Apocalipsis 7 - Triqui de San Juan Copala

Caꞌmii Juan cheꞌé nij síí israelitá cata̱ꞌ taꞌngaꞌ caan rihaan cheꞌé Yaꞌanj a

¹ Veé dan, ga̱a ne̱ queneꞌén ꞌu̱nj caꞌa̱nj se‑mo̱zó Yaꞌanj nicu̱nꞌ caꞌa̱nj nij scúj chumii̱ nihánj, ne̱ caráán nij soꞌ chrej rihaan caꞌa̱nj nij nana̱ avii rihaan chumii̱, se̱ cavii nij nana̱ rihaan yoꞌóó rihaan na yaꞌa̱nj rihaan a̱ doj chruun rihaan a.

² Dan me se queneꞌén ꞌu̱nj ꞌó se‑mo̱zó Yaꞌanj cavii rej síj güii, ne̱ nica̱j soꞌ selló no̱ se‑taꞌnga̱ꞌ Yaꞌanj vaa iꞌna̱ꞌ a. Dan me se caguáj soꞌ rihaan caꞌa̱nj nij se‑mo̱zó Yaꞌanj yoꞌ nij síí caꞌneꞌ Yaꞌanj suun rihaan quiꞌya̱j nij soꞌ sayuun man yoꞌóó do̱ꞌ, man na yaꞌa̱nj do̱ꞌ, ne̱ cataj soꞌ a:

³ ―Se̱ guun quiꞌya̱j soj sayuun man yoꞌóó do̱ꞌ, man na yaꞌa̱nj do̱ꞌ, man chruun do̱ꞌ maꞌ. Caꞌne̱ꞌ rá soj do̱j tzínꞌ, ne̱ nda̱a quisíj cutaꞌ núj taꞌngaꞌ caan rihaan nij síí nu̱u̱ rihaan Taꞌanj níꞌ, ne̱ caꞌve̱e ado̱nj ―taj soꞌ, caguáj soꞌ a.

⁴ Ga̱a ne̱ cunó ꞌu̱nj me daj nij soꞌ cutaꞌ nii taꞌngaꞌ caan rihaan, ne̱ cientó táá vi̱j chiha̱a̱ caꞌa̱nj míj (144,000) yuvii̱ me nij soꞌ, ne̱ si̱j ma̱n cunuda̱nj nij xꞌneꞌ nij yuvii̱ israelitá me nij soꞌ, ne̱ ꞌo̱ xꞌneꞌ cheꞌé ꞌo̱ ꞌo̱ taꞌníí Israel síí cayáán ga̱a naá me nij soꞌ a.

⁵ Dan me se chuvi̱j míj nij soꞌ me síí noco̱ꞌ xꞌneꞌ Judá a. Ne̱ chuvi̱j míj nij soꞌ me síí noco̱ꞌ xꞌneꞌ Rubén a. Ne̱ chuvi̱j míj nij soꞌ me síí noco̱ꞌ xꞌneꞌ Gad a.

⁶ Ne̱ chuvi̱j míj nij soꞌ me síí noco̱ꞌ xꞌneꞌ Aser a. Ne̱ chuvi̱j míj nij soꞌ me síí noco̱ꞌ xꞌneꞌ Neftalí a. Ne̱ chuvi̱j míj nij soꞌ me síí noco̱ꞌ xꞌneꞌ Manasés a.

⁷ Ne̱ chuvi̱j míj nij soꞌ me síí noco̱ꞌ xꞌneꞌ Simeón a. Ne̱ chuvi̱j míj nij soꞌ me síí noco̱ꞌ xꞌneꞌ Leví a. Ne̱ chuvi̱j míj nij soꞌ me síí noco̱ꞌ xꞌneꞌ Isacar a.

⁸ Ne̱ chuvi̱j míj nij soꞌ me síí noco̱ꞌ xꞌneꞌ Zabulón a. Ne̱ chuvi̱j míj nij soꞌ me síí noco̱ꞌ xꞌneꞌ José a. Ne̱ chuvi̱j míj nij soꞌ me síí noco̱ꞌ xꞌneꞌ Benjamín a.

Caꞌmii Juan cheꞌé ri̱i̱ uxrá yuvii̱ ma̱n ꞌo̱ ꞌo̱ chumanꞌ a

⁹ Veé dan, ga̱a ne̱ niꞌya̱j ꞌu̱nj, ne̱ dan me se ri̱i̱ uxrá yuvii̱, ne̱ taj va̱j síí gu̱un nucua̱j quiꞌya̱j contá man nij yuvii̱ a̱ maan chugua̱nj. Ne̱ yuvii̱ ma̱n da̱j a̱ yoꞌóó noco̱o do̱ꞌ, yuvii̱ ma̱n da̱j a̱ xꞌneꞌ yuvii̱ ino̱ vaa stucua̱nj do̱ꞌ, yuvii̱ ma̱n da̱j a̱ chumanꞌ do̱ꞌ, yuvii̱ ma̱n da̱j a̱ xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, me uún nij soꞌ, ne̱ dan me se canicunꞌ nij soꞌ rihaan chruun xlá sa̱ꞌ yoꞌ do̱ꞌ, rihaan Matzinj Leꞌe̱j yoꞌ do̱ꞌ a. Ne̱ yatzíj xca̱a̱n catzi̱i̱ nuû nij soꞌ, ne̱ nica̱j nij soꞌ raꞌa chruun yuun a.

