Gálatas 3 - Triqui de San Juan Copala

Ina̱nj cheꞌé se amán rá níꞌ niꞌya̱j níꞌ man Cristó, cheꞌé dan ya̱nj Nimán Yaꞌanj ga̱ níꞌ a

¹ Síí nij snúú rmaꞌa̱n ya̱ me soj si̱j ma̱n estadó Galacia na̱nj chugua̱nj. Me cheꞌé guun rá soj ta̱náj soj tucuáán sa̱ꞌ ga̱. Vaa síí quiꞌyaj chre̱e man soj naꞌ. Né se sa̱ꞌ uxrá nataꞌ nii rihaan soj se vaa caviꞌ Jesucristó rihaan rcutze̱ cheꞌé soj a̱ naꞌ.

² ꞌO̱ se me rá ꞌu̱nj xna̱ꞌanj ꞌu̱nj ꞌo̱ nana̱ man soj chugua̱nj: Cheꞌé se canocoꞌ nij soj stucua̱nj Moisés me catúj Nimán Yaꞌanj nimán soj naꞌ. Ase cheꞌé se amán rá soj cuno soj nana̱ sa̱ꞌ cheꞌé Cristó me catúj Nimán Yaꞌanj nimán soj xa̱ꞌ.

³ ꞌO̱ se síí nij snúú rmaꞌa̱n ya̱ me soj na̱nj chugua̱nj. Ga̱a guun cheꞌe̱ soj canocoꞌ soj man Cristó, ne̱ guun nucua̱j rá soj man Nimán Yaꞌanj se vaa ra̱cuíj Nimán Yaꞌanj man soj, tza̱j ne̱ ya̱j me se nucua̱j rá soj man maꞌa̱n soj se vaa cunu̱u sa̱ꞌ soj quiꞌya̱j maꞌa̱n soj na̱nj asânj.

⁴ Nu̱ꞌ se sa̱ꞌ quiꞌyaj Yaꞌanj cheꞌé soj ga̱a canocoꞌ naca̱ soj man Cristó roꞌ, taj yuꞌvee nó yoꞌ, quiꞌyaj soj a̱ maan asunj. Ya̱ ya̱ a̱ naꞌ. Ne cuchuma̱n ya̱ raj se vaa quiꞌyaj soj a̱ maꞌ.

⁵ Ga̱a rqué Yaꞌanj Nimán soꞌ rihaan soj quiꞌya̱j ndoꞌo soj suun sa̱ꞌ noco̱o, ga̱a ne̱ me cheꞌé quiꞌyaj Yaꞌanj da̱nj, rá soj ga̱. Cheꞌé se canocoꞌ soj stucua̱nj Moisés me quiꞌyaj Yaꞌanj da̱nj naꞌ. Taj maꞌ. Cheꞌé se amán rá soj niꞌya̱j soj man Cristó me quiꞌyaj Yaꞌanj da̱nj chugua̱nj.

⁶ Xca̱j soj cuentá cheꞌé Abraham síí cayáán ga̱a naá se vaa cuchumán rá soꞌ niꞌya̱j soꞌ Yaꞌanj, ne̱ cheꞌé dan cataj Yaꞌanj se vaa si̱j cunuu sa̱ꞌ nimán me soꞌ a.

⁷ Cheꞌé dan xca̱j soj cuentá se vaa níꞌ si̱j amán rá niꞌya̱j man Yaꞌanj me se ase vaa Abraham roꞌ, taꞌngaꞌ da̱nj vaa maꞌa̱n níꞌ chugua̱nj.

