Colosenses 2 - Triqui de San Juan Copala

¹ Me rá ꞌu̱nj queneꞌe̱n nij soj se vaa ꞌyaj ndoꞌoj se‑su̱u̱n Cristó cheꞌé soj do̱ꞌ, cheꞌé nij síí noco̱ꞌ man Cristó ya̱nj chumanꞌ Laodicea do̱ꞌ, cheꞌé ꞌó nij yuvii̱ noco̱ꞌ man Cristó yuvii̱ ataa queneꞌe̱n manj do̱ꞌ a.

² ꞌO̱ se me ndoꞌo rá ꞌu̱nj nari̱ꞌ nucuaj nimán soj ne̱ ꞌo̱ cu̱nuû se sa̱ꞌ nimán soj cuma̱n soj ga̱ tuviꞌ soj, ne̱ ꞌo̱ nari̱ꞌ ndoꞌo soj nda̱a gu̱un ya̱ ya̱ rá soj nana̱ sa̱ꞌ yuve̱ tihaa̱n Yaꞌanj se vaa maꞌa̱n Cristó me nana̱ naca̱ yoꞌ na̱nj á.

³ Dan me se rihaan Cristó me se ꞌni̱j yuve̱ cunuda̱nj nana̱ vaa yuꞌvee ndoꞌo ase vaa nana̱ cu̱u do̱ꞌ, nana̱ achiin queneꞌe̱n yuvii̱ do̱ꞌ, me yoꞌ ado̱nj.

Ina̱nj Cristó canoco̱ꞌ níꞌ, ne̱ se̱ cuno níꞌ nana̱ tihaꞌ yuꞌunj maꞌ

⁴ Nana̱ nihánj me taj xnaꞌanj ꞌu̱nj rihaan nij soj cheꞌé se naꞌvej rá ꞌu̱nj tiha̱ꞌ yuꞌunj yuvii̱ veꞌé aꞌmii astuꞌva man soj maꞌ.

⁵ Nda̱ꞌ se nuvíꞌ ꞌu̱nj nicunꞌ niꞌya̱j soj, tza̱j ne̱ nicu̱nꞌ nimán ꞌu̱nj ga̱ soj chugua̱nj. ꞌO̱ se uun niha̱ꞌ uxrá ya̱ raj se vaa ꞌo̱ veꞌé sa̱ꞌ mán soj, ne̱ ꞌo̱ Cristó nucua̱j rá soj, mán soj ado̱nj.

⁶ Dan me se nda̱ꞌ rá se guun rá soj ga̱a guun cheꞌe̱ soj canocoꞌ soj man Cristó Jesús Si̱j ꞌNi̱j Raꞌa man níꞌ roꞌ, da̱nj gu̱un rá soj ꞌo̱ canoco̱ꞌ chre̱ꞌ soj man soꞌ á.

⁷ Dan me se ꞌo̱ gu̱un xe̱j soj rihaan soꞌ, ne̱ ꞌo̱ canicu̱nꞌ xraan soj rihaan soꞌ, ne̱ ꞌo̱ cuno̱ soj rihaan soꞌ, ne̱ ꞌo̱ ca̱yáán soj nda̱a vaa taj tucuáán tucuꞌyón núj man soj, ne̱ o̱rúnꞌ soꞌ cuchuma̱n rá soj ni̱ꞌyaj soj, ne̱ cata̱j uxrá soj guun niꞌya̱j níꞌ rihaan Yaꞌanj á.

⁸ Tu̱mé soj man soj se̱ gaa na̱nj tiha̱ꞌ yuꞌunj yuvii̱ man soj maꞌ. Me rá nij yuvii̱ canoco̱ꞌ soj stucua̱nj nij soꞌ, tza̱j ne̱ nuviꞌ yuꞌvee nó stucua̱nj nij soꞌ rihaan tucuáán sa̱ꞌ noco̱ꞌ níꞌ maꞌ. Ma̱an se tucuáán yoꞌ roꞌ, nana̱ tucuꞌyón na̱nj tuviꞌ nij yuvii̱ rihaan nij yuvii̱ me nana̱ yoꞌ, ne̱ snana̱ nij nana̱ chre̱e ma̱n rihaan chumii̱ nihánj me nana̱ yoꞌ, tza̱j ne̱ né sna̱na̱ Cristó me nana̱ yoꞌ maꞌ.

⁹ ꞌO̱ se ase vaa maꞌa̱n Yaꞌanj roꞌ, da̱nj vaa Cristó, tza̱j ne̱ vaa nee̱ man Cristó, ne̱ cheꞌé dan ruviꞌ Cristó rihaan níꞌ, ne̱ xcaj níꞌ cuentá da̱j vaa maꞌa̱n Yaꞌanj uún chugua̱nj.

