Apocalipsis 19 - Triqui de San Juan Copala

¹ Veé dan, ga̱a ne̱ cunó ꞌu̱nj nana̱ caꞌmii nucua̱j ri̱i̱ uxrá yuvii̱ nicu̱nꞌ rej xta̱ꞌ, ne̱ cataj nij yuvii̱ a: Cara̱a̱ gue̱e̱ níꞌ rihaan Yaꞌanj á. Taꞌanj níꞌ roꞌ, soꞌ me síí tinanii man níꞌ rihaan sayuun, ne̱ cara̱a̱ cochro̱j níꞌ rihaan soꞌ do̱ꞌ, niꞌndaj ya̱ sa̱ꞌ veꞌé ga̱a̱ soꞌ do̱ꞌ, gu̱un chij ndoꞌo soꞌ do̱ꞌ ado̱nj.

² ꞌO̱ se nana̱ ya̱ nana̱ nica̱ ina̱nj me nu̱ꞌ nana̱ aꞌmii soꞌ ga̱a aꞌneꞌ soꞌ cacunꞌ cheꞌé yuvii̱ ado̱nj. ꞌO̱ se ya̱j me naruꞌvee Yaꞌanj rihaan nij yuvii̱ cheꞌé nu̱ꞌ cacunꞌ quiꞌyaj nij yuvii̱ rihaan Yaꞌanj a. Cheꞌé dan quiꞌyaj soꞌ sayuun man chumanꞌ noco̱o chumanꞌ guun ase vaa chana̱ niha̱ꞌ ndoꞌo rá ga̱ chii, cheꞌé se quiriꞌ nu̱ꞌ chumii̱, quiꞌyaj chumanꞌ noco̱o yoꞌ do̱ꞌ, cheꞌé nu̱ꞌ nij síí nu̱u̱ rihaan maꞌa̱n Yaꞌanj síí caviꞌ quiꞌyaj chumanꞌ noco̱o yoꞌ do̱ꞌ a, taj nij yuvii̱ yoꞌ a.

³ Ga̱a ne̱ cataj uún nij síí caꞌmii rej xta̱ꞌ yoꞌ a: ―Cara̱a̱ gue̱e̱ níꞌ rihaan Yaꞌanj á. Ne̱ nu̱ꞌ cavii nu̱ꞌ caꞌanj me se ꞌo̱ cavi̱i̱ yachruu̱ rej acaa chumanꞌ yoꞌ a ―taj uún nij soꞌ a.

⁴ Ga̱a ne̱ ico̱ caꞌa̱nj (24) nij síí uun chij do̱ꞌ, caꞌa̱nj nij xcuu do̱ꞌ, quinij ru̱j nda̱a canó rihaan rihaan yoꞌóó rihaan Yaꞌanj si̱j ta̱j rihaan chruun xlá sa̱ꞌ yoꞌ, ne̱ caráj gue̱e̱ nij soꞌ rihaan soꞌ, cataj nij soꞌ a: ―Veé da̱nj ga̱a̱ ya̱ ado̱nj. Cara̱a̱ gue̱e̱ níꞌ rihaan Yaꞌanj á ―taj nij soꞌ a.

Caꞌmii Juan cheꞌé chaꞌanj naraꞌa̱a Matzinj Leꞌe̱j a

⁵ Ga̱a ne̱ cunó ꞌu̱nj doj nana̱ cavii rej nicu̱nꞌ chruun xlá sa̱ꞌ, ne̱ cataj nana̱ yoꞌ a: Caꞌmi̱i̱ sa̱ꞌ ina̱nj soj rihaan Taꞌanj níꞌ á. Dan me se soj si̱j nu̱u̱ rihaan soꞌ si̱j aráj cochro̱j rihaan soꞌ roꞌ, taꞌa̱j soj me síí chéé maꞌa̱n, ne̱ taꞌa̱j soj me síí sa̱ꞌ ata̱ suun, ne̱ caꞌmi̱i̱ sa̱ꞌ ta̱ranꞌ soj cheꞌé soꞌ á, taj nana̱ cavii rej nicu̱nꞌ chruun xlá sa̱ꞌ yoꞌ a.

⁶ Ga̱a ne̱ cunó ꞌu̱nj doj nana̱ caꞌmii ri̱i̱ uxrá yuvii̱, ne̱ ase uun ráꞌ unóꞌ cayu̱j va̱j chráá xi̱j do̱ꞌ, ase uun ráꞌ unóꞌ aguáj ndoꞌo tuꞌvii do̱ꞌ, da̱nj guun raj ga̱a cunoj snana̱ nij soꞌ, ne̱ cataj nij soꞌ a: Cara̱a̱ gue̱e̱ níꞌ rihaan Yaꞌanj á. ꞌO̱ se Yaꞌanj Si̱j ꞌNi̱j Raꞌa man níꞌ Síí Uun Nucua̱j ꞌYaj Cunuda̱nj roꞌ, guun cheꞌe̱ soꞌ uun chij soꞌ ado̱nj.

