Efesios 6 - Triqui de San Juan Copala

¹ Soj xni̱i noco̱ꞌ Yaꞌanj Si̱j ꞌNi̱j Raꞌa man níꞌ roꞌ, cuno̱ soj rihaan rej soj do̱ꞌ, rihaan nii soj do̱ꞌ, cheꞌé se da̱nj nó xcúún níꞌ quiꞌya̱j níꞌ á.

² Nihánj me ꞌo̱ suun noco̱o no̱ rihaan Danj Yaꞌanj caꞌneꞌ Yaꞌanj rihaan níꞌ cuno̱ níꞌ a: “Veꞌé cara̱a̱ co̱chróó so̱ꞌ rihaan réé so̱ꞌ do̱ꞌ, rihaan nií so̱ꞌ do̱ꞌ á”, taj Danj Yaꞌanj rihaan níꞌ ado̱nj. Ne̱ scaꞌnúj nij suun caꞌneꞌ Yaꞌanj rihaan níꞌ ga̱a naá roꞌ, suun nihánj me suun uun tuvi̱ꞌ asino ya̱a̱n ga̱ ꞌo̱ se lu̱j ataꞌ tuꞌva Yaꞌanj ado̱nj.

³ Sese da̱nj quiꞌya̱j níꞌ, ga̱a ne̱ cavi̱i̱ sa̱ꞌ níꞌ, ne̱ gu̱un queꞌe̱e̱ doj güii ca̱yáán níꞌ rihaan chumii̱ nihánj a.

⁴ Ne̱ sese rej xnii me soj, ne̱ se̱ caꞌmaan rá taꞌníí soj quiꞌya̱j soj maꞌ. Tana̱nj veꞌé ta̱cuachij soj man taꞌníí soj á. ꞌO̱ se tu̱cuꞌyón soj snana̱ Yaꞌanj Si̱j ꞌNi̱j Raꞌa man níꞌ man taꞌníí soj, ne̱ narque̱ soj chrej nucua̱j man taꞌníí soj á.

⁵ Ne̱ mozó roꞌ, veꞌé cuno̱ soꞌ rihaan se‑ruꞌve̱e̱ soꞌ, ne̱ ga̱a̱ niꞌya̱nj nimán mozó, ne̱ cara̱a̱ cochro̱j uxrá mozó rihaan se‑ruꞌve̱e̱ mozó á. Ase vaa ꞌyaj mozó rihaan maꞌa̱n Cristó roꞌ, da̱nj quiꞌya̱j mozó rihaan se‑ruꞌve̱e̱ mozó uún á.

⁶ Ne̱ se̱ quiꞌyaj mozó yoꞌ se vaa ꞌyaj nij síí vaa qui̱j nimán maꞌ. Dan me se nij síí vaa qui̱j nimán roꞌ, me rá nij soꞌ cara̱nꞌ rá se‑ruꞌve̱e̱ nij soꞌ ni̱ꞌyaj soꞌ man nij soꞌ, tza̱j ne̱ ina̱nj ga̱a niꞌya̱j ruꞌvee man nij soꞌ ꞌyaj suun nij soꞌ, tza̱j ne̱ se̱ guun quiꞌya̱j soj da̱nj maꞌ. Tana̱nj ꞌo̱ caꞌne̱j nimán soj quiꞌya̱j suun soj, ne̱ gu̱un rá soj se vaa se‑mo̱zó Cristó me soj, ne̱ quiꞌya̱j soj nu̱ꞌ se vaa me rá Yaꞌanj quiꞌya̱j soj á.

⁷ Gu̱un niha̱ꞌ rá soj quiꞌya̱j suun soj á. Se̱ guun rá soj se vaa rihaan yuvii̱ ꞌyaj suun soj maꞌ. Tana̱nj gu̱un rá soj se vaa mozó ꞌyaj suun rihaan maꞌa̱n Yaꞌanj Si̱j ꞌNi̱j Raꞌa man níꞌ me soj á.

