Apocalipsis 17 - Triqui de San Juan Copala

Caꞌmii Juan cheꞌé chana̱ niha̱ꞌ rá ga̱ chii a

¹ Ga̱a ne̱ dan me se caꞌnaꞌ ꞌo̱ nij chi̱j nij se‑mo̱zó Yaꞌanj nica̱j chi̱j nij coꞌoo, ga̱a ne̱ cataj soꞌ rihanj a: ―Caꞌna̱ꞌ so̱ꞌ nihánj, ne̱ ti̱haán ꞌu̱nj rihaan so̱ꞌ da̱j ga̱a̱ sayuun quira̱nꞌ chana̱ niha̱ꞌ ndoꞌo rá ga̱ chii, chana̱ ta̱j rej vaa queꞌe̱e̱ ndoꞌo rej nu̱u̱ na á.

² Dan me se quiꞌyaj chiꞌi̱i̱ nij síí nica̱j suun rey uun chij rihaan chumii̱ ga̱ noꞌ, ga̱a ne̱ ase ꞌyaj nij síí xno̱ roꞌ, da̱nj quiꞌyaj nij síí ma̱n rihaan chumii̱, cheꞌé se quiꞌyaj chiꞌi̱i̱ nij soꞌ ga̱ noꞌ chugua̱nj ―taj se‑mo̱zó Yaꞌanj rihanj a.

³ Ga̱a ne̱ caꞌanj nica̱j se‑mo̱zó Yaꞌanj mán ꞌu̱nj nda̱a rej tacaan, quiꞌyaj Nimán Yaꞌanj a. Ga̱a ne̱ queneꞌén ꞌu̱nj ꞌo̱ chana̱ ta̱j xráá xcuu yuva̱a̱ mare̱e, ne̱ nó ndoꞌo se‑chuvi̱i xoꞌ xráá xoꞌ, ne̱ nij nana̱ yoꞌ me se ina̱nj nana̱ qui̱j me nij yoꞌ, ne̱ vaa chi̱j raa̱ xoꞌ, ne̱ táá chi̱ꞌ cúú nij raa̱ xoꞌ a.

⁴ Ne̱ chana̱ yoꞌ roꞌ, nuû noꞌ yatzéj tintá ga̱ yatzéj mare̱e, ne̱ rásuun noꞌ agaꞌ oró míí do̱ꞌ, yahij chuguu̱n tuꞌve̱e̱ ndoꞌo do̱ꞌ, chruj perlá tuꞌve̱e̱ ndoꞌo do̱ꞌ a. Ne̱ nica̱j raꞌa noꞌ ꞌo̱ agaꞌ tazá agaꞌ oró míí, ne̱ nda̱a araa ayanj maꞌa̱n ina̱nj nij se chiꞌi̱i̱ rque agaꞌ oró yoꞌ, ne̱ dan me se ina̱nj se chiꞌi̱i̱ quiꞌyaj maꞌa̱n noꞌ ga̱ chii me se vaa araa ma̱n rque saga̱ꞌ noꞌ a.

⁵ Ne̱ caan rihaan noꞌ roꞌ, nó se‑chuvi̱i noꞌ, ne̱ nana̱ yuve̱ me se‑chuvi̱i noꞌ, ne̱ dan me se se-chuvi̱i noꞌ me: “Chumanꞌ noco̱o Babilonia, nii nij chana̱ niha̱ꞌ rá ga̱ chii, nii nu̱ꞌ se chiꞌi̱i̱ ma̱n rihaan chumii̱ a.”

⁶ Ga̱a ne̱ queneꞌén ꞌu̱nj se vaa xno̱ chana̱ yoꞌ, cheꞌé se a̱j coꞌo ndoꞌo noꞌ ton man nij síí noco̱ꞌ man Yaꞌanj do̱ꞌ, ton man nij síí caviꞌ cheꞌé se nataꞌ nij soꞌ cheꞌé Jesús do̱ꞌ a. Ne̱ caꞌanj ndoꞌo raj niꞌya̱j ꞌu̱nj man noꞌ a.

