Efesios 5 - Triqui de San Juan Copala

¹ Neꞌen nij soj se vaa taꞌni̱j Yaꞌanj me soj cuano̱, ne̱ ꞌe̱e̱ uxrá rá Yaꞌanj man soj, ne̱ cheꞌé dan ase vaa ꞌyaj maꞌa̱n Yaꞌanj roꞌ, da̱nj ga̱a̱ quiꞌya̱j uún maꞌa̱n soj na̱nj á.

² ꞌO̱ ga̱a̱ ꞌe̱e̱ rá soj man tinúú soj á. Ina̱nj da̱nj quiꞌyaj Cristó, cunuu ꞌe̱e̱ rá soꞌ man níꞌ, ne̱ caꞌvej soꞌ cavi̱ꞌ soꞌ cheꞌé níꞌ, ne̱ ase vaa rasu̱u̱n rqué yuvii̱ rihaan Yaꞌanj roꞌ, taꞌngaꞌ da̱nj vaa Cristó cheꞌé níꞌ na̱nj chugua̱nj.

³ Se̱ quiꞌyaj soj cacunꞌ ga̱ ꞌó yuvii̱ né ni̱ca̱ soj me maꞌ. A̱ ꞌó se chiꞌi̱i̱ se̱ quiꞌyaj soj maꞌ. Ne̱ se̱ guun niha̱ꞌ rá soj quiri̱ꞌ ndoꞌo soj rasu̱u̱n maꞌ. Síí noco̱ꞌ man Yaꞌanj me soj, ne̱ daj chiha̱a̱ míj se̱ quiꞌyaj soj a̱ doj cacunꞌ vaa da̱nj maꞌ.

⁴ Ne̱ se̱ caꞌmii soj nana̱ chiꞌi̱i̱ do̱ꞌ, nana̱ nij do̱ꞌ maꞌ. Se̱ caꞌmii soj nana̱ snúú rmaꞌa̱n maꞌ. ꞌO̱ se taj cheꞌé caꞌmi̱i̱ soj nana̱ vaa da̱nj maꞌ. Tana̱nj no̱ xcúún soj cata̱j ina̱nj soj guun niꞌya̱j níꞌ rihaan Yaꞌanj ado̱nj.

⁵ Dan me se síí ꞌyaj cacunꞌ ga̱ ꞌó yuvii̱ né ni̱ca̱ me roꞌ, quira̱nꞌ soꞌ sayuun, ne̱ síí niha̱ꞌ rá quiri̱ꞌ ndoꞌo rasu̱u̱n roꞌ, quira̱nꞌ soꞌ sayuun ado̱nj. (ꞌO̱ se ase vaa síí aráj gue̱e̱ rihaan yaꞌanj quiꞌyaj maꞌa̱n yuvii̱ roꞌ, da̱nj vaa uún síí niha̱ꞌ rá quiri̱ꞌ ndoꞌo rasu̱u̱n ado̱nj.) Xca̱j ya̱ soj cuentá se vaa a̱ ꞌó síí ꞌyaj cacunꞌ yoꞌ se̱ cayáán ga̱ Yaꞌanj asa̱ꞌ quisíj güii gu̱un chij Cristó do̱ꞌ, gu̱un chij Yaꞌanj do̱ꞌ a̱ maꞌ.

⁶ Se̱ caꞌvej rá soj caꞌmi̱i̱ yuvii̱ nana̱ ne̱ rihaan soj ne̱ tiha̱ꞌ yuꞌunj nij yuvii̱ man soj maꞌ. Se̱ quiꞌyaj soj se chiꞌi̱i̱ me rá nij yuvii̱ quiꞌya̱j soj maꞌ. ꞌO̱ se yoꞌ me se ꞌyaj nij síí naꞌvej rá cuno̱ rihaan Yaꞌanj, ne̱ cheꞌé dan uyanj rá Yaꞌanj, ne̱ ꞌyaj Yaꞌanj sayuun man nij soꞌ ado̱nj.

⁷ Cheꞌé dan naxu̱u̱n yaníj soj man soj rihaan nij síí ꞌyaj da̱nj á.

