Apocalipsis 16 - Triqui de San Juan Copala

Caꞌmii Juan cheꞌé nij sayuun nu̱u̱ rque coꞌoo nica̱j chi̱j nij se‑mo̱zó Yaꞌanj a

¹ Ga̱a ne̱ cunó ꞌu̱nj se vaa nucua̱j caꞌmii ꞌo̱ síí ya̱nj rá nuvií noco̱o yoꞌ rihaan chi̱j nij se‑mo̱zó Yaꞌanj, cataj soꞌ a: ―Cavi̱i̱ nij soj, tucuayu̱u soj se nu̱u̱ rque se‑coꞌo̱o soj rihaan chumii̱, cheꞌé se uyanj rá Yaꞌanj niꞌya̱j Yaꞌanj man nij síí ma̱n rihaan chumii̱ á ―taj síí ya̱nj rá nuvií noco̱o yoꞌ a.

² Ga̱a ne̱ guun ya̱a̱n ꞌo̱ se‑mo̱zó Yaꞌanj, cavii soꞌ caꞌanj soꞌ, ne̱ tucuayuu soꞌ se nu̱u̱ rque se‑coꞌo̱o soꞌ rihaan chumii̱ a. Ga̱a ne̱ dan me se canó ndoꞌo luj riꞌyuj chiꞌi̱i̱ man nij síí no̱ se‑taꞌnga̱ꞌ xcuu yuva̱a̱ síí aráj gue̱e̱ rihaan se tinanga̱ꞌ soꞌ a.

³ Ga̱a ne̱ se‑mo̱zó Yaꞌanj mozó vi̱j roꞌ, tucuayuu soꞌ se ma̱n rque se‑coꞌo̱o soꞌ rihaan na yaꞌa̱nj, ne̱ ase vaa ton man xnangá roꞌ, da̱nj vaa nuu nu̱ꞌ na yaꞌa̱nj a. Ga̱a ne̱ cunuda̱nj nij xcuu do̱ꞌ, xcuaj do̱ꞌ, ma̱n rque na yaꞌa̱nj caviꞌ a.

⁴ Ga̱a ne̱ se‑mo̱zó Yaꞌanj mozó vaꞌnu̱j roꞌ, tucuayuu soꞌ se ma̱n rque se‑coꞌo̱o soꞌ rihaan nij chráá do̱ꞌ, rihaan nij rej avii na do̱ꞌ a. Ga̱a ne̱ guun ton man nu̱ꞌ nij na yoꞌ a.

⁵ Ga̱a ne̱ cunó ꞌu̱nj caꞌmii se‑mo̱zó Yaꞌanj síí tumé na, se vaa cataj soꞌ a: ―Nica̱ uxrá vaa rá so̱ꞌ, Señor. Si̱j nicu̱nꞌ ya̱j, ne̱ si̱j nicu̱nꞌ asi̱j naá, ne̱ Si̱j Sa̱ꞌ Ina̱nj mé so̱ꞌ á. ꞌO̱ se ma̱ꞌán so̱ꞌ me síí cataj xnaꞌanj se vaa gu̱un nu̱ꞌ nij sayuun nihánj na̱nj ado̱nj.

⁶ ꞌO̱ se nij síí ma̱n rihaan chumii̱ roꞌ, tucuayuu nij soꞌ ton man nij síí noco̱ꞌ mán so̱ꞌ do̱ꞌ, man nij síí nataꞌ snana̱ so̱ꞌ do̱ꞌ, rihaan yoꞌóó, ne̱ nihánj me se rqué so̱ꞌ ton rihaan nij soꞌ coꞌo̱ maꞌa̱n nij soꞌ ya̱j ado̱nj. Dan me se ya̱j me nayo̱n ya̱ cuentá nda̱a vaa quiꞌyaj nij soꞌ ga̱a naá na̱nj á ―taj se‑mo̱zó Yaꞌanj síí tumé na a.

⁷ Ga̱a ne̱ cunó ꞌu̱nj se vaa caꞌmii ꞌo̱ síí nicu̱nꞌ nichru̱nꞌ rihaan mesá altar, ne̱ cataj soꞌ a: ―Veé da̱nj vaa ya̱, Yaꞌanj Si̱j ꞌNi̱j Raꞌa man núj, Síí Uun Nucua̱j ꞌYaj Cunuda̱nj a. Nana̱ ya̱ ne̱ nana̱ nica̱ me nu̱ꞌ nana̱ taj xnaꞌanj so̱ꞌ ga̱a aꞌnéꞌ so̱ꞌ cacunꞌ cheꞌé nij yuvii̱ yoꞌ ado̱nj ―taj soꞌ uún a.

