Apocalipsis 5 - Triqui de San Juan Copala

Nataꞌ Juan cheꞌé yanj do̱ꞌ, cheꞌé Matzinj Leꞌe̱j no̱ xcúún nuxra̱ꞌ yanj do̱ꞌ a

¹ Ne̱ rej nuva̱ꞌ síí ta̱j rihaan chruun xlá sa̱ꞌ yoꞌ roꞌ, queneꞌenj ꞌo̱ yanj, ne̱ no̱ nana̱ nu̱ꞌ rej rque̱ yanj nu̱ꞌ rej xra̱j yanj nu̱ꞌ a. Ne̱ no̱ chi̱j selló yánj tuꞌva yanj yoꞌ, ne̱ aráán selló yoꞌ nu̱ꞌ anica̱j tuꞌva yanj yoꞌ a.

² Ga̱a ne̱ queneꞌén ꞌu̱nj ꞌo̱ se‑mo̱zó Yaꞌanj síí nucua̱j ndoꞌo, ne̱ nucua̱j ndoꞌo xnáꞌanj soꞌ, cataj soꞌ a: ―Me síí no̱ xcúún caꞌne̱e̱ nij selló no̱ aráán tuꞌva yanj ne̱ nuxra̱ꞌ soꞌ yanj ga̱ ―taj soꞌ, xnáꞌanj soꞌ a.

³ Ne̱ taj va̱j a̱ ꞌó síí ma̱n rej xta̱ꞌ do̱ꞌ, síí ma̱n rihaan yoꞌóó do̱ꞌ, síí ma̱n rej rque̱ yoꞌóó do̱ꞌ, gu̱un nucua̱j nuxra̱ꞌ yanj ne̱ ni̱ꞌyaj soꞌ yanj yoꞌ a̱ maꞌ.

⁴ Cheꞌé dan taꞌvee uxraj cheꞌé se ne nari̱ꞌ nii man a̱ ꞌó síí niꞌya̱nj nimán nuxra̱ꞌ yanj yoꞌ ni̱ꞌyaj man yanj yoꞌ a̱ maan ado̱nj.

⁵ Ga̱a ne̱ ꞌo̱ nij síí uun chij cataj rihanj a: ―Se̱ taꞌveé so̱ꞌ maꞌ. Ni̱ꞌyaj so̱ꞌ á. A̱j quiꞌyaj canaán síí cuꞌna̱j Chuvaa̱ síí noco̱ꞌ xꞌneꞌ síí cuꞌna̱j Judá síí cayáán ga̱a naá, ne̱ ꞌo̱ taꞌníí taꞌnij siꞌno̱ rey cuꞌna̱j David me uún soꞌ, ne̱ cheꞌé dan caꞌve̱e caꞌne̱e̱ soꞌ chi̱j nij selló no̱ tuꞌva yanj ne̱ nuxra̱ꞌ soꞌ yanj yoꞌ na̱nj ado̱nj ―taj soꞌ rihanj a.

⁶ Ga̱a ne̱ queneꞌén ꞌu̱nj se vaa tanu̱u̱ nij chruun xlá sa̱ꞌ do̱ꞌ, tanu̱u̱ caꞌa̱nj nij xcuu do̱ꞌ, tanu̱u̱ nij síí uun chij do̱ꞌ, nicunꞌ ꞌo̱ soꞌ, ne̱ Matzinj Leꞌe̱j me soꞌ, ne̱ ruviꞌ soꞌ ase vaa matzinj a̱j ticaviꞌ nii man asi̱j rque̱ a. Ne̱ chi̱j cúú ta̱j raa̱ soꞌ, ne̱ chi̱j nij rlij rihaan soꞌ, ne̱ nij rlij rihaan soꞌ roꞌ, nij yoꞌ me Nimán Yaꞌanj síí nica̱j chi̱j ya̱ se nucua̱j síí a̱j caꞌnéé Yaꞌanj rihaan nu̱ꞌ chumii̱ a.

⁷ Dan me se cuchiꞌ soꞌ rihaan síí ta̱j rihaan chruun xlá sa̱ꞌ yoꞌ, ne̱ taꞌaa soꞌ yanj oro̱ꞌ raꞌa síí ta̱j rihaan chruun xlá rej nuva̱ꞌ soꞌ a.

⁸ Ne̱ ga̱a taꞌaa soꞌ yanj, ne̱ quinij ru̱j caꞌa̱nj nij xcuu do̱ꞌ, ico̱ caꞌa̱nj (24) nij síí uun chij do̱ꞌ, rihaan Matzinj Leꞌe̱j yoꞌ a. Ne̱ nica̱j ꞌo̱ ꞌo̱ nij soꞌ yaꞌánj arpá do̱ꞌ, coꞌoo agaꞌ oró míí caraa squíí xlá rque do̱ꞌ, ne̱ squíí xlá yoꞌ roꞌ, me nij nana̱ achíín niꞌya̱j nij síí noco̱ꞌ man Yaꞌanj rihaan maꞌa̱n Yaꞌanj a.

