Filipenses 4 - Triqui de San Juan Copala

¹ Dan me se ꞌe̱e̱ ndoꞌo raj man soj, ne̱ me uxrá raj ni̱ꞌyaj ꞌu̱nj man soj, tinu̱j, nocoj. Niha̱ꞌ ndoꞌo raj, ꞌyaj soj, ne̱ vaa güii cata̱j Yaꞌanj se vaa sa̱ꞌ uxrá quiꞌyáj, tucuꞌyón ꞌu̱nj man soj, ne̱ cheꞌé dan vaa cheꞌé cuno̱ soj nu̱ꞌ nana̱ nihánj, ne̱ xraan canoco̱ꞌ soj man Síí ꞌNi̱j Raꞌa man níꞌ, tinu̱j, nocoj.

Nagoꞌ Pabló chrej sa̱ꞌ man nij síí noco̱ꞌ man Cristó ya̱nj chumanꞌ Filipos a

² Achíín ni̱ꞌyáá ꞌu̱nj rihaan chana̱ cuꞌna̱j Evodia do̱ꞌ, rihaan chana̱ cuꞌna̱j Síntique do̱ꞌ, se vaa ꞌo̱ cuya̱a̱n ga̱a̱ rá ro̱j noꞌ, cheꞌé se chana̱ noco̱ꞌ man Síí ꞌNi̱j Raꞌa man níꞌ me ro̱j noꞌ á.

³ Vaa so̱ꞌ, ne̱ tuvíꞌ ꞌu̱nj síí sa̱ꞌ noco̱ꞌ xraan man Yaꞌanj mé so̱ꞌ, ne̱ dan me se achíín ni̱ꞌyáj rihaan so̱ꞌ ra̱cuíj so̱ꞌ man ro̱j chana̱ nihánj, tinu̱j. Ro̱j chana̱ nihánj ga̱ ꞌó síí cuꞌna̱j Clemente do̱ꞌ, ꞌó nij tinúú ꞌu̱nj do̱ꞌ, racuíj ndoꞌo nij soꞌ mán ꞌu̱nj caꞌmii núj nana̱ sa̱ꞌ cheꞌé Cristó rihaan yuvii̱ a. Ne̱ no̱ se‑chuvi̱i nij soꞌ rihaan yanj ta̱j rihaan Yaꞌanj se vaa ga̱a̱ iꞌna̱ꞌ nij soꞌ rihaan Yaꞌanj nu̱ꞌ cavii nu̱ꞌ caꞌanj ado̱nj.

⁴ Ga̱a̱ niha̱ꞌ niga̱nj rá nimán soj ni̱ꞌyaj soj man Síí ꞌNi̱j Raꞌa man níꞌ á. Dan me se cata̱j xnaꞌanj uún ꞌu̱nj rihaan soj á: No̱ xcúún soj ga̱a̱ niha̱ꞌ niga̱nj rá nimán soj na̱nj á.

⁵ Ina̱nj niꞌya̱nj caꞌmi̱i̱ soj rihaan cunuda̱nj yuvii̱ ma̱n rihaan chumii̱ nihánj, ne̱ xca̱j nij yuvii̱ cuentá se vaa síí sa̱ꞌ me soj á. Nichrunꞌ caꞌna̱ꞌ uún Síí ꞌNi̱j Raꞌa man níꞌ na̱nj ado̱nj.

⁶ Se̱ nanó rá soj cheꞌé a̱ ꞌó rasu̱u̱n maꞌ. Tana̱nj cachi̱nj niꞌya̱j soj rihaan Yaꞌanj, ne̱ me maꞌa̱n rasu̱u̱n achiin man soj, ne̱ cachi̱nj soj rihaan Yaꞌanj, ne̱ cata̱j soj guun niꞌya̱j níꞌ rihaan Yaꞌanj á.

⁷ Da̱nj quiꞌya̱j soj, ga̱a ne̱ ꞌo̱ ga̱a̱ xe̱j nimán soj, quiꞌya̱j Yaꞌanj, nda̱ꞌ se ne neꞌen yuvii̱ da̱j ꞌyaj Yaꞌanj maꞌ. Ne̱ tu̱mé Yaꞌanj nimán soj ga̱ raa̱ soj cheꞌé se si̱j noco̱ꞌ man Cristó Jesús me soj ado̱nj.

