Apocalipsis 13 - Triqui de San Juan Copala

Caꞌmii Juan cheꞌé xcuu yuva̱a̱ cavii rque na yaꞌa̱nj a

¹ Ga̱a ne̱ queneꞌén ꞌu̱nj se vaa cavii ꞌo̱ xcuu yuva̱a̱ rque na yaꞌa̱nj, ne̱ chi̱j ya̱ raa̱ xoꞌ, ne̱ chi̱ꞌ cúú táá raa̱ xoꞌ, ne̱ táá chi̱ꞌ cachriin raa̱ nij cúú ta̱j raa̱ xoꞌ a. Ne̱ qui̱j ndoꞌo vaa se‑chuvi̱i xoꞌ nó da̱j a̱ raa̱ xoꞌ a.

² Ne̱ ase vaa sniꞌyó vaa xoꞌ, ne̱ ase vaa tacóó xcuu osó vaa tacóó xoꞌ, ne̱ ase vaa tuꞌva chuvaa̱ vaa tuꞌva xoꞌ a. Ne̱ xcuu yuva̱a̱ cavii rque na yaꞌa̱nj roꞌ, guun nucua̱j ndoꞌo xoꞌ guun chij xoꞌ, quiꞌyaj xcuáá tuꞌvi̱i a.

³ Ne̱ ꞌo̱ raa̱ xoꞌ roꞌ, a̱j quiranꞌ chiꞌii̱ nda̱a se da̱j doj se caviꞌ xoꞌ, tza̱j ne̱ nahuun sa̱ꞌ uún man xoꞌ a. Ne̱ caráyaꞌa̱nj nij yuvii̱ ma̱n nu̱ꞌ rihaan chumii̱ niꞌya̱j nij yuvii̱ man xcuu yuva̱a̱ yoꞌ,

⁴ ne̱ caráj gue̱e̱ nij yuvii̱ rihaan xcuáá tuꞌvi̱i yoꞌ, cheꞌé se guun nucua̱j xcuu yuva̱a̱ yoꞌ guun chij yoꞌ, quiꞌyaj maꞌa̱n xcuáá tuꞌvi̱i yoꞌ a. Ne̱ caráj gue̱e̱ nij yuvii̱ rihaan xcuu yuva̱a̱ uún, cataj nij yuvii̱ a: ―Me ꞌó síí caꞌve̱e quiꞌya̱j nda̱a vaa ꞌyaj xcuu yuva̱a̱ nihánj ga̱. Taj va̱j a̱ doj síí gu̱un nucua̱j cunu̱ꞌ ga̱ soꞌ maꞌ ―taj nij yuvii̱ niꞌya̱j nij yuvii̱ man xcuu yuva̱a̱ yoꞌ a.

⁵ Ga̱a ne̱ caꞌvej rá Yaꞌanj gu̱un nucua̱j xcuu yuva̱a̱ yoꞌ caꞌmi̱i̱ xta̱ꞌ ndoꞌo soꞌ nda̱a nana̱ qui̱j rihaan maꞌa̱n Yaꞌanj a. Ne̱ caꞌvej rá Yaꞌanj gu̱un chij soꞌ vi̱j chiha̱a̱ vi̱j (42) yavii a.

⁶ Ga̱a ne̱ caꞌmii ndoꞌo soꞌ nana̱ qui̱j niꞌya̱j soꞌ man Yaꞌanj do̱ꞌ, rej ya̱nj Yaꞌanj do̱ꞌ, cheꞌé nij síí ya̱nj rej xta̱ꞌ ga̱ Yaꞌanj do̱ꞌ a.

