Apocalipsis 21 - Triqui de San Juan Copala

Caꞌmii Juan cheꞌé rej xta̱ꞌ naca̱ do̱ꞌ, cheꞌé chumii̱ naca̱ do̱ꞌ a

¹ Dan me se queneꞌén ꞌu̱nj rej xta̱ꞌ naca̱ do̱ꞌ, chumii̱ naca̱ do̱ꞌ a. ꞌO̱ se a̱j navij nu̱ꞌ rej xta̱ꞌ nga̱ do̱ꞌ, chumii̱ nga̱ do̱ꞌ, ne̱ na yaꞌa̱nj me se nuviꞌ yoꞌ naj a̱ maꞌ.

² ꞌO̱ se ꞌu̱nj si̱j cuꞌna̱j Juan me queneꞌen se vaa cavii chumanꞌ gue̱e̱ chumanꞌ Jerusalén naca̱ rej xta̱ꞌ rej ya̱nj Yaꞌanj, ne̱ nanij yoꞌ, ne̱ ase vaa uun ráꞌ niꞌya̱ꞌ chana̱ naraꞌa̱a roꞌ, da̱nj guun raj niꞌya̱j ꞌu̱nj man chumanꞌ yoꞌ a.

³ Ga̱a ne̱ cunó ꞌu̱nj nana̱ caꞌmii síí ta̱j chruun xlá sa̱ꞌ, cataj soꞌ a: ―Ni̱ꞌyaj soj á. Nihánj me tucuá Yaꞌanj ca̱yáán rej ya̱nj yuvii̱, ne̱ ca̱yáán rcuaꞌa̱a̱n Yaꞌanj ga̱ nij soꞌ, ne̱ Taꞌanj nij soꞌ gu̱un soꞌ na̱nj ado̱nj.

⁴ Ne̱ maꞌa̱n Yaꞌanj roꞌ, naꞌve̱ nu̱ꞌ na ayanj rihaan nij soꞌ, ne̱ se̱ caviꞌ uún nij soꞌ a̱ maꞌ. Ne̱ se̱ nanó rá nij soꞌ do̱ꞌ, se̱ taꞌvee nij soꞌ a̱ doj do̱ꞌ, se̱ quiranꞌ nij soꞌ a̱ doj sayuun do̱ꞌ, a̱ maꞌ. ꞌO̱ se a̱j cachén nu̱ꞌ rasu̱u̱n nga̱ yoꞌ na̱nj ado̱nj ―taj síí ta̱j rihaan chruun xlá sa̱ꞌ yoꞌ a.

⁵ Ga̱a ne̱ cataj uún soꞌ a: ―Ni̱ꞌyaj soj á. Nihánj me se naquiꞌya̱j naca̱ uún ꞌu̱nj man cunuda̱nj nij rasu̱u̱n na̱nj á ―taj soꞌ a. Ga̱a ne̱ cataj uún soꞌ a: ―Cachro̱n so̱ꞌ nana̱ nihánj rihaan yanj á. ꞌO̱ se nana̱ ya̱ me nana̱ nihánj, ne̱ vaa cheꞌé ga̱a̱ nucua̱j rá soj manj se vaa qui̱ꞌyáj nu̱ꞌ rasu̱u̱n nihánj ado̱nj ―taj soꞌ a.

⁶ Ga̱a ne̱ cataj uún soꞌ rihanj a: ―A̱j quisíj quiꞌyáá ꞌu̱nj nu̱ꞌ rasu̱u̱n na̱nj á. Ne̱ ase vaa letrá ruviꞌ rej uun cheꞌe̱ alfabetó me letrá A, ne̱ ase vaa letrá ruviꞌ rej navij alfabetó me letrá Z, da̱nj vaa ꞌu̱nj, ne̱ dan me se si̱j nicu̱nꞌ asi̱j rque̱ mej, ne̱ veé ꞌu̱nj canicu̱nꞌ nu̱ꞌ cavii nu̱ꞌ caꞌanj na̱nj ado̱nj. Ne̱ rihaan síí nacoo̱ na me se rque̱ u̱u̱n ꞌu̱nj na coꞌo̱ soꞌ, ne̱ ga̱a̱ iꞌna̱ꞌ soꞌ nu̱ꞌ cavii nu̱ꞌ caꞌanj, quiꞌya̱j na yoꞌ ado̱nj.