⁷ Ga̱a ne̱ xnáꞌanj se‑mo̱zó Yaꞌanj manj, cataj soꞌ a: ―Me cheꞌé caꞌanj rá so̱ꞌ ga̱. ꞌO̱ se cata̱j xnaꞌanj ꞌu̱nj rihaan so̱ꞌ nana̱ yuve̱ nana̱ cheꞌé chana̱ do̱ꞌ, cheꞌé xcuu yuva̱a̱ ata̱ man noꞌ xcuu ta̱j chi̱j cúú yave̱ do̱ꞌ, cheꞌé chi̱ꞌ cúú ta̱j raa̱ chi̱j cúú yave̱ xoꞌ do̱ꞌ a.

⁸ Xcuu yuva̱a̱ queneꞌén so̱ꞌ roꞌ, me síí cayáán asi̱j rque̱ doj, tza̱j ne̱ taj va̱j soꞌ rihaan chumii̱ cuano̱ maꞌ. Ne̱ rej rihaan níꞌ me se vaa cavi̱i̱ uún soꞌ yuꞌuj cunu̱u̱ ndoꞌo, ga̱a ne̱ caꞌa̱nj soꞌ rej quiri̱ꞌ nu̱ꞌ soꞌ ado̱nj. Da̱nj na̱nj uún, ne̱ vaa nij síí ma̱n rihaan chumii̱ síí taj vaj se‑chuvi̱i nó rihaan yanj no̱ se‑chuvi̱i nij síí ga̱a̱ iꞌna̱ꞌ nu̱ꞌ cavii nu̱ꞌ caꞌanj asi̱j ataa quiꞌya̱j Yaꞌanj chumii̱, ne̱ caꞌa̱nj rá nij soꞌ ni̱ꞌyaj nij soꞌ xcuu yuva̱a̱ yoꞌ, cheꞌé se queneꞌe̱n nij soꞌ se vaa asi̱j rque̱ doj cayáán soꞌ, ne̱ taj va̱j soꞌ cuano̱ maꞌ. Ne̱ rej rihaan níꞌ me se caꞌna̱ꞌ uún soꞌ ado̱nj.

⁹ ’Ne̱ nihánj me xca̱j síí avii raa̱ cuentá a. Dan me se chi̱j nij raa̱ xcuu yuva̱a̱ yoꞌ roꞌ, me chi̱j tacaan, ne̱ ya̱nj chana̱ yoꞌ xráá nij tacaan yoꞌ a. Ne̱ chi̱j síí nica̱j suun rey me uún chi̱j nij raa̱ xcuu yuva̱a̱ yoꞌ a.

¹⁰ Dan me se ꞌu̱nꞌ nij soꞌ roꞌ, a̱j quiriꞌ ne̱ a̱j navij cachén nij soꞌ suun a. Ne̱ ꞌó soꞌ roꞌ, ne cuano̱, ne̱ ataa quisi̱j ꞌó soꞌ uún, ne̱ asa̱ꞌ caꞌnaꞌ ꞌó soꞌ, ne̱ do̱j ca̱yáán soꞌ rihaan suun na̱nj á.

¹¹ Ne̱ maꞌa̱n xcuu yuva̱a̱ yoꞌ me se síí cayáán asi̱j rque̱ me soꞌ, ne̱ taj va̱j soꞌ yáán cuano̱ maꞌ. Ne̱ síí nica̱j suun rey tu̱nj me soꞌ, tza̱j ne̱ ꞌo̱ tuviꞌ ꞌó chi̱j nij síí nica̱j suun rey me uún soꞌ, ne̱ cavi̱i̱ soꞌ, ne̱ quiri̱ꞌ nu̱ꞌ soꞌ na̱nj ado̱nj.

¹² ’Ne̱ chi̱ꞌ nij cúú ta̱j nij raa̱ xcuu yuva̱a̱ roꞌ, me chi̱ꞌ nij síí nica̱j suun rey uún a. Dan me se ataa ca̱yáán nij soꞌ quiꞌya̱j nij soꞌ suun a. Tza̱j ne̱ asa̱ꞌ quiꞌyaj nij soꞌ suun rey me se o̱rúnꞌ orá nii gu̱un nij soꞌ síí nica̱j suun rey ne̱ gu̱un chij nij soꞌ ga̱ maꞌa̱n xcuu yuva̱a̱ yoꞌ na̱nj á.

