Efesios 4 - Triqui de San Juan Copala

Veꞌé quiꞌya̱j níꞌ rihaan tinúú níꞌ, cheꞌé se ase vaa nee̱ man ꞌo̱ yuvii̱ roꞌ, da̱nj vaa ta̱ranꞌ nij tinu̱j níꞌ a

¹ Síí ꞌni̱j tagaꞌ cheꞌé se nocóꞌ ꞌu̱nj man Síí ꞌNi̱j Raꞌa man níꞌ mé ꞌu̱nj, ne̱ cheꞌé dan rqueé ꞌu̱nj man nij soj se vaa veꞌé canoco̱ꞌ soj man Yaꞌanj ga̱a chéé soj rihaan chumii̱ nihánj á. ꞌO̱ se Yaꞌanj me síí canacúún man soj canoco̱ꞌ soj man soꞌ a.

² Ne̱ gu̱un nij soj síí niꞌya̱nj aꞌmii, ne̱ veꞌé quiꞌya̱j soj ga̱ tinúú soj, ne̱ se̱ guun yuva̱a̱ soj man tinúú soj maꞌ. Tana̱nj cunu̱u ꞌe̱e̱ rá soj man tinúú soj, ne̱ ga̱a̱ ina̱j nimán soj ga̱ tinúú soj á.

³ Ne̱ se̱ cunuꞌ soj ga̱ tuviꞌ soj, ne̱ se̱ quitáá riꞌyunj soj tuviꞌ soj maꞌ. Ma̱an se dínj cuma̱n soj ga̱ tinúú soj á. Veꞌé cuno̱ ta̱ranꞌ soj rihaan Nimán Yaꞌanj, ne̱ ase vaa nimán o̱rúnꞌ yuvii̱ roꞌ, da̱nj ga̱a̱ nimán soj ga̱ tinúú soj á.

⁴ Dan me se o̱rúnꞌ ya̱ yuvii̱ me níꞌ vaa, ne̱ o̱rúnꞌ ya̱ nimán níꞌ vaa, ne̱ dan me se o̱rúnꞌ ya̱ Nimán Yaꞌanj me nuû nimán ya̱ níꞌ ado̱nj. Ne̱ uun ya̱ rá ta̱ranꞌ níꞌ se vaa canacúún Yaꞌanj man ta̱ranꞌ níꞌ, ne̱ ꞌo̱ cuya̱a̱n cavi̱i̱ sa̱ꞌ ta̱ranꞌ níꞌ, quiꞌya̱j Yaꞌanj ado̱nj.

⁵ O̱rúnꞌ Síí ꞌNi̱j Raꞌa man níꞌ, ne̱ o̱rúnꞌ nana̱ sa̱ꞌ amán rá níꞌ, ne̱ ꞌo̱ cuya̱a̱n vaa cataꞌ ne níꞌ,

⁶ ne̱ o̱rúnꞌ Yaꞌanj me Rej ta̱ranꞌ níꞌ uún a. Nica̱j yuꞌunj soꞌ man ta̱ranꞌ níꞌ, ne̱ ꞌyaj suun soꞌ nimán ta̱ranꞌ níꞌ, ne̱ ya̱nj soꞌ nimán ta̱ranꞌ níꞌ na̱nj ado̱nj.

⁷ Tza̱j ne̱ nda̱a ꞌo̱ ꞌo̱ níꞌ rqué Cristó ꞌo̱ ꞌo̱ suun sa̱ꞌ rihaan, nda̱a vaa me rá soꞌ rque̱ soꞌ man níꞌ ado̱nj. Ne̱ quiꞌyaj ndoꞌo Yaꞌanj se lu̱j rihaan ꞌo̱ ꞌo̱ níꞌ se vaa guun nucua̱j ꞌo̱ ꞌo̱ níꞌ quiꞌya̱j níꞌ suun caꞌneꞌ Cristó rihaan níꞌ a.

⁸ ꞌO̱ cuya̱a̱n vaa nana̱ nihánj ga̱ nana̱ no̱ rihaan Danj Yaꞌanj a: Quiꞌyaj canaán soꞌ rihaan nij síí ta̱j riꞌyunj man soꞌ, ga̱a ne̱ caꞌanj nica̱j soꞌ man nij soꞌ rej xta̱ꞌ, ga̱a ne̱ rqué soꞌ se sa̱ꞌ rihaan nij yuvii̱ a. Da̱nj taj Danj Yaꞌanj a.

