Gálatas 4 - Triqui de San Juan Copala

¹ ꞌO̱ se neꞌen soj da̱j vaa xnii, se vaa vaa güii, ne̱ gu̱un siꞌya̱j xnii nu̱ꞌ rasu̱u̱n ma̱n tucuá rej xnii a. Tza̱j ne̱ ga̱a xnii me soꞌ, ne̱ ase vaa mozó roꞌ, da̱nj vaa soꞌ tucuá rej soꞌ ga̱a yáán rej soꞌ a.

² Dan me se vaa yuvii̱ tumé man xnii da̱j quiꞌya̱j xnii, ne̱ ina̱nj da̱nj vaa tumé nii man xnii nda̱a se cachi̱j ya̱ xnii, ga̱a ne̱ gu̱un siꞌyaj xnii rasu̱u̱n ma̱n tucuá rej xnii nda̱a vaa cataj rej xnii ado̱nj.

³ Ne̱ ase vaa xnii ataa cachi̱j roꞌ, taꞌngaꞌ da̱nj vaa maꞌa̱n níꞌ ga̱a rque̱, ne̱ ina̱nj neꞌen níꞌ canoco̱ꞌ níꞌ man nij yaꞌanj uun chij rihaan chumii̱ nihánj a.

⁴ Tza̱j ne̱ ga̱a quisíj güii a̱j narii Yaꞌanj asi̱j naá, ne̱ caꞌnéé Yaꞌanj Taꞌníí soꞌ caꞌnaꞌ Taꞌníí soꞌ rihaan chumii̱ nihánj, ne̱ cuchruj ꞌo̱ chana̱ man Taꞌníí Yaꞌanj, ne̱ síí noco̱ꞌ stucua̱nj Moisés me nu̱ꞌ nij tuvi̱ꞌ soꞌ ga̱a cayáán soꞌ rihaan chumii̱ nihánj ado̱nj.

⁵ Dan me se me rá Taꞌníí soꞌ Cristó ra̱cuíj soꞌ man ta̱ranꞌ níꞌ si̱j noco̱ꞌ tucuáán noco̱ꞌ yuvii̱ ma̱n rihaan chumii̱ nihánj, cheꞌé rej caꞌve̱e ta̱náj níꞌ tucuáán yoꞌ, ne̱ gu̱un níꞌ taꞌníí ya̱ Yaꞌanj á.

⁶ Cuano̱ nihánj me se taꞌníí ya̱ Yaꞌanj me nij soj ado̱nj. Cheꞌé dan caꞌnéé Yaꞌanj man Nimán Taꞌníí soꞌ nimán níꞌ, ne̱ cheꞌé dan me taj níꞌ a: “Ata̱j Chij, Rej núj mé so̱ꞌ á”, taj níꞌ, aguáj níꞌ, ꞌyaj Nimán Taꞌníí soꞌ a.

⁷ Cheꞌé dan me né mo̱zó me soj rihaan Yaꞌanj cuano̱ nihánj maꞌ. Ase vaa mozó vaa soj ga̱a rque̱, tza̱j ne̱ xa̱ꞌ ya̱j, nahuun soj taꞌníí Yaꞌanj, ne̱ vaa güii naca̱j soj nu̱ꞌ se sa̱ꞌ rque̱ Yaꞌanj rihaan nij taꞌníí soꞌ ado̱nj.

Ne nó xcúún níꞌ canoco̱ꞌ níꞌ tucuáán noco̱ꞌ yuvii̱ ma̱n rihaan chumii̱ nihánj cuano̱ maꞌ

⁸ Ga̱a rque̱ me se ne neꞌen ya̱ soj da̱j vaa Yaꞌanj maꞌ. Cheꞌé dan me soj mozó rihaan nij yaꞌanj uun chij rihaan rasu̱u̱n ma̱n rihaan chumii̱ nihánj, tza̱j ne̱ né yaꞌa̱nj ya̱ me nij yaꞌanj yoꞌ maꞌ.

