Apocalipsis 2 - Triqui de San Juan Copala

Nana̱ caꞌa̱nj rihaan xꞌneꞌ nij síí noco̱ꞌ man Cristó ya̱nj chumanꞌ Éfeso a

¹ Ga̱a ne̱ cataj soꞌ rihanj a: ―Nana̱ nihánj me nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Éfeso á: “Dan me se nihánj me nana̱ aꞌmii ꞌu̱nj si̱j nica̱j chi̱j yatiꞌ raꞌa rej nuva̱ꞌ ado̱nj. Ne̱ si̱j va̱j scaꞌnúj chi̱j nij agaꞌ oró míí ta̱j agaꞌ yaꞌan mej ado̱nj.

² A̱j neꞌén ꞌu̱nj da̱j ꞌyaj soj se vaa ꞌyaj uxrá soj se‑su̱u̱n ꞌu̱nj ne̱ nucua̱j ndoꞌo vaa nimán soj rihaan sayuun ado̱nj. Ne̱ a̱j neꞌenj se vaa naꞌvej uxrá rá soj ni̱ꞌyaj soj man nij síí chiꞌi̱i̱ maꞌ. Ne̱ xa̱ꞌ nij síí tihaꞌ yuꞌunj tuꞌva rmaꞌa̱n se vaa si̱j ata̱ suun caꞌa̱nj nata̱ꞌ snana̱ Jesucristó me nij soꞌ, tza̱j ne̱ a̱j nuchruj ra̱a̱ soj cheꞌé nij soꞌ, ne̱ a̱j xcaj soj cuentá se vaa né si̱j aꞌmii ya̱ me nij soꞌ a̱ maan ado̱nj.

³ Ne̱ nucua̱j ndoꞌo vaa nimán soj rihaan sayuun quiranꞌ soj cheꞌé se si̱j noco̱ꞌ manj me soj, ne̱ ne caꞌne̱ꞌ a̱ doj rá soj a̱ maꞌ.

⁴ Tza̱j ne̱ vaa ꞌo̱ cacunꞌ tumé soj rihanj se vaa asi̱j rque̱ doj me se caráj cochro̱j ndoꞌo soj manj, tza̱j ne̱ ya̱j me se do̱ꞌ do̱ꞌ caꞌneꞌ rá soj aráj cochro̱j soj manj ado̱nj.

⁵ ’Cheꞌé dan nanu̱j rá soj da̱j quiꞌyaj soj ga̱a ataa caꞌa̱nj yaníj soj rihanj, ne̱ ca̱nica̱j nimán soj, ne̱ quiꞌya̱j soj nda̱a vaa quiꞌyaj soj asino ya̱a̱n á. Sese se̱ canica̱j nimán soj, ne̱ cuchi̱ꞌ ꞌu̱nj rihaan soj, ne̱ caꞌne̱e̱ ꞌu̱nj se‑aga̱ꞌ soj agaꞌ ta̱j agaꞌ yaꞌan rej nicu̱nꞌ yoꞌ na̱nj ado̱nj.

⁶ Tza̱j ne̱ nihánj me se sa̱ꞌ ꞌyaj soj, se vaa nachriꞌ uxrá rá soj niꞌya̱j soj se vaa ꞌyaj nij síí nicolaíta, ne̱ veé da̱nj nachriꞌ rá ma̱ꞌanj niꞌya̱j ꞌu̱nj se vaa ꞌyaj nij soꞌ uún na̱nj ado̱nj.

⁷ Dan me se sese ta̱j yuꞌuj xréé soj, ne̱ no̱ xcúún soj cuno̱ soj nana̱ nihánj nana̱ taj xnaꞌanj Nimán Yaꞌanj rihaan nij xꞌneꞌ nij síí noco̱ꞌ manj ya̱nj ꞌo̱ ꞌo̱ chumanꞌ a. Dan me se rihaan síí ꞌyaj canaán rihaan nu̱ꞌ sayuun me se rque̱ ꞌu̱nj chruj ma̱n raa̱ chruun quiꞌya̱j ga̱a̱ iꞌna̱ꞌ yuvii̱ nu̱ꞌ cavii nu̱ꞌ caꞌanj ga̱ Yaꞌanj cha̱ soꞌ, ne̱ chruun yoꞌ roꞌ, nicunꞌ tanu̱u̱ rej sa̱ꞌ ndoꞌo rej rihaan maꞌa̱n Yaꞌanj ado̱nj.” Veé da̱nj síj nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Éfeso a ―taj soꞌ rihanj a.

