Apocalipsis 20 - Triqui de San Juan Copala

Caꞌmii Juan cheꞌé míj nij yoꞌ numi̱i xcuáá tuꞌvi̱i a

¹ Ga̱a ne̱ queneꞌén ꞌu̱nj ꞌo̱ se‑mo̱zó Yaꞌanj cavii rej xta̱ꞌ, ne̱ nanij soꞌ ꞌnaꞌ soꞌ, ne̱ oro̱ꞌ soꞌ agaꞌ ne̱ꞌ ga̱ ragaꞌ yavé ꞌni̱j tuꞌva yuꞌuj cunu̱u̱ rmi̱ꞌ ndoꞌo yoꞌ a.

² Ga̱a ne̱ taꞌaa soꞌ xcuáá tuꞌvi̱i xcuáá cayáán asi̱j naá a. Ne̱ xcuáá tuꞌvi̱i yoꞌ roꞌ, me Síí Chre̱e, ne̱ Satanás cuꞌna̱j soꞌ a. Dan me se nica̱j se‑mo̱zó Yaꞌanj agaꞌ ne̱ꞌ numíj se‑mo̱zó Yaꞌanj man soꞌ rque ꞌo̱ míj ya̱ yoꞌ a.

³ Ga̱a ne̱ quiriꞌíj se‑mo̱zó Yaꞌanj man soꞌ rque yuꞌuj cunu̱u̱ rmi̱ꞌ ndoꞌo, ne̱ caxríj soꞌ ragaꞌ, ne̱ cachrón soꞌ ꞌo̱ taꞌngaꞌ selló ya̱ tuꞌva yuꞌuj cunu̱u̱ rmi̱ꞌ ndoꞌo yoꞌ, cheꞌé rej ꞌo̱ qui̱ꞌnij yuve̱ xcuáá yoꞌ, ga̱a ne̱ se̱ gaa na̱nj tiha̱ꞌ yuꞌunj uún xcuáá tuꞌvi̱i yoꞌ doj man nij yuvii̱ ma̱n rihaan chumii̱ rque ꞌo̱ míj ya̱ yoꞌ maꞌ. Dan me se ga̱a quisi̱j míj nij yoꞌ yoꞌ, ga̱a ne̱ nache̱ uún xcuáá tuꞌvi̱i yoꞌ do̱j tzínꞌ a.

⁴ Ga̱a ne̱ dan me se queneꞌén ꞌu̱nj chruun xlá sa̱ꞌ, ne̱ vaa nij síí ta̱j nij chruun xlá sa̱ꞌ yoꞌ a. Dan me se caꞌneꞌ Yaꞌanj suun rihaan nij soꞌ se vaa caꞌne̱ꞌ nij soꞌ cacunꞌ cheꞌé nij yuvii̱ a. Ne̱ queneꞌén ꞌu̱nj man nimán ꞌó nij síí ya̱nj rej yoꞌ a. Ne̱ nij soꞌ roꞌ, me nij síí sa̱ꞌ tagüéj nii cúú yave̱ cheꞌé snana̱ Jesús nana̱ nataꞌ nij soꞌ do̱ꞌ, cheꞌé snana̱ Yaꞌanj do̱ꞌ a. Ne̱ nij soꞌ roꞌ, ne cara̱a̱ gue̱e̱ nij soꞌ rihaan xcuu yuva̱a̱ do̱ꞌ, rihaan se tinanga̱ꞌ xcuu yuva̱a̱ do̱ꞌ maꞌ. Ne̱ ne caꞌve̱j rá nij soꞌ cata̱ꞌ se‑taꞌnga̱ꞌ xcuu yuva̱a̱ yoꞌ caan rihaan nij soꞌ do̱ꞌ, raꞌa nij soꞌ do̱ꞌ maꞌ. ꞌO̱ se cunuu iꞌna̱ꞌ uún nij soꞌ, ne̱ ꞌo̱ míj yoꞌ cayáán nij soꞌ ne̱ guun chij nij soꞌ ga̱ Cristó a.