⁷ Ne̱ síí ꞌyaj canaán roꞌ, gu̱un soꞌ síí ni̱caj cunuda̱nj rasu̱u̱n siꞌyáá ꞌu̱nj, ne̱ ꞌu̱nj roꞌ, gu̱un Taꞌanj nij soꞌ, ne̱ nij soꞌ roꞌ, gu̱un taꞌníj ado̱nj.

⁸ Tza̱j ne̱ xa̱ꞌ nij síí cunánj rihaan sayuun do̱ꞌ, nij síí ne nocoꞌ xraan manj do̱ꞌ, nij síí ꞌyaj se chiꞌi̱i̱ do̱ꞌ, nij síí ticaviꞌ tuviꞌ do̱ꞌ, nij síí otoj ga̱ ꞌó yuvii̱ sese né ni̱ca̱ nij soꞌ me do̱ꞌ, nij síí ꞌyaj chre̱e do̱ꞌ, nij síí aráj gue̱e̱ rihaan yaꞌanj quiꞌyaj maꞌa̱n yuvii̱ do̱ꞌ, ta̱ranꞌ nij síí ne̱ do̱ꞌ, me se vaa laguaná caca̱a̱ nij soꞌ rihaan yaꞌan, ne̱ laguaná acaa ndoꞌo yoꞌóó azufré me yoꞌ ado̱nj. Yoꞌ me rej cavi̱ꞌ uún nij soꞌ nu̱ꞌ cavii nu̱ꞌ caꞌanj na̱nj chugua̱nj ―taj síí ta̱j rihaan chruun xlá sa̱ꞌ yoꞌ a.

Caꞌmii Juan cheꞌé chumanꞌ Jerusalén naca̱ a

⁹ Ga̱a ne̱ caꞌnaꞌ ꞌo̱ tuviꞌ chi̱j nij se‑mo̱zó Yaꞌanj síí nica̱j chi̱j nij coꞌoo araa nda̱a ayanj maꞌa̱n chi̱j nij sayuun a. Ga̱a ne̱ cataj soꞌ rihanj a: ―Caꞌna̱ꞌ so̱ꞌ nihánj, ne̱ ti̱haán ꞌu̱nj chana̱ xca̱j Matzinj Leꞌe̱j man rihaan so̱ꞌ á ―taj soꞌ rihanj a.

¹⁰ Ga̱a ne̱ dan me se caꞌanj nica̱j soꞌ manj raa̱ quij xi̱j xca̱a̱n, quiꞌyaj Nimán Yaꞌanj, ga̱a ne̱ tihaa̱n soꞌ chumanꞌ gue̱e̱ noco̱o cuꞌna̱j Jerusalén rihanj, ne̱ cavii chumanꞌ yoꞌ rej xta̱ꞌ rej ya̱nj Yaꞌanj, ne̱ nanij yoꞌ rihaan yoꞌóó a.

¹¹ Ne̱ chumanꞌ yoꞌ roꞌ, niꞌndaj ya̱ veꞌé chuguu̱n yoꞌ ase vaa chuguu̱n maꞌa̱n Yaꞌanj na̱nj ado̱nj. Ne̱ chuguu̱n yoꞌ nda̱a vaa chuguu̱n yahij chuguu̱n tuꞌve̱e̱ ndoꞌo a. Dan me se ase vaa yahij “jaspe” vaa yoꞌ, chuguu̱n ndoꞌo yoꞌ a.

¹² Dan me se nicu̱nꞌ ꞌo̱ chingá chraan xi̱j xca̱a̱n nu̱ꞌ anica̱j tuꞌva chumanꞌ yoꞌ, ne̱ ta̱j chuvi̱j taꞌyaa tuꞌva chingá yoꞌ, ne̱ nicu̱nꞌ ꞌo̱ se‑mo̱zó Yaꞌanj tuꞌva ꞌo̱ ꞌo̱ taꞌyaa yoꞌ a. Ne̱ nó se‑chuvi̱i ꞌo̱ chuvi̱j nij xꞌneꞌ nij yuvii̱ israelitá rihaan chuvi̱j nij taꞌyaa yoꞌ a.