⁸ Xca̱j soj cuentá se vaa sese quiꞌya̱j níꞌ suun sa̱ꞌ, ne̱ taj se ꞌyaj sese mozó me níꞌ do̱ꞌ, sese né mo̱zó me níꞌ do̱ꞌ, taj se ꞌyaj maꞌ. Dan me se ya̱ na̱ruꞌvee Yaꞌanj Si̱j ꞌNi̱j Raꞌa man níꞌ cheꞌé suun sa̱ꞌ ꞌyaj níꞌ na̱nj ado̱nj.

⁹ Ne̱ soj si̱j ruꞌvee roꞌ, veꞌé quiꞌya̱j soj ga̱ se‑mo̱zó soj uún á. Caꞌne̱ꞌ rá soj ga̱ suun axríj yuva̱a̱ man mozó, ne̱ caꞌne̱ꞌ rá soj ga̱ suun tuchuꞌviꞌ man mozó uún á. ꞌO̱ se neꞌen soj se vaa nicu̱nꞌ Síí ꞌNi̱j Raꞌa man soj do̱ꞌ, man se‑mo̱zó soj do̱ꞌ, rej xta̱ꞌ, ne̱ ꞌo̱ cuya̱a̱n vaa ta̱ranꞌ níꞌ rihaan soꞌ ado̱nj.

Da̱j quiꞌya̱j níꞌ, ne̱ caꞌve̱e quiꞌya̱j canaán níꞌ rihaan Síí Chre̱e a

¹⁰ Da̱j ꞌó nana̱ cata̱j xnaꞌanj ꞌu̱nj rihaan soj a. ꞌO̱ ga̱a̱ chre̱ꞌ soj ga̱ Yaꞌanj Si̱j ꞌNi̱j Raꞌa man níꞌ á. Caꞌve̱j soj caꞌne̱j Síí ꞌNi̱j Raꞌa man níꞌ se nucua̱j nimán soj, ne̱ da̱j se vaa se nucua̱j nica̱j maꞌa̱n soꞌ roꞌ, da̱nj ga̱a̱ se nucua̱j ni̱caj maꞌa̱n soj, quiꞌya̱j soꞌ chugua̱nj.

¹¹ Dan me se nu̱ꞌ se nucua̱j rqué Yaꞌanj man soj roꞌ, caꞌne̱j soj se nucua̱j yoꞌ nimán soj, ne̱ gu̱un nucua̱j soj quiꞌya̱j canaán soj rihaan Síí Chre̱e ga̱a me rá soꞌ tiha̱ꞌ yuꞌunj soꞌ man soj ado̱nj.

¹² Da̱nj quiꞌya̱j níꞌ cheꞌé se nij síí unuꞌ ga̱ níꞌ me nij nana̱ chre̱e uun chij rihaan chumii̱ nihánj do̱ꞌ, nij nana̱ chre̱e nica̱j suun do̱ꞌ, nij nana̱ chre̱e rii taꞌngaꞌ rihaan rej rmi̱ꞌ ma̱n rihaan chumii̱ nihánj do̱ꞌ, nij xꞌneꞌ ri̱i̱ nana̱ chre̱e chéé rej xta̱ꞌ do̱ꞌ ado̱nj.

¹³ Cheꞌé dan caꞌne̱j soj nu̱ꞌ se nucua̱j rqué Yaꞌanj man soj nimán soj, ne̱ güii quiꞌya̱j ndoꞌo Síí Chre̱e sayuun rihaan chumii̱ nihánj roꞌ, ne̱ gu̱un nucua̱j soj quiꞌya̱j canaán soj rihaan soꞌ ado̱nj. Ne̱ asa̱ꞌ cunuꞌ soj ga̱ Síí Chre̱e yoꞌ, ne̱ síí ga̱a̱ nucua̱j doj rihaan soꞌ gu̱un soj ado̱nj.

