Gálatas 1 - Triqui de San Juan Copala

¹ Síí cuꞌna̱j Pabló mej, ne̱ dan me se ga̱a caviꞌ Jesucristó, ne̱ cunuu iꞌna̱ꞌ uún soꞌ, quiꞌyaj Yaꞌanj, ne̱ Jesucristó do̱ꞌ, Rej níꞌ Yaꞌanj do̱ꞌ, me ro̱j síí cuneꞌ mán ꞌu̱nj guún ꞌu̱nj ꞌo̱ síí caꞌa̱nj nata̱ꞌ snana̱ Jesucristó a. Né ina̱nj yuvii̱ me síí cuneꞌ mán ꞌu̱nj maꞌ. Maꞌa̱n ya̱ Yaꞌanj cuneꞌ mán ꞌu̱nj ado̱nj.

² Dan me se ta̱ranꞌ nij tinúú níꞌ síí ya̱nj ga̱ ꞌu̱nj roꞌ, ꞌyaj yanj cartá nihánj ga̱ ꞌu̱nj, ne̱ caꞌne̱j núj yanj nihánj rihaan nij soj nij xꞌneꞌ yuvii̱ noco̱ꞌ man Cristó si̱j ya̱nj nij chumanꞌ na̱j estadó Galacia a.

³ Dan me se me rá núj quiꞌya̱j ndoꞌo Rej níꞌ Yaꞌanj do̱ꞌ, Jesucristó Si̱j ꞌNi̱j Raꞌa man níꞌ do̱ꞌ, se lu̱j cheꞌé nij soj, ne̱ me rá núj ga̱a̱ xe̱j nimán soj quiꞌya̱j ro̱j soꞌ ado̱nj.

⁴ Dan me se chiꞌi̱i̱ vaa nimán yuvii̱ ma̱n rihaan chumii̱ nihánj cuano̱, ne̱ me rá Rej níꞌ Yaꞌanj nani̱i̱ níꞌ rihaan sayuun quira̱nꞌ nij yuvii̱ yoꞌ, ne̱ cheꞌé dan caꞌvej Jesucristó Si̱j ꞌNi̱j Raꞌa man níꞌ cavi̱ꞌ ya̱ maꞌa̱n soꞌ cheꞌé cacunꞌ tumé níꞌ ado̱nj.

⁵ Sa̱ꞌ uxrá vaa ꞌyaj Rej níꞌ Yaꞌanj, cata̱j níꞌ nu̱ꞌ cavii nu̱ꞌ caꞌanj á. Veé da̱nj ga̱a̱ ya̱ ado̱nj.

Se̱ tanáj xco̱ níꞌ nana̱ sa̱ꞌ cheꞌé Cristó maꞌ

⁶ Caꞌanj rá ꞌu̱nj cheꞌé se raꞌya̱nj tanáj nij soj man Yaꞌanj si̱j canacúún man soj ga̱ se lu̱j quiꞌyaj Cristó cheꞌé soj, ne̱ canocoꞌ soj ꞌó nana̱ taj nii se vaa me nana̱ sa̱ꞌ a.

⁷ Taj va̱j ꞌó nana̱ sa̱ꞌ maꞌ. Ma̱an se vaa do̱j síí me rá naquiꞌya̱j ino̱ nana̱ sa̱ꞌ cheꞌé Cristó cheꞌé yan gu̱un vi̱j rá soj chugua̱nj.

⁸ ꞌO̱ se ina̱nj nana̱ nataꞌ núj rihaan soj asi̱j rque̱ roꞌ, cuchuma̱n rá soj ado̱nj. Dan me se caꞌve̱e se nda̱a maꞌa̱n núj do̱ꞌ, caꞌve̱e se nda̱a ꞌo̱ se‑mo̱zó Yaꞌanj nanij rej xta̱ꞌ do̱ꞌ, nata̱ꞌ ꞌó nana̱ naca̱ rihaan soj nana̱ taj nii se vaa me nana̱ sa̱ꞌ, tza̱j ne̱ quira̱nꞌ ndoꞌo síí aꞌmii ꞌó nana̱ yoꞌ sayuun quiꞌya̱j Yaꞌanj rá núj ado̱nj.

