Efesios 1 - Triqui de San Juan Copala

¹ Síí cuꞌna̱j Pabló mej, ne̱ cuneꞌ Cristó Jesús mán ꞌu̱nj caꞌa̱nj nata̱ꞌ ꞌu̱nj snana̱ soꞌ rihaan nij yuvii̱, cheꞌé se da̱nj me rá Yaꞌanj qui̱ꞌyáj a. ꞌYáá ꞌu̱nj yanj cartá nihánj caꞌne̱j ꞌu̱nj rihaan nij soj xꞌneꞌ yuvii̱ noco̱ꞌ man Yaꞌanj ya̱nj chumanꞌ Éfeso si̱j ꞌo̱ amán rá niꞌya̱j man Cristó Jesús a.

² Me rá ꞌu̱nj quiꞌya̱j ndoꞌo Rej níꞌ Yaꞌanj do̱ꞌ, quiꞌya̱j Jesucristó Si̱j ꞌNi̱j Raꞌa man níꞌ do̱ꞌ, se lu̱j cheꞌé nij soj, ne̱ me rá ꞌu̱nj ga̱a̱ xe̱j nimán nij soj, quiꞌya̱j ro̱j soꞌ a.

Quiꞌyaj ndoꞌo Yaꞌanj se lu̱j cheꞌé nij síí israelitá do̱ꞌ, nij síí yaníj do̱ꞌ a

³ Cata̱j níꞌ se vaa ina̱nj sa̱ꞌ uxrá vaa Yaꞌanj Rej Jesucristó Si̱j ꞌNi̱j Raꞌa man níꞌ, ne̱ veꞌé ndoꞌo quiꞌyaj soꞌ cheꞌé níꞌ a. Ne̱ rqué soꞌ da̱j a̱ se sa̱ꞌ man níꞌ, ne̱ se sa̱ꞌ cavii rej xta̱ꞌ cavii maꞌa̱n ya̱ Nimán Yaꞌanj me rqué Yaꞌanj man níꞌ, cheꞌé se síí noco̱ꞌ man Cristó me níꞌ a.

⁴ Asi̱j ataa quiꞌya̱j Yaꞌanj chumii̱ nihánj me narii soꞌ man níꞌ cunu̱u sa̱ꞌ nimán níꞌ rihaan maꞌa̱n soꞌ, ne̱ se̱ tumé níꞌ cacunꞌ, rá soꞌ a̱ maꞌ. Ne̱ dan me se cunuu ꞌe̱e̱ rá soꞌ man níꞌ,

⁵ ne̱ cuneꞌ soꞌ man níꞌ canoco̱ꞌ níꞌ man Jesucristó ne̱ gu̱un taꞌni̱j maꞌa̱n soꞌ man níꞌ, nda̱a vaa quirii nimán maꞌa̱n soꞌ quiꞌya̱j soꞌ cheꞌé níꞌ ado̱nj.

⁶ Da̱nj quiꞌyaj soꞌ cheꞌé yan veꞌé caꞌmi̱i̱ níꞌ ni̱ꞌyaj níꞌ man Yaꞌanj, ne̱ cata̱j níꞌ se vaa veꞌé ndoꞌo quiꞌyaj soꞌ se lu̱j cheꞌé níꞌ, cheꞌé se noco̱ꞌ níꞌ man Cristó síí ꞌe̱e̱ rá soꞌ niꞌya̱j soꞌ man na̱nj ado̱nj.

⁷ Ne̱ cheꞌé ton cayanj man Cristó ga̱a caviꞌ soꞌ cheꞌé níꞌ roꞌ, cheꞌé dan navij cacunꞌ xráá níꞌ, cheꞌé se sa̱ꞌ uxrá vaa rá Yaꞌanj niꞌya̱j Yaꞌanj man níꞌ a.

⁸ Ne̱ Yaꞌanj roꞌ, me síí quiꞌyaj ndoꞌo se lu̱j cheꞌé níꞌ se vaa rqué ndoꞌo soꞌ nana̱ cu̱u man níꞌ, ne̱ xcaj ndoꞌo níꞌ cuentá, quiꞌyaj soꞌ ado̱nj.

