Colosenses 1 - Triqui de San Juan Copala

¹ ꞌU̱nj roꞌ, me síí cuꞌna̱j Pabló, ne̱ si̱j cuneꞌ Cristó Jesús caꞌa̱nj nata̱ꞌ snana̱ soꞌ rihaan yuvii̱ mej nda̱a vaa guun rá Yaꞌanj, ne̱ ya̱nj tinúꞌ Timoteo ga̱ ꞌu̱nj cuano̱ a.

² ꞌYaj rój yanj nihánj caꞌne̱j rój rihaan nij soj xꞌneꞌ nij síí noco̱ꞌ man Yaꞌanj amán rá niꞌya̱j man Cristó ya̱nj chumanꞌ Colosas a. Cheꞌé se amán rá soj niꞌya̱j soj man Cristó roꞌ, cheꞌé dan nuu tinu̱j níꞌ, ne̱ nucua̱j rá rój neꞌen rój man soj cuano̱, tinu̱j, nocoj. Me rá rój quiꞌya̱j Rej níꞌ Yaꞌanj se lu̱j cheꞌé soj, ne̱ me rá rój ga̱a̱ xe̱j nimán soj, quiꞌya̱j Yaꞌanj uún ado̱nj.

Cachíín niꞌya̱j Pabló rihaan Yaꞌanj cheꞌé nij síí noco̱ꞌ man Cristó ya̱nj chumanꞌ Colosas a

³ Niga̱nj achíín niꞌya̱j rój rihaan Yaꞌanj Rej Jesucristó Si̱j ꞌNi̱j Raꞌa man níꞌ cheꞌé soj, ne̱ taj rój guun niꞌya̱j níꞌ rihaan Yaꞌanj cheꞌé soj,

⁴ cheꞌé se caꞌnaꞌ nana̱ rihaan rój se vaa amán rá soj niꞌya̱j soj man Cristó Jesús ne̱ ꞌe̱e̱ rá soj niꞌya̱j soj cunuda̱nj ꞌó nij síí noco̱ꞌ man Cristó a.

⁵ Da̱nj vaa rá soj cuano̱, cheꞌé se cuno soj nana̱ sa̱ꞌ cheꞌé Cristó nana̱ ya̱, ne̱ uun ya̱ rá soj se vaa ma̱n ndoꞌo se sa̱ꞌ rej xta̱ꞌ quiri̱ꞌ soj vaa güii ado̱nj.

⁶ Dan me se a̱j cuchiꞌ nana̱ sa̱ꞌ nihánj rihaan cunuda̱nj nij yuvii̱ ma̱n rihaan chumii̱, ne̱ doj a̱ doj a̱ vaa nij yuvii̱ cuchumán rá nana̱ sa̱ꞌ yoꞌ a. Ne̱ ꞌo̱ cuya̱a̱n quiꞌyaj nij soj ga̱ ꞌó nij síí cuno nana̱ yoꞌ, ne̱ dan me se ga̱a cuchiꞌ nana̱ nihánj rihaan soj, ne̱ cuno soj, ne̱ xcaj soj cuentá cheꞌé se lu̱j ꞌyaj Yaꞌanj cheꞌé níꞌ, ne̱ cuchumán rá soj ado̱nj.

⁷ Ne̱ síí cuꞌna̱j Epafras me síí tucuꞌyón nana̱ yoꞌ man soj, ne̱ dan me se síí ꞌyaj se‑su̱u̱n Yaꞌanj ga̱ núj me soꞌ, ne̱ ꞌe̱e̱ rá núj man soꞌ, ne̱ ꞌo̱ ꞌyaj soꞌ se‑su̱u̱n Cristó cheꞌé soj ado̱nj.

⁸ Ne̱ cataj xnaꞌanj soꞌ rihaan núj se vaa ꞌe̱e̱ uxrá rá soj man tinúú soj, quiꞌyaj Nimán Yaꞌanj ado̱nj.