⁸ Asi̱j rque̱ roꞌ, ase vaa nij síí chéé rej rmi̱ꞌ roꞌ, da̱nj vaa maꞌa̱n soj, ne̱ nuviꞌ cuentá nica̱j soj maꞌ. Tza̱j ne̱ ya̱j roꞌ, canocoꞌ soj man Síí ꞌNi̱j Raꞌa man níꞌ, ne̱ cheꞌé dan ase vaa síí chéé rej ranga̱ꞌ roꞌ, da̱nj vaa soj, nica̱j ndoꞌo soj cuentá, ne̱ cheꞌé dan veꞌé quiꞌya̱j soj ga̱a chéé soj rihaan chumii̱ nihánj na̱nj á.

⁹ Síí chéé rej ranga̱ꞌ roꞌ, sa̱ꞌ ꞌyaj soꞌ, ne̱ nica̱ vaa nimán soꞌ, ne̱ nana̱ ya̱ ina̱nj aꞌmii soꞌ ado̱nj.

¹⁰ Dan me se nuchru̱j ra̱a̱ soj da̱j quiꞌya̱j soj, ne̱ cara̱nꞌ rá Síí ꞌNi̱j Raꞌa man níꞌ ni̱ꞌyaj soꞌ man soj ado̱nj.

¹¹ Ne̱ se̱ guun gu̱un tuvi̱ꞌ soj ga̱ nij síí chiꞌi̱i̱ ne acaj cuentá, ne̱ se̱ quiꞌyaj soj rasu̱u̱n taj se gúnꞌ ga̱ nij soꞌ a̱ maꞌ. Tana̱nj a̱ ti̱haa̱n soj man nij síí ꞌyaj da̱nj se vaa rasu̱u̱n nij ꞌyaj nij soꞌ á.

¹² ꞌO̱ se xa̱ꞌ se vaa ꞌyaj yuve̱ nij soꞌ, tza̱j ne̱ nda̱a uun naꞌa̱j yáꞌ caꞌmi̱ꞌ cheꞌé se vaa ꞌyaj yuve̱ nij soꞌ chugua̱nj.

¹³ Tza̱j ne̱ sese curuvi̱ꞌ da̱j vaa nu̱ꞌ rasu̱u̱n ꞌyaj yuve̱ nij soꞌ, ga̱a ne̱ queneꞌe̱n nij soꞌ da̱j vaa yoꞌ, ne̱ xca̱j ya̱ nij soꞌ cuentá se vaa nij uxrá vaa quiꞌyaj nij soꞌ ado̱nj.

¹⁴ ꞌO̱ se yaꞌan chuguu̱n me se ya̱ ruviꞌ nu̱ꞌ nij rasu̱u̱n ꞌyaj yaꞌan ado̱nj. Cheꞌé dan taj nana̱ nihánj a: Nari̱i̱ soj nej, si̱j otoj scaꞌnúj nij xnangá, ne̱ na̱xagaa soj, canicu̱nꞌ caya̱ soj, ne̱ Cristó me síí chugu̱u̱n rihaan soj á, taj nana̱ yoꞌ a.

¹⁵ Cheꞌé dan tu̱mé uxrá soj da̱j vaa ꞌyaj soj ga̱a chéé soj rihaan chumii̱ nihánj á. Se̱ quiꞌyaj soj se vaa ꞌyaj nij síí ne acaj cuentá maꞌ. Tana̱nj quiꞌya̱j soj nda̱a vaa ꞌyaj síí cu̱u raa̱ á.

¹⁶ Ne̱ se̱ caꞌneꞌ u̱u̱n rá soj cache̱n ndoꞌo orá rihaan soj maꞌ. ꞌO̱ se uun ndoꞌo cacunꞌ cuano̱ nihánj, ne̱ cheꞌé dan no̱ xcúún soj quiꞌya̱j ndoꞌo soj rasu̱u̱n sa̱ꞌ ya̱j ga̱a vaa yaꞌnúj rihaan soj chugua̱nj.

¹⁷ Ne̱ se̱ guun soj síí niꞌyo̱n maꞌ. Tana̱nj xca̱j soj cuentá da̱j me rá Síí ꞌNi̱j Raꞌa man níꞌ quiꞌya̱j soj a.