⁸ Dan me se ga̱a naá neꞌen Yaꞌanj se vaa cuchuma̱n rá nij yuvii̱ yaníj ni̱ꞌyaj nij soꞌ man Yaꞌanj, ne̱ neꞌen Yaꞌanj se vaa cunu̱u sa̱ꞌ nij soꞌ rihaan Yaꞌanj, quiꞌya̱j maꞌa̱n Yaꞌanj, ne̱ cheꞌé dan me nataꞌ Yaꞌanj snana̱ Yaꞌanj nana̱ sa̱ꞌ rihaan Abraham, cataj Yaꞌanj a: “Cheꞌé se vaa quiꞌyáá so̱ꞌ roꞌ, cheꞌé dan me qui̱ꞌyáá ꞌu̱nj se lu̱j cheꞌé ta̱ranꞌ nij xꞌneꞌ yuvii̱ ino̱ vaa stucua̱nj ma̱n rihaan chumii̱ ado̱nj”, taj Yaꞌanj rihaan Abraham asi̱j taj va̱j a̱ ꞌó yuvii̱ neꞌen snana̱ Yaꞌanj nana̱ sa̱ꞌ, ne̱ nu̱ꞌ nana̱ yoꞌ nana̱ caꞌmii Yaꞌanj rihaan Abraham roꞌ, canó nana̱ yoꞌ rihaan Danj Yaꞌanj a.

⁹ Dan me se cuchumán rá Abraham niꞌya̱j soꞌ Yaꞌanj, ne̱ quiꞌyaj Yaꞌanj se lu̱j cheꞌé soꞌ, ne̱ ase vaa quiꞌyaj Yaꞌanj cheꞌé Abraham roꞌ, da̱nj quiꞌya̱j uún Yaꞌanj cheꞌé ta̱ranꞌ nij síí cuchuma̱n rá ni̱ꞌyaj man soꞌ, ne̱ quiꞌya̱j Yaꞌanj se lu̱j cheꞌé nij soꞌ uún ado̱nj.

Se̱ caꞌvee cunu̱u sa̱ꞌ níꞌ rihaan Yaꞌanj, quiꞌya̱j stucua̱nj Moisés a̱ maꞌ

¹⁰ Nij síí nucua̱j rá man stucua̱nj Moisés me se se̱ cavii sa̱ꞌ nij soꞌ a̱ maꞌ. ꞌO̱ se taj Danj Yaꞌanj a: “Sese se̱ quiꞌyaj ꞌo̱ soꞌ cunuda̱nj nij nana̱ no̱ rihaan stucua̱nj Yaꞌanj nana̱ cataj xnaꞌanj Moisés, ne̱ se̱ cavii sa̱ꞌ soꞌ rihaan Yaꞌanj a̱ maꞌ”, taj Danj Yaꞌanj ado̱nj.

¹¹ Tza̱j ne̱ taj Danj Yaꞌanj a: “Síí a̱j cunuu sa̱ꞌ nimán rihaan Yaꞌanj roꞌ, ꞌo̱ amán rá soꞌ niꞌya̱j soꞌ Yaꞌanj ga̱a vaa iꞌna̱ꞌ soꞌ ado̱nj”, taj Danj Yaꞌanj uún a. Ne̱ cheꞌé dan me neꞌen níꞌ se vaa ina̱nj nij yuvii̱ amán rá niꞌya̱j man Yaꞌanj me yuvii̱ cunu̱u sa̱ꞌ rihaan Yaꞌanj á. Se̱ cunuu sa̱ꞌ nij yuvii̱ nucua̱j rá man stucua̱nj Moisés maꞌ.

¹² Dan me se xa̱ꞌ stucua̱nj Moisés, tza̱j ne̱ né cheꞌe̱ se cuchuma̱n ráꞌ me nani̱ꞌ rihaan sayuun maꞌ. Ma̱an cheꞌé se qui̱ꞌyáꞌ nu̱ꞌ rasu̱u̱n taj tucuáán yoꞌ me nani̱ꞌ rihaan sayuun, taj stucua̱nj Moisés na̱nj ado̱nj.

¹³ Ga̱a naá cataj Yaꞌanj se vaa cano̱ uxrá sayuun xráá nij síí ne uno nu̱ꞌ stucua̱nj Moisés, tza̱j ne̱ tinanii Cristó man níꞌ rihaan sayuun yoꞌ cheꞌé se cata̱ soꞌ cacunꞌ tumé níꞌ do̱ꞌ, sayuun no̱ xráá níꞌ do̱ꞌ, ga̱a caviꞌ soꞌ rihaan rcutze̱ a. No̱ nana̱ nihánj rihaan Danj Yaꞌanj a: “Daj a̱ yuvii̱ noco̱ꞌ va̱j rihaan ꞌo̱ chruun me síí quiriꞌ nimán rihaan Yaꞌanj a.”

