Gálatas 2 - Triqui de San Juan Copala

¹ Dan me se cachén xcaꞌa̱nj yoꞌ asi̱j curiha̱nj ꞌu̱nj chumanꞌ Jerusalén, ga̱a ne̱ canica̱j uún ꞌu̱nj cavii ꞌu̱nj nda̱a chumanꞌ Jerusalén ga̱ síí cuꞌna̱j Bernabé, ne̱ dan me se nica̱j rój man síí cuꞌna̱j Titó caꞌanj rój rej yoꞌ a.

² Dan me se caꞌanj ꞌu̱nj chumanꞌ Jerusalén, cheꞌé se queneꞌén ꞌu̱nj quiꞌyaj Yaꞌanj se vaa me rá Yaꞌanj caꞌa̱nj ꞌu̱nj chumanꞌ Jerusalén a. Ne̱ quirii yaníj ꞌu̱nj man nij síí uun chij doj rihaan tinúú níꞌ síí israelitá, ne̱ natáꞌ ꞌu̱nj rihaan maꞌa̱n ina̱nj nij soꞌ cheꞌé snana̱ Yaꞌanj nana̱ sa̱ꞌ aꞌmii natáj ꞌu̱nj rihaan nij soj si̱j yaníj, cheꞌé rej cata̱j nij soꞌ se vaa cuna̱j ꞌyáá ꞌu̱nj, ne̱ se̱ quiriꞌ suun a̱j quiꞌyáj do̱ꞌ, suun ꞌyáj cuano̱ do̱ꞌ maꞌ.

³ Ne̱ nicu̱nꞌ Titó ga̱ ꞌu̱nj, ne̱ nda̱ꞌ se né si̱j israelitá me soꞌ, tza̱j ne̱ ne rquee̱ nij síí ma̱n Jerusalén man soꞌ cata̱ꞌ taꞌngaꞌ man soꞌ maꞌ.

⁴ Tza̱j ne̱ do̱j nij síí tihaꞌ yuꞌunj taj se vaa tinúú níꞌ me nij soꞌ, tza̱j ne̱ taj maꞌ. Dan me se catúj yuve̱ nij soꞌ rej nuu chre̱ꞌ núj cheꞌé rej xca̱j nij soꞌ cuentá da̱j ꞌyaj núj a. ꞌO̱ se vaa yaꞌnúj rihaan níꞌ canoco̱ꞌ níꞌ man Cristó Jesús, ne̱ taj cheꞌé canoco̱ꞌ níꞌ nu̱ꞌ stucua̱nj Moisés nda̱a vaa guun rá nij síí tihaꞌ yuꞌunj quiꞌya̱j níꞌ a̱ maꞌ.

⁵ Tza̱j ne̱ núj me se a̱ ꞌó xcoꞌ nii ne cuno̱ núj rihaan nij soꞌ a̱ maꞌ. ꞌO̱ se guun rá núj se vaa veꞌé ya̱ quina̱j nu̱ꞌ nana̱ sa̱ꞌ nana̱ ya̱ rihaan soj, rá núj ado̱nj.

⁶ Dan me se ase vaa síí uun chij vaa taꞌa̱j nij síí ma̱n Jerusalén, rá nii, tza̱j ne̱ taj va̱j síí sa̱ꞌ doj rihaan tuviꞌ, rá ꞌu̱nj a̱ maꞌ. Ma̱an se ꞌo̱ cuya̱a̱n vaa cunuda̱nj yuvii̱ rihaan Yaꞌanj na̱nj ado̱nj. Dan me se nij síí uun chij yoꞌ roꞌ, taj ꞌó me cataj nij soꞌ rihaan ꞌu̱nj maꞌ. Ma̱an se cuna̱j vaa nana̱ caꞌmii natáj ꞌu̱nj, taj nij soꞌ a.