¹³ Dan me se ꞌo̱ cuya̱a̱n ga̱a̱ rá ta̱ranꞌ nij soꞌ, ne̱ nayo̱n xcuu yuva̱a̱ rihaan nij soꞌ gu̱un chij maꞌa̱n xcuu yuva̱a̱, quiꞌya̱j maꞌa̱n nij soꞌ ado̱nj.

¹⁴ Ga̱a ne̱ cunu̱ꞌ ta̱ranꞌ nij soꞌ ga̱ Matzinj Leꞌe̱j, tza̱j ne̱ quiꞌya̱j canaán doj Matzinj Leꞌe̱j rihaan nij soꞌ ado̱nj. ꞌO̱ se Matzinj Leꞌe̱j roꞌ, me síí nica̱j suun noco̱o doj rihaan ꞌó da̱nj nij síí nica̱j suun, ne̱ rey uun chij doj rihaan ꞌó da̱nj nij rey me uún soꞌ ado̱nj. Ne̱ nij tuviꞌ soꞌ roꞌ, me nij síí canacúún soꞌ canoco̱ꞌ man soꞌ, ne̱ dan me se a̱j narii soꞌ man nij soꞌ, ne̱ ꞌo̱ amán rá nij soꞌ niꞌya̱j nij soꞌ man soꞌ na̱nj ado̱nj ―taj se‑mo̱zó Yaꞌanj rihanj a.

¹⁵ Ga̱a ne̱ cataj uún soꞌ a: ―Nij rej nu̱u̱ na queneꞌén so̱ꞌ rej ya̱nj chana̱ niha̱ꞌ rá ga̱ chii roꞌ, me nij xꞌneꞌ yuvii̱ ino̱ vaa stucua̱nj do̱ꞌ, nij xꞌneꞌ ri̱i̱ uxrá yuvii̱ do̱ꞌ, yuvii̱ ma̱n nij yoꞌóó noco̱o do̱ꞌ, nij xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ a.

¹⁶ Ne̱ xcuu yuva̱a̱ yoꞌ do̱ꞌ, chi̱ꞌ nij cúú ta̱j raa̱ xcuu yuva̱a̱ do̱ꞌ, nachri̱ꞌ ndoꞌo nij soꞌ ni̱ꞌyaj nij soꞌ man chana̱ niha̱ꞌ rá ga̱ chii yoꞌ a. Ne̱ quiri̱ꞌ nu̱ꞌ noꞌ, quiꞌya̱j nij soꞌ, ne̱ cánj u̱u̱n ga̱a̱ noꞌ, quiꞌya̱j nij soꞌ, ne̱ cha̱ nij soꞌ man noꞌ, ne̱ caca̱a̱ nu̱ꞌ noꞌ, quiꞌya̱j nij soꞌ na̱nj á.

¹⁷ ꞌO̱ se maꞌa̱n Yaꞌanj quiꞌyaj guun nimán nij soꞌ quiꞌya̱j nij soꞌ nda̱a vaa me rá maꞌa̱n soꞌ quiꞌya̱j nij soꞌ, ne̱ cheꞌé dan ꞌo̱ vaa rá ta̱ranꞌ nij soꞌ, ne̱ nayón xcuu yuva̱a̱ rihaan nij soꞌ guun chij soꞌ, quiꞌyaj nij soꞌ, ne̱ veé da̱nj gu̱un chij ya̱ soꞌ nda̱a se quisi̱j ya̱ nu̱ꞌ snana̱ Yaꞌanj ado̱nj.

¹⁸ Ne̱ maꞌa̱n chana̱ queneꞌén so̱ꞌ roꞌ, noꞌ me chumanꞌ noco̱o ꞌni̱j raꞌa man nij síí nica̱j suun rey uun chij rihaan chumii̱ a ―taj se‑mo̱zó Yaꞌanj rihanj a.