¹⁰ Ne̱ Cristó me síí uun chij rihaan nu̱ꞌ nij nana̱ chre̱e ma̱n rihaan chumii̱ nihánj, ne̱ ya̱nj Cristó ga̱ soj, ne̱ cheꞌé dan taj se achiin man soj cuano̱ maꞌ.

¹¹ Da̱nj na̱nj uún, ne̱ ma̱an cheꞌé se nuu rcuaꞌa̱a̱n soj ga̱ Cristó roꞌ, ma̱an cheꞌé dan a̱j ta̱j taꞌngaꞌ sa̱ꞌ ina̱nj man soj vaa ado̱nj. Né taꞌnga̱ꞌ ta̱j nee̱ man yuvii̱ me taꞌngaꞌ yoꞌ maꞌ. Taꞌngaꞌ ꞌyaj caꞌvee tanáj soj nu̱ꞌ rasu̱u̱n chiꞌi̱i̱ me yoꞌ ado̱nj. ꞌO̱ se cheꞌé yan tanáj soj nu̱ꞌ rasu̱u̱n chiꞌi̱i̱ roꞌ, cheꞌé dan ase vaa táá taꞌngaꞌ nee̱ man soj vaa ya̱ ado̱nj.

¹² ꞌO̱ se ga̱a cataꞌ ne soj, ne̱ ase vaa cachinꞌ nii man Cristó ne̱ naꞌnúj uún soꞌ roꞌ, da̱nj vaa soj, cheꞌé se cuchumán rá soj se vaa veé ya̱ Yaꞌanj si̱j nucua̱j ndoꞌo quiꞌyaj ya̱ cunuu iꞌna̱ꞌ uún Cristó ado̱nj.

¹³ Ga̱a naá ga̱a ataa queneꞌe̱n soj si̱j yaníj man Cristó, ne̱ quiꞌyaj ndoꞌo soj cacunꞌ, ne̱ taj taꞌngaꞌ cutaꞌ nii man nee̱ man soj maꞌ. Tza̱j ne̱ tinavij u̱u̱n Yaꞌanj nu̱ꞌ cacunꞌ ta̱j xráá soj, ne̱ ase vaa cunuu iꞌna̱ꞌ uún Cristó ga̱a caviꞌ soꞌ roꞌ, da̱nj vaa soj, ne̱ ꞌo̱ cunuu sa̱ꞌ nimán soj, quiꞌyaj Yaꞌanj na̱nj á.

¹⁴ Ne̱ dan me se ase vaa tinavij nii ꞌo̱ yanj actá cheꞌé ꞌo̱ síí naruꞌvee cheꞌé scacu̱nꞌ soꞌ roꞌ, taꞌngaꞌ da̱nj tinavij Yaꞌanj cacunꞌ tumé níꞌ cheꞌé se ne cuno̱ níꞌ nu̱ꞌ stucua̱nj Moisés a. Da̱nj quiꞌyaj Yaꞌanj ga̱a goꞌ nii caquíí raꞌa Cristó ne̱ cachrón nii man soꞌ rihaan rcutze̱ a.

¹⁵ Dan me se cheꞌé se caviꞌ Cristó rihaan rcutze̱ roꞌ, cheꞌé dan quiꞌyaj canaán Yaꞌanj man da̱j a̱ nij nana̱ chre̱e uun chij do̱ꞌ, da̱j a̱ nij nana̱ chre̱e nica̱j suun do̱ꞌ, ne̱ caxríj naꞌa̱j ranga̱ꞌ Yaꞌanj man nij soꞌ a.

¹⁶ Cheꞌé dan se̱ caꞌvej rá soj cata̱j yuvii̱ rihaan soj me rasu̱u̱n se̱ caꞌvee cha̱ soj do̱ꞌ, me rasu̱u̱n se̱ caꞌvee coꞌo̱ soj do̱ꞌ, me güii navi̱j rá soj chaꞌanj cheꞌé Yaꞌanj do̱ꞌ, da̱j quiꞌya̱j soj güii naránj rá soj do̱ꞌ maꞌ.

¹⁷ Tucuáán tucuꞌyón nij yuvii̱ rihaan soj me tucuáán canocoꞌ nij yuvii̱ israelitá ga̱a naá a. Ne̱ a̱j tihaa̱n tucuáán yoꞌ do̱j tzínꞌ cheꞌé da̱j ga̱a̱ gu̱un vaa güii, tza̱j ne̱ ya̱j roꞌ, cheꞌé Cristó me se xcaj níꞌ cuentá sa̱ꞌ doj, se vaa maꞌa̱n soꞌ canoco̱ꞌ níꞌ a.