^7-8 Dan me se Yaꞌanj me síí quiꞌyaj guun nucua̱j síí cuꞌna̱j Pedró nata̱ꞌ soꞌ nana̱ sa̱ꞌ cheꞌé Cristó rihaan nij yuvii̱ israelitá, ne̱ da̱nj quiꞌyaj gue̱e̱ Yaꞌanj ga̱ ꞌu̱nj uún, ne̱ dan me se guun nu̱cuáá ꞌu̱nj nata̱ꞌ ꞌu̱nj nana̱ sa̱ꞌ cheꞌé Cristó rihaan nij yuvii̱ yaníj, quiꞌyaj Yaꞌanj a. Cheꞌé dan me xcaj nij síí uun chij ma̱n Jerusalén cuentá se vaa ne cachi̱in doj nana̱ mán ꞌu̱nj a. Ma̱an se ase vaa ata̱ Pedró suun nata̱ꞌ rihaan nij yuvii̱ israelitá, quiꞌyaj Yaꞌanj roꞌ, da̱nj vaa atá ꞌu̱nj suun nata̱ꞌ rihaan nij yuvii̱ yaníj, quiꞌyaj uún Yaꞌanj a.

⁹ Ne̱ queneꞌen Jacobo do̱ꞌ, Cefas do̱ꞌ, Juan do̱ꞌ, se vaa quiꞌyaj ndoꞌo Yaꞌanj se lu̱j cheꞌé ꞌu̱nj do̱ꞌ, cheꞌé Bernabé do̱ꞌ, se vaa guun nu̱cuáá ꞌu̱nj nata̱ꞌ ꞌu̱nj nana̱ sa̱ꞌ cheꞌé Cristó rihaan yuvii̱, quiꞌyaj Yaꞌanj, ne̱ guun ya̱ nu̱ꞌ rá nij soꞌ se vaa Yaꞌanj me síí caꞌneꞌ suun rihaan núj a. Dan me se síí uun chij rihaan nij síí noco̱ꞌ man Cristó ma̱n Jerusalén me nij soꞌ, tza̱j ne̱ guun ya̱ rá nij soꞌ se vaa tuviꞌ maꞌa̱n nij soꞌ me núj, ne̱ ꞌo̱ cuya̱a̱n vaa suun vaa rihaan núj ga̱ suun vaa rihaan nij soꞌ, rá nij soꞌ a. Dan me se nata̱ꞌ nij soꞌ nana̱ sa̱ꞌ cheꞌé Cristó rihaan nij yuvii̱ israelitá, ne̱ da̱nj na̱nj núj uún, ne̱ nata̱ꞌ núj rihaan nij síí yaníj, cataj nij soꞌ a.

¹⁰ Tza̱j ne̱ o̱rúnꞌ ya̱ rasu̱u̱n me cachíín niꞌya̱j ndoꞌo nij soꞌ rihaan núj se vaa asino nij síí nique̱ me ra̱cuíj núj, taj nij soꞌ a. Tza̱j ne̱ tumé ndoꞌo núj man nij síí nique̱, ne̱ asino yoꞌ me ꞌyaj núj chéé núj ado̱nj.

Caꞌmii nucua̱j Pabló rihaan Pedró tinanuj rá soꞌ man Pedró se vaa ina̱nj cheꞌé Cristó cunuu sa̱ꞌ níꞌ rihaan Yaꞌanj a

¹¹ Cachén do̱j güii, ga̱a ne̱ cuchiꞌ Pedró chumanꞌ cuꞌna̱j Antioquía a. Tza̱j ne̱ quiꞌyaj soꞌ do̱j se nij, ne̱ tumé soꞌ cacunꞌ cheꞌé se nij quiꞌyaj soꞌ, rá ꞌu̱nj, ne̱ cheꞌé dan caꞌmii riha̱a̱n yáj ga̱ soꞌ rihaan cunuda̱nj yuvii̱, ne̱ cataj ꞌu̱nj se vaa tumé soꞌ cacunꞌ cheꞌé se vaa quiꞌyaj soꞌ a.

