Hebreos 10 - Triqui de San Juan Copala

¹ ꞌO̱ se ase vaa nij se sa̱ꞌ queneꞌe̱n níꞌ rej riha̱a̱n vaa stucua̱nj Moisés, tza̱j ne̱ né maꞌa̱n nij se sa̱ꞌ yoꞌ me tucuáán yoꞌ maꞌ. ꞌO̱ se ticaviꞌ nii man xcuu, ne̱ rqué nii xcuu yoꞌ rihaan Yaꞌanj, ne̱ ina̱nj da̱nj ꞌyaj nii ꞌo̱ ꞌo̱ yoꞌ na̱nj ado̱nj. Dan me se taj güii ꞌo̱ cunu̱u sa̱ꞌ ya̱ nij síí rqué rasu̱u̱n yoꞌ rihaan Yaꞌanj maꞌ.

² Dan me se sese ya̱ ya̱ xꞌnéj cacunꞌ xráá yuvii̱ rqué rasu̱u̱n yoꞌ, ne̱ ne rqué uún nij soꞌ rasu̱u̱n yoꞌ asuun tza̱j maꞌ. ꞌO̱ se̱ a̱j rqué nij soꞌ rasu̱u̱n rihaan Yaꞌanj, ne̱ a̱j xꞌnéj cacunꞌ xráá nij soꞌ, ne̱ se̱ xcaj nij soꞌ cuentá cheꞌé doj cacunꞌ tumé nij soꞌ asuun tza̱j maꞌ. Tza̱j ne̱ ne vaa da̱nj a̱ maan ado̱nj.

³ Dan me se cheꞌé xcuu caviꞌ rqué nij soꞌ rihaan Yaꞌanj roꞌ, cheꞌé dan ꞌo̱ ꞌo̱ yoꞌ me se nanuj rá nij soꞌ se vaa si̱j tumé ya̱ cacunꞌ me nij soꞌ na̱nj ado̱nj.

⁴ ꞌO̱ se taj se qui̱ꞌyáꞌ navi̱j cacunꞌ tumé yuvii̱ quiꞌya̱j ton man scúj toró do̱ꞌ, ton man tana do̱ꞌ a̱ maꞌ.

⁵ Cheꞌé dan caꞌnaꞌ Cristó rihaan chumii̱ nihánj, ne̱ caꞌmii soꞌ rihaan Yaꞌanj, cataj soꞌ a: Taj se uun xcuu rque̱ yuvii̱ cavi̱ꞌ rihaan so̱ꞌ a̱ maꞌ. Taj se uun nu̱ꞌ rasu̱u̱n rque̱ yuvii̱ rihaan so̱ꞌ a̱ maꞌ. Tza̱j ne̱ nee̱ manj roꞌ, vaa se uun rihaan so̱ꞌ, ne̱ cheꞌé dan quiꞌyáá so̱ꞌ nee̱ manj ado̱nj.

⁶ Dan me se ne niha̱ꞌ rá so̱ꞌ niꞌya̱j so̱ꞌ xcuu acaa nu̱ꞌ do̱ꞌ, rasu̱u̱n rqué yuvii̱ cheꞌé cacunꞌ do̱ꞌ maꞌ.

⁷ Dan me se cataj ꞌu̱nj a: “Veé ꞌu̱nj nicunꞌ rihaan so̱ꞌ na̱nꞌ. Rihaan dáán so̱ꞌ yanj libró nó nana̱ aꞌmii cheꞌé ꞌu̱nj, se vaa qui̱ꞌyáá ꞌu̱nj nu̱ꞌ se vaa me rá so̱ꞌ qui̱ꞌyáj, Ata̱j”, taj ꞌu̱nj rihaan so̱ꞌ a. Da̱nj taj nana̱ no̱ rihaan Danj Yaꞌanj, nana̱ caꞌmii maꞌa̱n Cristó rihaan Yaꞌanj a.