¹⁴ Nda̱a síj, ga̱a ne̱ se lu̱j cataꞌ tuꞌva Yaꞌanj rihaan Abraham roꞌ, caꞌnaꞌ se lu̱j yoꞌ nda̱a rihaan nij yuvii̱ yaníj, cheꞌé se vaa quiꞌyaj Cristó Jesús a. Dan me se ga̱a naá, ne̱ cataꞌ tuꞌva Yaꞌanj se vaa catu̱u̱ Nimán Yaꞌanj nimán níꞌ, ne̱ cuchumán rá níꞌ niꞌya̱j níꞌ man Yaꞌanj, ne̱ cheꞌé dan ya̱ da̱nj guun ado̱nj.

Cataꞌ tuꞌva Yaꞌanj rihaan Abraham se vaa rque̱ ndoꞌo Yaꞌanj se sa̱ꞌ rihaan nij taꞌníí taꞌnij siꞌno̱ Abraham a

¹⁵ Ne̱ caꞌmi̱i̱ ꞌu̱nj cheꞌé nda̱a vaa ꞌyaj nij síí ma̱n rihaan yoꞌóó nihánj, tinu̱j, nocoj. Sese vaa vi̱j ro̱j síí ataꞌ tuꞌva ꞌo̱ nana̱, ne̱ asa̱ꞌ quisíj cataꞌ tuꞌva ro̱j soꞌ nana̱ yoꞌ, ga̱a ne̱ naxca̱j ro̱j soꞌ ꞌo̱ yanj aꞌmii cheꞌé nda̱a vaa quiꞌya̱j ro̱j soꞌ, ga̱a ne̱ dan me se nda̱a vaa taj yanj naxca̱j ro̱j soꞌ roꞌ, ꞌyaj ro̱j soꞌ a. Se̱ guun caꞌne̱ꞌ rá ro̱j soꞌ, ne̱ se̱ guun cuta̱ꞌ nii doj raa̱ nana̱ yoꞌ maꞌ.

¹⁶ Ne̱ dan me se taꞌngaꞌ da̱nj quiꞌyaj gue̱e̱ Yaꞌanj ga̱ Abraham, ne̱ dan me se cataꞌ tuꞌva ro̱j soꞌ nana̱ nda̱a vaa quiꞌya̱j Yaꞌanj ga̱ Abraham a. Dan me se cataj Yaꞌanj se vaa cavi̱i̱ sa̱ꞌ soꞌ do̱ꞌ, cavi̱i̱ sa̱ꞌ taꞌníí taꞌnij siꞌno̱ soꞌ do̱ꞌ a. Dan me se da̱nj aꞌmii Danj Yaꞌanj, tza̱j ne̱ ne cata̱j Yaꞌanj se vaa cavi̱i̱ sa̱ꞌ queꞌe̱e̱ taꞌníí taꞌnij siꞌno̱ síí cuꞌna̱j Abraham maꞌ. ꞌO̱ se cheꞌé o̱rúnꞌ taꞌníí taꞌnij siꞌno̱ Abraham caꞌmii Danj Yaꞌanj, ne̱ síí cuꞌna̱j Cristó me soꞌ na̱nj ado̱nj.

¹⁷ Ne̱ ina̱nj nihánj me nana̱ me rá ꞌu̱nj cata̱j xnaꞌanj ꞌu̱nj rihaan soj á: Dan me se Yaꞌanj cataꞌ tuꞌva rihaan Abraham da̱j quiꞌya̱j Yaꞌanj cheꞌé Abraham do̱ꞌ, cheꞌé taꞌníí taꞌnij siꞌno̱ Abraham do̱ꞌ, ne̱ cachén ꞌó caꞌa̱nj cientó táá ico̱ chi̱ꞌ (430) yoꞌ, ga̱a ne̱ caꞌnaꞌ stucua̱nj Moisés, tza̱j ne̱ ne quiri̱ꞌ nana̱ cataꞌ tuꞌva Yaꞌanj quiꞌya̱j Yaꞌanj cheꞌé Abraham quiꞌyaj stucua̱nj Moisés maꞌ. ꞌO̱ se ya̱ quiꞌya̱j soꞌ nda̱a vaa cataj soꞌ ado̱nj.