¹² Dan me se ga̱a caꞌnaꞌ soꞌ chumanꞌ Antioquía, ne̱ xcaj soꞌ cuentá se vaa caꞌve̱e cha̱ soꞌ ga̱ nij yuvii̱ yaníj, ne̱ da̱nj quiꞌyaj soꞌ a. Tza̱j ne̱ ga̱a namán nij síí caꞌnaꞌ suun quiꞌyaj Jacobo chumanꞌ nihánj, ga̱a ne̱ cuchuꞌviꞌ Pedró caꞌmi̱i̱ nij síí taj se vaa no̱ xcúún cunuda̱nj nij snóꞌo noco̱ꞌ man Yaꞌanj cata̱ꞌ taꞌngaꞌ man nij soꞌ a. Dan me se chuꞌviꞌ Pedró se vaa xca̱j nij soꞌ cuentá se vaa chá soꞌ ga̱ nij yuvii̱ yaníj, ne̱ cata̱j nij soꞌ se vaa ne nó xcúún soꞌ quiꞌya̱j soꞌ da̱nj, rá soꞌ a. Cheꞌé dan me caꞌneꞌ rá soꞌ ga̱ suun chá ga̱ nij yuvii̱ yaníj, ne̱ naxuun yaníj soꞌ man soꞌ rihaan nij yuvii̱ yaníj na̱nj ado̱nj.

¹³ Queneꞌen maꞌa̱n soꞌ se vaa caꞌve̱e cha̱ soꞌ ga̱ nij yuvii̱ yaníj, tza̱j ne̱ né si̱j ꞌo̱ vaa rá ga̱ nana̱ aꞌmii me soꞌ a̱ maꞌ. Ne̱ ase vaa quiꞌyaj soꞌ roꞌ, taꞌngaꞌ da̱nj quiꞌyaj uún ta̱ranꞌ nij yuvii̱ israelitá noco̱ꞌ man Cristó ma̱n rej yoꞌ, ne̱ nda̱a Bernabé quiꞌyaj cacunꞌ ga̱ nij soꞌ se vaa caꞌneꞌ rá soꞌ ga̱ suun chá ga̱ nij yuvii̱ yaníj na̱nj ado̱nj.

¹⁴ Dan me se xcaj ꞌu̱nj cuentá se vaa ne xraan nocoꞌ nij soꞌ nana̱ sa̱ꞌ nana̱ ya̱ maꞌ. Dan me se caꞌmii yá ꞌu̱nj rihaan Pedró, ne̱ cuno ta̱ranꞌ nij soꞌ, ne̱ cataj ꞌu̱nj a: “Síí israelitá mé so̱ꞌ, tza̱j ne̱ ne nocóꞌ so̱ꞌ tucuáán noco̱ꞌ nij yuvii̱ israelitá maꞌ. Ma̱an se ase vaa ꞌyaj nij yuvii̱ yaníj roꞌ, da̱nj vaa ꞌyáá so̱ꞌ chugua̱nj. Me cheꞌé rqueé so̱ꞌ man nij yuvii̱ yaníj canoco̱ꞌ nij yuvii̱ yaníj tucuáán noco̱ꞌ nij yuvii̱ israelitá ga̱.

¹⁵ Dan me se yuvii̱ israelitá me níꞌ á. Né yuvi̱i̱ yaníj yuvii̱ ꞌyaj ndoꞌo cacunꞌ me níꞌ maꞌ.

¹⁶ Tza̱j ne̱ neꞌen níꞌ se vaa nda̱ꞌ se veꞌé nocoꞌ ꞌo̱ soꞌ stucua̱nj Moisés, tza̱j ne̱ se̱ cunuu sa̱ꞌ maꞌa̱n soꞌ rihaan Yaꞌanj maꞌ. ꞌO̱ se cunu̱u sa̱ꞌ ya̱ soꞌ rihaan Yaꞌanj sese cuchuma̱n rá soꞌ ni̱ꞌyaj soꞌ man Cristó ado̱nj. Dan me se cuchumán rá maꞌa̱n níꞌ niꞌya̱j níꞌ man Cristó Jesús, yan cunu̱u sa̱ꞌ níꞌ rihaan Yaꞌanj, tza̱j ne̱ se̱ cunuu sa̱ꞌ níꞌ, quiꞌya̱j stucua̱nj Moisés maꞌ. Ina̱nj da̱nj taj Danj Yaꞌanj á. A̱ ꞌó yuvii̱ se̱ cunuu sa̱ꞌ rihaan Yaꞌanj quiꞌya̱j stucua̱nj Moisés maꞌ, taj uún Danj Yaꞌanj ado̱nj.

