Apocalipsis 14 - Triqui de San Juan Copala

Cachráá cientó táá vi̱j chiha̱a̱ caꞌa̱nj míj (144,000) nij síí vaa sa̱ꞌ rihaan Yaꞌanj a

¹ Ga̱a ne̱ niꞌya̱j ꞌu̱nj, ne̱ dan me se nicunꞌ Matzinj Leꞌe̱j yoꞌ raa̱ quij cuꞌna̱j Sion, ne̱ nicunꞌ ꞌo̱ cientó táá vi̱j chiha̱a̱ caꞌa̱nj míj (144,000) nij soꞌ ga̱ xoꞌ, ne̱ no̱ se‑chuvi̱i Matzinj Leꞌe̱j do̱ꞌ, se‑chuvi̱i Rej Matzinj Leꞌe̱j do̱ꞌ, caan rihaan nij soꞌ a.

² Ga̱a ne̱ cunó ꞌu̱nj se vaa caꞌmii nana̱ cavii rej xta̱ꞌ, ne̱ ase vaa uun ayu̱j va̱j chráá xi̱j do̱ꞌ, ase vaa uun aguáj ndoꞌo tuꞌvii do̱ꞌ, da̱nj vaa nana̱ yoꞌ, ne̱ ase vaa chraꞌ achráá nii yaꞌánj arpá vaa nana̱ yoꞌ a.

³ Ne̱ achráá nij soꞌ chraꞌ naca̱ ina̱nj rihaan síí ta̱j chruun xlá sa̱ꞌ yoꞌ do̱ꞌ, rihaan caꞌa̱nj nij xcuu nicu̱nꞌ nu̱ꞌ anica̱j chruun xlá sa̱ꞌ do̱ꞌ, rihaan nij síí uun chij do̱ꞌ a. Ne̱ taj va̱j a̱ ꞌó nij síí caꞌve̱e nari̱ꞌ cachra̱a̱ chraꞌ yoꞌ maꞌ. Ma̱an se o̱rúnꞌ cientó táá vi̱j chiha̱a̱ caꞌa̱nj míj nij síí vaa sa̱ꞌ yoꞌ roꞌ, me nij síí guun nucua̱j nariꞌ chraꞌ yoꞌ na̱nj ado̱nj. Nij soꞌ roꞌ, me nij síí narii Yaꞌanj rihaan chumii̱, ne̱ nij soꞌ me síí tinanii Matzinj Leꞌe̱j man rihaan sayuun ga̱a caviꞌ soꞌ a.

⁴ Ne̱ ne quiꞌya̱j nij soꞌ cacunꞌ ga̱ chana̱ rihaan Yaꞌanj maꞌ. ꞌO̱ se síí vaa sa̱ꞌ ina̱nj me ta̱ranꞌ nij soꞌ na̱nj ado̱nj. Ne̱ síí canocoꞌ xcó Matzinj Leꞌe̱j me rej maꞌa̱n va̱j soꞌ me uún nij soꞌ a. Ne̱ nij soꞌ me nij síí táá ya̱a̱n rihaan ta̱ranꞌ ꞌó nij síí ma̱n rihaan chumii̱ síí cunuu sa̱ꞌ rihaan Yaꞌanj do̱ꞌ, rihaan Matzinj Leꞌe̱j do̱ꞌ, ga̱a caviꞌ Matzinj Leꞌe̱j yoꞌ a.

⁵ Ne̱ dan me se taj va̱j a̱ doj nana̱ ne̱ ne caꞌmi̱i̱ nij soꞌ maꞌ. ꞌO̱ se si̱j vaa sa̱ꞌ ina̱nj me nij soꞌ na̱nj ado̱nj.