⁹ Tza̱j ne̱ cuano̱ nihánj me se neꞌen nij soj man maꞌa̱n ya̱ Yaꞌanj ado̱nj. Tza̱j ne̱ sa̱ꞌ doj cata̱j ꞌu̱nj se vaa neꞌen Yaꞌanj man nij soj chugua̱nj. Sese a̱j neꞌen soj man maꞌa̱n ya̱ Yaꞌanj, ga̱a ne̱ me cheꞌé ca̱nica̱j uún soj canoco̱ꞌ soj man nij yaꞌanj uun chij rihaan rasu̱u̱n ma̱n rihaan chumii̱ nihánj ga̱. Neꞌen soj se vaa se̱ guun nucua̱j nij soꞌ ra̱cuíj nij soꞌ man soj maꞌ. Taj yuꞌvee a̱ ꞌó xcoꞌ nó maꞌa̱n nij soꞌ a̱ maꞌ. Me cheꞌé me rá uún soj gu̱un soj mozó rihaan nij soꞌ ga̱.

¹⁰ Ne̱ navij rá soj güii gue̱e̱ do̱ꞌ, navij rá soj chaꞌanj cheꞌé ꞌo̱ ꞌo̱ yavii do̱ꞌ, vaa tiempó gue̱e̱ rihaan soj do̱ꞌ, vaa yoꞌ gue̱e̱ rihaan soj do̱ꞌ asânj. Me cheꞌé ꞌyaj soj da̱nj ga̱.

¹¹ Nanó ndoꞌo rá ꞌu̱nj se vaa ꞌyaj soj, ne̱ nanó rá ꞌu̱nj se vaa quiri̱ꞌ rmaꞌa̱n nu̱ꞌ suun quiꞌyáá ꞌu̱nj tucuꞌyón ꞌu̱nj snana̱ Yaꞌanj nana̱ sa̱ꞌ man nij soj na̱nj chugua̱nj.

Nanó rá Pabló cheꞌé se tanáj nij síí ma̱n Galacia nana̱ tucuꞌyón soꞌ man nij soꞌ a

¹² Ase vaa ꞌu̱nj roꞌ, da̱nj ga̱a̱ gue̱e̱ soj, ese nda̱a adi̱ꞌ se vaa soj roꞌ, da̱nj gaa gue̱e̱ ꞌu̱nj, tinu̱j, nocoj. Né cheꞌe̱ se quiꞌyaj chiꞌi̱i̱ soj manj aꞌmii ꞌu̱nj da̱nj maꞌ. Tana̱nj a̱ veꞌé ina̱nj quiꞌyaj soj ga̱a cayáán ꞌu̱nj ga̱ soj ado̱nj.

¹³ A̱j neꞌen soj se vaa cheꞌé se canó chiꞌii̱ manj, cheꞌé dan natáꞌ ꞌu̱nj nana̱ sa̱ꞌ cheꞌé Cristó rihaan soj ga̱a asino ya̱a̱n a.

¹⁴ Ne̱ ga̱a quiránꞌ ꞌu̱nj rihaan soj me se ne nachri̱ꞌ soj ni̱ꞌyaj soj manj maꞌ. Tana̱nj a̱ caráyaꞌa̱nj ndoꞌo soj niꞌya̱j soj manj, ne̱ nda̱a adi̱ꞌ veꞌé ꞌyaj nii ga̱ ꞌo̱ se‑mo̱zó Yaꞌanj roꞌ, da̱nj quiꞌyaj soj, ga̱a ne̱ veꞌé ndoꞌo caꞌmii soj ga̱j ado̱nj. Ne̱ ase vaa maꞌa̱n ya̱ Cristó Jesús roꞌ, taꞌngaꞌ da̱nj vaa ꞌu̱nj, rá soj,

¹⁵ ne̱ cheꞌé dan me guun niha̱ꞌ uxrá rá nij soj ne̱ veꞌé uxrá cuno soj nana̱ caꞌmij, ne̱ cunuu ꞌe̱e̱ uxrá rá soj manj na̱nj ado̱nj. Dan me se cata̱j yáꞌ sese guun nucua̱j nij soj quiri̱i̱ soj rlij rihaan soj cu̱nuû yoꞌ rihanj, ne̱ caꞌvej rá soj quiꞌya̱j soj da̱nj, ta̱ꞌ asuun chugua̱nj. Tza̱j ne̱ ya̱j me se me cheꞌé ne niha̱ꞌ rá soj ga̱a uno soj nana̱ aꞌmij cuano̱ ga̱.

¹⁶ Ma̱an cheꞌé se caꞌmij nana̱ ya̱ ya̱ ga̱ soj, cheꞌé dan mej síí ta̱j riꞌyunj man soj, rá soj a̱ naꞌ. Taj maꞌ.

