌanj se lu̱j cheꞌé ro̱j taꞌníí soꞌ síí cuꞌna̱j Jacob ga̱ Esaú a. Ne̱ cataj xnaꞌanj soꞌ da̱j ga̱a̱ quira̱nꞌ ro̱j taꞌníí soꞌ rej rihaan ro̱j soꞌ a.

²¹ Dan me se Jacob me se cheꞌé se amán rá soꞌ niꞌya̱j soꞌ Yaꞌanj roꞌ, cheꞌé dan ga̱a nichrunꞌ cavi̱ꞌ soꞌ, ne̱ cataj soꞌ se vaa quiꞌya̱j Yaꞌanj se lu̱j cheꞌé ro̱j taꞌníí síí cuꞌna̱j José, ne̱ dan me se ruꞌmaan soꞌ chruun garroté nica̱j soꞌ chéé soꞌ rihaan yoꞌóó, ne̱ caráj gue̱e̱ ndoꞌo soꞌ rihaan Yaꞌanj a.

²² Ne̱ dan me se José me se cheꞌé se amán rá soꞌ niꞌya̱j soꞌ Yaꞌanj, cheꞌé dan ga̱a nichrunꞌ cavi̱ꞌ soꞌ, ne̱ caꞌneꞌ soꞌ suun se vaa asa̱ꞌ cavii nij síí israelitá yoꞌóó Egiptó, ne̱ quiri̱i̱ nij soꞌ cúú man maꞌa̱n soꞌ ni̱caj nij soꞌ caꞌa̱nj nij soꞌ, cataj soꞌ rihaan nij soꞌ a.

²³ Dan me se Moisés me se cheꞌé se amán rá ro̱j rej Moisés niꞌya̱j ro̱j soꞌ Yaꞌanj roꞌ, cheꞌé dan vaꞌnu̱j ya̱ yavii caxríj yuve̱ ro̱j soꞌ man Moisés ga̱a caꞌngaa soꞌ a. Da̱nj quiꞌyaj ro̱j soꞌ cheꞌé se queneꞌen ro̱j soꞌ se vaa veꞌé ndoꞌo vaa neꞌej yoꞌ a. Ne̱ ne cuchuꞌvi̱ꞌ ro̱j soꞌ rihaan síí nica̱j suun rey síí caꞌneꞌ suun se vaa cavi̱ꞌ nu̱ꞌ taꞌníí nij síí israelitá neꞌej sno̱ꞌo cunii a̱ maꞌ.

²⁴ Cheꞌé se amán rá maꞌa̱n Moisés niꞌya̱j soꞌ Yaꞌanj roꞌ, cheꞌé dan ga̱a cachij soꞌ, ne̱ ne caꞌve̱j rá soꞌ cata̱j yuvii̱ se vaa taꞌnij siꞌno̱ síí nica̱j suun rey cuꞌna̱j Faraón me soꞌ maꞌ.

²⁵ ꞌO̱ se caꞌnéé nimán soꞌ quira̱nꞌ soꞌ sayuun ga̱ nij yuvii̱ noco̱ꞌ man Yaꞌanj na̱nj ado̱nj. ꞌO̱ se sa̱ꞌ a̱ doj vaa ca̱nocóꞌ man Yaꞌanj, rá soꞌ, ne̱ nij vaa gu̱un niha̱ꞌ ráꞌ qui̱ꞌyáꞌ cacunꞌ rihaan Yaꞌanj ya̱j vaa iꞌna̱ꞌ rihaan chumii̱ nihánj, rá soꞌ a.