¹⁴ Dan me se nano̱ꞌ soj da̱j quiꞌya̱j soj cunu̱ꞌ soj ga̱ Síí Chre̱e yoꞌ á. Uxrá canoco̱ꞌ soj nana̱ ya̱, ne̱ ase vaa nuj ꞌni̱j catuu̱n tanuu roꞌ, da̱nj ga̱a̱ nana̱ yoꞌ rihaan soj, ne̱ gu̱un nucua̱j soj cunu̱ꞌ soj ga̱ Síí Chre̱e yoꞌ ado̱nj. Ne̱ caꞌve̱j soj cunu̱u sa̱ꞌ nimán soj rihaan Yaꞌanj, ne̱ ase vaa agaꞌ aráán nu̱ꞌ rucua̱a̱ tanuu roꞌ, da̱nj ga̱a̱ se ca̱ráán nimán soj, quiꞌya̱j Yaꞌanj, ga̱a ne̱ se̱ guun nucua̱j Síí Chre̱e quiꞌya̱j chiꞌi̱i̱ Síí Chre̱e yoꞌ nimán soj a̱ maꞌ.

¹⁵ Ne̱ ga̱a̱ listó soj, ne̱ cavi̱i̱ soj caꞌa̱nj soj, nata̱ꞌ soj nana̱ sa̱ꞌ cheꞌé Cristó rihaan yuvii̱, ne̱ cuno̱ nij yuvii̱ nana̱ sa̱ꞌ yoꞌ, ne̱ dínj ca̱yáán nij yuvii̱ ga̱ Yaꞌanj ado̱nj. Ne̱ ase vaa canu̱j ꞌni̱j tacóó tanuu roꞌ, da̱nj ga̱a̱ nana̱ sa̱ꞌ yoꞌ rihaan soj a.

¹⁶ Ne̱ niga̱nj ga̱a̱ nucua̱j uxrá rá soj man Cristó, ga̱a ne̱ ase vaa tanuu noco̱ꞌ rcuchra̱ꞌ ma̱nj raꞌa roꞌ, da̱nj ga̱a̱ maꞌa̱n soj uún, ne̱ sese go̱ꞌ Síí Chre̱e chruun ta̱j tanj raa̱ acoꞌ yaꞌan man soj, ne̱ gu̱un nucua̱j soj ti̱naꞌáj soj yaꞌan yoꞌ chugua̱nj.

¹⁷ Ne̱ gu̱un ya̱ rá soj se vaa nani̱i̱ soj rihaan sayuun, quiꞌya̱j Yaꞌanj, ne̱ ase vaa nave̱ aga̱ꞌ nu̱u̱ raa̱ tanuu roꞌ, da̱nj ga̱a̱ nana̱ sa̱ꞌ cu̱nuû raa̱ soj, ne̱ se̱ guun nucua̱j Síí Chre̱e quiꞌya̱j Síí Chre̱e se chiꞌi̱i̱ man soj maꞌ. Ne̱ canoco̱ꞌ uxrá soj snana̱ Yaꞌanj nana̱ sa̱ꞌ nana̱ rqué Nimán Yaꞌanj rihaan níꞌ, ne̱ ase vaa neê espadá noco̱ꞌ raꞌa tanuu roꞌ, da̱nj ga̱a̱ snana̱ Yaꞌanj rihaan soj, ne̱ gu̱un nucua̱j soj go̱ꞌ soj man Síí Chre̱e, quiꞌya̱j snana̱ Yaꞌanj yoꞌ ado̱nj.

¹⁸ Ne̱ niga̱nj cachi̱nj niꞌya̱j uxrá soj rihaan Yaꞌanj, ne̱ ra̱cuíj Nimán Yaꞌanj man soj nacu̱nj soj ne̱ cachi̱nj niꞌya̱j soj ado̱nj. Se̱ caꞌneꞌ rá soj maꞌ. Tana̱nj ꞌo̱ cachi̱nj niꞌya̱j uxrá soj cheꞌé ta̱ranꞌ nij síí noco̱ꞌ man Cristó na̱nj á.