Nana̱ caꞌmii vaꞌnu̱j nij se‑mo̱zó Yaꞌanj a

⁶ Ga̱a ne̱ queneꞌén ꞌu̱nj ꞌó se‑mo̱zó Yaꞌanj va̱j tanu̱u̱ rihaan riscaꞌ xta̱ꞌ, ne̱ nica̱j soꞌ snana̱ Yaꞌanj nana̱ sa̱ꞌ se vaa ꞌo̱ ga̱a̱ nu̱ꞌ cavii nu̱ꞌ caꞌanj nata̱ꞌ soꞌ rihaan nij yuvii̱ man rihaan chumii̱ a. Caꞌanj nata̱ꞌ soꞌ rihaan yuvii̱ ma̱n da̱j a̱ yoꞌóó noco̱o do̱ꞌ, rihaan da̱j a̱ xꞌneꞌ yuvii̱ ino̱ vaa stucua̱nj do̱ꞌ, rihaan da̱j a̱ xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, rihaan yuvii̱ ma̱n da̱j a̱ chumanꞌ do̱ꞌ a.

⁷ Ga̱a ne̱ dan me se nucua̱j ndoꞌo caꞌmii soꞌ, cataj soꞌ a: ―Cara̱a̱ cochro̱j uxrá nij soj rihaan Yaꞌanj, ne̱ veꞌé caꞌmi̱i̱ soj cheꞌé soꞌ á. ꞌO̱ se a̱j quisíj orá caꞌne̱ꞌ soꞌ cacunꞌ cheꞌé yuvii̱ na̱nj ado̱nj. Dan me se cara̱a̱ gue̱e̱ soj rihaan soꞌ, cheꞌé se soꞌ me síí quiꞌyaj rej xta̱ꞌ do̱ꞌ, yoꞌóó do̱ꞌ, na yaꞌa̱nj do̱ꞌ, rej avii na do̱ꞌ a ―taj se‑mo̱zó Yaꞌanj yoꞌ cunoj a.

⁸ Ga̱a ne̱ canocoꞌ ꞌó se‑mo̱zó Yaꞌanj xcó tuviꞌ soꞌ, ne̱ cataj soꞌ a: ―A̱j quiriꞌ nu̱ꞌ chumanꞌ noco̱o chumanꞌ cuꞌna̱j Babilonia, cheꞌé se quiꞌyaj ndoꞌo nij síí ma̱n rihaan chumii̱ cacunꞌ chiꞌi̱i̱, quiꞌyaj chumanꞌ yoꞌ, ne̱ nihánj me se quiꞌya̱j Yaꞌanj sayuun man nij soꞌ cheꞌé cacunꞌ chiꞌi̱i̱ quiꞌyaj nij soꞌ chugua̱nj ―taj ꞌó se‑mo̱zó Yaꞌanj yoꞌ a.

⁹ Ga̱a ne̱ canocoꞌ se‑mo̱zó Yaꞌanj mozó vaꞌnu̱j rej xco̱ ro̱j tuviꞌ soꞌ, ne̱ nucua̱j ndoꞌo caꞌmii soꞌ, cataj soꞌ a: ―Sese cara̱a̱ gue̱e̱ ꞌo̱ soꞌ rihaan xcuu yuva̱a̱ yoꞌ do̱ꞌ, rihaan se tinanga̱ꞌ xcuu yuva̱a̱ yoꞌ do̱ꞌ, ne̱ sese caꞌve̱j rá ꞌo̱ soꞌ cata̱ꞌ taꞌngaꞌ caan rihaan soꞌ do̱ꞌ, raꞌa soꞌ do̱ꞌ,

¹⁰ ne̱ ya̱ coꞌo̱ soꞌ na vinó sayuun nucua̱j caraa Yaꞌanj rque tazá, ne̱ na vinó yoꞌ roꞌ, me sayuun quiꞌya̱j Yaꞌanj man soꞌ asa̱ꞌ cuyanj rá Yaꞌanj ga̱ soꞌ, ne̱ dan me se caca̱a̱ soꞌ rihaan yaꞌan do̱ꞌ, rihaan yoꞌóó azufré acaa do̱ꞌ, ni̱ꞌyaj nij se‑mo̱zó Yaꞌanj mozó gue̱e̱ do̱ꞌ, ni̱ꞌyaj Matzinj Leꞌe̱j do̱ꞌ a.