⁹ Dan me se a̱j cataj xnaꞌanj núj rihaan soj, ne̱ cuano̱ nihánj me cata̱j xnaꞌanj uún ꞌu̱nj rihaan soj, se vaa sese ino̱ ga̱a̱ nana̱ nata̱ꞌ ꞌo̱ soꞌ rihaan soj ga̱ nana̱ sa̱ꞌ cheꞌé Cristó canocoꞌ soj asi̱j rque̱, ne̱ me rá ꞌu̱nj quira̱nꞌ uxrá síí nataꞌ ꞌó nana̱ yoꞌ sayuun, quiꞌya̱j Yaꞌanj a.

Ina̱nj me rá Pabló ga̱a̱ niha̱ꞌ rá Yaꞌanj ni̱ꞌyaj Yaꞌanj man soꞌ a

¹⁰ Me rá ꞌu̱nj ga̱a̱ niha̱ꞌ rá yuvii̱ ni̱ꞌyaj yuvii̱ mán ꞌu̱nj, rá soj naꞌ. Taj maꞌ. ꞌO̱ se ina̱nj me rá ꞌu̱nj ga̱a̱ niha̱ꞌ rá Yaꞌanj ni̱ꞌyaj Yaꞌanj manj ado̱nj. Dan me se ga̱a rque̱ me se ina̱nj me rá ꞌu̱nj ga̱a̱ niha̱ꞌ rá yuvii̱ ni̱ꞌyaj yuvii̱ manj, tza̱j ne̱ ya̱j roꞌ, taj maꞌ. Sese ina̱nj gu̱un rá ꞌu̱nj ga̱a̱ niha̱ꞌ rá yuvii̱ ni̱ꞌyaj yuvii̱ mán ꞌu̱nj, ne̱ né si̱j ꞌyaj se‑su̱u̱n Cristó mé ꞌu̱nj a̱ maan chugua̱nj.

Nana̱ caꞌmii natáj Pabló roꞌ, o̱rúnꞌ Cristó me síí tucuꞌyón nana̱ yoꞌ man soꞌ a

¹¹ Me rá ꞌu̱nj xca̱j nij soj cuentá se vaa nana̱ sa̱ꞌ cheꞌé Cristó aꞌmii natáj ꞌu̱nj roꞌ, né na̱na̱ cavii raa̱ yuvii̱ me nana̱ yoꞌ maꞌ.

¹² Ne̱ né yuvi̱i̱ nataꞌ nana̱ yoꞌ rihanj maꞌ. Ne̱ taj síí tucuꞌyón nana̱ yoꞌ manj maꞌ. Tana̱nj maꞌa̱n ya̱ Jesucristó tihaa̱n nana̱ sa̱ꞌ yoꞌ manj ado̱nj.

¹³ A̱j neꞌen soj da̱j vaa raj asi̱j rque̱ doj ado̱nj. Dan me se ga̱a canocóꞌ ꞌu̱nj tucuáán noco̱ꞌ nij yuvii̱ israelitá, ne̱ dan me se quiꞌyaj ndoꞌo ꞌu̱nj sayuun man xꞌneꞌ nij síí noco̱ꞌ man Yaꞌanj, ne̱ guun rá ꞌu̱nj ti̱ríꞌ ꞌu̱nj man nij soꞌ a.

¹⁴ Ne̱ tucuáán noco̱ꞌ nij yuvii̱ israelitá roꞌ, ꞌu̱nj me síí noco̱ꞌ sa̱ꞌ doj tucuáán yoꞌ rihaan queꞌe̱e̱ ndoꞌo nij tuvíꞌ ꞌu̱nj síí israelitá cuya̱a̱n noco̱o ga̱ ꞌu̱nj ado̱nj. Ne̱ ꞌu̱nj roꞌ, me síí quiꞌyaj nu̱ꞌ nda̱a vaa taj stucua̱nj xií ꞌu̱nj si̱j israelitá ado̱nj.