⁸ Dan me se ina̱nj cheꞌé se ya̱ do̱ꞌ, cheꞌé se sa̱ꞌ do̱ꞌ, cheꞌé tucuáán sa̱ꞌ do̱ꞌ, cheꞌé se lu̱j do̱ꞌ, cheꞌé se nica̱ vaa nimán do̱ꞌ, cheꞌé se niꞌya̱nj do̱ꞌ, nuchru̱j ra̱a̱ soj, tinu̱j, nocoj. Dan me se sese veꞌé vaa se ꞌyaj ꞌo̱ soꞌ rá soj, ne̱ xca̱j soj cuentá, ne̱ nuchru̱j ra̱a̱ soj da̱j ꞌyaj soꞌ á.

⁹ Nu̱ꞌ nana̱ tucuꞌyón ꞌu̱nj man soj do̱ꞌ, nu̱ꞌ suun caꞌnéꞌ ꞌu̱nj rihaan soj do̱ꞌ, nu̱ꞌ nana̱ caꞌmii ꞌu̱nj cuno soj do̱ꞌ, nu̱ꞌ se vaa quiꞌyáá ꞌu̱nj queneꞌen soj do̱ꞌ roꞌ, da̱nj quiꞌya̱j uún soj á. Ga̱a ne̱ ca̱yáán Yaꞌanj si̱j ꞌyaj vaa xe̱j nimán níꞌ nimán soj ado̱nj.

Sa̱ꞌ uxrá quiꞌyaj nij síí noco̱ꞌ man Cristó ya̱nj chumanꞌ Filipos racuíj nij soꞌ man Pabló a

¹⁰ Guun niha̱ꞌ ndoꞌo rá nimanj rihaan Síí ꞌNi̱j Raꞌa man níꞌ, cheꞌé se guun cheꞌe̱ uún soj caráyaꞌa̱nj soj manj ne̱ rqué soj nu̱ꞌ se vaa cachiin manj ado̱nj. ꞌO̱ se ne taj ꞌu̱nj rihaan soj se vaa naꞌvej rá soj ra̱cuíj soj manj maꞌ. Ma̱an se ga̱a rque̱ me se ne ga̱a̱ yaꞌnúj rihaan soj ra̱cuíj soj manj maan ado̱nj.

¹¹ Né cheꞌe̱ se vaa doj rasu̱u̱n achiin manj me tuꞌvaj da̱nj rihaan soj cuano̱ maꞌ. Nda̱ꞌ se do̱j rasu̱u̱n vaa rihanj, tza̱j ne̱ ne nanó rá ꞌu̱nj maꞌ. ꞌO̱ se a̱j naríꞌ ꞌu̱nj naquiꞌya̱j ina̱j ꞌu̱nj nimanj, ne̱ niha̱ꞌ ina̱nj raj na̱nj ado̱nj.

¹² Dan me se asa̱ꞌ me achiin ndoꞌo rasu̱u̱n manj, ne̱ asa̱ꞌ me vaa ndoꞌo rasu̱u̱n rihanj, tza̱j ne̱ caꞌve̱e se vaa xraan rquej do̱ꞌ, caꞌve̱e se naꞌaan rquej do̱ꞌ, caꞌve̱e se vaa se achiin manj do̱ꞌ, caꞌve̱e se ma̱n ndoꞌo rasu̱u̱n rihanj do̱ꞌ, tza̱j ne̱ taj se ꞌyaj maꞌ. Ma̱an se da̱j a̱ güii vaa ina̱j nimanj, ne̱ vaa niha̱ꞌ raj, ne̱ ne nanó raj maꞌ.

¹³ Cheꞌé se rqué ndoꞌo Cristó se nucua̱j manj roꞌ, cheꞌé dan uun nu̱cuáj rihaan me maꞌa̱n rasu̱u̱n ado̱nj.

¹⁴ Tza̱j ne̱ cuna̱j uxrá quiꞌyaj soj racuíj soj manj ga̱a quiránꞌ ꞌu̱nj sayuun ga̱a rque̱ chugua̱nj.

