Efesios 3 - Triqui de San Juan Copala

Caꞌneꞌ Yaꞌanj suun rihaan Pabló nata̱ꞌ soꞌ nana̱ sa̱ꞌ yuve̱ cheꞌé Cristó rihaan nij síí yaníj a

¹ Neꞌen nij soj se vaa ꞌni̱j ꞌu̱nj tagaꞌ cheꞌé se nocóꞌ ꞌu̱nj man Cristó Jesús, ne̱ aꞌmii natáj ꞌu̱nj rihaan nij soj si̱j yaníj cheꞌé soꞌ,

² ne̱ a̱j neꞌen soj se vaa atá ꞌu̱nj suun quiꞌyaj Yaꞌanj cheꞌé soj si̱j yaníj na̱nj ado̱nj. Dan me se quiꞌyaj ndoꞌo Yaꞌanj se lu̱j cheꞌé ꞌu̱nj, ne̱ caꞌneꞌ soꞌ suun rihanj nata̱ꞌ ꞌu̱nj snana̱ soꞌ rihaan soj ado̱nj.

³ Dan me se tihaa̱n naca̱ Yaꞌanj nana̱ sa̱ꞌ yuve̱ rihanj, ne̱ a̱j cachrón ꞌu̱nj do̱j nana̱ cheꞌé se vaa tihaa̱n Yaꞌanj manj rihaan yanj cartá caꞌnéé ꞌu̱nj rihaan soj ga̱a rque̱ ado̱nj.

⁴ Naya̱a̱ soj yanj cartá yoꞌ, ne̱ xca̱j soj cuentá cheꞌé nu̱ꞌ nana̱ naríꞌ ꞌu̱nj nana̱ sa̱ꞌ yuve̱ cheꞌé nu̱ꞌ se vaa quiꞌyaj Cristó cheꞌé yuvii̱ a.

⁵ Ga̱a rque̱ roꞌ, ne cata̱j xnaꞌanj Yaꞌanj nana̱ sa̱ꞌ yuve̱ yoꞌ rihaan yuvii̱ maꞌ. Tza̱j ne̱ nda̱a ya̱j roꞌ, me tihaa̱n Nimán Yaꞌanj nana̱ yoꞌ rihaan núj si̱j cunuu sa̱ꞌ nimán rihaan Yaꞌanj, si̱j cuneꞌ Jesucristó caꞌa̱nj nata̱ꞌ snana̱ soꞌ do̱ꞌ, rihaan ꞌó nij síí nataꞌ snana̱ Yaꞌanj rihaan yuvii̱ do̱ꞌ a.

⁶ Dan me se tihaa̱n soꞌ nana̱ se vaa cuno̱ nij soj si̱j yaníj nana̱ sa̱ꞌ cheꞌé Cristó, ne̱ cunu̱u sa̱ꞌ nimán soj rihaan Yaꞌanj ga̱ núj si̱j israelitá ado̱nj. Ne̱ nana̱ cataꞌ tuꞌva Yaꞌanj cheꞌé nij síí canoco̱ꞌ man Cristó Jesús roꞌ, quisíj ya̱ nu̱ꞌ nana̱ yoꞌ cheꞌé nij soj si̱j yaníj ga̱ núj si̱j israelitá na̱nj chugua̱nj.

⁷ Ne̱ vaa ndoꞌo suun rihanj nata̱ꞌ ꞌu̱nj nana̱ sa̱ꞌ yoꞌ, ne̱ yoꞌ me se lu̱j quiꞌyaj Yaꞌanj cheꞌej ado̱nj. Nda̱ꞌ se ne nó xcúún ꞌu̱nj quiri̱ꞌ ꞌu̱nj se lu̱j nihánj, tza̱j ne̱ maꞌa̱n ya̱ Yaꞌanj me síí rqué se lu̱j nihánj manj na̱nj ado̱nj. Soꞌ me síí nucua̱j ndoꞌo, ne̱ uun nu̱cuáj ꞌyáj suun nihánj, ꞌyaj Yaꞌanj na̱nj chugua̱nj.

⁸ Nda̱ꞌ se síí nica̱ꞌ doj rihaan ta̱ranꞌ nij síí noco̱ꞌ man Yaꞌanj mej, tza̱j ne̱ quiꞌyaj Yaꞌanj se lu̱j yoꞌ rihanj, ne̱ caꞌneꞌ soꞌ suun rihanj nata̱j nana̱ sa̱ꞌ rihaan nij soj si̱j yaníj se vaa niꞌndaj uxrá ya̱ se sa̱ꞌ vaa quiꞌyaj Cristó cheꞌé níꞌ ado̱nj.

⁹ Ne̱ me rá Yaꞌanj nata̱ꞌ yá ꞌu̱nj rihaan yuvii̱ nu̱ꞌ nana̱ sa̱ꞌ yuve̱ cheꞌé se vaa quiꞌya̱j soꞌ cheꞌé nij yuvii̱ a. Dan me se Yaꞌanj me síí quiꞌyaj nu̱ꞌ rasu̱u̱n, tza̱j ne̱ ne nata̱ꞌ ya̱ soꞌ nana̱ sa̱ꞌ yuve̱ yoꞌ rihaan yuvii̱ nu̱ꞌ cavii nu̱ꞌ caꞌnaꞌ maꞌ.

¹⁰ Tza̱j ne̱ da̱j a̱ nij síí uun chij rej xta̱ꞌ do̱ꞌ, da̱j a̱ nij síí nica̱j suun rej xta̱ꞌ do̱ꞌ roꞌ, me rá Yaꞌanj xca̱j nij soꞌ cuentá cuano̱ se vaa ina̱nj nana̱ cu̱u sa̱ꞌ ndoꞌo avii raa̱ Yaꞌanj, ne̱ queneꞌe̱n nij soꞌ man xꞌneꞌ ta̱ranꞌ níꞌ si̱j noco̱ꞌ man Cristó, ne̱ xca̱j nij soꞌ cuentá se vaa avii ndoꞌo raa̱ Yaꞌanj ado̱nj.