⁸ Dan me se cataj soꞌ se vaa xcuu rqué yuvii̱ rihaan Yaꞌanj do̱ꞌ, ꞌnúú rqué yuvii̱ rihaan Yaꞌanj do̱ꞌ, xcuu acaa nu̱ꞌ do̱ꞌ, rasu̱u̱n rqué yuvii̱ cheꞌé cacunꞌ do̱ꞌ, taj se uun rihaan Yaꞌanj maꞌ. Ne̱ ne niha̱ꞌ rá Yaꞌanj ni̱ꞌyaj Yaꞌanj rasu̱u̱n yoꞌ nda̱ꞌ se taj stucua̱nj Moisés se vaa no̱ xcúún yuvii̱ quiꞌya̱j yuvii̱ da̱nj na̱nj ado̱nj.

⁹ Ga̱a ne̱ cataj uún soꞌ a: “Veé ꞌu̱nj nicunꞌ rihaan so̱ꞌ, ꞌnaꞌ qui̱ꞌyáá ꞌu̱nj nu̱ꞌ se vaa me rá so̱ꞌ qui̱ꞌyáj á”, taj uún soꞌ a. Veé dan me tinavij soꞌ tucuáán nga̱ yoꞌ, ne̱ vaa tucuáán naca̱ cuchruj soꞌ canoco̱ꞌ níꞌ a.

¹⁰ Ne̱ cheꞌé se yu̱u̱n cheꞌe̱ nagoꞌ Jesucristó man maꞌa̱n soꞌ rihaan Yaꞌanj nda̱a vaa guun rá Yaꞌanj quiꞌya̱j soꞌ roꞌ, cheꞌé dan a̱j cunuu sa̱ꞌ nimán níꞌ rihaan Yaꞌanj ado̱nj.

¹¹ Ne̱ xa̱ꞌ ta̱ranꞌ nij xrej, tza̱j ne̱ ꞌo̱ nicunꞌ nij soꞌ ꞌyaj nij soꞌ se‑su̱u̱n Yaꞌanj da̱j a̱ güii, ne̱ na̱nj xcuu do̱ꞌ, ꞌnúú do̱ꞌ, rqué nij soꞌ rihaan Yaꞌanj, tza̱j ne̱ taj se qui̱ꞌyáꞌ xꞌne̱e̱ cacunꞌ xráá yuvii̱ quiꞌya̱j rasu̱u̱n yoꞌ maꞌ.

¹² Tza̱j ne̱ Cristó me se o̱rúnꞌ yu̱u̱n caꞌvej soꞌ cavi̱ꞌ soꞌ cheꞌé nij yuvii̱, ne̱ ꞌo̱ yu̱u̱n caviꞌ soꞌ cheꞌé nu̱ꞌ cacunꞌ ata̱ nij yuvii̱, ga̱a ne̱ caꞌanj ca̱yáán soꞌ xꞌnúú Yaꞌanj rej nuva̱ꞌ Yaꞌanj ado̱nj.

¹³ Ne̱ cuano̱ nihánj me se naꞌvi̱j u̱u̱n Cristó nda̱a se quiꞌya̱j canaán Yaꞌanj rihaan ta̱ranꞌ nij síí ta̱j riꞌyunj man Cristó, ga̱a ne̱ quiri̱i̱ taꞌngaꞌ Cristó rihaan ta̱ranꞌ nij soꞌ ado̱nj.

¹⁴ ꞌO̱ se o̱rúnꞌ yu̱u̱n nagoꞌ soꞌ man maꞌa̱n soꞌ rihaan Yaꞌanj, ne̱ cheꞌé dan quisíj suun cunu̱u sa̱ꞌ nimán nij síí noco̱ꞌ man Yaꞌanj nu̱ꞌ cavii nu̱ꞌ caꞌanj na̱nj á.