⁹ Ne̱ nana̱ yoꞌ taj se vaa cavii soꞌ xta̱ꞌ, ne̱ neꞌen níꞌ se vaa asino ya̱a̱n nanij soꞌ nda̱a rej cunu̱u̱ doj rque yoꞌóó a.

¹⁰ Ne̱ o̱rúnꞌ soꞌ me síí nanij, ne̱ o̱rúnꞌ soꞌ me síí cavii rej xta̱ꞌ uún ado̱nj. Dan me se xta̱ꞌ doj cavii soꞌ rihaan da̱j a̱ rasu̱u̱n, ga̱a ne̱ guun soꞌ síí nica̱j yuꞌunj man da̱j a̱ rasu̱u̱n ado̱nj.

¹¹ Ne̱ maꞌa̱n soꞌ me síí cuneꞌ man taꞌa̱j níꞌ gu̱un taꞌa̱j níꞌ síí ca̱ta̱ suun caꞌa̱nj nata̱ꞌ snana̱ soꞌ, ne̱ ꞌó taꞌa̱j níꞌ me síí cuneꞌ soꞌ nata̱ꞌ nana̱ rqué Yaꞌanj rihaan, ne̱ ꞌó taꞌa̱j níꞌ me síí cuneꞌ soꞌ nata̱ꞌ nana̱ sa̱ꞌ cheꞌé Cristó rihaan nij síí ataa cuchuma̱n rá, ne̱ ꞌó taꞌa̱j níꞌ me síí tumé sa̱ꞌ rihaan Yaꞌanj man nij síí noco̱ꞌ man soꞌ, ne̱ ꞌó taꞌa̱j níꞌ me síí tihaa̱n snana̱ Yaꞌanj rihaan nu̱ꞌ tinúú níꞌ, quiꞌyaj Cristó a.

¹² Dan me se da̱nj quiꞌyaj Cristó, cheꞌé se me rá Cristó gu̱un nucua̱j níꞌ si̱j noco̱ꞌ man Cristó quiꞌya̱j níꞌ suun ra̱cuíj níꞌ man tinúú níꞌ, ga̱a ne̱ veꞌé doj cuma̱n ta̱ranꞌ níꞌ si̱j noco̱ꞌ man Cristó, ne̱ sa̱ꞌ doj quiꞌya̱j níꞌ se‑su̱u̱n soꞌ na̱nj ado̱nj.

¹³ Ne̱ sa̱ꞌ doj cuchuma̱n rá níꞌ ni̱ꞌyaj níꞌ Taꞌníí Yaꞌanj, ne̱ sa̱ꞌ doj queneꞌe̱n níꞌ da̱j vaa soꞌ, ne̱ veꞌé cunu̱u rcuaꞌa̱a̱n ta̱ranꞌ níꞌ ado̱nj. Chij ina̱nj ga̱a̱ rá níꞌ, ga̱a ne̱ da̱j se sa̱ꞌ ndoꞌo vaa Cristó roꞌ, da̱nj ga̱a̱ sa̱ꞌ ta̱ranꞌ níꞌ na̱nj ado̱nj.

¹⁴ Tza̱j ne̱ cuano̱ roꞌ, ase vaa xnii vaa níꞌ, ne̱ vaa yuvii̱ tihaꞌ yuꞌunj ndoꞌo man níꞌ, ne̱ dan me se nuchruj ra̱a̱ ndoꞌo nij yuvii̱ da̱j quiꞌya̱j nij soꞌ, ne̱ tihaꞌ yuꞌunj nij soꞌ man níꞌ a. Ne̱ tucuꞌyón ndoꞌo nij síí tihaꞌ yuꞌunj nana̱ naca̱ man níꞌ, ne̱ amán rá níꞌ uno níꞌ náá guun nana̱ tihaꞌ yuꞌunj yoꞌ, ꞌyaj nij soꞌ a. Tza̱j ne̱ asa̱ꞌ quisíj cunuu chij rá níꞌ, ne̱ se̱ cuno níꞌ nana̱ tihaꞌ yuꞌunj yoꞌ a̱ maꞌ.