⁷ Ne̱ caꞌvej rá Yaꞌanj cunu̱ꞌ soꞌ ga̱ nij síí noco̱ꞌ man Yaꞌanj, ne̱ dan me se quiꞌya̱j canaán ya̱ soꞌ man nij soꞌ a. Ne̱ caꞌvej rá Yaꞌanj gu̱un chij soꞌ rihaan da̱j a̱ xꞌneꞌ yuvii̱ ino̱ vaa stucua̱nj do̱ꞌ, rihaan yuvii̱ ma̱n da̱j a̱ chumanꞌ do̱ꞌ, rihaan da̱j a̱ xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, rihaan yuvii̱ ma̱n da̱j a̱ yoꞌóó noco̱o do̱ꞌ a.

⁸ Ne̱ caráj gue̱e̱ cunuda̱nj nij yuvii̱ ma̱n rihaan chumii̱ man soꞌ a. Ne̱ nij síí caráj gue̱e̱ man soꞌ me se nuviꞌ se‑chuvi̱i nij soꞌ nó rihaan danj Matzinj Leꞌe̱j ticaviꞌ nii man a. Ne̱ danj Matzinj Leꞌe̱j roꞌ, me yanj taj me síí ca̱yáán ga̱ Yaꞌanj nu̱ꞌ cavii nu̱ꞌ caꞌanj, ne̱ no̱ se‑chuvi̱i nij soꞌ rihaan yanj asi̱j ataa quiꞌya̱j Yaꞌanj chumii̱ na̱nj ado̱nj.

⁹ Dan me se sese ta̱j yuꞌuj xréé ꞌo̱ soꞌ, ne̱ no̱ xcúún soꞌ cuno̱ soꞌ nana̱ nihánj ado̱nj.

¹⁰ Dan me se síí taꞌaa man ꞌó yuvii̱ gu̱un yuvii̱ mozó siꞌyaj soꞌ roꞌ, vaa güii ta̱ꞌaa nii man soꞌ gu̱un soꞌ mozó siꞌyaj ꞌó yuvii̱ uún na̱nj ado̱nj. Ne̱ síí oꞌ neê espadá man tuviꞌ me se cavi̱ꞌ ya̱ maꞌa̱n soꞌ, quiꞌya̱j neê espadá na̱nj ado̱nj. Nihánj me se xca̱j níꞌ cuentá cheꞌé nij síí noco̱ꞌ man Yaꞌanj, se vaa ꞌo̱ ga̱a̱ nucua̱j rá nij soꞌ niꞌya̱j nij soꞌ Yaꞌanj, ne̱ ꞌo̱ cuchuma̱n rá nij soꞌ ni̱ꞌyaj nij soꞌ Yaꞌanj, ne̱ ꞌo̱ ga̱a̱ nucua̱j nimán nij soꞌ rihaan sayuun ado̱nj.

Caꞌmii Juan cheꞌé xcuu yuva̱a̱ cavii rque yoꞌóó a

¹¹ Ga̱a ne̱ queneꞌén ꞌu̱nj ꞌó xcuu yuva̱a̱ cavii rque yoꞌóó, ne̱ táá vi̱j cúú raa̱ xcuu yoꞌ, ne̱ ase vaa cúú ta̱j raa̱ matzinj leꞌe̱j roꞌ, da̱nj vaa cúú ta̱j raa̱ xoꞌ a. Ne̱ aꞌmii xcuu yuva̱a̱ nda̱a vaa aꞌmii maꞌa̱n xcuáá tuꞌvi̱i a.

¹² Ne̱ dan me se caꞌnaꞌ soꞌ rihaan xcuu yuva̱a̱ cavii rque na yaꞌa̱nj, ne̱ guun chij soꞌ rihaan yuvii̱ nda̱a vaa uun chij maꞌa̱n xcuu cavii rque na yaꞌa̱nj yoꞌ a. Dan me se aráj gue̱e̱ nij yuvii̱ ma̱n nu̱ꞌ rihaan chumii̱ rihaan xcuu yuva̱a̱ cavii rque na yaꞌa̱nj xcuu nahuun sa̱ꞌ ga̱a da̱j doj se caviꞌ, quiꞌyaj xcuu yuva̱a̱ cavii rque yoꞌóó yoꞌ a.