¹⁸ Dan me se sese cheꞌé stucua̱nj Moisés me quiꞌya̱j Yaꞌanj se lu̱j, ga̱a ne̱ né cheꞌe̱ yan cataꞌ tuꞌva soꞌ quiꞌya̱j soꞌ se lu̱j asi̱j naá me yoꞌ ga̱a a̱ maꞌ. Tza̱j ne̱ cheꞌé nana̱ cataꞌ tuꞌva Yaꞌanj rihaan Abraham me quiriꞌ soꞌ nij se lu̱j yoꞌ ado̱nj.

Rqué Yaꞌanj stucua̱nj Moisés cheꞌé yan xca̱j yuvii̱ cuentá cheꞌé cacunꞌ tumé yuvii̱ a

¹⁹ Dan me se sese da̱nj vaa, ga̱a ne̱ me cheꞌé rqué Yaꞌanj stucua̱nj Moisés, rá soj ga̱. Rqué Yaꞌanj tucuáán yoꞌ rihaan Moisés cheꞌé cacunꞌ tumé yuvii̱, ne̱ me rá Yaꞌanj canoco̱ꞌ yuvii̱ tucuáán yoꞌ nda̱a se caꞌna̱ꞌ taꞌníí taꞌnij siꞌno̱ Abraham síí cuꞌna̱j Cristó rihaan chumii̱ nihánj a. Ga̱a ne̱ soꞌ roꞌ, me síí quiꞌya̱j ndoꞌo se lu̱j cheꞌé yuvii̱, nda̱a vaa cataj Yaꞌanj rihaan Abraham ga̱a naá a. Tza̱j ne̱ se‑mo̱zó Yaꞌanj me nij síí cataj xnaꞌanj tucuáán yoꞌ rihaan Moisés, ga̱a ne̱ cataj xnaꞌanj soꞌ tucuáán yoꞌ rihaan nij yuvii̱ a.

²⁰ Tza̱j ne̱ ga̱a caꞌmii Yaꞌanj ga̱ Abraham, ne̱ maꞌa̱n ya̱ soꞌ caꞌmii ado̱nj. Taj va̱j síí caꞌmii cheꞌé Yaꞌanj, ne̱ taj va̱j síí cataj xnaꞌanj rihaan Yaꞌanj da̱j me rá Abraham maꞌ. Ma̱an se maꞌa̱n ya̱ soꞌ me síí caꞌmii ga̱ Abraham, ese o̱rúnꞌ ya̱ soꞌ me Yaꞌanj na̱nj ado̱nj.

²¹ Tza̱j ne̱ ta̱j riꞌyunj stucua̱nj Moisés man nana̱ cataꞌ tuꞌva Yaꞌanj rihaan Abraham ga̱a naá, rá soj naꞌ. Daj chiha̱a̱ míj ne vaa da̱nj maꞌ. Tza̱j ne̱ sese caꞌve̱e gu̱un nucua̱j yuvii̱ quiꞌya̱j yuvii̱ ꞌo̱ tucuáán rqué Yaꞌanj, ne̱ ya̱ cunu̱u sa̱ꞌ yuvii̱ rihaan Yaꞌanj, quiꞌya̱j tucuáán yoꞌ ado̱nj. Tza̱j ne̱ se̱ guun nucua̱j yuvii̱ quiꞌya̱j yuvii̱ tucuáán vaa da̱nj maꞌ.

²² Cheꞌé dan me taj Danj Yaꞌanj se vaa cunuda̱nj yuvii̱ tumé ndoꞌo cacunꞌ na̱nj ado̱nj. Ne̱ cheꞌé dan me nana̱ cataꞌ tuꞌva Yaꞌanj rihaan Abraham roꞌ, quisi̱j ya̱ nu̱ꞌ nana̱ yoꞌ cheꞌé ta̱ranꞌ níꞌ si̱j amán rá niꞌya̱j man Cristó ado̱nj.