Nana̱ caꞌa̱nj rihaan xꞌneꞌ nij síí noco̱ꞌ man Cristó ya̱nj chumanꞌ Esmirna a

⁸ Ga̱a ne̱ cataj uún soꞌ rihanj a: ―Nana̱ nihánj me nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man nij síí noco̱ꞌ manj ya̱nj chumanꞌ Esmirna a: “Dan me se nihánj me nana̱ aꞌmii ꞌu̱nj si̱j nicu̱nꞌ asi̱j rque̱ do̱ꞌ, si̱j canicu̱nꞌ nu̱ꞌ cavii nu̱ꞌ caꞌanj do̱ꞌ, ne̱ si̱j caviꞌ mej, tza̱j ne̱ cunuu iꞌna̱ꞌ ya̱ uún ꞌu̱nj ado̱nj.

⁹ Neꞌén ꞌu̱nj da̱j vaa sayuun ranꞌ nij soj si̱j ma̱n chumanꞌ Esmirna, ne̱ neꞌén ꞌu̱nj se vaa nique̱ ndoꞌo soj ado̱nj. Tza̱j ne̱ rihaan Yaꞌanj me se síí ruꞌvee me ya̱ soj ado̱nj. Ne̱ vaa nij síí tuꞌva rmaꞌa̱n taj se vaa yuvii̱ israelitá me nij soꞌ, tza̱j ne̱ né si̱j israelitá me ya̱ nij soꞌ maꞌ. Ma̱an xꞌneꞌ síí tucuꞌyón snana̱ Síí Chre̱e me nij soꞌ na̱nj á. Ne̱ neꞌén ꞌu̱nj se vaa aꞌmii nij soꞌ nana̱ nij cheꞌé soj ado̱nj.

¹⁰ ’Tza̱j ne̱ a̱ doj se̱ cuchuꞌviꞌ soj cheꞌé sayuun quira̱nꞌ soj maꞌ. Dan me se Síí Chre̱e roꞌ, caxri̱i̱ soꞌ tagaꞌ man taꞌa̱j soj, cheꞌé rej cuchuꞌvi̱ꞌ soj ne̱ ta̱náj soj tucuáán sa̱ꞌ ado̱nj. Ne̱ chi̱ꞌ güii quira̱nꞌ soj sayuun da̱nj chugua̱nj. Dan me se nda̱ꞌ se ticavi̱ꞌ nii man soj, tza̱j ne̱ ꞌo̱ canoco̱ꞌ soj manj, ne̱ vaa güii rque̱ ꞌu̱nj ꞌo̱ cachriin cu̱nuû raa̱ soj, cheꞌé se si̱j ga̱a̱ iꞌna̱ꞌ nu̱ꞌ cavii nu̱ꞌ caꞌanj ga̱ Yaꞌanj gu̱un soj na̱nj á.

¹¹ Dan me se sese ta̱j yuꞌuj xréé soj, ne̱ no̱ xcúún soj cuno̱ soj nana̱ nihánj nana̱ taj xnaꞌanj Nimán Yaꞌanj rihaan nij xꞌneꞌ nij síí noco̱ꞌ manj ya̱nj ꞌo̱ ꞌo̱ chumanꞌ a. Dan me se se̱ quiranꞌ síí quiꞌya̱j canaán yoꞌ sayuun asa̱ꞌ caviꞌ uún nij síí tumé cacunꞌ a̱ maꞌ.” Veé da̱nj síj nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Esmirna a ―taj uún soꞌ rihanj a.

Nana̱ caꞌa̱nj rihaan xꞌneꞌ nij síí noco̱ꞌ man Cristó ya̱nj chumanꞌ Pérgamo a

¹² Ga̱a ne̱ cataj uún soꞌ rihanj a: ―Nana̱ nihánj me nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Pérgamo a: “Dan me se nihánj me nana̱ aꞌmii ꞌu̱nj si̱j nica̱j neê espadá siha̱a̱ nu̱ꞌ niha̱ rihaan rihaan soj si̱j ya̱nj chumanꞌ Pérgamo a.

¹³ Neꞌén ꞌu̱nj rej ya̱nj nij soj, se vaa uun chij ndoꞌo Síí Chre̱e rej yoꞌ na̱nj á. Tza̱j ne̱ ꞌo̱ nocoꞌ soj manj, ne̱ ne ta̱náj xco̱ soj stucua̱nj ꞌu̱nj maꞌ. Dan me se vaa síí cuꞌna̱j Antipas síí ꞌo̱ nataꞌ rihaan yuvii̱ cheꞌé ꞌu̱nj, ne̱ nda̱ꞌ se ticaviꞌ nii man soꞌ rej ya̱nj soj rej ya̱nj maꞌa̱n Síí Chre̱e, tza̱j ne̱ ne caꞌne̱ꞌ rá soj ga̱ snana̱j maꞌ.

