Filipenses 2 - Triqui de San Juan Copala

Ase vaa rá Cristó roꞌ, da̱nj ga̱a̱ rá maꞌa̱n níꞌ uún á

¹ Ya̱ ya̱ nariꞌ nucuaj nimán níꞌ, ꞌyaj Cristó, rá soj naꞌ. Ya̱ ya̱ uun niha̱ꞌ nimán níꞌ, ꞌyaj tinúú níꞌ síí ꞌe̱e̱ rá man níꞌ, rá soj naꞌ. Ya̱ ya̱ veꞌé mán nu̱ꞌ nij tinu̱j níꞌ, ꞌyaj Nimán Yaꞌanj, rá soj naꞌ. Ya̱ ya̱ nuu ꞌe̱e̱ rá níꞌ si̱j noco̱ꞌ man Cristó man tinúú níꞌ síí quiranꞌ sayuun, rá soj naꞌ. Dan me se nana̱ nihánj roꞌ, me nana̱ ya̱ uxrá vaa na̱nj ado̱nj.

² Cheꞌé dan quiꞌya̱j soj nda̱a vaa taj nana̱ nihánj, ga̱a ne̱ gu̱un niha̱ꞌ uxrá rá nimanj, ne̱ dan me se cuya̱a̱n ga̱a̱ rá nimán soj ga̱ tinúú soj do̱ꞌ, cunu̱u ꞌe̱e̱ rá soj man tinúú soj do̱ꞌ, ꞌo̱ cuya̱a̱n o̱rúnꞌ rasu̱u̱n ga̱a̱ nimán soj do̱ꞌ, veꞌé ca̱yáán soj ga̱ tinúú soj do̱ꞌ, ne̱ gu̱un niha̱ꞌ uxrá rá nimanj ado̱nj.

³ Se̱ guun xco̱j ruva̱a̱ rá soj ni̱ꞌyaj soj tinúú soj maꞌ. Se̱ guun rá soj se vaa cata̱j tinúú soj se vaa sa̱ꞌ uxrá vaa maꞌa̱n soj maꞌ. Tza̱j ne̱ ga̱a̱ nica̱ꞌ nimán soj, cata̱j soj se vaa sa̱ꞌ doj vaa tinúú soj rihaan maꞌa̱n soj á.

⁴ Se̱ caráyaꞌa̱nj soj man ina̱nj maꞌa̱n soj maꞌ. Tza̱j ne̱ cara̱yaꞌa̱nj ꞌo̱ ꞌo̱ soj man tinúú soj á.

⁵ Ase vaa rá maꞌa̱n Cristó Jesús roꞌ, da̱nj ga̱a̱ rá maꞌa̱n soj uún á.

⁶ Nda̱ꞌ se Yaꞌanj ya̱ me Cristó, ne̱ soꞌ me síí no̱ xcúún gu̱un chij ndoꞌo, tza̱j ne̱ ne gu̱un na̱nj rá soꞌ gu̱un chij soꞌ maꞌ.

⁷ Tana̱nj a̱ tanáj soꞌ nu̱ꞌ suun uun chij yoꞌ, ne̱ guun soꞌ yuvii̱ guun soꞌ se‑mo̱zó yuvii̱ guun soꞌ, ne̱ ase vaa yuvii̱ roꞌ, da̱nj vaa soꞌ ga̱a caꞌnaꞌ soꞌ rihaan chumii̱ nihánj ado̱nj.

⁸ Dan me se cunuu nica̱ꞌ nimán soꞌ, ne̱ cuno soꞌ caꞌmii Yaꞌanj, ne̱ nda̱a caꞌvej rá soꞌ cavi̱ꞌ soꞌ, nda̱a se caꞌvej rá soꞌ cachro̱n nii man soꞌ rihaan rcutze̱ ya̱, ne̱ veé da̱nj me nó soꞌ ga̱a caviꞌ soꞌ na̱nj ado̱nj.

⁹ Cheꞌé dan guun chij ndoꞌo soꞌ doj rej xta̱ꞌ, quiꞌyaj Yaꞌanj, ne̱ rqué ya̱ Yaꞌanj ꞌo̱ se‑chuvi̱i soꞌ ne̱ noco̱o doj vaa se‑chuvi̱i soꞌ rihaan da̱j a̱ ꞌó se‑chuvi̱i yuvii̱ na̱nj ado̱nj.