¹⁵ Ne̱ maꞌa̱n Nimán Yaꞌanj taj xnaꞌanj rihaan níꞌ uún da̱j quira̱nꞌ níꞌ na̱nj á. Asino ya̱a̱n cataj soꞌ a:

¹⁶ Dan me se ino̱ doj ga̱a̱ nana̱ naca̱ yoꞌ nana̱ tu̱cuꞌyón ꞌu̱nj rihaan nij soꞌ asa̱ꞌ quisíj güii yoꞌ ado̱nj. ꞌO̱ se cune̱ꞌ ꞌu̱nj stucua̱nj ꞌu̱nj nimán nij soꞌ, ne̱ caꞌne̱j ꞌu̱nj letrá nana̱ yoꞌ raa̱ nij soꞌ da̱j quiꞌya̱j nij soꞌ, ne̱ queneꞌe̱n maꞌa̱n nij soꞌ quiꞌya̱j nij soꞌ suun sa̱ꞌ ado̱nj. Da̱nj taj Síí ꞌNi̱j Raꞌa man níꞌ a.

¹⁷ Ga̱a ne̱ cataj uún soꞌ a: A̱ doj se̱ cunuû rá ꞌu̱nj cacunꞌ tumé nij soꞌ do̱ꞌ, se vaa ne uno nij soꞌ stucua̱nj do̱ꞌ maꞌ, taj uún Nimán Yaꞌanj a.

¹⁸ Ne̱ cheꞌé se a̱j tinavij Yaꞌanj cacunꞌ tumé níꞌ roꞌ, cheꞌé dan caꞌneꞌ rá níꞌ ga̱ suun rqué rasu̱u̱n rihaan Yaꞌanj cheꞌé cacunꞌ na̱nj ado̱nj.

No̱ xcúún níꞌ canoco̱ꞌ xraan níꞌ man Yaꞌanj a

¹⁹ Dan me se cheꞌé se cayanj ton man Jesús roꞌ, cheꞌé dan nucua̱j rá níꞌ catu̱u̱ níꞌ rá Rej Gue̱e̱ Ya̱ Doj rej ya̱nj maꞌa̱n Yaꞌanj, tinu̱j, nocoj.

²⁰ ꞌO̱ se caviꞌ nee̱ man Jesús, ne̱ ina̱nj da̱nj caꞌnúj soꞌ chrej naca̱ rihaan níꞌ catu̱u̱ níꞌ rihaan Yaꞌanj, ne̱ vaa iꞌna̱ꞌ Jesús cuano̱ ne̱ maꞌa̱n soꞌ me chrej yoꞌ na̱nj ado̱nj.

²¹ Ne̱ xrej sa̱ꞌ uxrá me uún Jesús cheꞌé níꞌ si̱j noco̱ꞌ man Yaꞌanj na̱nj á.

²² Cheꞌé dan vaa yaꞌnúj rihaan níꞌ cuchi̱ꞌ níꞌ rihaan Yaꞌanj, ne̱ cheꞌé se amán rá níꞌ niꞌya̱j níꞌ man Cristó, cheꞌé dan gu̱un ya̱ uxrá rá níꞌ se vaa caꞌve̱e canoco̱ꞌ sa̱ꞌ níꞌ man Yaꞌanj a. Cheꞌé se quisíj nanó rá níꞌ cheꞌé cacunꞌ tumé níꞌ, ne̱ cunuu sa̱ꞌ ya̱ nimán níꞌ, ga̱a canocoꞌ níꞌ man Cristó na̱nj chugua̱nj. Ne̱ síí naruvii rihaan Yaꞌanj me níꞌ, da̱j se vaa yuvii̱ naruvii nu̱ꞌ nee̱ man rque na sa̱ꞌ na̱nj ado̱nj.

²³ Ne̱ ꞌo̱ cuchuma̱n rá níꞌ se vaa ya̱ cavi̱i̱ sa̱ꞌ níꞌ, ne̱ se̱ guun vi̱j rá níꞌ daj chiha̱a̱ míj maꞌ. ꞌO̱ se vaa cheꞌé ga̱a̱ nucua̱j rá níꞌ man síí cataꞌ tuꞌva se vaa sa̱ꞌ quiꞌya̱j soꞌ cheꞌé níꞌ na̱nj á.