¹⁰ Ne̱ nucua̱j ndoꞌo caguáj nij soꞌ, cataj nij soꞌ a: Nanii núj rihaan sayuun ne̱ avii sa̱ꞌ núj, ꞌyaj Taꞌanj núj síí ta̱j rihaan chruun xlá sa̱ꞌ do̱ꞌ, Matzinj Leꞌe̱j do̱ꞌ ado̱nj, taj nij soꞌ a.

¹¹ Ga̱a ne̱ cunuda̱nj nij se‑mo̱zó Yaꞌanj roꞌ, canicunꞌ nij soꞌ nu̱ꞌ anica̱j xrúún Yaꞌanj chruun xlá sa̱ꞌ do̱ꞌ, nij síí uun chij do̱ꞌ, caꞌa̱nj nij xcuu do̱ꞌ, ga̱a ne̱ cayáán ru̱j nij soꞌ rihaan chruun xlá sa̱ꞌ yoꞌ, ne̱ tocoꞌ ni̱j nij soꞌ rihaan nij soꞌ rihaan yoꞌóó, ne̱ caráj gue̱e̱ nij soꞌ rihaan Yaꞌanj a.

¹² Ne̱ cataj nij soꞌ a: Veé da̱nj ga̱a̱ ya̱ ado̱nj. No̱ xcúún Taꞌanj níꞌ caꞌmi̱i̱ sa̱ꞌ ta̱ranꞌ níꞌ cheꞌé soꞌ do̱ꞌ, cata̱j níꞌ se vaa niꞌndaj ya̱ sa̱ꞌ veꞌé vaa soꞌ do̱ꞌ, ni̱caj ndoꞌo soꞌ cuentá do̱ꞌ, cata̱j níꞌ guun niꞌya̱j ndoꞌo níꞌ rihaan soꞌ do̱ꞌ, cara̱a̱ cochro̱j níꞌ rihaan soꞌ do̱ꞌ, gu̱un chij ndoꞌo soꞌ do̱ꞌ, gu̱un nucua̱j ndoꞌo soꞌ do̱ꞌ, nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj, taj nij soꞌ niꞌya̱j nij soꞌ Yaꞌanj a.

¹³ Ga̱a ne̱ xnáꞌanj ꞌo̱ nij síí uun chij manj, cataj soꞌ a: ―Ne̱ nij síí nu̱u̱ yatzíj xca̱a̱n catzi̱i̱ roꞌ, me si̱j me nij soꞌ, ne̱ me rej cavii nij soꞌ, rá so̱ꞌ ga̱ ―taj soꞌ, xnáꞌanj soꞌ manj a.

¹⁴ Ga̱a ne̱ cataj ꞌu̱nj rihaan soꞌ a: ―Ne neꞌén ꞌu̱nj me síí me nij soꞌ, maan señor. Tza̱j ne̱ so̱ꞌ me síí neꞌen, raj a ―taj ꞌu̱nj rihaan soꞌ a. Ga̱a ne̱ cataj soꞌ rihanj a: ―Nij síí nihánj roꞌ, me nij síí cachén rihaan queꞌe̱e̱ ndoꞌo sayuun, ga̱a guun sayuun noco̱o rihaan chumii̱ ado̱nj. Ne̱ quináán nij soꞌ saga̱nꞌ nij soꞌ, ne̱ cunuu catzi̱i̱ saga̱nꞌ nij soꞌ, quiꞌyaj ton cayanj man Matzinj Leꞌe̱j ga̱a caviꞌ soꞌ cheꞌé nij soꞌ ado̱nj.

¹⁵ Cheꞌé dan me nicu̱nꞌ nij soꞌ rihaan xrúún Yaꞌanj chruun xlá sa̱ꞌ, ne̱ nuvi̱i niga̱nꞌ nicunꞌ nij soꞌ rá nuvií noco̱o ya̱nj rej xta̱ꞌ nu̱u̱ nij soꞌ rihaan Yaꞌanj, ne̱ Yaꞌanj si̱j ta̱j rihaan chruun xlá sa̱ꞌ yoꞌ roꞌ, ca̱ráán soꞌ rihaan sayuun cheꞌé nij soꞌ a.

¹⁶ Ne̱ daj chiha̱a̱ míj se̱ quinaꞌaan uún rque nij soꞌ do̱ꞌ, se̱ canacoo̱ nij soꞌ na do̱ꞌ, se̱ goꞌ naán xráá nij soꞌ do̱ꞌ, se̱ cunuû cachiꞌ rá nij soꞌ do̱ꞌ a̱ maꞌ.

¹⁷ ꞌO̱ se maꞌa̱n Matzinj Leꞌe̱j nicu̱nꞌ maꞌa̱n rej rihaan chruun xlá sa̱ꞌ yoꞌ roꞌ, tu̱mé man nij soꞌ, ne̱ caꞌa̱nj ni̱caj soꞌ man nij soꞌ rej xraꞌ na sa̱ꞌ, ne̱ coꞌo̱ nij soꞌ, ga̱a ne̱ ꞌo̱ ga̱a̱ iꞌna̱ꞌ nimán nij soꞌ, quiꞌya̱j na yoꞌ a. Ne̱ maꞌa̱n Yaꞌanj roꞌ, me síí ti̱nacoo̱ na ayanj rihaan nij soꞌ ado̱nj ―taj síí uun chij yoꞌ rihanj a.