¹⁷ ꞌO̱ se níꞌ si̱j israelitá me se canocoꞌ níꞌ man Cristó, ga̱a ne̱ caꞌve̱e xꞌne̱e̱ cacunꞌ xráá níꞌ quiꞌya̱j soꞌ, rá níꞌ, tza̱j ne̱ ꞌo̱ se veé da̱nj ꞌyaj níꞌ cacunꞌ ta̱ꞌ asuun xa̱ꞌ. Me cheꞌé ꞌyaj níꞌ da̱nj ga̱. ꞌO̱ se Cristó me síí caꞌneꞌ suun quiꞌya̱j níꞌ cacunꞌ, rá so̱ꞌ naꞌ. Taj maꞌ.

¹⁸ Dan me se ma̱ꞌán ꞌu̱nj me síí tiriꞌ chrej canoco̱ꞌ stucua̱nj Moisés, ne̱ veé dan, ga̱a ne̱ sese gu̱un cheꞌe̱ uún ꞌu̱nj naquiꞌya̱j sa̱ꞌ uún ꞌu̱nj man chrej yoꞌ, ne̱ dan me se maꞌa̱n ina̱nj yá ꞌu̱nj me síí tumé cacunꞌ ga̱a na̱nj ado̱nj.

¹⁹ Asi̱j rque̱ me se canocóꞌ ꞌu̱nj tucuáán yoꞌ, tza̱j ne̱ quiriꞌ rá ꞌu̱nj, quiꞌyaj tucuáán yoꞌ, ne̱ ya̱j me se ase vaa caviꞌ Cristó rihaan rcutze̱ roꞌ, da̱nj vaa cavíꞌ ꞌu̱nj rihaan tucuáán yoꞌ chugua̱nj. Ne̱ ya̱j me se ina̱nj cheꞌé Yaꞌanj ga̱a̱ iꞌna̱ꞌ ꞌu̱nj ado̱nj.

²⁰ Canó rcuaꞌa̱a̱n ꞌu̱nj rihaan rcutze̱ ga̱ Cristó vaa ga̱a na̱nj ado̱nj. Ya̱j me se né ꞌu̱nj me síí ya̱nj cuano̱ maꞌ. ꞌO̱ se Cristó me síí ya̱nj nimanj, ne̱ cheꞌé dan vaa iꞌna̱ꞌ ꞌu̱nj cuano̱ ado̱nj. Cheꞌé se amán rá ꞌu̱nj niꞌya̱j ꞌu̱nj man Taꞌníí Yaꞌanj roꞌ, cheꞌé dan ina̱nj nocóꞌ ꞌu̱nj man soꞌ ga̱a chéé ꞌu̱nj rihaan chumii̱ nihánj ado̱nj. Ne̱ dan me se ma̱an cheꞌé se cunuu ꞌe̱e̱ uxrá rá soꞌ mán ꞌu̱nj roꞌ, cheꞌé dan caꞌneꞌ gue̱e̱ rá soꞌ caviꞌ soꞌ rihaan rcutze̱ cheꞌé ꞌu̱nj na̱nj ado̱nj.

²¹ Ne̱ naꞌvej rá ꞌu̱nj ta̱náj yaníj ꞌu̱nj se lu̱j quiꞌyaj Yaꞌanj cheꞌé ꞌu̱nj maꞌ. ꞌO̱ se vaa cheꞌé ya̱ quiꞌyaj Yaꞌanj se lu̱j ado̱nj. Dan me se sese caꞌve̱e ya̱ navi̱j cacunꞌ quiꞌya̱j stucua̱nj Moisés, ga̱a ne̱ caviꞌ u̱u̱n maꞌa̱n Cristó vaa ga̱a na̱nj ado̱nj.” Nu̱ꞌ nana̱ nihánj me nana̱ caꞌmii ꞌu̱nj rihaan Pedró ado̱nj.