¹⁵ Neꞌen maꞌa̱n soj se vaa ga̱a curiha̱nj ꞌu̱nj estadó Macedonia ne̱ guun cheꞌe̱j tucuꞌyonj nana̱ sa̱ꞌ cheꞌé Cristó, ne̱ cuaj rqué soj saꞌanj manj na̱nj niha̱nꞌ. Taj va̱j ꞌó xꞌneꞌ yuvii̱ noco̱ꞌ man Cristó racuíj manj maꞌ. Ma̱an se o̱rúnꞌ soj me síí racuíj manj na̱nj niha̱nꞌ.

¹⁶ Ga̱a cayánj chumanꞌ Tesalónica, ne̱ queꞌe̱e̱ ya̱ rqué soj saꞌanj cachiin manj na̱nj niha̱nꞌ.

¹⁷ Né cheꞌe̱ se me raj rque̱ u̱u̱n soj doj saꞌanj manj me tuꞌva uún ꞌu̱nj da̱nj nihánj cuano̱ maꞌ. Ma̱an se cheꞌé se me raj na̱ruꞌvee Yaꞌanj doj se sa̱ꞌ rihaan soj, cheꞌé dan tuꞌvaj da̱nj ado̱nj.

¹⁸ Dan me se nacaj ꞌu̱nj cunuda̱nj se vaa caꞌnéé soj rihanj, ne̱ a̱ ꞌó rasu̱u̱n ne achiin manj a̱ maꞌ. Ne̱ saꞌanj caꞌnéé soj rihanj ga̱ Epafrodito me se narqué soꞌ nu̱ꞌ saꞌanj yoꞌ rihanj, ne̱ guun niha̱ꞌ rá Yaꞌanj niꞌya̱j Yaꞌanj se vaa rqué soj saꞌanj yoꞌ manj, ne̱ ase vaa se acaa rihaan chraan altar, ne̱ da̱j ndoꞌo gunꞌ yoꞌ roꞌ, da̱nj vaa saꞌanj yoꞌ niꞌya̱j Yaꞌanj ado̱nj.

¹⁹ Dan me se sese vaa se achiin man soj, ne̱ rque̱ Taꞌanj ꞌu̱nj nu̱ꞌ rasu̱u̱n yoꞌ rihaan soj cheꞌé se me soj síí noco̱ꞌ man Cristó Jesús, ne̱ xa̱ꞌ Yaꞌanj, tza̱j ne̱ taj va̱j rasu̱u̱n achiin rihaan Yaꞌanj maꞌ. ꞌO̱ se soꞌ me síí uun chij rihaan cunuda̱nj rasu̱u̱n ado̱nj.

²⁰ Cata̱j níꞌ se vaa niꞌndaj ya̱ sa̱ꞌ veꞌé vaa Rej níꞌ Yaꞌanj nu̱ꞌ cavii nu̱ꞌ caꞌanj á. Veé da̱nj ga̱a̱ ya̱ ado̱nj.

Veꞌé cuma̱n nij síí noco̱ꞌ man Cristó ya̱nj chumanꞌ Filipos, rá nij tuvi̱ꞌ Pabló a

²¹ Me raj cata̱j nij soj rihaan cunuda̱nj nij síí noco̱ꞌ man Cristó Jesús se vaa veꞌé ca̱yáán nij soꞌ raj a. Ne̱ vaa nij tinúú níꞌ síí ma̱n ga̱j, ne̱ veꞌé cuma̱n nij soj, rá nij soꞌ uún a.

²² Ne̱ vaa nij síí noco̱ꞌ man Cristó ma̱n chumanꞌ nihánj, ne̱ veꞌé cuma̱n soj, rá da̱j a̱ nij soꞌ uún, ne̱ vaa nij síí ꞌyaj suun tucuá síí nica̱j suun emperador cuꞌna̱j César, ne̱ me ndoꞌo rá nij soꞌ veꞌé cuma̱n soj uún na̱nj ado̱nj.

²³ Me raj quiꞌya̱j ndoꞌo Jesucristó Si̱j ꞌNi̱j Raꞌa man níꞌ se lu̱j cheꞌé cunuda̱nj soj ado̱nj.