⁹ ꞌO̱ se soꞌ me síí quiꞌyaj xcaj níꞌ cuentá cheꞌé nana̱ sa̱ꞌ yuve̱ aꞌmii cheꞌé da̱j me rá maꞌa̱n soꞌ quiꞌya̱j soꞌ cheꞌé níꞌ si̱j noco̱ꞌ man Cristó

¹⁰ asa̱ꞌ quisíj güii caꞌna̱ꞌ uún Cristó rihaan chumii̱ nihánj a. Dan me se güii yoꞌ me se gu̱un chij Cristó rihaan cunuda̱nj rasu̱u̱n, quiꞌya̱j Yaꞌanj, ne̱ gu̱un chij Cristó rihaan cunuda̱nj nij rasu̱u̱n ma̱n rej xta̱ꞌ do̱ꞌ, rihaan cunuda̱nj nij rasu̱u̱n ma̱n rihaan chumii̱ nihánj do̱ꞌ a.

^11-12 Ne̱ cheꞌé Cristó me se narii Yaꞌanj man núj si̱j israelitá si̱j amán rá niꞌya̱j man Cristó, ne̱ dan me se narii soꞌ man núj cheꞌé se a̱j cuneꞌ soꞌ man núj gu̱un núj nij síí ga̱a̱ nucua̱j rá ga̱a asino ya̱a̱n man Cristó, cheꞌé rej veꞌé nata̱ꞌ núj se vaa sa̱ꞌ uxrá vaa Yaꞌanj a. Dan me se ina̱nj da̱nj guun rá Yaꞌanj quiꞌya̱j soꞌ, ne̱ soꞌ me síí avii ndoꞌo raa̱ da̱j quiꞌya̱j, ne̱ soꞌ me síí ꞌyaj nu̱ꞌ nda̱a vaa avii raa̱ soꞌ quiꞌya̱j soꞌ ado̱nj.

¹³ Ne̱ vaa nij soj si̱j yaníj uún, ne̱ cuno soj nana̱ ya̱ nana̱ sa̱ꞌ taj se vaa caꞌve̱e nani̱i̱ soj rihaan sayuun ne̱ cavi̱i̱ sa̱ꞌ soj quiꞌya̱j Cristó a. Ne̱ cuchumán rá soj niꞌya̱j soj man Cristó, ne̱ cheꞌé Cristó me se caꞌnaꞌ Nimán Yaꞌanj catúj Nimán Yaꞌanj nimán soj, nda̱a vaa cataꞌ tuꞌva Yaꞌanj ga̱a naá a. Ne̱ cheꞌé se nu̱u̱ Nimán Yaꞌanj nimán níꞌ roꞌ, cheꞌé dan neꞌen ya̱ níꞌ se vaa me níꞌ taꞌníí Yaꞌanj

¹⁴ ne̱ ya̱ rque̱ ndoꞌo Yaꞌanj se sa̱ꞌ man níꞌ vaa güii na̱nj ado̱nj. Dan me se rqué Yaꞌanj Nimán Yaꞌanj rihaan níꞌ tihaa̱n Yaꞌanj se vaa ya̱ naca̱j Yaꞌanj man níꞌ vaa güii, ne̱ nani̱i̱ níꞌ rihaan sayuun, cheꞌé rej cata̱j níꞌ se vaa niꞌndaj ya̱ sa̱ꞌ veꞌé vaa Yaꞌanj a.

Cachíín niꞌya̱j Pabló rihaan Yaꞌanj se vaa xca̱j sa̱ꞌ doj nij síí ma̱n Éfeso cuentá cheꞌé Cristó quiꞌya̱j Yaꞌanj a

¹⁵ Dan me se cunó ꞌu̱nj nana̱ se vaa amán rá nij soj niꞌya̱j soj man Jesús Si̱j ꞌNi̱j Raꞌa man níꞌ, ne̱ cunó ꞌu̱nj nana̱ se vaa ꞌe̱e̱ rá soj man ta̱ranꞌ nij síí noco̱ꞌ man Cristó a. Ne̱ cheꞌé se vaa quiꞌyaj Yaꞌanj cheꞌé níꞌ si̱j noco̱ꞌ man Cristó roꞌ,

¹⁶ cheꞌé dan ꞌo̱ taj ꞌu̱nj guun niꞌya̱j níꞌ rihaan Yaꞌanj cheꞌé soj ga̱a achíín ni̱ꞌyáá ꞌu̱nj cheꞌé soj rihaan Yaꞌanj ado̱nj.