¹⁸ Ne̱ se̱ guun xno̱ soj maꞌ. Cheꞌé se uun xno̱ yuvii̱ roꞌ, cheꞌé dan ꞌyaj ndoꞌo nij yuvii̱ cacunꞌ chiꞌi̱i̱ ndoꞌo ado̱nj. Tana̱nj ꞌo̱ cu̱nuû Nimán Yaꞌanj nimán soj á.

¹⁹ Ase vaa chraꞌ no̱ rihaan Danj Yaꞌanj do̱ꞌ, chraꞌ aꞌmii cheꞌé Yaꞌanj do̱ꞌ, chraꞌ rqué Nimán Yaꞌanj man soj do̱ꞌ roꞌ, da̱nj ga̱a̱ nana̱ caꞌmi̱i̱ soj ga̱ tinúú soj á. Ne̱ cachra̱a̱ nimán soj chraꞌ rihaan Síí ꞌNi̱j Raꞌa man níꞌ á.

²⁰ Ne̱ niga̱nj cata̱j soj guun niꞌya̱j níꞌ rihaan Rej níꞌ Yaꞌanj cheꞌé cunuda̱nj rasu̱u̱n, cheꞌé se‑chuvi̱i Jesucristó Si̱j ꞌNi̱j Raꞌa man níꞌ á.

Veꞌé quiꞌya̱j ꞌo̱ ꞌo̱ níꞌ nda̱a vaa me rá tuviꞌ níꞌ á

²¹ Veꞌé quiꞌya̱j cunuda̱nj soj nda̱a vaa me rá tuviꞌ soj cheꞌé se aráj cochro̱j uxrá soj rihaan Cristó á.

²² Dan me se veꞌé quiꞌya̱j nij chana̱ nda̱a vaa me rá nica̱ noꞌ á. Dan me se da̱j se uun rá níꞌ niꞌya̱j níꞌ man Síí ꞌNi̱j Raꞌa man níꞌ roꞌ, da̱nj gu̱un rá chana̱ ni̱ꞌyaj chana̱ nica̱ noꞌ á.

²³ Dan me se Cristó me Síí Tinanii rihaan Sayuun man xꞌneꞌ níꞌ si̱j noco̱ꞌ man soꞌ, ne̱ uun chij soꞌ rihaan níꞌ, ne̱ cheꞌé dan da̱j se uun rá níꞌ niꞌya̱j níꞌ man soꞌ roꞌ, da̱nj ina̱nj gu̱un rá chana̱ ni̱ꞌyaj noꞌ man nica̱ noꞌ á.

²⁴ Ne̱ ase vaa uno xꞌneꞌ níꞌ si̱j noco̱ꞌ man Cristó rihaan Cristó roꞌ, taꞌngaꞌ da̱nj quiꞌya̱j nij chana̱ cuno̱ nij noꞌ nu̱ꞌ nana̱ sa̱ꞌ aꞌmii nica̱ nij noꞌ rihaan nij noꞌ á.

²⁵ Ne̱ nij snóꞌo roꞌ, ga̱a̱ ꞌe̱e̱ uxrá rá nij soꞌ man nica̱ nij soꞌ á. Dan me se ase vaa ꞌe̱e̱ rá Cristó man xꞌneꞌ níꞌ si̱j noco̱ꞌ man soꞌ roꞌ, da̱nj ga̱a̱ ꞌe̱e̱ rá nij snóꞌo man nica̱ nij soꞌ uún ado̱nj. Neꞌen soj se vaa caꞌnéé nimán Cristó cavi̱ꞌ soꞌ cheꞌé níꞌ si̱j noco̱ꞌ man soꞌ,

²⁶ cheꞌé se me rá soꞌ naquiꞌya̱j sa̱ꞌ soꞌ nimán ta̱ranꞌ níꞌ si̱j noco̱ꞌ man soꞌ ado̱nj. Da̱j se vaa naruvii man níꞌ ꞌyaj na roꞌ, da̱nj naꞌnuꞌ snana̱ Yaꞌanj nimán níꞌ ne̱ xꞌnéj cacunꞌ ta̱j xráá níꞌ a.