¹³ Dan me se rej síj güii rihaan chingá chraan roꞌ, táá vaꞌnu̱j nij taꞌyaa, ne̱ rej norté rihaan chingá roꞌ, táá yaꞌnúj nij taꞌyaa, ne̱ rej sur rihaan chingá chraan roꞌ, táá yaꞌnúj nij taꞌyaa, ne̱ rej ataꞌ güii rihaan chingá chraan roꞌ, táá yaꞌnúj nij taꞌyaa yoꞌ a.

¹⁴ Ne̱ vaa chuvi̱j yuvej xi̱j na̱j tacóó chingá chraan yoꞌ, ne̱ rihaan chuvi̱j nij yuvej yoꞌ roꞌ, nó se‑chuvi̱i chuvi̱j nij síí cuneꞌ Matzinj Leꞌe̱j caꞌa̱nj nata̱ꞌ snana̱ soꞌ rihaan yuvii̱ a.

¹⁵ Ne̱ se‑mo̱zó Yaꞌanj síí caꞌmii ga̱ ꞌu̱nj roꞌ, nica̱j soꞌ ꞌo̱ vará aga̱ꞌ oró míí, cheꞌé rej xca̱j taꞌngaꞌ soꞌ chumanꞌ do̱ꞌ, nij taꞌyaa do̱ꞌ, nu̱ꞌ chingá do̱ꞌ a.

¹⁶ Ne̱ dan me se cuya̱a̱n vaa rej xca̱a̱n ga̱ rej caxra̱ꞌ man chumanꞌ yoꞌ a. Ga̱a ne̱ xcaj taꞌngaꞌ soꞌ chumanꞌ yoꞌ, ne̱ vi̱j míj táá vi̱j cientó (2,200) kilómetro vaa chumanꞌ yoꞌ a. Dan me se cuya̱a̱n vaa rej xca̱a̱n do̱ꞌ, rej caxra̱ꞌ do̱ꞌ, rej xta̱ꞌ do̱ꞌ, man chumanꞌ yoꞌ a.

¹⁷ Ga̱a ne̱ xcaj taꞌngaꞌ soꞌ rej xca̱a̱n xta̱ꞌ chingá yoꞌ, ne̱ vaꞌnu̱j chiha̱a̱ caꞌa̱nj (64) metró ta̱j doj vaa chraan chingá yoꞌ a. Dan me se ase vaa xcaj taꞌngaꞌ yuvii̱ rasu̱u̱n roꞌ, da̱nj vaa xcaj taꞌngaꞌ se‑mo̱zó Yaꞌanj yoꞌ nu̱ꞌ chingá yoꞌ a.

¹⁸ Ne̱ ina̱nj yahij “jaspe” me nu̱ꞌ chraan yoꞌ, ne̱ ina̱nj agaꞌ oró míí sa̱ꞌ me nu̱ꞌ chumanꞌ yoꞌ, ne̱ ase vaa scura̱a̱n roꞌ, da̱nj vaa nu̱ꞌ agaꞌ oró míí sa̱ꞌ yoꞌ a.

¹⁹ Ne̱ da̱j a̱ yahij chuguu̱n tuꞌve̱e̱ ndoꞌo roꞌ, nó rihaan tacóó chumanꞌ yoꞌ a. Dan me se ꞌo̱ yuvej xi̱j na̱j tacóó chraan roꞌ, me yahij “jaspe”, ne̱ yuvej vi̱j roꞌ, me yahij “zafiro”, ne̱ yuvej vaꞌnu̱j roꞌ, me yahij “ágata”, ne̱ yuvej caꞌa̱nj roꞌ, me yahij “esmeralda” a.

²⁰ Ne̱ yuvej ꞌu̱nꞌ roꞌ, me yahij “ónice”, ne̱ yuvej vata̱nꞌ roꞌ, me yahij “cornalina”, ne̱ yuvej chi̱j roꞌ, me yahij “crisólito”, ne̱ yuvej tu̱nj roꞌ, me yahij “berilo”, ne̱ yuvej u̱u̱n roꞌ, me yahij “topacio”, ne̱ yuvej chi̱ꞌ roꞌ, me yahij “crisopraso”, ne̱ yuvej xa̱a̱n roꞌ, me yahij “jacinto”, ne̱ yuvej chuvi̱j roꞌ, me yahij “amatista” a. Ne̱ nu̱ꞌ nij yahij yoꞌ roꞌ, nó rihaan ꞌo̱ ꞌo̱ nij yuvej xi̱j na̱j tacóó chingá chumanꞌ yoꞌ a.