¹⁴ Tza̱j ne̱ vaa do̱j cacunꞌ tumé soj rihanj, se vaa nda̱a scaꞌnúj soj ꞌnij síí noco̱ꞌ stucua̱nj síí cuꞌna̱j Balaam a. Ne̱ tucuꞌyón Balaam rihaan síí cuꞌna̱j Balac se vaa caꞌne̱j soꞌ tucuáán chiꞌi̱i̱ nimán nij síí israelitá se vaa cha̱ nij síí israelitá rasu̱u̱n rqué nii rihaan nij yaꞌanj quiꞌyaj nij tuvi̱ꞌ Balac ne̱ quiꞌya̱j nij soꞌ cacunꞌ ga̱ chana̱ ado̱nj.

¹⁵ Ne̱ da̱nj na̱nj uún, ne̱ ma̱n taꞌa̱j nij síí nica̱j stucua̱nj nij síí nicolaíta scaꞌnúj soj uún na̱nj á. Dan me se nachríꞌ ꞌu̱nj niꞌya̱j ꞌu̱nj tucuáán yoꞌ ado̱nj.

¹⁶ ’Cheꞌé dan ca̱nica̱j nimán soj, ta̱náj soj chrej chiꞌi̱i̱ yoꞌ á. Se taj, ne̱ raꞌya̱nj cuchi̱ꞌ ꞌu̱nj rihaan soj, ne̱ ni̱caj ꞌu̱nj neê espadá avii tuꞌvaj cunu̱ꞌ ꞌu̱nj ga̱ nij soj ado̱nj.

¹⁷ Sese ta̱j yuꞌuj xréé soj, ne̱ no̱ xcúún soj cuno̱ soj nana̱ nihánj nana̱ taj xnaꞌanj Nimán Yaꞌanj rihaan nij xꞌneꞌ nij síí noco̱ꞌ manj ya̱nj ꞌo̱ ꞌo̱ chumanꞌ a. Rihaan síí ꞌyaj canaán roꞌ, rque̱ ꞌu̱nj se cuꞌna̱j maná se ꞌni̱j yuve̱ cha̱ soꞌ, ne̱ caxri̱i̱ ꞌu̱nj ꞌo̱ yahij catzi̱i̱ ston soꞌ, ne̱ quino̱ naca̱ ꞌo̱ se‑chuvi̱i ꞌo̱ soꞌ ni̱caj síí quiꞌyaj canaán, ne̱ dan me se taj a̱ ꞌó síí caꞌve̱e naya̱a̱ nana̱ yoꞌ a̱ maꞌ. Ma̱an se o̱rúnꞌ síí ni̱caj yahij catzi̱i̱ yoꞌ me síí queneꞌe̱n me taj yoꞌ na̱nj ado̱nj.” Veé da̱nj síj nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Pérgamo a ―taj soꞌ rihanj a.

Nana̱ caꞌa̱nj rihaan xꞌneꞌ nij síí noco̱ꞌ man Cristó ya̱nj chumanꞌ Tiatira a

¹⁸ Ga̱a ne̱ cataj uún soꞌ rihanj a: ―Ga̱a ne̱ cachro̱n so̱ꞌ nana̱ nihánj ne̱ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Tiatira a: “Dan me se nana̱ nihánj me nana̱ aꞌmii ꞌu̱nj Taꞌni̱j Yaꞌanj cuno̱ soj, ne̱ ꞌu̱nj roꞌ, ase vaa yaꞌan vaa rlij rihanj, ne̱ ase vaa agaꞌ bronce mare̱e vaa tacój a.

¹⁹ Neꞌén ꞌu̱nj da̱j ꞌyaj nij soj se vaa ꞌe̱e̱ rá soj tinúú soj ne̱ ꞌo̱ amán rá soj niꞌya̱j soj manj ne̱ racuíj soj man tinúú soj ne̱ ꞌo̱ nucua̱j vaa nimán soj rihaan sayuun a. Dan me se doj a̱ ꞌyaj soj suun sa̱ꞌ ya̱j ado̱nj. Ga̱a guun cheꞌe̱ soj canocoꞌ soj manj me se do̱j doj ꞌyaj soj suun sa̱ꞌ nda̱ꞌ rá se ꞌyaj soj ya̱j ado̱nj.

²⁰ Tza̱j ne̱ vaa do̱j cacunꞌ tumé soj rihanj se vaa aꞌvej rá soj ca̱yáán chana̱ cuꞌna̱j Jezabel ga̱ soj a. Ne̱ noꞌ me níí taj se vaa chana̱ nataꞌ snana̱ Yaꞌanj me noꞌ, ne̱ tucuꞌyón noꞌ man yuvii̱, ne̱ tihaꞌ yuꞌunj noꞌ man nij síí nu̱u̱ rihaan ma̱ꞌanj na̱nj á. Síj ga̱a ne̱ ꞌyaj nij soꞌ cacunꞌ ga̱ chana̱ ne̱ chá nij soꞌ rasu̱u̱n rqué nii rihaan yaꞌanj quiꞌyaj nii uún ado̱nj.