²⁴ Ne̱ xca̱j níꞌ cuentá cheꞌé tinúú níꞌ da̱j quiꞌya̱j níꞌ ne̱ sa̱ꞌ doj cunu̱u ꞌe̱e̱ rá nij tinúú níꞌ man tuviꞌ soꞌ, ne̱ doj a̱ quiꞌya̱j nij tinúú níꞌ suun sa̱ꞌ cheꞌé Yaꞌanj ado̱nj.

²⁵ Ne̱ se̱ tanáj níꞌ tucuáán nuu chre̱ꞌ níꞌ ga̱ tinúú níꞌ maꞌ. ꞌO̱ se vaa yuvii̱ ne nocoꞌ tucuáán yoꞌ, tza̱j ne̱ no̱ xcúún soj nago̱ꞌ soj chrej nucua̱j man tinúú soj ga̱a nuu chre̱ꞌ soj á. Ne̱ ya̱j roꞌ, doj a̱ cunu̱u chre̱ꞌ soj, cheꞌé se neꞌen soj se vaa nichrunꞌ quisi̱j güii caꞌna̱ꞌ uún Cristó rihaan chumii̱ nihánj na̱nj ado̱nj.

²⁶ ꞌO̱ se sese a̱j canocoꞌ níꞌ nana̱ ya̱ nana̱ nariꞌ níꞌ, ga̱a ne̱ sese quiri̱i̱ nimán níꞌ quiꞌya̱j níꞌ cacunꞌ, ne̱ taj va̱j ꞌó se vaa quiꞌya̱j níꞌ ga̱a ne̱ tinavi̱j uún Yaꞌanj cacunꞌ tumé níꞌ a̱ maꞌ.

²⁷ Dan me se nique̱ níꞌ, ne̱ vaa güii caꞌne̱ꞌ Yaꞌanj cacunꞌ cheꞌé níꞌ, ne̱ ga̱a̱ ꞌo̱ yaꞌan, ne̱ gu̱un niha̱ꞌ uxrá rá yaꞌan yoꞌ cha̱ yaꞌan yoꞌ man nij síí ta̱j riꞌyunj man Yaꞌanj na̱nj ado̱nj.

²⁸ Xa̱ꞌ nij síí noco̱ꞌ stucua̱nj Moisés, tza̱j ne̱ sese ꞌyaj ꞌo̱ nij soꞌ cacunꞌ, ne̱ sese vaa vi̱j vaꞌnu̱j síí queneꞌen se vaa ꞌyaj soꞌ cacunꞌ, ne̱ se̱ cunuu ꞌe̱e̱ rá nii man soꞌ a̱ maꞌ. Tana̱nj aviꞌ soꞌ cuaj, ꞌyaj nii na̱nj á.

²⁹ Ne̱ nij uxrá doj ga̱a̱ sayuun quira̱nꞌ síí ta̱j riꞌyunj man maꞌa̱n Taꞌníí Yaꞌanj ado̱nj. ꞌO̱ se ton man Cristó roꞌ, quiꞌyaj cunuu sa̱ꞌ nimán níꞌ rihaan Yaꞌanj ne̱ ꞌo̱ canocoꞌ níꞌ chrej sa̱ꞌ cuchruj Yaꞌanj cheꞌé níꞌ ado̱nj. Tza̱j ne̱ taj yuꞌvee nó ton yoꞌ, rá nij síí tanáj xco̱ snana̱ Cristó a̱ maꞌ. Ne̱ qui̱j aꞌmii nij soꞌ rihaan Nimán Yaꞌanj síí quiꞌyaj ndoꞌo se lu̱j cheꞌé níꞌ ado̱nj.

³⁰ ꞌO̱ se a̱j neꞌen níꞌ da̱j caꞌmii Yaꞌanj, cataj Yaꞌanj a: “ꞌU̱nj roꞌ, me síí no̱ xcúún quiꞌya̱j sayuun man yuvii̱ tumé cacunꞌ a. Ya̱ na̱ruꞌvee ꞌu̱nj nu̱ꞌ cheꞌé se vaa quiꞌyaj nij soꞌ rihaan chumii̱ na̱nj á”, taj Yaꞌanj a. Ne̱ taj uún Yaꞌanj a: “ꞌU̱nj Si̱j ꞌNi̱j Raꞌa man soj roꞌ, caꞌne̱j cacunꞌ cheꞌé soj si̱j noco̱ꞌ manj ado̱nj”, taj uún Yaꞌanj a.