²¹ Ne̱ chuvi̱j nij taꞌyaa ta̱j rej atúj yuvii̱ rque chumanꞌ roꞌ, me rmii perlá na̱nj a. Dan me se o̱rúnꞌ rmii perlá yoꞌ me ꞌo̱ ꞌo̱ nij taꞌyaa a. Ne̱ ina̱nj agaꞌ oró míí sa̱ꞌ me callé noco̱o caxra̱ꞌ ta̱j rque chumanꞌ yoꞌ, ne̱ ase vaa raa̱n scura̱a̱n roꞌ, vaa nu̱ꞌ agaꞌ oró míí yoꞌ a.

²² Ne̱ nuviꞌ nuvií noco̱o queneꞌén ꞌu̱nj rque chumanꞌ yoꞌ maꞌ. ꞌO̱ se maꞌa̱n Yaꞌanj Si̱j ꞌNi̱j Raꞌa man níꞌ Si̱j Uun Nucua̱j ꞌYaj Cunuda̱nj ga̱ maꞌa̱n Matzinj Leꞌe̱j me ro̱j síí guun nuvií rque chumanꞌ yoꞌ na̱nj ado̱nj.

²³ Ne̱ ne achiin güii do̱ꞌ, yavii do̱ꞌ, chugu̱u̱n rihaan chumanꞌ yoꞌ a̱ maꞌ. ꞌO̱ se maꞌa̱n Yaꞌanj chuguu̱n rihaan chumanꞌ yoꞌ, ne̱ maꞌa̱n Matzinj Leꞌe̱j yoꞌ guun agaꞌ chuguu̱n rque nu̱ꞌ chumanꞌ yoꞌ na̱nj chugua̱nj.

²⁴ Ne̱ cunuda̱nj nij xꞌneꞌ yuvii̱ ma̱n rihaan chumii̱ roꞌ, curuvi̱ꞌ ni̱ꞌyaj nij soꞌ cache̱e̱ nij soꞌ, quiꞌya̱j maꞌa̱n chumanꞌ yoꞌ a. Ne̱ nij síí nica̱j suun rey ma̱n rihaan chumii̱ roꞌ, me se nica̱j nij soꞌ nu̱ꞌ siꞌyaj nij soꞌ rasu̱u̱n sa̱ꞌ uxrá, ꞌnaꞌ nij soꞌ rque chumanꞌ yoꞌ a.

²⁵ ꞌO̱ se ina̱nj rej ranga̱ꞌ ga̱a̱ chumanꞌ yoꞌ, ne̱ daj chiha̱a̱ míj se̱ caráán nii taꞌyaa ta̱j tuꞌva chumanꞌ yoꞌ maꞌ. ꞌO̱ se taj va̱j rej nii̱ chumanꞌ yoꞌ maꞌ.

²⁶ Ne̱ nu̱ꞌ rasu̱u̱n veꞌé uxrá vaa do̱ꞌ, nu̱ꞌ rasu̱u̱n sa̱ꞌ uxrá do̱ꞌ, caꞌa̱nj ni̱caj cunuda̱nj nij xꞌneꞌ yuvii̱ ma̱n rihaan chumii̱ rque chumanꞌ yoꞌ a.

²⁷ Tza̱j ne̱ taj va̱j a̱ doj se chiꞌi̱i̱ catu̱u̱ rque chumanꞌ yoꞌ maꞌ. ꞌO̱ se síí ꞌyaj se chiꞌi̱i̱ do̱ꞌ, síí aꞌmii ne̱ do̱ꞌ, se̱ catúj nij soꞌ daj chiha̱a̱ míj rque chumanꞌ yoꞌ a̱ maan ado̱nj. Tza̱j ne̱ ina̱nj nij síí no̱ se‑chuvi̱i rihaan danj Matzinj Leꞌe̱j yanj libró no̱ se‑chuvi̱i nij síí ga̱a̱ iꞌna̱ꞌ ga̱ Yaꞌanj nu̱ꞌ cavii nu̱ꞌ caꞌanj roꞌ, ina̱nj nij soꞌ me nij síí catu̱u̱ rque chumanꞌ yoꞌ na̱nj ado̱nj.