²⁶ Dan me se vaa yuꞌvee ndoꞌo nó sayuun quira̱nꞌ soꞌ cheꞌé Síí Caꞌne̱j Yaꞌanj Ti̱nanii man Yuvii̱ rihaan Sayuun, ne̱ taj yuꞌvee nó ta̱ranꞌ nij rasu̱u̱n sa̱ꞌ tuꞌve̱e̱ ndoꞌo ma̱n yoꞌóó Egiptó, rá soꞌ, ne̱ veꞌé a̱ doj ca̱nocóꞌ man Yaꞌanj, rá Moisés a. ꞌO̱ se a̱j nuchruj ra̱a̱ soꞌ cheꞌé nu̱ꞌ rasu̱u̱n sa̱ꞌ rque̱ Yaꞌanj man soꞌ rej riha̱a̱n ado̱nj.

²⁷ Cheꞌé se amán rá soꞌ niꞌya̱j soꞌ Yaꞌanj, cheꞌé dan tanáj soꞌ yoꞌóó Egiptó caꞌanj soꞌ, ne̱ ne cuchuꞌvi̱ꞌ soꞌ da̱j quiꞌya̱j síí nica̱j suun rey man soꞌ maꞌ. Nda̱ꞌ se ne ruviꞌ Yaꞌanj niꞌya̱j yuvii̱, tza̱j ne̱ ase ꞌyaj síí ruviꞌ nicu̱nꞌ Yaꞌanj rihaan roꞌ, da̱nj quiꞌyaj Moisés, ꞌo̱ canocoꞌ soꞌ man Yaꞌanj ado̱nj.

²⁸ Cheꞌé se amán rá soꞌ niꞌya̱j soꞌ Yaꞌanj, cheꞌé dan cuchruj soꞌ chaꞌanj cuꞌna̱j Pascuá navij rá nij yuvii̱ israelitá, ne̱ caꞌneꞌ soꞌ suun rihaan nij yuvii̱ israelitá se vaa caxri̱i̱ nij soꞌ ton matzinj tuꞌva taꞌyaa rihaan tucuá nij soꞌ, ga̱a ne̱ se̱ gaa na̱nj cavi̱ꞌ taꞌníí nij soꞌ síí chava̱ꞌ quiꞌya̱j se‑mo̱zó Yaꞌanj síí ꞌyaj aviꞌ ndoꞌo yuvii̱, taj Moisés rihaan nij soꞌ a.

²⁹ Dan me se nij yuvii̱ israelitá me se cheꞌé se amán rá nij soꞌ niꞌya̱j nij soꞌ Yaꞌanj roꞌ, cheꞌé dan guun nucua̱j nij soꞌ cachén nij soꞌ tanu̱u̱ na yaꞌa̱nj cuꞌna̱j Na Yaꞌa̱nj Veꞌe̱j a. Ne̱ xꞌneꞌ tanu̱u̱ na yaꞌa̱nj yoꞌ, ne̱ quináj yoꞌóó naco̱o̱ ina̱nj cachén nij soꞌ, quiꞌyaj Yaꞌanj a. Tza̱j ne̱ ga̱a guun rá nij síí ma̱n yoꞌóó Egiptó cache̱n nij soꞌ, ne̱ canó xráá nij soꞌ, quiꞌyaj na yoꞌ a.

³⁰ Ne̱ cheꞌé se amán rá nij yuvii̱ israelitá niꞌya̱j nij soꞌ Yaꞌanj roꞌ, cheꞌé dan cachén chi̱j ya̱ güii tucuachriin nij soꞌ nu̱ꞌ anica̱j chumanꞌ cuꞌna̱j Jericó, ne̱ canee nu̱ꞌ chingá nicu̱nꞌ nu̱ꞌ anica̱j tuꞌva chumanꞌ yoꞌ, quiꞌyaj Yaꞌanj a.

³¹ Dan me se cheꞌé se amán rá chana̱ niha̱ꞌ rá ga̱ chii, chana̱ cuꞌna̱j Rahab niꞌya̱j noꞌ Yaꞌanj roꞌ, cheꞌé dan ne cavi̱ꞌ noꞌ ga̱ ꞌó nij síí ma̱n chiháán noꞌ síí ne caꞌve̱j rá cuno̱ rihaan Yaꞌanj maꞌ. Ma̱an se veꞌé nacaj noꞌ man ro̱j síí israelitá síí caꞌanj ni̱ꞌyaj yuve̱ da̱j vaa nu̱ꞌ chiháán noꞌ, ne̱ ne quiꞌya̱j noꞌ sayuun man ro̱j soꞌ a.