⁸ Ga̱a ne̱ se‑mo̱zó Yaꞌanj mozó caꞌa̱nj roꞌ, tucuayuu soꞌ se ma̱n rque se‑coꞌo̱o soꞌ rihaan güii a. Ga̱a ne̱ guun nucua̱j güii cacaa nij yuvii̱ quiꞌyaj güii a.

⁹ Ga̱a ne̱ cacaa ndoꞌo nij yuvii̱, ne̱ nda̱ꞌ se Yaꞌanj me síí uun chij rihaan nu̱ꞌ nij sayuun yoꞌ, tza̱j ne̱ caꞌmii nij yuvii̱ nana̱ qui̱j niꞌya̱j nij yuvii̱ man Yaꞌanj, ne̱ ne ca̱nica̱j nimán nij yuvii̱ caꞌmi̱i̱ sa̱ꞌ nij yuvii̱ cheꞌé Yaꞌanj a̱ maꞌ.

¹⁰ Ga̱a ne̱ se‑mo̱zó Yaꞌanj mozó ꞌu̱nꞌ roꞌ, tucuayuu soꞌ se ma̱n rque se‑coꞌo̱o soꞌ rihaan chruun xlá sa̱ꞌ rej ta̱j xcuu yuva̱a̱ a. Ga̱a ne̱ yu̱u̱n cheꞌe̱ cunuu rmi̱ꞌ nu̱ꞌ rej rii taꞌngaꞌ soꞌ rihaan, ne̱ dan me se queꞌee̱ ndoꞌo man nij síí uun chij soꞌ rihaan, ne̱ nda̱a chá ru̱j maꞌa̱n nij soꞌ tuꞌva nij soꞌ cheꞌé se aꞌngaj man nij soꞌ a.

¹¹ Ga̱a ne̱ caꞌmii nij soꞌ nana̱ qui̱j cheꞌé Yaꞌanj, cheꞌé se queꞌee̱ ndoꞌo man nij soꞌ ne̱ canó luj chiꞌi̱i̱ riꞌyuj man nij soꞌ a. Tza̱j ne̱ ne ca̱nica̱j nimán nij soꞌ ta̱náj nij soꞌ se chiꞌi̱i̱ quiꞌyaj nij soꞌ a̱ maꞌ.

¹² Ga̱a ne̱ se‑mo̱zó Yaꞌanj mozó vata̱nꞌ roꞌ, tucuayuu soꞌ se ma̱n rque se‑coꞌo̱o soꞌ rihaan chráá xi̱j cuꞌna̱j chráá Éufrates, ga̱a ne̱ canacoo̱ nu̱ꞌ na ma̱n rque chráá yoꞌ, quiꞌyaj soꞌ a. Ne̱ dan me se guun chráá yoꞌ chrej cache̱n nij síí nica̱j suun rey cavii rej síj güii caꞌna̱ꞌ nij soꞌ a.

¹³ Ga̱a ne̱ queneꞌén ꞌu̱nj se vaa curiha̱nj vaꞌnu̱j nana̱ chiꞌi̱i̱ tuꞌva xcuáá tuꞌvi̱i do̱ꞌ, tuꞌva xcuu yuva̱a̱ do̱ꞌ, tuꞌva síí nataꞌ nana̱ ne̱ do̱ꞌ, ne̱ ase vaa riqui̱j vaa vaꞌnu̱j nij nana̱ chiꞌi̱i̱ yoꞌ a.

¹⁴ ꞌO̱ se nana̱ chre̱e me nij soꞌ, ne̱ va̱j nij soꞌ ꞌyaj nij soꞌ suun noco̱o neꞌen nij yuvii̱, ne̱ dan me se cavii nij soꞌ caꞌanj nij soꞌ rej ya̱nj nij síí nica̱j suun rey uun chij rihaan nu̱ꞌ nij yuvii̱ ma̱n rihaan chumii̱ a. Ga̱a ne̱ cunu̱u chre̱ꞌ cunuda̱nj nij síí nica̱j suun rey, quiꞌya̱j nij nana̱ chre̱e, cheꞌé rej cunu̱ꞌ nij síí nica̱j suun rey yoꞌ ga̱ Yaꞌanj asa̱ꞌ quisíj güii noco̱o güii quira̱nꞌ nij síí ta̱j riꞌyunj man Yaꞌanj sayuun quiꞌya̱j Yaꞌanj Si̱j Uun Nucua̱j ꞌYaj Cunuda̱nj a.

