Apocalipsis 6 - Triqui de San Juan Copala

Caꞌnéj Matzinj Leꞌe̱j selló yánj caráán tuꞌva yanj a

¹ Ga̱a ne̱ queneꞌén ꞌu̱nj se vaa caꞌnéj Matzinj Leꞌe̱j ꞌo̱ nij chi̱j selló caráán tuꞌva yanj libró yoꞌ, ga̱a ne̱ cunoj caꞌmii ꞌo̱ tuviꞌ caꞌa̱nj nij xcuu, ne̱ ase uun ráꞌ ga̱a aguáj tuꞌvii roꞌ, da̱nj guun raj ga̱a caꞌmii xoꞌ a. Ne̱ cataj soꞌ a: ―Caꞌna̱ꞌ so̱ꞌ ni̱ꞌyaj so̱ꞌ á ―taj xcuu yoꞌ a.

² Ga̱a ne̱ niꞌya̱j ꞌu̱nj, ne̱ dan me se cavii ꞌo̱ cuayó catzi̱i̱, ne̱ síí ta̱j xráá cuayó yoꞌ roꞌ, nica̱j soꞌ cunuvej, ne̱ rqué nii cachriin cu̱nuû raa̱ soꞌ man soꞌ, ne̱ si̱j ꞌyaj canaán ndoꞌo me soꞌ, ne̱ cavii soꞌ quiꞌya̱j canaán soꞌ a.

³ Ne̱ ga̱a caꞌnéj Matzinj Leꞌe̱j selló vi̱j no̱ tuꞌva yanj yoꞌ, ne̱ cunó ꞌu̱nj caꞌmii xcuu vi̱j a. Ne̱ xcuu vi̱j cataj a: ―Caꞌna̱ꞌ so̱ꞌ ni̱ꞌyaj so̱ꞌ á ―taj xoꞌ a.

⁴ Ga̱a ne̱ cavii ꞌó cuayó, ne̱ cuayó mare̱e me xoꞌ a. Ga̱a ne̱ rqué nii se nucua̱j man síí ta̱j xráá cuayó yoꞌ se vaa quisi̱j cayáán dínj yuvii̱ rihaan chumii̱, quiꞌya̱j soꞌ, ne̱ ticavi̱ꞌ ndoꞌo yuvii̱ tuviꞌ yuvii̱, quiꞌya̱j soꞌ a. Ne̱ rqué nii ꞌo̱ neê espadá xi̱j rihaan soꞌ a.

⁵ Ga̱a ne̱ ga̱a caꞌnéj Matzinj Leꞌe̱j selló vaꞌnu̱j, ga̱a ne̱ cunoj caꞌmii xcuu vaꞌnu̱j a. Ne̱ cataj xoꞌ a: ―Caꞌna̱ꞌ so̱ꞌ ni̱ꞌyaj so̱ꞌ á ―taj xoꞌ a. Ga̱a ne̱ niꞌya̱j ꞌu̱nj, ne̱ dan me se cavii cuayó maruu̱, ne̱ síí ta̱j xráá cuayó roꞌ, ꞌni̱j raꞌa soꞌ agaꞌ romaná agaꞌ aꞌnéé taꞌngaꞌ nij rasu̱u̱n a.

⁶ Ga̱a ne̱ cunó ꞌu̱nj nana̱ cavii rej tanu̱u̱ caꞌa̱nj nij xcuu, ne̱ nana̱ yoꞌ cataj a: ―Saꞌanj ꞌyaj canaán yuvii̱ ꞌo̱ güii roꞌ, caꞌve̱e quira̱a̱n soꞌ ꞌo̱ kiló ꞌnúú trigó do̱ꞌ, ase vaꞌnu̱j kiló ꞌnúú cebada do̱ꞌ a. Tza̱j ne̱ se̱ tiríꞌ so̱ꞌ casté chá do̱ꞌ, na vinó do̱ꞌ maꞌ ―taj nana̱ yoꞌ a.

⁷ Ga̱a ne̱ ga̱a caꞌnéj Matzinj Leꞌe̱j yoꞌ selló caꞌa̱nj no̱ tuꞌva yanj me se cunó ꞌu̱nj caꞌmii xcuu caꞌa̱nj yoꞌ a. Ne̱ cataj xoꞌ a: ―Caꞌna̱ꞌ so̱ꞌ ni̱ꞌyaj so̱ꞌ á ―taj xoꞌ a.

⁸ Ga̱a ne̱ niꞌya̱j ꞌu̱nj, ne̱ dan me se cavii cuayó da̱j, ne̱ síí ta̱j xráá cuayó da̱j roꞌ, Se ꞌYaj Aviꞌ Yuvii̱ cuꞌna̱j soꞌ, ne̱ rej xco̱ soꞌ roꞌ, noco̱ꞌ Rej Ma̱n Nimán Nij Síí Caviꞌ a. Ga̱a ne̱ caꞌneꞌ nii suun rihaan ro̱j soꞌ se vaa gu̱un chij ro̱j soꞌ rihaan ꞌo̱ taꞌa̱j yane̱j nij yuvii̱ ma̱n rihaan chumii̱, ne̱ ni̱caj ro̱j soꞌ neê espadá ni̱caj ro̱j soꞌ xꞌnaa naꞌaan rque ni̱caj ro̱j soꞌ chiꞌii̱ yuva̱a̱ ni̱caj ro̱j soꞌ xcuu yuva̱a̱ qui̱j ni̱caj ro̱j soꞌ, ticavi̱ꞌ ro̱j soꞌ man nij yuvii̱ yoꞌ a.