³² Ne̱ me ꞌó nana̱ cata̱j xnaꞌanj ꞌu̱nj rihaan nij soj, rá soj ga̱. ꞌO̱ se cachi̱in orá sese me rá ꞌu̱nj cata̱j xnaꞌanj ꞌu̱nj cheꞌé síí cuꞌna̱j Gedeón do̱ꞌ, Barac do̱ꞌ, Sansón do̱ꞌ, Jefté do̱ꞌ, David do̱ꞌ, Samuel do̱ꞌ, ꞌó ta̱ranꞌ nij síí nataꞌ snana̱ Yaꞌanj ga̱a naá do̱ꞌ na̱nj chugua̱nj.

³³ Dan me se cheꞌé se amán rá nij soꞌ niꞌya̱j nij soꞌ Yaꞌanj roꞌ, cheꞌé dan quiꞌyaj canaán nij soꞌ rihaan síí nica̱j suun rey do̱ꞌ, caꞌneꞌ sa̱ꞌ nij soꞌ cacunꞌ cheꞌé yuvii̱ do̱ꞌ, quiriꞌ nij soꞌ se vaa cataꞌ tuꞌva Yaꞌanj quiri̱ꞌ ya̱ nij soꞌ do̱ꞌ, guun nucua̱j nij soꞌ caráán nij soꞌ tuꞌva chuvaa̱ do̱ꞌ,

³⁴ tinaꞌáj nij soꞌ yaꞌan yuva̱a̱ se̱ gaa na̱nj caca̱a̱ nij soꞌ quiꞌya̱j yaꞌan do̱ꞌ, nanii nij soꞌ rihaan yuvii̱ nica̱j neê espadá me rá ticavi̱ꞌ man nij soꞌ do̱ꞌ, nariꞌ nucuaj nij soꞌ quiꞌyaj Yaꞌanj ga̱a ninaj nij soꞌ do̱ꞌ, guun nucua̱j nij soꞌ quiꞌyaj canaán nij soꞌ rihaan síí ma̱n ꞌó chumanꞌ síí cunuꞌ ga̱ nij soꞌ do̱ꞌ, tucunánj nij soꞌ man xꞌneꞌ tanuu ꞌnaꞌ ꞌó chumanꞌ me rá cunu̱ꞌ ga̱ nij soꞌ do̱ꞌ ado̱nj.

³⁵ Ne̱ vaa nij chana̱ amán rá niꞌya̱j man Yaꞌanj se vaa ya̱ cunu̱u iꞌna̱ꞌ uún tuviꞌ nij chana̱ síí caviꞌ, ne̱ ya̱ uxrá cunuu iꞌna̱ꞌ uún tuviꞌ nij chana̱ yoꞌ a. Ne̱ ꞌó taꞌa̱j nij síí amán rá niꞌya̱j man Yaꞌanj roꞌ, taꞌaa nii numíj nii man nij soꞌ, ne̱ goꞌ uxrá nii man nij soꞌ nda̱a se caviꞌ nij soꞌ ado̱nj. Dan me se caviꞌ nij soꞌ cheꞌé se ne caꞌve̱j rá nij soꞌ cata̱j nij soꞌ se vaa nij vaa Yaꞌanj a. ꞌO̱ se sa̱ꞌ doj cavi̱ꞌ nij soꞌ cheꞌé Yaꞌanj, ne̱ veꞌé doj cunu̱u iꞌna̱ꞌ uún nij soꞌ vaa güii quiꞌya̱j Yaꞌanj, rá nij soꞌ a.