¹⁸ Se̱ caꞌvej soj quiri̱ꞌ soj quiꞌya̱j nij síí taj se vaa nica̱ꞌ ndoꞌo aꞌmii nij soꞌ maꞌ. Caꞌve̱e se cata̱j nij soꞌ se vaa aráj gue̱e̱ nij soꞌ rihaan se‑mo̱zó Yaꞌanj do̱ꞌ, caꞌve̱e se nucuiꞌ ndoꞌo rá nij soꞌ se vaa neꞌen nij soꞌ rasu̱u̱n tihaa̱n Yaꞌanj rihaan nij soꞌ taj nij soꞌ do̱ꞌ, tza̱j ne̱ tuꞌva rmaꞌa̱n nij soꞌ, ne̱ ma̱an rasu̱u̱n avii raa̱ maꞌa̱n nij soꞌ me yoꞌ na̱nj ado̱nj.

¹⁹ Dan me se taj cúú yave̱ nij soꞌ táá gaán chihá nij soꞌ vaa, ese taj Cristó rihaan nij soꞌ maꞌ. Ne uno nij soꞌ snana̱ Cristó maꞌ. Ne̱ ase vaa rii taꞌngaꞌ cúú yave̱ níꞌ rihaan nee̱ man níꞌ roꞌ, da̱nj vaa rii taꞌngaꞌ Cristó rihaan ta̱ranꞌ níꞌ si̱j noco̱ꞌ man soꞌ, ne̱ sa̱ꞌ doj nocoꞌ níꞌ man Yaꞌanj, ꞌyaj Cristó, ne̱ ina̱nj da̱nj me rá Yaꞌanj quiꞌya̱j níꞌ na̱nj ado̱nj. Ne̱ ase vaa vaa sca̱ꞌ nee̱ man níꞌ ꞌyaj yaꞌaâ man níꞌ roꞌ, da̱nj vaa cuya̱a̱n vaa ta̱ranꞌ níꞌ si̱j noco̱ꞌ man Yaꞌanj ꞌyaj Cristó ado̱nj.

²⁰ Cheꞌé se caviꞌ Cristó cheꞌé nij soj roꞌ, cheꞌé dan ne nó xcúún soj daj chiha̱a̱ míj cuno̱ soj suun aꞌneꞌ nij nana̱ chre̱e ma̱n rihaan chumii̱ nihánj a̱ maꞌ. Cheꞌé dan, me cheꞌé ꞌyaj ndoꞌo soj se vaa ꞌyaj nij yuvii̱ ma̱n u̱u̱n rihaan chumii̱ nihánj ga̱. Dan me se me cheꞌé niha̱ꞌ rá soj cuno̱ soj suun taj se vaa

²¹ vaa rasu̱u̱n se̱ guun cha̱ soj do̱ꞌ, vaa rasu̱u̱n se̱ guun xca̱j tuꞌva soj da̱j chá yoꞌ do̱ꞌ, vaa rasu̱u̱n se̱ guun cano̱ raꞌa soj do̱ꞌ ga̱.

²² Me cheꞌé uno rmaꞌa̱n soj suun vaa da̱nj ga̱. ꞌO̱ se rasu̱u̱n yoꞌ me se navi̱j yoꞌ vaa güii ado̱nj. Ne̱ xa̱ꞌ suun vaa da̱nj, tza̱j ne̱ suun avii u̱u̱n raa̱ yuvii̱ me suun yoꞌ, ne̱ niha̱ꞌ rá nij yuvii̱ caꞌne̱ꞌ nij yuvii̱ suun vaa da̱nj rihaan tuviꞌ nij yuvii̱ na̱nj ado̱nj.

²³ Ne̱ avii raa̱ yuvii̱ uno suun yoꞌ, taj nii, ne̱ sa̱ꞌ uxrá nariꞌ nij soꞌ chrej canoco̱ꞌ nij soꞌ Yaꞌanj, taj nii, ne̱ síí niꞌya̱nj aꞌmii me nij soꞌ, taj nii, tza̱j ne̱ ne ya̱ ya̱ si̱j noco̱ꞌ man Yaꞌanj me nij soꞌ maꞌ. Ma̱an se cheꞌé nana̱ noco̱ꞌ nij soꞌ roꞌ, ꞌyaj ndoꞌo nij soꞌ na̱j guun cacunꞌ me rá nee̱ man nij soꞌ quiꞌya̱j nij soꞌ na̱nj ado̱nj.