⁹ Ga̱a ne̱ ga̱a caꞌnéj Matzinj Leꞌe̱j selló ꞌu̱nꞌ no̱ tuꞌva yanj yoꞌ, ne̱ queneꞌén ꞌu̱nj rej rque mesá altar, ne̱ rque mesá altar me se naj nij nimán nij síí caviꞌ cheꞌé snana̱ Yaꞌanj cheꞌé se nataꞌ nij soꞌ nana̱ ya̱ rihaan yuvii̱ a.

¹⁰ Ne̱ nucua̱j ndoꞌo aguáj nij soꞌ, cataj nij soꞌ a: ―Nda̱a me güii caꞌne̱ꞌ so̱ꞌ cacunꞌ cheꞌé nij síí ma̱n rihaan chumii̱, ne̱ qui̱ꞌyáá so̱ꞌ sayuun man nij soꞌ cheꞌé ton cayanj man núj quiꞌyaj nij soꞌ ga̱. Señor, síí sa̱ꞌ ina̱nj do̱ꞌ, síí aꞌmii ina̱nj nana̱ ya̱ do̱ꞌ, mé so̱ꞌ ado̱nj ―taj nimán nij síí caviꞌ, aguáj nij soꞌ a.

¹¹ Ga̱a ne̱ rqué nii yatzíj xca̱a̱n catzi̱i̱ rihaan ꞌo̱ ꞌo̱ nij soꞌ, ga̱a ne̱ cataj xnaꞌanj nii rihaan nij soꞌ se vaa ga̱a̱ ina̱j nimán nij soꞌ doj nda̱a se quisi̱j cavi̱ꞌ nu̱ꞌ nij tinúú nij soꞌ síí nu̱u̱ rihaan Yaꞌanj ga̱ nij soꞌ síí cavi̱ꞌ nda̱a vaa caviꞌ maꞌa̱n nij soꞌ a.

¹² Ga̱a ne̱ queneꞌén ꞌu̱nj se vaa caꞌnéj Matzinj Leꞌe̱j selló vata̱nꞌ no̱ tuꞌva yanj yoꞌ, ne̱ dan me se nucua̱j ndoꞌo cachén yuún, ne̱ guun maruu̱ rihaan güii, ne̱ nda̱ꞌ rá se vaa maruu̱ yatzéj maruu̱ roꞌ, da̱nj vaa güii a. Ne̱ ase vaa ton roꞌ, da̱nj vaa rihaan yavii a.

¹³ Ne̱ cayuu nij yatiꞌ ma̱n xta̱ꞌ rihaan yoꞌóó, ne̱ nda̱ꞌ rá se vaa ayuu chruj higó rihaan yoꞌóó ga̱a oꞌ nana̱ yuva̱a̱ raa̱ chruun higó ne̱ tinasquiꞌ ndoꞌo nana̱ raa̱ chruun yoꞌ roꞌ, da̱nj vaa ayuu yatiꞌ a.

¹⁴ Ne̱ quixraꞌ rej xta̱ꞌ, ne̱ ase vaa yanj ga̱a nacué nii yanj roꞌ, da̱nj guun rej xta̱ꞌ yoꞌ a. Ne̱ nasquiꞌ nu̱ꞌ quij do̱ꞌ, nu̱ꞌ yoꞌóó ta̱j rihaan na yaꞌa̱nj do̱ꞌ a.

¹⁵ Ga̱a ne̱ nij síí nica̱j suun ma̱n rihaan chumii̱ do̱ꞌ, nij síí chij do̱ꞌ, nij síí uun chij rihaan tanuu do̱ꞌ, nij síí ruꞌvee do̱ꞌ, nij síí nucua̱j do̱ꞌ, cunuda̱nj nij mozó do̱ꞌ, cunuda̱nj nij síí ne uun mozó do̱ꞌ, catúj yuve̱ nij soꞌ rque yuꞌuj yuvej do̱ꞌ, rque nij yuvej na̱j quij do̱ꞌ a.

¹⁶ Ga̱a ne̱ cataj nij soꞌ rihaan nij quij rihaan nij yuvej rihaan a: ―Cayu̱u nij soj xráá núj, ne̱ caxri̱i̱ yuve̱ soj man núj, se̱ gaa na̱nj queneꞌe̱n síí ta̱j rihaan chruun xlá sa̱ꞌ yoꞌ man núj, ne̱ se̱ quiꞌyaj Matzinj Leꞌe̱j yoꞌ sayuun man núj rugua̱nj.

¹⁷ ꞌO̱ se a̱j quisíj güii noco̱o güii cuya̱nj rá ro̱j soꞌ, ne̱ se̱ guun nucua̱j núj canicu̱nꞌ núj rihaan sayuun yoꞌ a̱ maꞌ ―taj nij soꞌ rihaan quij do̱ꞌ, rihaan yuvej do̱ꞌ a.