⁷ Dan me se gu̱un niha̱ꞌ ya̱ uxrá rá nimán níꞌ, ne̱ caꞌmi̱i̱ sa̱ꞌ níꞌ cheꞌé soꞌ á. ꞌO̱ se nihánj me se anuû chaꞌanj naraꞌa̱a Matzinj Leꞌe̱j, ne̱ chana̱ xca̱j soꞌ man roꞌ, a̱j quisíj quiꞌyaj chuvi̱i noꞌ man noꞌ na̱raꞌa̱a noꞌ ga̱ soꞌ ado̱nj.

⁸ Ne̱ rqué nii yatzíj linó sa̱ꞌ ina̱nj cu̱nuû noꞌ, ne̱ nda̱a too chuguu̱n maꞌa̱n yatzéj yoꞌ, ne̱ naruvii sa̱ꞌ ndoꞌo yatzéj yoꞌ a. Da̱nj taj nij yuvii̱ yoꞌ a. Ne̱ yatzéj yoꞌ roꞌ, me nu̱ꞌ se sa̱ꞌ quiꞌyaj nij síí noco̱ꞌ man Yaꞌanj ado̱nj.

⁹ Ga̱a ne̱ cataj se‑mo̱zó Yaꞌanj rihanj a: ―Cachro̱n so̱ꞌ nana̱ nihánj rihaan yanj á: “Cavi̱i̱ sa̱ꞌ nij síí canacúún nii man cha̱ xtiꞌno̱ chaꞌanj na̱raꞌa̱a Matzinj Leꞌe̱j yoꞌ”, cachro̱n so̱ꞌ á ―taj soꞌ rihanj a. Ne̱ cataj uún soꞌ a: ―Nana̱ nihánj me nana̱ ya̱ caꞌmii maꞌa̱n Yaꞌanj ado̱nj ―taj soꞌ uún a.

¹⁰ Ga̱a ne̱ cayáán ru̱j ꞌu̱nj rihaan soꞌ cara̱a̱ gue̱e̱ ꞌu̱nj rihaan soꞌ a. Tza̱j ne̱ cataj soꞌ rihanj a: ―Se̱ quiꞌyáá so̱ꞌ da̱nj maꞌ. ꞌO̱ se ꞌu̱nj roꞌ, me síí nu̱u̱ rihaan Yaꞌanj ga̱ nij tinu̱j nij soj si̱j nataꞌ snana̱ Jesús rihaan yuvii̱ a. Rihaan o̱rúnꞌ Yaꞌanj cara̱a̱ gue̱e̱ so̱ꞌ á. ꞌO̱ se nu̱ꞌ nana̱ caꞌmii nij síí nataꞌ snana̱ Yaꞌanj roꞌ, me nana̱ rqué Nimán Yaꞌanj rihaan nij soꞌ, ne̱ snana̱ Jesús me nana̱ yoꞌ ado̱nj ―taj soꞌ rihanj a.

Caꞌmii Juan cheꞌé síí ta̱j xráá cuayó catzi̱i̱ a

¹¹ Ga̱a ne̱ queneꞌén ꞌu̱nj se vaa naxraꞌ rej xta̱ꞌ, ne̱ dan me se cavii ꞌo̱ cuayó catzi̱i̱, ne̱ síí ta̱j xráá cuayó yoꞌ roꞌ, me síí cuꞌna̱j Síí Nica̱ Nimán ne̱ Síí Aꞌmii Nana̱ Ya̱, ne̱ aꞌneꞌ nica̱ soꞌ cacunꞌ cheꞌé yuvii̱, ne̱ nica̱ unuꞌ soꞌ a.

¹² Ne̱ ase vaa yaꞌan chuguu̱n vaa rlij rihaan soꞌ, ne̱ queꞌe̱e̱ ndoꞌo cachriin nuû raa̱ soꞌ a. Ne̱ nó se‑chuvi̱i soꞌ xráá soꞌ, tza̱j ne̱ dan me se o̱rúnꞌ soꞌ me síí neꞌen da̱j cuꞌna̱j soꞌ a.

¹³ Ne̱ nu̱u̱ soꞌ yatzíj quixíj ndoꞌo ton man, ne̱ tucuꞌnáj nii Snana̱ Yaꞌanj man soꞌ a.

¹⁴ Ne̱ canocoꞌ nij tanuu ma̱n rej xta̱ꞌ xcó soꞌ, ne̱ táá nij soꞌ xráá cuayó catzi̱i̱, ne̱ nu̱u̱ ta̱ranꞌ nij soꞌ yatzíj linó sa̱ꞌ catzi̱i̱ naruvii sa̱ꞌ a.