¹⁷ Dan me se Yaꞌanj me Taꞌanj Jesucristó Si̱j ꞌNi̱j Raꞌa man níꞌ, ne̱ Rej níꞌ síí nicu̱nꞌ xta̱ꞌ me uún Yaꞌanj, ne̱ síí uun chij sa̱ꞌ uxrá me soꞌ ado̱nj. Ne̱ cheꞌé dan achíín ni̱ꞌyáá ꞌu̱nj rihaan Yaꞌanj se vaa rque̱ ndoꞌo soꞌ nana̱ cu̱u sa̱ꞌ nimán soj, ne̱ achíín ni̱ꞌyáá ꞌu̱nj se vaa gu̱un nucua̱j soj nari̱ꞌ soj nu̱ꞌ nana̱ naca̱ tihaa̱n soꞌ man níꞌ, ga̱a ne̱ sa̱ꞌ doj xca̱j maꞌa̱n soj cuentá cheꞌé soꞌ á.

¹⁸ Dan me se sa̱ꞌ doj xca̱j soj cuentá, ne̱ queneꞌe̱n soj me cheꞌé nacúún Yaꞌanj man soj, ne̱ queneꞌe̱n soj nu̱ꞌ se vaa quiꞌya̱j Yaꞌanj cheꞌé soj, ne̱ gu̱un ya̱ rá soj se vaa vaa cheꞌé ndoꞌo nocoꞌ soj man Cristó ado̱nj. Queneꞌe̱n soj se vaa niꞌndaj ya̱ sa̱ꞌ vaa se quiꞌya̱j Yaꞌanj cheꞌé ta̱ranꞌ níꞌ si̱j noco̱ꞌ man soꞌ,

¹⁹ ne̱ queneꞌe̱n soj se vaa niꞌndaj ya̱ veꞌé gu̱un nucua̱j ya̱ Yaꞌanj ra̱cuíj Yaꞌanj man níꞌ si̱j amán rá niꞌya̱j man soꞌ a. Nucua̱j ndoꞌo Yaꞌanj ado̱nj.

²⁰ Cheꞌé snucua̱j Yaꞌanj roꞌ, cheꞌé dan cunuu iꞌna̱ꞌ ya̱ uún Cristó, quiꞌyaj Yaꞌanj ga̱a caviꞌ Cristó, ne̱ caꞌanj ca̱yáán Cristó rej xta̱ꞌ rej xꞌnu̱j Yaꞌanj rej nuva̱ꞌ Yaꞌanj, quiꞌyaj uún Yaꞌanj ado̱nj.

²¹ Veé dan, ne̱ rej xta̱ꞌ yoꞌ me se uun chij soꞌ doj rihaan da̱j a̱ nij síí nucua̱j do̱ꞌ, da̱j a̱ nij síí rii taꞌngaꞌ do̱ꞌ, da̱j a̱ nij síí uun chij do̱ꞌ, da̱j a̱ nij síí nica̱j suun do̱ꞌ a. Ne̱ se‑chuvi̱i soꞌ me se sa̱ꞌ doj vaa yoꞌ rihaan se‑chuvi̱i ta̱ranꞌ nij síí uun chij rihaan chumii̱ nihánj do̱ꞌ, rihaan rej xta̱ꞌ do̱ꞌ ado̱nj. Tza̱j ne̱ ne do̱j cuano̱ me uun chij soꞌ maꞌ. ꞌO̱ se gu̱un chij soꞌ nu̱ꞌ cavii nu̱ꞌ caꞌanj na̱nj ado̱nj.

²² Ne̱ uun chij Cristó rihaan cunuda̱nj rasu̱u̱n, quiꞌyaj Yaꞌanj, ne̱ dan me se Yaꞌanj me síí quiꞌyaj rii taꞌngaꞌ Cristó rihaan cunuda̱nj rasu̱u̱n cheꞌé xꞌneꞌ cunuda̱nj níꞌ si̱j noco̱ꞌ man soꞌ ado̱nj.

²³ Ne̱ ase vaa nee̱ man Cristó roꞌ, da̱nj vaa níꞌ, uno níꞌ rihaan soꞌ a. Ne̱ dan me se soꞌ me Síí ꞌNi̱j Raꞌa man cunuda̱nj rasu̱u̱n ma̱n rihaan nu̱ꞌ cachra̱ꞌ chumii̱ a. Ne̱ soꞌ me síí rqué nu̱ꞌ se vaa achiin man nu̱ꞌ nij rasu̱u̱n ma̱n rihaan chumii̱ nihánj ado̱nj.