¹⁷ Dan me se aráyaꞌa̱nj uxrá ꞌó nij soꞌ man soj, tza̱j ne̱ ne cuna̱j daj chiha̱a̱ míj ꞌyaj nij soꞌ maꞌ. Ma̱an se me rá nij soꞌ ta̱náj xco̱ soj nana̱ noco̱ꞌ níꞌ si̱j amán rá niꞌya̱j man Cristó, ne̱ ina̱nj man maꞌa̱n nij soꞌ canoco̱ꞌ soj, rá nij soꞌ na̱nj ado̱nj.

¹⁸ Sese veꞌé ꞌyaj yuvii̱ ga̱ soj, ne̱ cuna̱j uxrá sese cara̱yaꞌa̱nj nij yuvii̱ man soj, rá ꞌu̱nj á. Tza̱j ne̱ ꞌo̱ da̱nj quiꞌya̱j nij soꞌ, sese ya̱ me sa̱ꞌ rá nij soꞌ niꞌya̱j nij soꞌ man nij soj á. Tza̱j ne̱ taj maꞌ. Me cheꞌé ga̱a yáán ꞌu̱nj ga̱ soj, ga̱a ne̱ uun cheꞌe̱ nij soꞌ ꞌyaj nij soꞌ se sa̱ꞌ ga̱ soj ga̱. Né se sa̱ꞌ ꞌyaj nij soꞌ ga̱ soj maan chugua̱nj.

¹⁹ Dan me se ase vaa taꞌníí ꞌu̱nj neꞌej roꞌ, da̱nj vaa nij soj, tinu̱j, nocoj. Cuano̱ nihánj me se uun cheꞌe̱ uún ꞌu̱nj nanó ndoꞌo rá ꞌu̱nj cheꞌé soj nda̱a vaa nanó rá ꞌu̱nj ga̱a rque̱ a. Dan me se ase vaa nanó rá chana̱ nichrunꞌ cuchru̱j neꞌej roꞌ, da̱nj vaa nanó rá ꞌu̱nj cheꞌé soj cuano̱ chugua̱nj. Ne̱ veé ina̱nj da̱nj nanó ndoꞌo rá uún ꞌu̱nj cheꞌé nij soj nda̱a nari̱ꞌ ya̱ ya̱ soj nda̱a vaa quiꞌyaj maꞌa̱n ya̱ Cristó na̱nj á.

²⁰ ꞌO̱ seꞌvee, ne̱ nda̱a cuano̱ ca̱yáán yá ꞌu̱nj ga̱ soj, ga̱a ne̱ caꞌmi̱i̱ maꞌa̱n yá ꞌu̱nj ga̱ soj, raj a. Tza̱j ne̱ ne neꞌen yaj da̱j qui̱ꞌyáj cheꞌé soj a̱ maꞌ.

Sese noco̱ꞌ níꞌ stucua̱nj Moisés, ne̱ mozó me níꞌ a

²¹ Me rá ꞌu̱nj cata̱j ya̱ soj ꞌo̱ nana̱ rihanj á: Me rá nij soj canoco̱ꞌ soj stucua̱nj Moisés, tza̱j ne̱ neꞌen soj da̱j taj nana̱ cachrón Moisés rihaan yanj yoꞌ naꞌ.

²² Dan me se cachrón Moisés nana̱ nihánj rihaan yanj, se vaa vaa vi̱j taꞌníí Abraham snóꞌo cunii, ne̱ ꞌo̱ taꞌníí soꞌ me neꞌej cuchruj mozó cha̱na̱ nu̱u̱ rihaan soꞌ, ne̱ ꞌó taꞌníí soꞌ me neꞌej cuchruj maꞌa̱n nica̱ soꞌ a. Xa̱ꞌ nica̱ soꞌ, tza̱j ne̱ né mo̱zó me noꞌ maꞌ.

²³ Dan me se neꞌej cuchruj mozó cha̱na̱ roꞌ, ase vaa aꞌngaa na̱j guun neꞌej roꞌ, da̱nj vaa caꞌngaa soꞌ a. Tza̱j ne̱ xa̱ꞌ neꞌej cuchruj maꞌa̱n nica̱ Abraham, tza̱j ne̱ a̱j cataꞌ tuꞌva Yaꞌanj da̱j quiꞌya̱j Yaꞌanj cheꞌé soꞌ asi̱j ga̱a ataa caꞌnga̱a̱ soꞌ a.