¹⁵ Ma̱an ina̱nj nana̱ ya̱ caꞌmi̱i̱ níꞌ rihaan tinúú níꞌ, cheꞌé se ꞌe̱e̱ rá níꞌ man tinúú níꞌ, ga̱a ne̱ sa̱ꞌ doj queneꞌe̱n níꞌ canoco̱ꞌ níꞌ man Cristó nu̱ꞌ se vaa quiꞌya̱j níꞌ ado̱nj. Dan me se ase vaa rii taꞌngaꞌ cúú yave̱ yuvii̱ rihaan nu̱ꞌ nee̱ man yuvii̱ roꞌ, da̱nj vaa rii taꞌngaꞌ Cristó rihaan níꞌ ado̱nj.

¹⁶ Ne̱ ma̱an cheꞌé soꞌ roꞌ, me ase vaa oro̱ꞌ tuviꞌ nu̱ꞌ cúú man ꞌo̱ yuvii̱ roꞌ, da̱nj vaa nocoꞌ tuviꞌ níꞌ ga̱ tinúú níꞌ a. Ne̱ narqué Cristó se nucua̱j achiin rihaan nu̱ꞌ nij tinu̱j níꞌ, ne̱ cheꞌé dan veꞌé doj cuma̱n ta̱ranꞌ níꞌ, ne̱ veꞌé doj cunu̱u ꞌe̱e̱ rá níꞌ tinúú níꞌ ado̱nj.

Caꞌne̱ꞌ rá níꞌ ga̱ tucuáán chiꞌi̱i̱, ne̱ veꞌé canoco̱ꞌ níꞌ man Síí ꞌNi̱j Raꞌa man níꞌ á

¹⁷ Cheꞌé dan me cata̱j xnaꞌanj yá ꞌu̱nj ꞌo̱ nana̱ rihaan soj, cheꞌé se noco̱ꞌ níꞌ man Síí ꞌNi̱j Raꞌa man níꞌ a. Dan me se quisíj quiꞌyaj soj se vaa ꞌyaj ꞌó nij síí yaníj nij síí ne nocoꞌ man Cristó na̱nj á. Nij síí yaníj yoꞌ me se noco̱ꞌ nij soꞌ nana̱ snúú rmaꞌa̱n nana̱ avii raa̱ maꞌa̱n nij soꞌ,

¹⁸ ne̱ ne uun nucua̱j nij soꞌ xca̱j sa̱ꞌ nij soꞌ cuentá a̱ maꞌ. Se̱ cavii sa̱ꞌ nimán nij soꞌ, quiꞌya̱j Yaꞌanj maꞌ. Ma̱an se quira̱nꞌ nij soꞌ sayuun cheꞌé se síí niꞌyo̱n me nij soꞌ ne̱ nichra̱j ndoꞌo nimán nij soꞌ ado̱nj.

¹⁹ Ne nanó rá nij soꞌ cheꞌé cacunꞌ ꞌyaj nij soꞌ maꞌ. Tana̱nj ꞌo̱ nocoꞌ nij soꞌ tucuáán chiꞌi̱i̱, ne̱ ꞌyaj ndoꞌo nij soꞌ cacunꞌ se vaa me rá nee̱ man nij soꞌ quiꞌya̱j nij soꞌ, ne̱ niha̱ꞌ ndoꞌo rá nij soꞌ quiꞌya̱j nij soꞌ da̱j a̱ cacunꞌ yoꞌ a. Ne aꞌneꞌ rá nij soꞌ ga̱ suun ꞌyaj cacunꞌ a̱ maꞌ.

²⁰ Tza̱j ne̱ ino̱ uxrá vaa nana̱ nariꞌ soj asi̱j guun cheꞌe̱ soj canocoꞌ soj man Cristó ado̱nj.

²¹ Cuno nij soj snana̱ soꞌ, ne̱ nariꞌ nij soj cheꞌé soꞌ nda̱a vaa taj nana̱ ya̱ tihaa̱n Jesús man níꞌ ado̱nj.

²² Nana̱ nariꞌ nij soj taj se vaa xa̱ꞌ chrej chiꞌi̱i̱ noco̱ꞌ soj asino ya̱a̱n, tza̱j ne̱ riꞌi̱j soj man nimán nga̱ soj noco̱ꞌ chrej chiꞌi̱i̱ á. ꞌO̱ se síí riꞌyuj me soꞌ cheꞌé se uno soꞌ rihaan nana̱ taꞌyunj ne̱ ꞌyaj soꞌ se vaa me rá nee̱ man soꞌ a.

²³ Tza̱j ne̱ cuano̱ nihánj no̱ xcúún soj caꞌve̱j soj cunu̱u sa̱ꞌ nimán soj, ne̱ xca̱j naca̱ soj cuentá á.