²¹ Ne̱ caꞌneꞌ raj cache̱n do̱j güii cheꞌé rej nuchra̱nꞌ nimán noꞌ ne̱ ta̱náj noꞌ cacunꞌ otoj ga̱ ꞌó snóꞌo né ni̱ca̱ noꞌ me, tza̱j ne̱ naꞌvej rá noꞌ maꞌ.

²² Cheꞌé dan nihánj me se cano̱ chiꞌii̱ nucua̱j man noꞌ qui̱ꞌyáj, ne̱ nij síí quiꞌyaj cacunꞌ ga̱ noꞌ roꞌ, quira̱nꞌ uxrá nij soꞌ sayuun qui̱ꞌyáj ado̱nj. Da̱nj quira̱nꞌ nij soꞌ sese se̱ canica̱j nimán nij soꞌ ne̱ se̱ tanáj xco̱ nij soꞌ se vaa ꞌyaj nij soꞌ ga̱ noꞌ na̱nj á.

²³ Ne̱ ꞌo̱ cavi̱ꞌ nij síí noco̱ꞌ snana̱ chana̱ yoꞌ, qui̱ꞌyáj, ga̱a ne̱ queneꞌe̱n nij xꞌneꞌ nij síí noco̱ꞌ manj ya̱nj ꞌo̱ ꞌo̱ chumanꞌ se vaa ꞌu̱nj me síí acaj ndoꞌo cuentá da̱j vaa raa̱ yuvii̱ do̱ꞌ, da̱j vaa nimán yuvii̱ do̱ꞌ, ne̱ na̱ruꞌvee ꞌu̱nj rihaan ꞌo̱ ꞌo̱ nij soj cheꞌé se vaa ꞌyaj ꞌo̱ ꞌo̱ nij soj chugua̱nj.

²⁴ ’Ne̱ nihánj me se caꞌmi̱i̱ ꞌu̱nj rihaan ꞌó nij soj si̱j ma̱n chumanꞌ Tiatira si̱j ne nocoꞌ tucuáán chiꞌi̱i̱ yoꞌ a. ꞌO̱ se tucuáán sca̱ꞌ yuve̱ ndoꞌo me tucuáán chiꞌi̱i̱ yoꞌ, rá maꞌa̱n nij soꞌ, tza̱j ne̱ stucua̱nj Síí Chre̱e me yoꞌ rihaan soj, ne̱ ne nari̱ꞌ soj tucuáán yoꞌ a̱ maꞌ. Dan me se taj cheꞌé cuta̱ꞌ ꞌu̱nj doj suun xráá soj a̱ maꞌ.

²⁵ Ma̱an se ꞌo̱ canoco̱ꞌ soj tucuáán nica̱j soj nda̱a se quisi̱j güii cuchi̱ꞌ ꞌu̱nj rihaan soj á.

²⁶ Ne̱ síí ꞌyaj canaán ꞌo̱ ꞌyaj nij suun caꞌnéꞌ ꞌu̱nj rihaan nda̱a se cuchi̱ꞌ ꞌu̱nj rihaan soj roꞌ, gu̱un chij soꞌ rihaan nij xꞌneꞌ yuvii̱ naꞌvej rá canoco̱ꞌ manj, qui̱ꞌyáj ado̱nj.

²⁷ Ne̱ ni̱caj soꞌ vará aga̱ꞌ, ne̱ gu̱un chij soꞌ rihaan nij soꞌ, ne̱ dan me se nda̱a rá se vaa ꞌyaj nii ga̱a uxraꞌ nii xruj roꞌ, da̱nj ga̱a̱ quiꞌya̱j síí gu̱un chij yoꞌ chugua̱nj.

²⁸ Dan me se ase vaa uun chij ma̱ꞌanj quiꞌyaj Réj Yaꞌanj roꞌ, da̱nj ga̱a̱ gu̱un chij soꞌ, ne̱ rque̱ ꞌu̱nj yatiꞌ xtaꞌngaa uriha̱nj rej nichrunꞌ rá ranga̱ꞌ rihaan soꞌ ado̱nj.

²⁹ Sese ta̱j yuꞌuj xréé soj, ne̱ no̱ xcúún soj cuno̱ soj nana̱ nihánj nana̱ taj xnaꞌanj Nimán Yaꞌanj rihaan nij xꞌneꞌ nij síí noco̱ꞌ manj ya̱nj ꞌo̱ ꞌo̱ chumanꞌ a.” Veé da̱nj síj nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Tiatira a ―taj soꞌ rihanj a.