¹⁵ Tza̱j ne̱ asi̱j ataa caꞌnga̱a̱ ꞌu̱nj, ne̱ guun rá Yaꞌanj se vaa qui̱ꞌyáj se‑su̱u̱n soꞌ a. Dan me se quiꞌyaj ndoꞌo Yaꞌanj se lu̱j cheꞌej se vaa canacúún soꞌ manj,

¹⁶ ne̱ tihaa̱n soꞌ Taꞌníí soꞌ Jesucristó rihanj, cheꞌé se me rá soꞌ caꞌa̱nj ꞌu̱nj nata̱ꞌ ꞌu̱nj snana̱ soꞌ nana̱ sa̱ꞌ rihaan nij yuvii̱ yaníj na̱nj ado̱nj. Tza̱j ne̱ ꞌu̱nj me se a̱ doj ne caꞌa̱nj ꞌu̱nj xna̱ꞌanj ꞌu̱nj man yuvii̱ da̱j qui̱ꞌyáj ca̱nocoj man Yaꞌanj maꞌ.

¹⁷ Dan me se chumanꞌ Jerusalén roꞌ, ya̱nj nij síí cuneꞌ Jesucristó asino ya̱a̱n caꞌa̱nj nata̱ꞌ snana̱ soꞌ, tza̱j ne̱ ne cuchi̱ꞌ ꞌu̱nj rihaan nij soꞌ xna̱ꞌanj ꞌu̱nj man nij soꞌ da̱j qui̱ꞌyáj maꞌ. Ma̱an se caꞌanj ꞌu̱nj cuaj estadó Arabia, ne̱ canica̱j ꞌu̱nj caꞌnaj chumanꞌ Damasco ado̱nj.

¹⁸ Quisíj vaꞌnu̱j ya̱ yoꞌ nocoj man Cristó ta̱ꞌ asuun, ga̱a ne̱ cavii ꞌu̱nj nda̱a chumanꞌ Jerusalén, cheꞌé rej cunu̱u ya̱a̱n ꞌu̱nj man síí cuꞌna̱j Pedró a. Dan me se nanó ꞌu̱nj cuentó ga̱ soꞌ, ne̱ caránꞌ ꞌu̱nj tucuá soꞌ rque xnu̱ꞌ gue̱e̱ güii a.

¹⁹ Ne̱ dan me se ga̱a caránꞌ ꞌu̱nj veꞌ tucuá soꞌ me se queneꞌenj man síí cuꞌna̱j Jacobo tinúú Jesucristó Si̱j ꞌNi̱j Raꞌa man níꞌ uún a. Tza̱j ne̱ ne que̱neꞌén ꞌu̱nj man ꞌó nij síí cuneꞌ Jesucristó maꞌ.

²⁰ Neꞌen ya̱ Yaꞌanj se vaa ya̱ vaa nana̱ nihánj nana̱ cachrón ꞌu̱nj rihaan yanj nihánj ado̱nj.

²¹ Dan me se curiha̱nj ꞌu̱nj chumanꞌ Jerusalén, ne̱ caꞌanj ꞌu̱nj estadó Siria do̱ꞌ, estadó Cilicia do̱ꞌ,

²² tza̱j ne̱ nij xꞌneꞌ yuvii̱ noco̱ꞌ man Cristó ya̱nj estadó Judea roꞌ, ne queneꞌe̱n nij soꞌ mán ꞌu̱nj maꞌ.

²³ Ma̱an se cuno nij soꞌ cuentó cataj xnaꞌanj tuviꞌ nij soꞌ cheꞌé ꞌu̱nj se vaa: “Síí quiꞌyaj ndoꞌo sayuun man níꞌ ga̱a rque̱ me se cuano̱ nihánj nataꞌ maꞌa̱n soꞌ nana̱ sa̱ꞌ nana̱ noco̱ꞌ níꞌ nana̱ me rá soꞌ tiri̱ꞌ soꞌ ga̱a rque̱ na̱nj ado̱nj.”

²⁴ Dan me se caráyaꞌa̱nj ndoꞌo nij soꞌ, ne̱ cataj nij soꞌ se vaa sa̱ꞌ uxrá quiꞌyaj Yaꞌanj ga̱ ꞌu̱nj ado̱nj.