³⁶ Ne̱ ꞌó taꞌa̱j nij soꞌ me se caꞌngaꞌ naco̱o̱ yuvii̱ niꞌya̱j yuvii̱ man nij soꞌ, ne̱ goꞌ yuvii̱ cuartá xráá nij soꞌ, ne̱ ꞌó taꞌa̱j nij soꞌ me se numíj nii agaꞌ ne̱ꞌ raꞌa nij soꞌ, ne̱ caxríj nii tagaꞌ man nij soꞌ chugua̱nj.

³⁷ ꞌÓ taꞌa̱j nij soꞌ caviꞌ, quiꞌyaj yuvii̱ ga̱a goꞌ nij yuvii̱ yahij man nij soꞌ a. Ne̱ taꞌa̱j nij soꞌ roꞌ, caꞌneꞌ agaꞌ sera̱a̱ aꞌneꞌ chruun man nij soꞌ a. Goꞌ yuvii̱ neê espadá man taꞌa̱j nij soꞌ a. ꞌÓ taꞌa̱j nij síí sa̱ꞌ yoꞌ me se cachéé u̱u̱n nij soꞌ nda̱a yoꞌ tiꞌyaj, ne̱ taj va̱j veꞌ sa̱ꞌ cayáán nij soꞌ maꞌ. Ne̱ ina̱nj nuj matzinj do̱ꞌ, nuj tana do̱ꞌ, cunuû nij soꞌ ado̱nj. Ne̱ síí nique̱ uxrá me nij soꞌ, ne̱ síí cachiin ndoꞌo rasu̱u̱n rihaan guun uún nij soꞌ, ne̱ síí nij uxrá quiranꞌ guun uún nij soꞌ, quiꞌyaj yuvii̱ na̱nj ado̱nj.

³⁸ Dan me se si̱j sa̱ꞌ uxrá me nij soꞌ, ne̱ ne nó xcúún nij yuvii̱ ma̱n rihaan chumii̱ nihánj ca̱yáán nij soꞌ ga̱ nij yuvii̱ nihánj a̱ maan ado̱nj. Dan me se táá riꞌyunj yuvii̱ man nij soꞌ rihaan chumii̱ nihánj, ne̱ dan me se va̱j nij soꞌ rej tacaan do̱ꞌ, rej quij do̱ꞌ, atúj nij soꞌ rque yuꞌuj ta̱j yuvej do̱ꞌ, rque yuꞌuj ta̱j rque yoꞌóó do̱ꞌ, ꞌyaj nij yuvii̱ yoꞌ na̱nj ado̱nj.

³⁹ Ne̱ dan me se nda̱ꞌ se caránꞌ rá Yaꞌanj niꞌya̱j Yaꞌanj man cunuda̱nj nij soꞌ cheꞌé se amán rá nij soꞌ niꞌya̱j nij soꞌ Yaꞌanj, tza̱j ne̱ ne quiri̱ꞌ nij soꞌ nu̱ꞌ se vaa cataꞌ tuꞌva Yaꞌanj se vaa quiꞌya̱j Yaꞌanj cheꞌé nij síí noco̱ꞌ man soꞌ maꞌ.

⁴⁰ ꞌO̱ se a̱j neꞌen Yaꞌanj se vaa sa̱ꞌ doj ga̱a̱ suun quiꞌya̱j níꞌ cheꞌé soꞌ, ne̱ cheꞌé dan ne caꞌve̱j rá Yaꞌanj cunu̱u sa̱ꞌ ina̱nj nij síí cumán ga̱a naá yoꞌ rihaan Yaꞌanj, ga̱a ataa cunu̱u sa̱ꞌ maꞌa̱n níꞌ rihaan soꞌ maꞌ. ꞌO̱ se cheꞌé níꞌ me guun ra̱a̱n quiꞌya̱j Yaꞌanj nu̱ꞌ se sa̱ꞌ cheꞌé nij síí cumán ga̱a naá yoꞌ ado̱nj.