¹⁵ Ne̱ nihánj me snana̱ Síí ꞌNi̱j Raꞌa man níꞌ a: “Dan me se ase vaa ꞌnaꞌ yuve̱ síí itu̱u̱ roꞌ, da̱nj ga̱a̱ cuchi̱ꞌ ꞌu̱nj rihaan soj ado̱nj. Ne̱ cavi̱i̱ sa̱ꞌ síí ne otoj, ne̱ niꞌya̱j ranga̱ꞌ nij soꞌ, ne̱ tumé sa̱ꞌ nij soꞌ saga̱nꞌ nij soꞌ yatzéj catzi̱i̱ ado̱nj. Dan me se se̱ gaa ca̱nj nij soꞌ cache̱e̱ nij soꞌ, ne̱ se̱ cunó chrej naꞌa̱j rihaan nij soꞌ ni̱ꞌyaj yuvii̱ man nij soꞌ maꞌ.” Da̱nj taj Síí ꞌNi̱j Raꞌa man níꞌ niꞌya̱j soꞌ man nij síí ne tumé cacunꞌ a.

¹⁶ Ga̱a ne̱ dan me se cunuu chre̱ꞌ nij síí nica̱j suun rey yoꞌ rej cuꞌna̱j Armagedón xnaꞌánj hebreo, quiꞌyaj vaꞌnu̱j nij nana̱ chre̱e yoꞌ a.

¹⁷ Ga̱a ne̱ se‑mo̱zó Yaꞌanj mozó chi̱j me se tucuayuu soꞌ se ma̱n rque se‑coꞌo̱o soꞌ rihaan nana̱ a. Ga̱a ne̱ nucua̱j caꞌmii síí ta̱j chruun xlá sa̱ꞌ nicu̱nꞌ rá nuvií noco̱o, cataj soꞌ a: ―Quisíj guun yoꞌ na̱nj á ―taj soꞌ a.

¹⁸ Ga̱a ne̱ quiraa̱n, ne̱ cari̱i̱n ndoꞌo, ne̱ caguáj ndoꞌo tuꞌvii, ne̱ cachén uxrá yuún yuva̱a̱, ne̱ nucua̱j doj yuún yoꞌ rihaan nu̱ꞌ nij yuún cachén rihaan chumii̱ nihánj asi̱j guun cheꞌe̱ yuvii̱ cayáán yuvii̱ rihaan chumii̱ nihánj a.

¹⁹ Dan me se quixraꞌ taꞌa̱j chumanꞌ xi̱j noco̱o yoꞌ, ne̱ cunuu vaꞌnu̱j taꞌa̱j chumanꞌ xi̱j yoꞌ, ne̱ canee ꞌó nij chumanꞌ na̱j rihaan chumii̱, quiꞌyaj yuún a. Dan me se nanuj rá Yaꞌanj chumanꞌ noco̱o cuꞌna̱j Babilonia, ne̱ rqué soꞌ ꞌo̱ copá nu̱u̱ na vinó coꞌo̱ chumanꞌ yoꞌ a. Ne̱ na vinó yoꞌ roꞌ, me sayuun quira̱nꞌ chumanꞌ yoꞌ, cheꞌé se uyanj rá Yaꞌanj niꞌya̱j Yaꞌanj man chumanꞌ yoꞌ a.

²⁰ Ga̱a ne̱ caꞌanj niꞌya̱ cunuda̱nj nij yoꞌóó ta̱j rihaan na yaꞌa̱nj do̱ꞌ, canee cunuda̱nj nij quij xca̱a̱n do̱ꞌ, ne̱ ne curuvi̱ꞌ a̱ ꞌó nij quij a̱ maꞌ.

²¹ Ne̱ camanꞌ ndoꞌo maa̱n yahi̱j xráá nij yuvii̱, ne̱ vi̱j chiha̱a̱ (40) kiló ꞌe̱e̱ ꞌo̱ ꞌo̱ chraan yuꞌveꞌ cayuu xráá nij yuvii̱ a. Ga̱a ne̱ guun cheꞌe̱ nij soꞌ caꞌmii qui̱j nij soꞌ niꞌya̱j nij soꞌ man Yaꞌanj cheꞌé maa̱n yahi̱j cayuu xráá nij soꞌ quiꞌyaj Yaꞌanj a. ꞌO̱ se sayu̱u̱n noco̱o uxrá vaa sayuun quiranꞌ nij soꞌ na̱nj ado̱nj.