Ga̱a caꞌnaꞌ Cristó, ne̱ taj cheꞌé canoco̱ꞌ níꞌ stucua̱nj Moisés a̱ maan ado̱nj

²³ Tza̱j ne̱ ga̱a ataa doj quisi̱j güii cuchuma̱n rá níꞌ ni̱ꞌyaj níꞌ man Cristó, ne̱ ina̱nj stucua̱nj Moisés canocoꞌ níꞌ, ne̱ ase vaa ꞌo̱ síí tumé man síí ꞌni̱j tagaꞌ roꞌ, da̱nj vaa stucua̱nj Moisés rihaan níꞌ ga̱a rque̱ a. Ina̱nj stucua̱nj Moisés vaa rihaan níꞌ canoco̱ꞌ níꞌ nda̱a se caꞌnaꞌ güii tihaa̱n Yaꞌanj rihaan níꞌ se vaa cuchuma̱n rá níꞌ ni̱ꞌyaj níꞌ man Cristó a.

²⁴ Dan me se ase vaa síí tumé man xnii da̱j quiꞌya̱j xnii roꞌ, taꞌngaꞌ da̱nj vaa stucua̱nj Moisés rihaan níꞌ ga̱a rque̱, tumé yoꞌ man níꞌ nda̱a se caꞌnaꞌ Cristó ado̱nj. Nda̱a síj, ga̱a ne̱ no̱ xcúún níꞌ cuchuma̱n rá níꞌ ni̱ꞌyaj níꞌ man soꞌ, ne̱ caꞌve̱e cunu̱u sa̱ꞌ níꞌ rihaan Yaꞌanj ado̱nj.

²⁵ Cuano̱ roꞌ, nihánj me se a̱j cuchumán rá níꞌ niꞌya̱j níꞌ man Cristó, ne̱ cheꞌé dan me ne tumé stucua̱nj Moisés man níꞌ a̱ maꞌ.

²⁶ Cheꞌé se amán rá nij soj niꞌya̱j soj man Cristó Jesús roꞌ, cheꞌé dan taꞌníí Yaꞌanj me ta̱ranꞌ soj cuano̱ na̱nj ado̱nj.

²⁷ Dan me se cheꞌé se cunuu rcuaꞌa̱a̱n soj ga̱ Cristó ga̱a cataꞌ ne soj roꞌ, cheꞌé dan me ase vaa Cristó roꞌ, taꞌngaꞌ da̱nj vaa soj cuano̱ na̱nj ado̱nj.

²⁸ Ne̱ se̱ cataj soj se vaa taꞌa̱j soj me yuvii̱ israelitá ne̱ ꞌó taꞌa̱j soj me yuvii̱ yaníj maꞌ. Ne̱ se̱ cataj soj se vaa taꞌa̱j soj me mozó ne̱ ꞌó taꞌa̱j soj, né si̱j uun mozó me ꞌó taꞌa̱j soj, cata̱j soj maꞌ. Ne̱ se̱ cataj soj se vaa taꞌa̱j soj me snóꞌo ne̱ ꞌó taꞌa̱j soj me chana̱ maꞌ. ꞌO̱ se tana̱nj ase vaa o̱rúnꞌ yuvii̱ vaa ta̱ranꞌ soj, ne̱ ꞌo̱ cuya̱a̱n vaa ta̱ranꞌ soj cheꞌé se noco̱ꞌ soj man Cristó Jesús na̱nj á.

²⁹ Cheꞌé se si̱j noco̱ꞌ man Cristó me soj roꞌ, cheꞌé dan maꞌa̱n ya̱ taꞌníí taꞌnij siꞌno̱ síí cuꞌna̱j Abraham me soj rihaan Yaꞌanj, nda̱a vaa cataj Yaꞌanj rihaan Abraham se vaa quiꞌya̱j soꞌ se lu̱j rihaan ta̱ranꞌ nij taꞌníí taꞌnij siꞌno̱ Abraham ado̱nj.