¹¹ Dan me se guun rá Yaꞌanj nu̱ꞌ cavii nu̱ꞌ caꞌnaꞌ se vaa quiꞌya̱j soꞌ da̱nj tiempó ma̱n níꞌ, ne̱ guun rá soꞌ se vaa caꞌne̱j soꞌ man Cristó Jesús Si̱j ꞌNi̱j Raꞌa man níꞌ rihaan chumii̱ nihánj a.

¹² Ne̱ cheꞌé se amán rá níꞌ niꞌya̱j níꞌ Cristó roꞌ, cheꞌé dan caꞌve̱e cachi̱nj niꞌya̱j maꞌa̱n níꞌ rihaan Yaꞌanj, ne̱ taj cheꞌé cuchuꞌvi̱ꞌ níꞌ caꞌmi̱i̱ níꞌ ga̱ Yaꞌanj maꞌ.

¹³ Cheꞌé dan achíín ni̱ꞌyáá ꞌu̱nj se vaa se̱ quiriꞌ rá nimán soj queneꞌe̱n soj sayuun ránꞌ ꞌu̱nj cheꞌé soj maꞌ. ꞌO̱ se tana̱nj a̱ veꞌé uxrá cavi̱i̱ sa̱ꞌ soj doj cheꞌé sayuun ránꞌ ꞌu̱nj nihánj na̱nj ado̱nj.

Cachíín niꞌya̱j Pabló rihaan Yaꞌanj se vaa sa̱ꞌ doj xca̱j nij síí ma̱n Éfeso cuentá se vaa ꞌe̱e̱ ndoꞌo rá Cristó man níꞌ a

¹⁴ Cheꞌé se cavii sa̱ꞌ ndoꞌo nij soj ga̱ núj, cheꞌé dan yáán ru̱j ꞌu̱nj, ne̱ achíín ni̱ꞌyáá ꞌu̱nj rihaan Rej níꞌ Yaꞌanj cheꞌé soj ado̱nj.

¹⁵ Dan me se Yaꞌanj me Rej nu̱ꞌ ta̱ranꞌ nij xꞌneꞌ nij síí ma̱n rej xta̱ꞌ do̱ꞌ, Rej nu̱ꞌ ta̱ranꞌ nij xꞌneꞌ níꞌ si̱j ma̱n rihaan chumii̱ nihánj do̱ꞌ,

¹⁶ ne̱ achíín ni̱ꞌyáj rihaan soꞌ cheꞌé soj se vaa, cheꞌé se niꞌndaj ya̱ sa̱ꞌ veꞌé vaa soꞌ ne̱ taj a̱ ꞌó se achiin man soꞌ, nari̱ꞌ nucuaj nimán soj quiꞌya̱j Nimán soꞌ ado̱nj.

¹⁷ Ne̱ achíín ni̱ꞌyáj se vaa cuchuma̱n doj rá soj ni̱ꞌyaj soj man Cristó, ne̱ ꞌo̱ natu̱u̱ Cristó nimán soj quiꞌya̱j Yaꞌanj, ga̱a ne̱ ꞌo̱ cunu̱u ꞌe̱e̱ rá soj man ta̱ranꞌ tinúú soj ado̱nj.

^18-19 Nda̱a síj, ga̱a ne̱ nari̱ꞌ nucuaj ndoꞌo nimán soj, ne̱ gu̱un nucua̱j soj xca̱j sa̱ꞌ soj cuentá se vaa ꞌe̱e̱ uxrá rá Cristó man níꞌ, ne̱ queneꞌe̱n ta̱ranꞌ níꞌ si̱j noco̱ꞌ man Yaꞌanj se vaa ꞌe̱e̱ uxrá rá Cristó man níꞌ ado̱nj. Taj a̱ ꞌó síí gu̱un nucua̱j maꞌa̱n queneꞌe̱n nu̱ꞌ nda̱a vaa ꞌe̱e̱ uxrá rá Cristó man níꞌ maꞌ. Tza̱j ne̱ guun nucua̱j níꞌ xcaj níꞌ cuentá se vaa ꞌe̱e̱ uxrá rá Cristó man níꞌ, quiꞌyaj Yaꞌanj, ne̱ quiꞌyaj ndoꞌo Yaꞌanj se lu̱j cheꞌé níꞌ, ne̱ dan me se cunu̱u sa̱ꞌ ina̱nj nimán níꞌ, nda̱a vaa maꞌa̱n Yaꞌanj ado̱nj.

²⁰ Achíín ni̱ꞌyáá ꞌu̱nj rihaan síí nucua̱j ndoꞌo quiꞌya̱j doj a̱ rihaan da̱j a̱ se achíín níꞌ, nda̱a da̱j a̱ se nu̱u̱ raa̱ níꞌ, cheꞌé se ꞌyaj suun snucua̱j soꞌ nimán níꞌ ado̱nj.

²¹ Cheꞌé dan cata̱j xꞌneꞌ níꞌ si̱j noco̱ꞌ man Cristó se vaa niꞌndaj ya̱ sa̱ꞌ veꞌé vaa Yaꞌanj, ne̱ ꞌo̱ da̱nj caꞌmi̱i̱ níꞌ ga̱ taꞌníí níꞌ nu̱ꞌ cavii nu̱ꞌ caꞌanj cheꞌé Cristó Jesús a. Veé da̱nj ga̱a̱ ya̱ ado̱nj.