⁹ Cheꞌé dan asi̱j cuno núj nana̱ cataj soꞌ rihaan núj, ne̱ niga̱nj achíín niꞌya̱j núj rihaan Yaꞌanj cheꞌé soj se vaa rque̱ Nimán Yaꞌanj nana̱ sa̱ꞌ cu̱u nimán soj, ne̱ xca̱j soj cuentá da̱j me rá Yaꞌanj quiꞌya̱j soj,

¹⁰ cheꞌé rej quiꞌya̱j soj nu̱ꞌ se vaa no̱ xcúún níꞌ si̱j noco̱ꞌ man Síí ꞌNi̱j Raꞌa man níꞌ quiꞌya̱j níꞌ, ne̱ gu̱un niha̱ꞌ rá Yaꞌanj ni̱ꞌyaj Yaꞌanj man soj á. Ne̱ cunuda̱nj suun sa̱ꞌ quiꞌya̱j ndoꞌo soj, ga̱a ne̱ doj a̱ sa̱ꞌ xca̱j soj cuentá da̱j vaa maꞌa̱n Yaꞌanj a.

¹¹ Yaꞌanj me síí nucua̱j uxrá, ne̱ achíín niꞌya̱j núj se vaa caꞌne̱j ndoꞌo Yaꞌanj se nucua̱j nimán soj, ga̱a ne̱ caꞌve̱e ga̱a̱ sca̱ꞌ rá soj rihaan sayuun quiꞌya̱j yuvii̱ man soj, ne̱ ga̱a̱ ina̱j nimán soj, ne̱ ga̱a̱ niha̱ꞌ nimán soj,

¹² ne̱ cata̱j soj guun niꞌya̱j níꞌ rihaan Yaꞌanj Rej Jesucristó á. Nu̱ꞌ dan achíín niꞌya̱j rój rihaan Yaꞌanj cheꞌé soj, ne̱ neꞌen soj se vaa a̱j cunuu sa̱ꞌ níꞌ quiꞌyaj Yaꞌanj, ne̱ cheꞌé dan me vaa güii quiri̱ꞌ níꞌ se sa̱ꞌ rque̱ Yaꞌanj man ta̱ranꞌ nij síí noco̱ꞌ man soꞌ, cheꞌé se yuvii̱ xcaj cuentá chéé rej ranga̱ꞌ me níꞌ chugua̱nj.

¹³ Asino ya̱a̱n me se guun chij Síí Chre̱e rihaan níꞌ, ne̱ ase vaa síí chéé rej rmi̱ꞌ roꞌ, da̱nj vaa níꞌ ga̱a rque̱ a. Tza̱j ne̱ ya̱j me se tinanii Yaꞌanj man níꞌ rihaan Síí Chre̱e, ne̱ ya̱j uun chij Taꞌníí Yaꞌanj rihaan níꞌ quiꞌyaj Yaꞌanj ado̱nj. Dan me se ꞌe̱e̱ ndoꞌo rá Yaꞌanj man Taꞌníí soꞌ,

¹⁴ ne̱ cheꞌé Taꞌníí soꞌ navij cacunꞌ tumé níꞌ, ne̱ ti̱nanii Taꞌníí soꞌ man níꞌ rihaan sayuun ado̱nj.

Nataꞌ Pabló cheꞌé me síí me Cristó a

¹⁵ Ne ruviꞌ Yaꞌanj niꞌya̱j yuvii̱ maꞌ. Ma̱an se queneꞌen níꞌ man Cristó, ne̱ xcaj níꞌ cuentá da̱j vaa maꞌa̱n Yaꞌanj ado̱nj. Asi̱j ataa quiꞌya̱j Yaꞌanj chumii̱, ne̱ a̱j nicu̱nꞌ Cristó ga̱ soꞌ ado̱nj.

¹⁶ Dan me se nicu̱nꞌ Cristó ga̱ Yaꞌanj ga̱a quiꞌyaj Yaꞌanj se ma̱n xta̱ꞌ do̱ꞌ, se ma̱n rihaan chumii̱ do̱ꞌ, rasu̱u̱n ruviꞌ niꞌya̱j yuvii̱ do̱ꞌ, rasu̱u̱n ne ruviꞌ niꞌya̱j yuvii̱ do̱ꞌ, da̱j a̱ nij se‑mo̱zó Yaꞌanj uun chij rihaan chumii̱ nihánj do̱ꞌ, cunuda̱nj rasu̱u̱n yoꞌ me se quiꞌyaj Yaꞌanj á. Dan me se caꞌneꞌ Yaꞌanj suun rihaan Cristó quiꞌya̱j Cristó cunuda̱nj rasu̱u̱n, ne̱ ina̱nj cheꞌé Cristó vaa cunuda̱nj rasu̱u̱n yoꞌ, ne̱ dan me se me rá Yaꞌanj ni̱caj yuꞌunj Cristó man cunuda̱nj rasu̱u̱n yoꞌ na̱nj ado̱nj.