¹¹ Ne̱ dan me se nu̱ꞌ cavii nu̱ꞌ caꞌanj cavi̱i̱ yachruu̱ rej quira̱nꞌ nij soꞌ sayuun, ne̱ ꞌo̱ da̱nj quira̱nꞌ nij soꞌ nuvi̱i niga̱nꞌ na̱nj ado̱nj. Da̱nj quira̱nꞌ nij síí aráj gue̱e̱ rihaan xcuu yuva̱a̱ yoꞌ do̱ꞌ, rihaan se tinanga̱ꞌ xcuu yuva̱a̱ yoꞌ do̱ꞌ, síí caꞌvej rá cataꞌ taꞌngaꞌ se‑chuvi̱i xcuu yoꞌ do̱ꞌ a ―taj se‑mo̱zó Yaꞌanj mozó vaꞌnu̱j yoꞌ a.

¹² Ne̱ nihánj me rej xca̱j níꞌ cuentá cheꞌé nij síí noco̱ꞌ man Yaꞌanj, se vaa ꞌo̱ vaa nucua̱j nimán nij soꞌ rihaan sayuun ado̱nj. ꞌO̱ se nij soꞌ me síí ꞌo̱ uno nij suun caꞌneꞌ Yaꞌanj rihaan níꞌ, ne̱ ꞌo̱ amán rá nij soꞌ niꞌya̱j nij soꞌ Jesús a.

¹³ Ga̱a ne̱ cunó ꞌu̱nj ꞌó nana̱ cavii rej xta̱ꞌ, ne̱ nana̱ yoꞌ cataj rihanj a: ―Cachro̱n so̱ꞌ nana̱ nihánj rihaan yanj á. Cachro̱n so̱ꞌ se vaa nij síí noco̱ꞌ man Síí ꞌNi̱j Raꞌa man soj me se sese cavi̱ꞌ nij soꞌ rej rihaan ya̱j, ne̱ vaa cheꞌé gu̱un niha̱ꞌ rá nij soꞌ ado̱nj. ꞌO̱ se cavi̱i̱ sa̱ꞌ nij soꞌ na̱nj á. Ne̱ Nimán Yaꞌanj taj se vaa caꞌne̱ꞌ rá nij soꞌ ga̱ suun ꞌyaj nij soꞌ, ne̱ nara̱a̱n rá nij soꞌ a. ꞌO̱ se yu̱u̱n cheꞌe̱ cavi̱i̱ sa̱ꞌ nij soꞌ cheꞌé suun sa̱ꞌ a̱j quiꞌyaj nij soꞌ ado̱nj, cachro̱n so̱ꞌ á ―taj nana̱ cavii rej xta̱ꞌ yoꞌ a.

Caꞌmii Juan cheꞌé sayuun quira̱nꞌ nij síí ma̱n rihaan chumii̱ nihánj a

¹⁴ Ga̱a ne̱ niꞌya̱j ꞌu̱nj, ne̱ dan me se curuviꞌ ꞌo̱ ngaa catzi̱i̱ rej xta̱ꞌ, ne̱ táá ꞌo̱ síí ruviꞌ ase vaa Síí Caꞌnéé Yaꞌanj Ni̱caj Yuꞌunj man Yuvii̱ xráá ngaa, ne̱ nu̱u̱ raa̱ soꞌ ꞌo̱ cachriin agaꞌ oró míí, ne̱ noco̱ꞌ raꞌa soꞌ ꞌo̱ agaꞌ sera̱a̱ cuyu̱u̱ aꞌneꞌ coj, ne̱ siha̱a̱ uxrá sera̱a̱ yoꞌ a.