⁵ Nij soꞌ me nij síí cunuu iꞌna̱ꞌ uún asino ya̱a̱n rihaan cunuda̱nj nij yuvii̱ a. Ne̱ xa̱ꞌ ꞌó nij síí caviꞌ, tza̱j ne̱ ne cunu̱u iꞌna̱ꞌ uún nij soꞌ nda̱a se quisíj ya̱ nu̱ꞌ míj yoꞌ yoꞌ a.

⁶ Dan me se síí cavi̱i̱ sa̱ꞌ ndoꞌo me nij soꞌ, ne̱ síí cunu̱u sa̱ꞌ nimán rihaan Yaꞌanj me nij soꞌ, cheꞌé se síí cunu̱u iꞌna̱ꞌ uún asino ya̱a̱n me nij soꞌ ado̱nj. Se̱ caꞌvee daj chiha̱a̱ míj cavi̱ꞌ uún nij soꞌ a̱ maꞌ. Tana̱nj gu̱un nij soꞌ xrej ca̱yáán rihaan Yaꞌanj do̱ꞌ, rihaan Cristó do̱ꞌ, ne̱ gu̱un chij nij soꞌ ga̱ Cristó nu̱ꞌ míj ya̱ yoꞌ ado̱nj.

⁷ Ga̱a ne̱ asa̱ꞌ quisíj míj nij yoꞌ, ga̱a ne̱ cu̱riha̱nj Síí Chre̱e tagaꞌ nu̱u̱ soꞌ,

⁸ ga̱a ne̱ cavi̱i̱ soꞌ tiha̱ꞌ yuꞌunj soꞌ man nij síí ma̱n rihaan caꞌa̱nj nij scúj chumii̱ nihánj ado̱nj. Dan me se tiha̱ꞌ yuꞌunj soꞌ man nij síí ya̱nj chumanꞌ Gog do̱ꞌ, man nij síí ya̱nj chumanꞌ Magog do̱ꞌ, ga̱a ne̱ cunu̱u chre̱ꞌ ta̱ranꞌ nij soꞌ, quiꞌya̱j soꞌ, cheꞌé rej cunu̱ꞌ nij soꞌ a. Ne̱ ase vaa yoꞌóó chru̱u̱ na̱j tuꞌva na yaꞌa̱nj roꞌ, da̱nj ga̱a̱ ri̱i̱ uxrá nij tuvi̱ꞌ nij soꞌ na̱nj á.

⁹ Dan me se cavii nij soꞌ rihaan taa cachra̱ꞌ, ne̱ tucuachriin nij soꞌ man rej ya̱nj nij tanuu noco̱ꞌ man Yaꞌanj do̱ꞌ, man maꞌa̱n chumanꞌ ꞌe̱e̱ rá Yaꞌanj man do̱ꞌ a. Ga̱a ne̱ ma̱an orá yoꞌ cavii ndoꞌo yaꞌan rej xta̱ꞌ nanij yoꞌ rihaan yoꞌóó, ga̱a ne̱ cacaa nu̱ꞌ nij síí chiꞌi̱i̱ yoꞌ, quiꞌyaj yaꞌan yoꞌ na̱nj ado̱nj.

¹⁰ Ga̱a ne̱ Síí Chre̱e síí tihaꞌ yuꞌunj man nij soꞌ roꞌ, quiriꞌíj nii man soꞌ rque laguaná rej acaa ndoꞌo yoꞌóó azufré, ne̱ yoꞌ me rej nu̱u̱ xcuu yuva̱a̱ do̱ꞌ, síí nataꞌ nana̱ ne̱ do̱ꞌ a. Ga̱a ne̱ nuvi̱i niga̱nꞌ quira̱nꞌ ndoꞌo nij soꞌ sayuun nu̱ꞌ cavii nu̱ꞌ caꞌanj na̱nj ado̱nj.