²⁷ Nda̱a síj, ga̱a ne̱ vaa güii, ne̱ cachro̱n soꞌ man xꞌneꞌ níꞌ si̱j noco̱ꞌ man soꞌ rihaan maꞌa̱n soꞌ, ne̱ niꞌndaj ya̱ sa̱ꞌ ga̱a̱ ta̱ranꞌ níꞌ ni̱ꞌyaj soꞌ, ne̱ a̱ ꞌó cacunꞌ do̱ꞌ, a̱ ꞌó se nij do̱ꞌ, se̱ quitáá xráá níꞌ a̱ maꞌ. Tana̱nj ase vaa vaa sa̱ꞌ Yaꞌanj roꞌ, da̱nj ga̱a̱ sa̱ꞌ ta̱ranꞌ níꞌ ado̱nj.

²⁸ Dan me se ase vaa ꞌyaj Cristó cheꞌé níꞌ roꞌ, da̱nj quiꞌya̱j uún nij snóꞌo cheꞌé nica̱ snóꞌo, ne̱ ase vaa ꞌe̱e̱ rá snóꞌo man nee̱ man maꞌa̱n soꞌ roꞌ, da̱nj ga̱a̱ ꞌe̱e̱ rá soꞌ man nica̱ soꞌ uún á. Dan me se ase vaa nee̱ man maꞌa̱n níꞌ roꞌ, da̱nj vaa chana̱ nica̱ níꞌ rihaan níꞌ, ne̱ cheꞌé dan me se sese ꞌe̱e̱ rá snóꞌo man nica̱ snóꞌo, ne̱ síí ꞌe̱e̱ rá man maꞌa̱n me uún soꞌ na̱nj chugua̱nj.

²⁹ ꞌO̱ se a̱ ꞌó yuvii̱ ne nachriꞌ nee̱ man maꞌa̱n maꞌ. Tana̱nj sese naꞌaan rque níꞌ, ne̱ chá níꞌ, ne̱ aráyaꞌa̱nj uxrá níꞌ man nee̱ man níꞌ ase vaa ꞌyaj Cristó aráyaꞌa̱nj Cristó man xꞌneꞌ níꞌ si̱j noco̱ꞌ man soꞌ ado̱nj.

³⁰ Dan me se ase vaa nee̱ man maꞌa̱n Cristó roꞌ, da̱nj vaa da̱j a̱ níꞌ si̱j noco̱ꞌ xꞌneꞌ nij síí noco̱ꞌ man soꞌ ado̱nj.

³¹ Ne̱ nihánj me nana̱ no̱ rihaan Danj Yaꞌanj a: “Cheꞌé dan ta̱náj snóꞌo man rej soꞌ do̱ꞌ, man nii soꞌ do̱ꞌ, ne̱ cunu̱u rucuaꞌa̱a̱n snóꞌo ga̱ chana̱ nica̱ soꞌ, ne̱ ase vaa o̱rúnꞌ yuvii̱ roꞌ, da̱nj ga̱a̱ ro̱j soꞌ a”, taj Danj Yaꞌanj a.

³² Nana̱ noco̱o ndoꞌo me nana̱ nihánj nana̱ sa̱ꞌ yuve̱ tihaa̱n naca̱ Yaꞌanj rihaan níꞌ, ne̱ aꞌmii nana̱ nihánj cheꞌé Cristó do̱ꞌ, cheꞌé xꞌneꞌ níꞌ si̱j noco̱ꞌ man soꞌ do̱ꞌ na̱nj ado̱nj.

³³ Dan me se sese snóꞌo me soj, ne̱ no̱ xcúún ꞌo̱ ꞌo̱ soj ga̱a̱ ꞌe̱e̱ rá soj man nica̱ soj, ne̱ ase vaa ꞌe̱e̱ rá soj man maꞌa̱n soj roꞌ, da̱nj ga̱a̱ ꞌe̱e̱ rá soj man nica̱ soj á. Ne̱ chana̱ roꞌ, no̱ xcúún chana̱ cara̱a̱ cochro̱j chana̱ rihaan nica̱ chana̱ uún ado̱nj.