¹⁵ Ne̱ ꞌni̱j tuꞌva soꞌ neê espadá siha̱a̱, ne̱ yoꞌ me se go̱ꞌ soꞌ xráá nij yuvii̱ ma̱n rihaan chumii̱, ne̱ nica̱j soꞌ vará aga̱ꞌ, ne̱ gu̱un chij soꞌ rihaan nij yuvii̱ a. Ne̱ maꞌa̱n soꞌ me síí caꞌne̱ꞌ cacunꞌ cheꞌé yuvii̱, ne̱ quiri̱i̱ soꞌ nu̱ꞌ cacunꞌ ata̱ yuvii̱, ne̱ nda̱ꞌ rá se vaa ruꞌmaan cheꞌé nii chruj uvá ne̱ rii nii nu̱ꞌ na uvá roꞌ, veé da̱nj ga̱a̱ gue̱e̱ quiꞌya̱j soꞌ, ne̱ cavi̱i̱ nu̱ꞌ cacunꞌ ata̱ yuvii̱, quiꞌya̱j soꞌ a. Dan me se racuíj soꞌ man Yaꞌanj Si̱j Uun Nucua̱j ꞌYaj Cunuda̱nj cheꞌé yan quiꞌya̱j Yaꞌanj sayuun man nij síí tumé cacunꞌ a.

¹⁶ Ne̱ rihaan saga̱nꞌ soꞌ ne̱ rihaan taꞌmaa̱n soꞌ roꞌ, nó se‑chuvi̱i soꞌ, ne̱ “Rey uun chij doj rihaan ꞌó da̱nj rey, ne̱ Síí nica̱j suun noco̱o doj rihaan ꞌó da̱nj síí nica̱j suun”, me se‑chuvi̱i soꞌ a.

¹⁷ Ga̱a ne̱ queneꞌén ꞌu̱nj se vaa nicunꞌ ꞌo̱ se‑mo̱zó Yaꞌanj tanu̱u̱ rihaan güii, ne̱ nucua̱j ndoꞌo caguáj soꞌ rihaan cunuda̱nj nij xtaa do̱ꞌ, yachrúú do̱ꞌ, cataj soꞌ a: ―Caꞌna̱ꞌ cunuda̱nj soj cunu̱u chre̱ꞌ soj, ne̱ quiꞌya̱j chuvi̱i Yaꞌanj cha̱ xtiꞌno̱ soj á.

¹⁸ Ne̱ dan me se nee̱ man síí nica̱j suun rey do̱ꞌ, nee̱ man tanuu uun chij doj do̱ꞌ, nee̱ man síí nucua̱j do̱ꞌ, nee̱ man cuayó do̱ꞌ, nee̱ man nij síí ta̱j xráá cuayó do̱ꞌ, nee̱ man mozó do̱ꞌ, nee̱ man síí ne uun mozó do̱ꞌ, nee̱ man síí chéé maꞌa̱n do̱ꞌ, nee̱ man síí sa̱ꞌ ata̱ suun do̱ꞌ, cha̱ soj á ―cataj se‑mo̱zó Yaꞌanj rihaan nij xoꞌ a.

¹⁹ Ga̱a ne̱ queneꞌén ꞌu̱nj man xcuu yuva̱a̱ yoꞌ ga̱ nij síí nica̱j suun rey uun chij rihaan chumii̱ ga̱ nij tanuu nu̱u̱ rihaan nij soꞌ, ne̱ dan me se a̱j nuu chre̱ꞌ nij soꞌ cunu̱ꞌ nij soꞌ ga̱ síí ta̱j xráá cuayó catzi̱i̱ do̱ꞌ, ga̱ nij tanuu nu̱u̱ rihaan soꞌ do̱ꞌ a.

²⁰ Tza̱j ne̱ taꞌaa nii man xcuu yuva̱a̱ yoꞌ do̱ꞌ, man síí nataꞌ nana̱ ne̱ síí quiꞌyaj suun noco̱o rihaan xcuu yuva̱a̱ do̱ꞌ a. Ne̱ suun noco̱o quiꞌyaj soꞌ me se veé da̱nj tihaꞌ yuꞌunj ndoꞌo soꞌ man nij síí caꞌneꞌ rá quino̱ se‑taꞌnga̱ꞌ xcuu yuva̱a̱ yoꞌ man do̱ꞌ, síí caráj gue̱e̱ man se tinanga̱ꞌ xcuu yuva̱a̱ cheꞌé suun noco̱o queneꞌen nij soꞌ do̱ꞌ a. Dan me se quiriꞌíj nii man ro̱j soꞌ rque laguaná rej acaa ndoꞌo yoꞌóó azufré, ne̱ veé da̱nj vaa iꞌna̱ꞌ ro̱j soꞌ a.

²¹ Ga̱a ne̱ neê espadá ꞌni̱j tuꞌva síí ta̱j xráá cuayó catzi̱i̱ yoꞌ roꞌ, caviꞌ ꞌó nij síí noco̱ꞌ xcó ro̱j soꞌ, quiꞌyaj neê espadá yoꞌ a. Dan me se chá nij xtaa do̱ꞌ, chá nij yachrúú do̱ꞌ, man nee̱ man nij síí caviꞌ yoꞌ nda̱a quisíj caraa maꞌa̱n rque nij xoꞌ a.