¹⁵ Ga̱a ne̱ ꞌó se‑mo̱zó Yaꞌanj curiha̱nj rque nuvií noco̱o, ne̱ nucua̱j ndoꞌo caguáj soꞌ rihaan síí ta̱j xráá ngaa yoꞌ a. Dan me se cataj soꞌ a: ―Ta̱cuachén so̱ꞌ sa̱gáꞌ so̱ꞌ agaꞌ siha̱a̱ tacóó nij rasu̱u̱n ma̱n rihaan yoꞌóó, ne̱ cu̱tá so̱ꞌ se ma̱n rihaan yoꞌóó cuaj á. ꞌO̱ se quisíj orá cuta̱ níꞌ se ma̱n rihaan yoꞌóó na̱nj ado̱nj. ꞌO̱ se a̱j cachij nu̱ꞌ yoꞌ na̱nj á ―taj se‑mo̱zó Yaꞌanj rihaan síí ta̱j xráá ngaa yoꞌ a.

¹⁶ Ga̱a ne̱ síí ta̱j xráá ngaa yoꞌ roꞌ, tacuachén soꞌ saga̱ꞌ soꞌ tacóó nij rasu̱u̱n ma̱n rihaan yoꞌóó, ne̱ dan me se cuta soꞌ nu̱ꞌ rasu̱u̱n cachij ma̱n rihaan yoꞌóó yoꞌ a.

¹⁷ Ga̱a ne̱ curiha̱nj ꞌó se‑mo̱zó Yaꞌanj uún rque nuvií noco̱o ya̱nj rej xta̱ꞌ, ne̱ maꞌa̱n soꞌ nica̱j ꞌó agaꞌ sera̱a̱ cuyu̱u̱ siha̱a̱ uún a.

¹⁸ Ga̱a ne̱ curiha̱nj ꞌó se‑mo̱zó Yaꞌanj uún rej nicu̱nꞌ mesá altar, ne̱ síí guun chij rihaan yaꞌan me soꞌ, ne̱ nucua̱j ndoꞌo caguáj soꞌ rihaan síí nica̱j ꞌó agaꞌ siha̱a̱ yoꞌ a. Dan me se cataj soꞌ a: ―Ta̱cuachén so̱ꞌ sa̱gáꞌ so̱ꞌ agaꞌ sera̱a̱ siha̱a̱ tacóó nij rasu̱u̱n ma̱n rihaan yoꞌóó, ne̱ naquiꞌya̱j chre̱ꞌ so̱ꞌ nij chruj uvá cachij rihaan yoꞌóó á. ꞌO̱ se a̱j cané nu̱ꞌ nij chruj uvá na̱nj á ―taj soꞌ rihaan tuviꞌ mo̱zó soꞌ a.

¹⁹ Ga̱a ne̱ tacuachén se‑mo̱zó Yaꞌanj yoꞌ saga̱ꞌ soꞌ agaꞌ sera̱a̱ tacóó nij rasu̱u̱n ma̱n rihaan yoꞌóó, ga̱a ne̱ naquiꞌyaj chre̱ꞌ soꞌ nij chruj uvá cachij ma̱n rihaan yoꞌóó a. Ga̱a ne̱ caraa sa̱ꞌ soꞌ nij chruj uvá yoꞌ rque ꞌo̱ xruj xi̱j rej rii nii na man nij chruj uvá a. Dan me se rej yoꞌ me rej quira̱nꞌ uxrá nij chruj uvá yoꞌ sayuun quiꞌya̱j Yaꞌanj vaa na̱nj ado̱nj.

²⁰ Ga̱a ne̱ rej tuꞌva chumanꞌ quirii nii man chruj uvá, ne̱ rej yoꞌ me canuu nii man chruj uvá yoꞌ, ne̱ curiha̱nj ndoꞌo ton rque xruj xi̱j yoꞌ, ne̱ quisíj ton yoꞌ nda̱a tuꞌva nij cuayó yoꞌ rej nu̱u̱ rtá, ne̱ vaꞌnu̱j cientó kilómetro ya̱ cunánj ton yoꞌ rej ga̱nꞌ rihaan yoꞌóó a.