¹⁰ Cheꞌé dan vaa güii, ne̱ caꞌa̱nj ca̱yáán ru̱j cunuda̱nj nij síí ma̱n xta̱ꞌ do̱ꞌ, nij síí ma̱n rihaan chumii̱ do̱ꞌ, nij síí ma̱n rej rque yoꞌóó do̱ꞌ, cheꞌé se‑chuvi̱i Jesús,

¹¹ ne̱ cata̱j ya̱ cunuda̱nj nij soꞌ se vaa maꞌa̱n Jesucristó me Síí ꞌNi̱j Raꞌa man níꞌ, ga̱a ne̱ queneꞌe̱n ya̱ nij soꞌ se vaa sa̱ꞌ uxrá quiꞌyaj Rej níꞌ Yaꞌanj ado̱nj.

Rquee̱ níꞌ yan cunu̱u sa̱ꞌ nimán níꞌ á

¹² Cheꞌé dan cuno̱ soj si̱j ꞌe̱e̱ rá ꞌu̱nj niꞌya̱j ꞌu̱nj man caꞌmi̱j á. Ga̱a cayáán ꞌu̱nj ga̱ soj, ne̱ ꞌo̱ cuno soj nu̱ꞌ nana̱ caꞌmij a. Cuano̱ nihánj me se nda̱ꞌ se nuvíꞌ ꞌu̱nj yáán ga̱ soj, tza̱j ne̱ me rá ꞌu̱nj doj a̱ cuno̱ soj á. Ase ꞌyaj xnii ga̱a aráyaꞌa̱nj xnii ne̱ aráj cochro̱j xnii niꞌya̱j xnii rej xnii roꞌ, da̱nj ga̱a̱ quiꞌya̱j soj ni̱ꞌyaj soj Yaꞌanj, ne̱ doj a̱ rquee̱ soj cheꞌé rej navi̱j nu̱ꞌ chrej chiꞌi̱i̱ uun chij nimán soj á.

¹³ Yaꞌanj me síí ꞌyaj suun nimán soj yan gu̱un rá soj cuno̱ soj snana̱ soꞌ, ne̱ soꞌ me síí quiꞌya̱j gu̱un nucua̱j soj quiꞌya̱j soj nu̱ꞌ se vaa me rá soꞌ quiꞌya̱j soj ado̱nj.

¹⁴ A̱ ꞌó güii se̱ caꞌmii tuꞌva̱ yuve̱ soj cheꞌé tinúú soj maꞌ. Ina̱nj veꞌé quiꞌya̱j soj ga̱ tinúú soj á.

¹⁵ Ne̱ gu̱un soj síí sa̱ꞌ, ne̱ taj cacunꞌ tu̱mé soj rihaan Yaꞌanj maꞌ. Ne̱ nda̱ꞌ se chéé soj ga̱ yuvii̱ vaa qui̱j nimán ma̱n rihaan chumii̱ nihánj cuano̱, tza̱j ne̱ veꞌé cuno̱ soj rihaan Yaꞌanj, ne̱ ꞌo̱ ya̱ gu̱un taꞌni̱j Yaꞌanj man soj chugua̱nj. Dan me se ase vaa veꞌé ndoꞌo vaa chuguu̱n nij yatiꞌ rej xta̱ꞌ roꞌ, da̱nj veꞌé uxrá curuvi̱ꞌ soj scaꞌnúj nij yuvii̱ ma̱n rihaan chumii̱ nihánj, ne̱

¹⁶ xraan canoco̱ꞌ soj snana̱ Yaꞌanj nana̱ ꞌyaj vaa iꞌna̱ꞌ nimán níꞌ, ga̱a ne̱ gu̱un niha̱ꞌ raj ni̱ꞌyaj ꞌu̱nj man soj güii caꞌna̱ꞌ uún Cristó rihaan chumii̱ nihánj, cheꞌé se queneꞌe̱n soꞌ se vaa tucuꞌyón uxraj man soj ne̱ cavii sa̱ꞌ nu̱ꞌ suun quiꞌyáj a.

¹⁷ Ne̱ nda̱ꞌ se nda̱a ayanj maꞌa̱n ton manj cheꞌé sayuun ránꞌ ꞌu̱nj cheꞌé se me ndoꞌo raj ꞌo̱ cuchuma̱n rá soj ni̱ꞌyaj soj Yaꞌanj, tza̱j ne̱ gu̱un niha̱ꞌ ndoꞌo rá nimanj, ne̱ gu̱un niha̱ꞌ ndoꞌo rá nimanj ga̱ soj ado̱nj.

¹⁸ Ne̱ gu̱un niha̱ꞌ ndoꞌo rá nimán soj uún, ne̱ gu̱un niha̱ꞌ ndoꞌo rá nimán soj ga̱ ꞌu̱nj a.