²⁴ Ro̱j chana̱ nihánj roꞌ, da̱j se vaa ro̱j tucuáán uun ya̱ ataꞌ tuꞌva Yaꞌanj ga̱ níꞌ vaa ro̱j noꞌ a. ꞌO̱ se ꞌo̱ tucuáán me se avii quij Sinaí, ne̱ nij síí noco̱ꞌ tucuáán yoꞌ roꞌ, mozó u̱u̱n me nij soꞌ ado̱nj. Da̱j se vaa chana̱ cuꞌna̱j Agar vaa nij soꞌ a.

²⁵ Da̱j se vaa quij Sinaí nicu̱nꞌ rej Arabia vaa Agar, ne̱ da̱j se vaa chumanꞌ Jerusalén na̱j cuano̱ vaa Agar uún, cheꞌé se nij síí chiha̱nj chuman' Jerusalén me se mozó me nij soꞌ a.

²⁶ Tana̱nj ino̱ vaa chumanꞌ Jerusalén na̱j rej xta̱ꞌ ado̱nj. Da̱j se vaa nii cunuda̱nj níꞌ vaa chumanꞌ yoꞌ, ne̱ né mo̱zó me níꞌ si̱j noco̱ꞌ tucuáán cataꞌ tuꞌva Yaꞌanj maꞌ.

²⁷ Nihánj me nana̱ no̱ rihaan Danj Yaꞌanj a: Ga̱a̱ niha̱ꞌ nimán so̱ꞌ, cha̱na̱ itu̱un á. Nda̱ꞌ se naꞌvee cuchru̱j so̱ꞌ neꞌej, tza̱j ne̱ ga̱a̱ niha̱ꞌ uxrá nimán so̱ꞌ á. O̱ruún so̱ꞌ cuano̱, tza̱j ne̱ vaa güii, ne̱ doj a̱ ga̱a̱ taꞌníí so̱ꞌ rihaan taꞌníí chana̱ vaa nica̱ ado̱nj. Ina̱nj da̱nj aꞌmii Danj Yaꞌanj cheꞌé nica̱ Abraham chana̱ cuchruj man síí cuꞌna̱j Isaac a.

²⁸ Ne̱ ase vaa taꞌníí noꞌ síí cuꞌna̱j Isaac roꞌ, taꞌngaꞌ da̱nj vaa nij soj, tinu̱j, nocoj. Soj me neꞌej se vaa cataj ya̱ Yaꞌanj caꞌnga̱a̱ ya̱ ado̱nj. Ne̱ ase vaa cavii sa̱ꞌ Isaac roꞌ, da̱nj cavi̱i̱ sa̱ꞌ soj uún na̱nj á.

²⁹ Neꞌen nij soj se vaa xnii caꞌngaa maꞌa̱n taꞌníí ꞌó chana̱ roꞌ, ta̱j riꞌyunj ndoꞌo soꞌ man neꞌej tucua̱ ya̱ veꞌ chugua̱nj. Dan me se taꞌngaꞌ da̱nj ranꞌ gue̱e̱ níꞌ cuano̱ nihánj, ne̱ dan me se ꞌyaj ndoꞌo nij yuvii̱ noco̱ꞌ stucua̱nj Moisés sayuun man níꞌ si̱j cunuu sa̱ꞌ nimán cheꞌé Nimán Yaꞌanj chugua̱nj.

³⁰ Tza̱j ne̱ xca̱j níꞌ cuentá me taj Danj Yaꞌanj a: “Quiri̱i̱ so̱ꞌ man ro̱j taꞌni̱j mozó cha̱na̱ caꞌa̱nj yaníj ro̱j taꞌni̱j noꞌ á. ꞌO̱ se o̱rúnꞌ taꞌníí nica̱ so̱ꞌ níí ne uun mozó me síí gu̱un síí siꞌya̱j nu̱ꞌ siꞌyáá so̱ꞌ vaa güii ado̱nj. Ne̱ xa̱ꞌ taꞌníí chana̱ me mozó, tza̱j ne̱ daj chiha̱a̱ míj ne nó xcúún taꞌníí mozó cha̱na̱ yoꞌ quiri̱ꞌ yoꞌ taꞌa̱j siꞌyáá so̱ꞌ maꞌ.” Da̱nj vaa nana̱ caꞌmii Yaꞌanj rihaan Abraham nana̱ no̱ rihaan Danj Yaꞌanj a.

³¹ Dan me se né taꞌni̱j mozó cha̱na̱ me níꞌ, maan tinu̱j, maan nocoj. Ma̱an se ase vaa taꞌníí chana̱ ne uun mozó roꞌ, da̱nj vaa níꞌ ado̱nj.