¹⁹ Ne̱ cachi̱nj niꞌya̱j soj cheꞌé ma̱ꞌán ꞌu̱nj se vaa rque̱ Yaꞌanj nana̱ cu̱u caꞌmi̱i̱ ꞌu̱nj rihaan yuvii̱, ne̱ sca̱ꞌ ti̱haán ꞌu̱nj nu̱ꞌ nana̱ sa̱ꞌ cheꞌé Cristó rihaan nij yuvii̱ á. Dan me se nana̱ sa̱ꞌ yuve̱ tihaa̱n naca̱ Yaꞌanj man níꞌ me nana̱ sa̱ꞌ yoꞌ,

²⁰ ne̱ nda̱ꞌ se nu̱mií ꞌu̱nj agaꞌ ne̱ꞌ, tza̱j ne̱ ꞌu̱nj me síí quiriꞌ suun nata̱ꞌ nana̱ sa̱ꞌ yoꞌ rihaan yuvii̱, ne̱ cachi̱nj niꞌya̱j soj rihaan Yaꞌanj se vaa se̱ cuchuꞌvíꞌ ꞌu̱nj caꞌmi̱i̱ ꞌu̱nj nana̱ sa̱ꞌ yoꞌ rihaan yuvii̱, cheꞌé se no̱ xcúún yá ꞌu̱nj caꞌmi̱i̱ sca̱ꞌ yá ꞌu̱nj nana̱ sa̱ꞌ yoꞌ rihaan yuvii̱ ado̱nj.

Caꞌnéé Pabló man síí cuꞌna̱j Tíquico cuchi̱ꞌ soꞌ rihaan nij síí ma̱n Éfeso a

²¹ Cata̱j xnaꞌanj tinúú níꞌ síí cuꞌna̱j Tíquico rihaan soj nu̱ꞌ se vaa quiránꞌ ꞌu̱nj a. Síí ꞌe̱e̱ ndoꞌo rá níꞌ man me soꞌ, ne̱ veꞌé ndoꞌo nuû soꞌ rihaan Síí ꞌNi̱j Raꞌa man níꞌ chugua̱nj.

²² Ne̱ me rá ꞌu̱nj queneꞌe̱n soj nu̱ꞌ se vaa quiranꞌ núj, ne̱ me rá ꞌu̱nj nari̱ꞌ nucuaj nimán soj, ne̱ cheꞌé dan caꞌne̱j ꞌu̱nj man soꞌ cuchi̱ꞌ soꞌ rihaan soj á.

Me rá Pabló quiꞌya̱j ndoꞌo Yaꞌanj se lu̱j cheꞌé nij síí noco̱ꞌ man Cristó ya̱nj chumanꞌ Éfeso a

²³ Me rá ꞌu̱nj ga̱a̱ xe̱j nimán nij tinu̱j nij soj, ne̱ ga̱a̱ ꞌe̱e̱ rá soj tinúú soj, ne̱ ga̱a̱ nucua̱j rá soj man Yaꞌanj, quiꞌya̱j Rej níꞌ Yaꞌanj do̱ꞌ, quiꞌya̱j Jesucristó Si̱j ꞌNi̱j Raꞌa man níꞌ do̱ꞌ ado̱nj.

²⁴ Ne̱ me rá ꞌu̱nj quiꞌya̱j ndoꞌo Yaꞌanj se lu̱j cheꞌé ta̱ranꞌ nij soj si̱j ꞌo̱ aráj cochro̱j rihaan Jesucristó Si̱j ꞌNi̱j Raꞌa man níꞌ nu̱ꞌ cavii nu̱ꞌ caꞌanj a.