³¹ Se cuchuꞌvi̱ꞌ ndoꞌo vaa me se vaa quira̱nꞌ nij síí quinij raꞌa Yaꞌanj vaa iꞌna̱ꞌ ya̱ ado̱nj.

³² Dan me se cu̱nuû rá soj da̱j quiꞌyaj soj ga̱a guun cheꞌe̱ soj canocoꞌ soj man Cristó á. ꞌO̱ se síí xcaj cuentá me soj, ne̱ guun nucua̱j soj quiranꞌ soj sayuun, ne̱ ꞌo̱ xraan canocoꞌ soj man Cristó chugua̱nj.

³³ Ne̱ queneꞌen yuvii̱ da̱j si̱j me soj, ne̱ nachriꞌ nij yuvii̱ niꞌya̱j nij yuvii̱ man soj, ne̱ quiꞌyaj nij yuvii̱ sayuun man soj, ne̱ guun tuvi̱ꞌ soj ga̱ ꞌó nij síí ranꞌ sayuun yoꞌ a.

³⁴ ꞌO̱ se cunuu ꞌe̱e̱ rá soj man tinúú soj nij síí ꞌni̱j tagaꞌ, ne̱ guun niha̱ꞌ ya̱ rá nimán soj niꞌya̱j soj se vaa caꞌnéj yuvii̱ siꞌyaj soj cheꞌé se si̱j noco̱ꞌ man Cristó me soj a. ꞌO̱ se neꞌen soj se vaa sa̱ꞌ doj vaa siꞌyaj soj rasu̱u̱n nica̱j soj rej xta̱ꞌ, ne̱ rasu̱u̱n yoꞌ me se daj chiha̱a̱ míj se̱ navij rasu̱u̱n yoꞌ a̱ maan ado̱nj.

³⁵ Dan me se se̱ cuchuꞌviꞌ soj canoco̱ꞌ soj man Cristó, ne̱ se̱ caꞌneꞌ rá soj maꞌ. Cheꞌé se aꞌnéé nucua̱j nimán soj roꞌ, vaa güii, ne̱ noco̱o ya̱ ga̱a̱ rasu̱u̱n quiri̱ꞌ soj ado̱nj.

³⁶ ꞌO̱ se vaa cheꞌé ga̱a̱ ina̱j nimán soj, ne̱ ꞌo̱ quiꞌya̱j soj se vaa me rá Yaꞌanj quiꞌya̱j soj, ne̱ vaa güii naca̱j soj nu̱ꞌ se vaa cataꞌ tuꞌva Yaꞌanj naca̱j soj chugua̱nj.

³⁷ Dan me se Danj Yaꞌanj taj se vaa nichrunꞌ caꞌna̱ꞌ síí caꞌna̱ꞌ, ne̱ se̱ guun ra̱a̱n soꞌ maꞌ.

³⁸ Síí a̱j cunuu sa̱ꞌ nimán rihaan Yaꞌanj roꞌ, ꞌo̱ amán rá soꞌ niꞌya̱j soꞌ Yaꞌanj ga̱a vaa iꞌna̱ꞌ soꞌ ado̱nj. Tza̱j ne̱ sese ca̱nica̱j soꞌ rej xco̱ soꞌ, ne̱ se̱ caranꞌ rá Yaꞌanj queneꞌe̱n Yaꞌanj man soꞌ a̱ maꞌ, taj Danj Yaꞌanj a.

³⁹ Tza̱j ne̱ né si̱j anica̱j rmaꞌa̱n rej xco̱ me níꞌ maꞌ. Cheꞌé dan se̱ quiriꞌ níꞌ maꞌ. ꞌO̱ se si̱j nucua̱j rá man Yaꞌanj me níꞌ, ne̱ cheꞌé dan nani̱i̱ nimán níꞌ rihaan sayuun ado̱nj.