²⁴ Ne̱ caꞌve̱j soj gu̱un soj yuvii̱ naca̱ quiꞌya̱j Yaꞌanj á. Dan me se Yaꞌanj me síí quiꞌya̱j cunu̱u nica̱ ya̱ nimán soj, ne̱ cunu̱u sa̱ꞌ ya̱ nimán soj, quiꞌya̱j soꞌ ado̱nj.

²⁵ Cheꞌé dan caꞌne̱ꞌ rá soj ga̱ nana̱ ne̱, ne̱ ina̱nj nana̱ ya̱ caꞌmi̱i̱ soj rihaan tinúú soj, cheꞌé se ase vaa nee̱ man maꞌa̱n soj roꞌ, vaa nee̱ man ta̱ranꞌ nij tinu̱j níꞌ ado̱nj.

²⁶ Nda̱ꞌ se aꞌmaan ndoꞌo rá soj, tza̱j ne̱ se̱ quiꞌyaj soj cacunꞌ maꞌ. Ne̱ raꞌya̱nj naꞌma̱a̱n rá uún soj cuaj na̱nj á. Se̱ caꞌvej rá soj ꞌo̱ ga̱a̱ yuva̱a̱ nimán soj cunu̱ꞌ güii maꞌ.

²⁷ Se̱ gaa yaꞌnúj rihaan Síí Chre̱e caxri̱i̱ Síí Chre̱e chrej chiꞌi̱i̱ rque soj, quiꞌya̱j soj maꞌ.

²⁸ Sese vaa síí itu̱u̱ ꞌni̱j scaꞌnúj soj, ne̱ caꞌne̱ꞌ rá soꞌ ga̱ suun ꞌyaj itu̱u̱ rasu̱u̱n na̱nj á. Tana̱nj veꞌé quiꞌya̱j suun maꞌa̱n soꞌ suun sa̱ꞌ, ga̱a ne̱ sese achiin rasu̱u̱n rihaan tinúú soꞌ, ne̱ gu̱un nucua̱j soꞌ rque̱ maꞌa̱n soꞌ rasu̱u̱n rihaan tinúú soꞌ á.

²⁹ Se̱ caꞌvej soj caꞌmi̱i̱ soj nana̱ qui̱j maꞌ. Tana̱nj gu̱un rá soj veꞌé caꞌmi̱i̱ soj, ne̱ nana̱ sa̱ꞌ nana̱ achiin man tinúú soj roꞌ, yoꞌ me nago̱ꞌ soj rihaan tinúú soj á. Ne̱ cavi̱i̱ sa̱ꞌ doj ta̱ranꞌ nij síí cuno̱ nana̱ caꞌmi̱i̱ soj, sese sa̱ꞌ caꞌmi̱i̱ soj ado̱nj.

³⁰ Ne̱ se̱ guun nano̱ rá Nimán Yaꞌanj, quiꞌya̱j soj maꞌ. Cheꞌé se ya̱nj Nimán Yaꞌanj ga̱ soj roꞌ, cheꞌé dan neꞌen ya̱ soj se vaa cavi̱i̱ sa̱ꞌ soj asa̱ꞌ quisíj güii ti̱nanii Yaꞌanj man níꞌ rihaan sayuun ado̱nj.

³¹ Caꞌne̱ꞌ rá soj ga̱ suun nachriꞌ niꞌya̱j tinúú á. Caꞌne̱ꞌ rá soj ga̱ suun axríj yuva̱a̱ man tinúú á. Caꞌne̱ꞌ rá soj ga̱ suun aꞌmaan rá á. Se̱ caguáj soj doj rihaan tinúú soj maꞌ. Se̱ caꞌmii soj doj nana̱ nij cheꞌé tinúú soj maꞌ. Quiriꞌi̱j soj cunuda̱nj chrej chiꞌi̱i̱ á.

³² Dan me se veꞌé quiꞌya̱j soj rihaan tinúú soj á. Ga̱a̱ ꞌe̱e̱ rá soj ni̱ꞌyaj soj tinúú soj á. Neꞌen soj se vaa tinavij Yaꞌanj cacunꞌ tumé níꞌ, cheꞌé se caviꞌ Cristó cheꞌé níꞌ a. Cheꞌé dan no̱ xcúún ya̱ soj cara̱a̱ xꞌnaa soj ni̱ꞌyaj soj tinúú soj ado̱nj.