Cuchi̱ꞌ Timoteo ga̱ Epafrodito chumanꞌ Filipos a

¹⁹ Me rá ꞌu̱nj caꞌne̱j ꞌu̱nj man síí cuꞌna̱j Timoteo cuchi̱ꞌ soꞌ rihaan soj, sese caꞌve̱j rá Jesús Si̱j ꞌNi̱j Raꞌa man níꞌ cuchi̱ꞌ soꞌ a. Ne̱ ca̱nica̱j soꞌ caꞌna̱ꞌ soꞌ rihanj, ne̱ cata̱j xnaꞌanj soꞌ rihanj da̱j vaa mán soj, ga̱a ne̱ gu̱un niha̱ꞌ raj a.

²⁰ O̱rúnꞌ soꞌ me tuvíꞌ ꞌu̱nj ya̱ nanó ndoꞌo rá cheꞌé soj da̱j vaa mán soj chugua̱nj.

²¹ Tza̱j ne̱ ꞌó nij soꞌ roꞌ, ina̱nj cheꞌé maꞌa̱n nij soꞌ nanó rá nij soꞌ, tza̱j ne̱ ne nanó rá nij soꞌ cheꞌé se‑su̱u̱n Cristó Jesús maꞌ.

²² Tza̱j ne̱ a̱j neꞌen soj se vaa síí sa̱ꞌ uxrá me Timoteo, ne̱ da̱j se ꞌyaj xnii racuíj xnii man rej xnii roꞌ, da̱nj vaa ꞌyaj Timoteo racuíj soꞌ mán ꞌu̱nj nataꞌ rój nana̱ sa̱ꞌ cheꞌé Cristó ado̱nj.

²³ Núj xca̱j ꞌu̱nj cuentá da̱j qui̱ránꞌ ꞌu̱nj rej riha̱a̱n, ga̱a ne̱ nu̱ꞌ caꞌne̱j ꞌu̱nj man soꞌ cuchi̱ꞌ soꞌ rej ya̱nj soj a.

²⁴ Ne̱ nucua̱j rá ꞌu̱nj man Síí ꞌNi̱j Raꞌa man níꞌ se vaa raꞌya̱nj cuchi̱ꞌ ma̱ꞌanj rihaan soj ado̱nj.

²⁵ Vaa cheꞌé ndoꞌo caꞌne̱j ꞌu̱nj man tinúú níꞌ síí cuꞌna̱j Epafrodito cuchi̱ꞌ soꞌ rihaan soj vaa na̱nj ado̱nj. Soꞌ me síí quiꞌyaj ndoꞌo se‑su̱u̱n Yaꞌanj ga̱j rej ma̱n síí ta̱j riꞌyunj man níꞌ, ne̱ maꞌa̱n nij soj me síí caꞌnéé man soꞌ caꞌna̱ꞌ soꞌ rque̱ soꞌ se vaa achiin manj,

²⁶ ne̱ me ndoꞌo rá soꞌ queneꞌe̱n uún soꞌ man nij soj na̱nj ado̱nj. Dan me se nanó rá soꞌ se vaa cuno soj nana̱ cheꞌé soꞌ se vaa canó chiꞌii̱ man soꞌ ado̱nj.

²⁷ Ya̱ da̱j doj se caviꞌ soꞌ, tza̱j ne̱ cunuu ꞌe̱e̱ rá Yaꞌanj man soꞌ, ne̱ cunuu ꞌe̱e̱ rá Yaꞌanj mán ꞌu̱nj do̱ꞌ, ne̱ ne cavi̱ꞌ soꞌ maꞌ. ꞌO̱ se sese caviꞌ Epafrodito, ne̱ nanó ndoꞌo raj na̱nj á.

²⁸ Cheꞌé dan raꞌya̱nj caꞌne̱j ꞌu̱nj man soꞌ cuchi̱ꞌ soꞌ rihaan soj, ne̱ gu̱un niha̱ꞌ rá soj queneꞌe̱n soj man soꞌ, ne̱ cheꞌé dan se̱ nanó rá ꞌu̱nj cheꞌé soj maꞌ.

²⁹ Cheꞌé dan asa̱ꞌ cuchiꞌ soꞌ, ne̱ ga̱a̱ niha̱ꞌ ndoꞌo rá nimán soj caꞌmi̱i̱ soj ga̱ soꞌ á. Dan me se ya̱ tinúú níꞌ si̱j noco̱ꞌ man Síí ꞌNi̱j Raꞌa man níꞌ me soꞌ a. Cara̱a̱ cochro̱j soj rihaan cunuda̱nj nij yuvii̱ ꞌyaj nda̱a vaa ꞌyaj Epafrodito á.

³⁰ ꞌO̱ se da̱j doj se caviꞌ soꞌ cheꞌé suun quiꞌyaj soꞌ cheꞌé Cristó na̱nj ado̱nj. Dan me se nda̱a caꞌnéé nimán soꞌ cavi̱ꞌ soꞌ cheꞌé se nayón soꞌ rihaan soj racuíj soꞌ manj na̱nj chugua̱nj.