¹⁷ Asi̱j ataa curuvi̱ꞌ cunuda̱nj nij rasu̱u̱n, ne̱ a̱j nicu̱nꞌ Cristó, ne̱ cheꞌé o̱rúnꞌ Cristó vaa cunuda̱nj rasu̱u̱n yoꞌ cuano̱ ado̱nj.

¹⁸ Ne̱ soꞌ me síí uun chij ndoꞌo rihaan níꞌ á. Dan me se ase vaa rii taꞌngaꞌ cúú yave̱ yuvii̱ rihaan maꞌa̱n yuvii̱ roꞌ, da̱nj vaa rii taꞌngaꞌ Cristó rihaan cunuda̱nj níꞌ xꞌneꞌ yuvii̱ noco̱ꞌ man soꞌ chugua̱nj. Asino soꞌ me síí cunuu iꞌna̱ꞌ uún ga̱a caviꞌ soꞌ, ne̱ da̱nj ina̱nj ga̱a̱ cunu̱u iꞌna̱ꞌ uún níꞌ, quiꞌya̱j soꞌ, ga̱a ne̱ gu̱un soꞌ síí ra̱a̱ doj rihaan cunuda̱nj níꞌ ado̱nj.

¹⁹ Ase vaa maꞌa̱n Yaꞌanj roꞌ, da̱nj vaa Cristó, quiꞌyaj Yaꞌanj, ne̱ soꞌ me síí nica̱j cunuda̱nj snucua̱j Yaꞌanj ado̱nj.

²⁰ Asino quiriꞌ nu̱ꞌ chumii̱ rihaan Yaꞌanj cheꞌé cacunꞌ quiꞌyaj yuvii̱, tza̱j ne̱ caviꞌ Cristó rihaan rcutze̱ cheꞌé yuvii̱, quiꞌyaj Yaꞌanj a. Ne̱ caꞌve̱e cunu̱u sa̱ꞌ yuvii̱ do̱ꞌ, nu̱ꞌ chumii̱ do̱ꞌ, rihaan Yaꞌanj, ne̱ gu̱un niha̱ꞌ rá Yaꞌanj ni̱ꞌyaj Yaꞌanj nu̱ꞌ se ma̱n rihaan chumii̱ do̱ꞌ, nu̱ꞌ se ma̱n xta̱ꞌ do̱ꞌ na̱nj ado̱nj. Yoꞌ me se vaa quiꞌyaj Yaꞌanj ga̱a caꞌnéé Yaꞌanj man Cristó rihaan chumii̱ nihánj ne̱ cayanj ton man Cristó ga̱a caviꞌ soꞌ rihaan rcutze̱ na̱nj ado̱nj.

Cunuu rcuaꞌa̱a̱n níꞌ ga̱ Yaꞌanj, quiꞌyaj Cristó a

²¹ Ga̱a naá me se yuvii̱ yaníj me soj, ne̱ yuvii̱ ta̱j riꞌyunj man Yaꞌanj me soj a. ꞌO̱ se qui̱j vaa rá soj, ne̱ ina̱nj se chiꞌi̱i̱ quiꞌyaj soj ado̱nj.

²² Tza̱j ne̱ guun Cristó yuvii̱, ne̱ caviꞌ soꞌ, ne̱ cheꞌé dan cunuu rcuaꞌa̱a̱n soj ga̱ Yaꞌanj, quiꞌyaj soꞌ, ne̱ vaa güii canicu̱nꞌ soj rihaan Yaꞌanj, quiꞌya̱j Cristó, ne̱ si̱j nuu sa̱ꞌ nimán rihaan Yaꞌanj gu̱un soj, ne̱ taj cacunꞌ tu̱mé soj a̱ maꞌ.