Chruun xlá xi̱j catzi̱i̱ rej caꞌne̱ꞌ Yaꞌanj cacunꞌ cheꞌé yuvii̱ a

¹¹ Ga̱a ne̱ dan me se queneꞌén ꞌu̱nj ꞌo̱ chruun xlá sa̱ꞌ xi̱j catzi̱i̱, ne̱ queneꞌén ꞌu̱nj ꞌo̱ síí ta̱j chruun xlá yoꞌ, ne̱ cuchuꞌviꞌ ndoꞌo nu̱ꞌ chumii̱ do̱ꞌ, nu̱ꞌ rej xta̱ꞌ do̱ꞌ, niꞌya̱j ro̱j yoꞌ man soꞌ a. Dan me se naxuun ro̱j yoꞌ man ro̱j yoꞌ rihaan síí ta̱j chruun xlá, ne̱ ne nari̱ꞌ ro̱j yoꞌ a̱ ꞌó rej quina̱j ro̱j yoꞌ a̱ maꞌ.

¹² Ga̱a ne̱ queneꞌén ꞌu̱nj man nij síí caviꞌ uún a. Dan me se síí sa̱ꞌ ata̱ suun do̱ꞌ, síí chéé maꞌa̱n do̱ꞌ, queneꞌén ꞌu̱nj, ne̱ nicunꞌ nij soꞌ rihaan síí ta̱j chruun xlá sa̱ꞌ xi̱j catzi̱i̱ yoꞌ a. Ga̱a ne̱ nuxraꞌ nii nij yanj libró a. Dan me se nuxraꞌ nij soꞌ man ꞌó yanj libró no̱ se‑chuvi̱i nij síí ga̱a̱ iꞌna̱ꞌ nu̱ꞌ cavii nu̱ꞌ caꞌanj ga̱ Yaꞌanj a. Dan me se caꞌneꞌ Yaꞌanj cacunꞌ cheꞌé nij síí caviꞌ yoꞌ, ne̱ niꞌya̱j soꞌ nana̱ no̱ rihaan nij yanj libró yoꞌ nana̱ taj xnaꞌanj nda̱a vaa quiꞌyaj nij soꞌ ga̱a vaa iꞌna̱ꞌ nij soꞌ rihaan chumii̱ a.

¹³ Dan me se narqué na yaꞌa̱nj nu̱ꞌ nij síí caviꞌ rque na yaꞌa̱nj, ne̱ narqué se ꞌyaj aviꞌ yuvii̱ do̱ꞌ, rej ma̱n nij síí caviꞌ do̱ꞌ, nu̱ꞌ nij síí caviꞌ na̱j rej yoꞌ nuriha̱nj nij soꞌ canicunꞌ nij soꞌ rihaan síí ta̱j chruun xlá sa̱ꞌ xi̱j catzi̱i̱ yoꞌ a. Dan me se caꞌneꞌ Yaꞌanj cacunꞌ cheꞌé ꞌo̱ ꞌo̱ nij soꞌ nda̱a vaa quiꞌyaj ꞌo̱ ꞌo̱ nij soꞌ a.

¹⁴ Dan me se maꞌa̱n se ꞌyaj aviꞌ yuvii̱ do̱ꞌ, rej ma̱n nij síí caviꞌ do̱ꞌ, quiriꞌíj Yaꞌanj man ro̱j yoꞌ rque na laguaná rej acaa ndoꞌo caca̱a̱ ro̱j yoꞌ a. Ne̱ rque na laguaná yoꞌ roꞌ, me se quisi̱j vi̱j ꞌo̱ cavi̱ꞌ ya̱ nii nu̱ꞌ cavii nu̱ꞌ caꞌanj a.

¹⁵ Ne̱ ta̱ranꞌ nij síí nuviꞌ se‑chuvi̱i rihaan yanj no̱ se‑chuvi̱i nij síí ga̱a̱ iꞌna̱ꞌ nu̱ꞌ cavii nu̱ꞌ caꞌanj roꞌ, quiriꞌíj nii man nij soꞌ rque na laguaná acaa yoꞌ, ne̱ ꞌo̱ caca̱a̱ nij soꞌ ado̱nj.