⁹ Ga̱a ne̱ achráá nij soꞌ chraꞌ naca̱ rihaan Matzinj Leꞌe̱j, cataj nij soꞌ a: No̱ xcúún so̱ꞌ ni̱caj so̱ꞌ yanj ne̱ caꞌne̱e̱ so̱ꞌ nij selló yánj aráán tuꞌva yanj yoꞌ á. ꞌO̱ se ticaviꞌ nii mán so̱ꞌ, ne̱ dan me se nica̱j so̱ꞌ ton mán so̱ꞌ quiránj so̱ꞌ yuvii̱ ma̱n da̱j a̱ xꞌneꞌ yuvii̱ ino̱ vaa stucua̱nj do̱ꞌ, yuvii̱ ma̱n da̱j a̱ xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, yuvii̱ ma̱n da̱j a̱ chumanꞌ do̱ꞌ, yuvii̱ ma̱n da̱j a̱ yoꞌóó noco̱o do̱ꞌ, cheꞌé Yaꞌanj ado̱nj.

¹⁰ Ga̱a ne̱ guun chij Yaꞌanj rihaan nij soꞌ, quiꞌyáá so̱ꞌ, ne̱ guun nij soꞌ xrej nu̱u̱ rihaan Yaꞌanj, quiꞌyáá so̱ꞌ, ne̱ vaa güii gu̱un chij nij soꞌ rihaan chumii̱ ado̱nj, taj chraꞌ achráá nij soꞌ a.

¹¹ Ga̱a ne̱ queneꞌen uún ꞌu̱nj, ne̱ cunó ꞌu̱nj snana̱ queꞌe̱e̱ millón se‑mo̱zó Yaꞌanj nicu̱nꞌ nu̱ꞌ anica̱j chruun xlá sa̱ꞌ do̱ꞌ, nij xcuu do̱ꞌ, nij síí uun chij do̱ꞌ a.

¹² Ne̱ nucua̱j ndoꞌo caꞌmii nij se‑mo̱zó Yaꞌanj yoꞌ, cataj nij soꞌ a: No̱ xcúún ndoꞌo Matzinj Leꞌe̱j ticaviꞌ nii man gu̱un nucua̱j ndoꞌo soꞌ do̱ꞌ, ni̱caj soꞌ nu̱ꞌ rasu̱u̱n sa̱ꞌ do̱ꞌ, ni̱caj ndoꞌo soꞌ cuentá do̱ꞌ, gu̱un chij ndoꞌo soꞌ do̱ꞌ, caꞌmi̱i̱ cochro̱j ta̱ranꞌ níꞌ cheꞌé soꞌ do̱ꞌ, cata̱j níꞌ se vaa niꞌndaj ya̱ sa̱ꞌ vaa soꞌ do̱ꞌ, veꞌé uxrá caꞌmi̱i̱ níꞌ cheꞌé soꞌ do̱ꞌ ado̱nj taj nij se‑mo̱zó Yaꞌanj niꞌya̱j nij soꞌ Matzinj Leꞌe̱j yoꞌ a.

¹³ Ga̱a ne̱ cunó ꞌu̱nj se vaa caꞌmii da̱j a̱ nij rasu̱u̱n quiꞌyaj Yaꞌanj, rasu̱u̱n ma̱n rej xta̱ꞌ do̱ꞌ, rasu̱u̱n ma̱n rihaan yoꞌóó do̱ꞌ, rasu̱u̱n ma̱n rque yoꞌóó do̱ꞌ, rasu̱u̱n ma̱n rihaan na yaꞌa̱nj do̱ꞌ a. Ne̱ cataj cunuda̱nj nij rasu̱u̱n yoꞌ a: Cheꞌé síí ta̱j rihaan chruun xlá sa̱ꞌ do̱ꞌ, cheꞌé Matzinj Leꞌe̱j do̱ꞌ, cata̱j níꞌ se vaa ina̱nj sa̱ꞌ ꞌyaj ro̱j soꞌ do̱ꞌ, cara̱a̱ cochro̱j níꞌ rihaan ro̱j soꞌ do̱ꞌ, niꞌndaj ya̱ sa̱ꞌ veꞌé ga̱a̱ ro̱j soꞌ do̱ꞌ, gu̱un chij ro̱j soꞌ do̱ꞌ, nu̱ꞌ cavii nu̱ꞌ caꞌanj ado̱nj taj nij rasu̱u̱n yoꞌ a.

¹⁴ Ga̱a ne̱ cataj caꞌa̱nj nij xcuu yoꞌ a: ―Veé da̱nj ga̱a̱ ya̱ ado̱nj ―taj nij xoꞌ a. Ga̱a ne̱ cayáán ru̱j nij síí uun chij, ne̱ caráj gue̱e̱ nij soꞌ a.