²³ Dan me se cavi̱i̱ sa̱ꞌ soj, sese ꞌo̱ canoco̱ꞌ soj stucua̱nj Cristó na̱nj ado̱nj. Raan canoco̱ꞌ soj man soꞌ á. A̱j cuno soj nana̱ sa̱ꞌ cheꞌé Cristó, ne̱ cheꞌé dan uun ya̱ rá soj se vaa cavi̱i̱ sa̱ꞌ soj, ne̱ se̱ guun cata̱j soj se vaa ne ya̱ vaa nana̱ sa̱ꞌ cuno soj maꞌ. ꞌO̱ se nana̱ caꞌmii natáj nii rihaan cunuda̱nj nij yuvii̱ ma̱n rihaan chumii̱ me nana̱ sa̱ꞌ yoꞌ, ne̱ ꞌu̱nj nihánj guun ꞌo̱ síí aꞌmii natáj snana̱ Yaꞌanj nana̱ sa̱ꞌ yoꞌ rihaan yuvii̱ na̱nj ado̱nj.

Suun ꞌyaj Pabló cheꞌé nij síí noco̱ꞌ man Cristó a

²⁴ A̱j quiránꞌ ꞌu̱nj sayuun cheꞌé nij soj, ne̱ nihánj me guun niha̱ꞌ raj cheꞌé sayuun ránꞌ ꞌu̱nj á. Dan me se ase vaa sayuun quiranꞌ Cristó cheꞌé nij síí noco̱ꞌ man soꞌ roꞌ, da̱nj vaa sayuun ranꞌ ma̱ꞌán ꞌu̱nj cheꞌé xꞌneꞌ yuvii̱ noco̱ꞌ man soꞌ a.

²⁵ Síí ꞌyaj se‑su̱u̱n Yaꞌanj cheꞌé nij soj si̱j noco̱ꞌ man Cristó mej, ne̱ Yaꞌanj me síí cuneꞌ mán ꞌu̱nj nata̱ꞌ ꞌu̱nj cunuda̱nj snana̱ Yaꞌanj rihaan nij soj a.

²⁶ ꞌO̱ vaa yuve̱ snana̱ Yaꞌanj nana̱ sa̱ꞌ nihánj ga̱a naá, tza̱j ne̱ nda̱a ya̱j me tinaruviꞌ sa̱ꞌ Yaꞌanj nu̱ꞌ snana̱ Yaꞌanj nana̱ sa̱ꞌ rihaan níꞌ si̱j noco̱ꞌ man soꞌ ya̱j ado̱nj.

²⁷ Dan me se guun rá Yaꞌanj xca̱j cunuda̱nj níꞌ si̱j noco̱ꞌ man soꞌ cuentá cheꞌé nana̱ sa̱ꞌ yuve̱ nihánj nana̱ tihaa̱n naca̱ Yaꞌanj se vaa niꞌndaj ya̱ sa̱ꞌ quiꞌyaj Yaꞌanj cheꞌé soj si̱j yaníj na̱nj ado̱nj. Dan me se yuvii̱ yaníj me soj, tza̱j ne̱ ya̱nj Cristó nimán soj, ne̱ cheꞌé dan uun ya̱ rá níꞌ se vaa niꞌndaj ya̱ cavi̱i̱ sa̱ꞌ soj ga̱ Yaꞌanj vaa güii na̱nj ado̱nj.

²⁸ Ne̱ maꞌa̱n núj me síí nataꞌ rihaan cunuda̱nj yuvii̱ cheꞌé Cristó, ne̱ nagoꞌ núj chrej nucua̱j man nij yuvii̱ se vaa canoco̱ꞌ nij yuvii̱ man Cristó a. Ne̱ tucuꞌyón núj nana̱ sa̱ꞌ cu̱u rihaan cunuda̱nj yuvii̱, cheꞌé rej asa̱ꞌ cachrón núj man nij soꞌ rihaan Yaꞌanj, ne̱ sa̱ꞌ ina̱nj ga̱a̱ nij soꞌ, cheꞌé se sa̱ꞌ uxrá nocoꞌ nij soꞌ man Cristó a.

²⁹ Cheꞌé dan ꞌyaj uxraj se‑su̱u̱n Cristó cheꞌé se nucua̱j do̱ꞌ, cheꞌé nana̱ sca̱ꞌ do̱ꞌ, nu̱u̱ nimanj quiꞌyaj Cristó ado̱nj.