¹³ Ne̱ quiꞌyaj ndoꞌo xoꞌ suun noco̱o queneꞌen nij yuvii̱, ne̱ nda̱a cavii yaꞌan rej xta̱ꞌ ne̱ quinij yaꞌan rihaan yoꞌóó, quiꞌyaj xoꞌ a.

¹⁴ Dan me se quiꞌyaj xoꞌ suun noco̱o rihaan xcuu yuva̱a̱ cavii rque na yaꞌa̱nj yoꞌ, quiꞌyaj maꞌa̱n xoꞌ, ne̱ cheꞌé suun noco̱o yoꞌ me se tihaꞌ yuꞌunj ndoꞌo xoꞌ man nij síí ma̱n rihaan chumii̱ a. Ne̱ cataj xoꞌ rihaan nij soꞌ se vaa quiꞌya̱j nij soꞌ ꞌo̱ se tinanga̱ꞌ xcuu cavii rque na yaꞌa̱nj yoꞌ xcuu quiranꞌ chiꞌii̱ quiꞌyaj neê espadá ne̱ cunuu iꞌna̱ꞌ uún a.

¹⁵ Dan me se guun nucua̱j xoꞌ quiꞌyaj xoꞌ nayón nana̱ nimán se tinanga̱ꞌ xcuu cavii rque na yaꞌa̱nj yoꞌ, ne̱ quiꞌyaj uún xoꞌ caꞌmii se tinanga̱ꞌ yoꞌ, ne̱ ta̱ranꞌ nij síí naꞌvej rá cara̱a̱ gue̱e̱ rihaan se tinanga̱ꞌ yoꞌ roꞌ, ticavi̱ꞌ xoꞌ man ta̱ranꞌ nij soꞌ a.

¹⁶ Ga̱a ne̱ quiꞌyaj xcuu cavii rque yoꞌóó yoꞌ se vaa cuta̱ꞌ nii taꞌngaꞌ raꞌa cunuda̱nj nij yuvii̱ rej nuva̱ꞌ nij yuvii̱, ne̱ se taj, ne̱ caan rihaan nij yuvii̱ cata̱ꞌ taꞌngaꞌ a. Dan me se da̱nj quiꞌyaj nii man nij síí ata̱ suun do̱ꞌ, man nij síí chéé maꞌa̱n do̱ꞌ, man nij síí nique̱ do̱ꞌ, man nij síí ruꞌvee do̱ꞌ, man nij mozó do̱ꞌ, man nij síí ne uun mozó do̱ꞌ a.

¹⁷ Ne̱ dan me se sese nuviꞌ taꞌngaꞌ yoꞌ raꞌa ꞌo̱ soꞌ do̱ꞌ, rihaan ꞌo̱ soꞌ do̱ꞌ, ne̱ ne caꞌve̱e quira̱a̱n soꞌ rasu̱u̱n do̱ꞌ, cutuꞌve̱e̱ soꞌ rasu̱u̱n do̱ꞌ, quiꞌyaj se tinanga̱ꞌ xcuu yoꞌ a̱ maan ado̱nj. Ne̱ taꞌngaꞌ yoꞌ roꞌ, me se‑chuvi̱i xcuu cavii rque na yaꞌa̱nj, ne̱ dan me se número̱ me yoꞌ ado̱nj.

¹⁸ Ne̱ nihánj me se cavi̱i̱ raa̱ soj si̱j naya̱a̱ nana̱ nihánj, ne̱ sese cu̱u raa̱ soj, ne̱ nuchru̱j ra̱a̱ soj da̱j taj se‑nu̱mero̱ xcuu yuva̱a̱ cavii rque na yaꞌa̱nj yoꞌ á. ꞌO̱ se número̱ yoꞌ roꞌ, me se‑chuvi̱i ꞌo̱ snóꞌo na̱nj chugua̱nj. Ne̱ vata̱nꞌ cientó táá vaꞌnu̱j chiha̱a̱ vata̱nꞌ (666) me número̱ yoꞌ ado̱nj.