Apocalipsis 12 - Triqui de San Juan Copala

Caꞌmii Juan cheꞌé chana̱ do̱ꞌ, cheꞌé xcuáá tuꞌvi̱i do̱ꞌ, curuviꞌ rej xta̱ꞌ a

¹ Ga̱a ne̱ dan me se naquiꞌyaa ꞌo̱ rasu̱u̱n noco̱o curuviꞌ rej xta̱ꞌ rihaan ꞌu̱nj, quiꞌyaj Yaꞌanj, ne̱ chana̱ me yoꞌ, ne̱ saga̱nꞌ chana̱ yoꞌ roꞌ, me güii, ne̱ táá tacóó noꞌ xráá yavii a. Ne̱ nu̱u̱ raa̱ noꞌ ꞌo̱ cachriin no̱ chuvi̱j yatiꞌ a.

² Ne̱ chana̱ yoꞌ roꞌ, nuû rque, ne̱ veꞌee̱ uxrá rque noꞌ cheꞌé se da̱j doj cuchru̱j noꞌ neꞌej, ne̱ cheꞌé dan taꞌvee ndoꞌo noꞌ a.

³ Ne̱ naquiꞌyaa uún ꞌó rasu̱u̱n rej xta̱ꞌ rihaan ꞌu̱nj, quiꞌyaj Yaꞌanj, ne̱ dan me se xcuáá tuꞌvi̱i xi̱j mare̱e me yoꞌ a. Ne̱ vaa chi̱j raa̱ xoꞌ, ne̱ chi̱ꞌ cúú táá raa̱ xoꞌ, ne̱ chi̱j cachriin nuû raa̱ xoꞌ a.

⁴ Ne̱ taneꞌ xoꞌ me se cuxuun yoꞌ ꞌo̱ yatiꞌ rihaan da̱j a̱ vaꞌnu̱j nij yatiꞌ ma̱n rej xta̱ꞌ, ne̱ cayuu nij yatiꞌ rihaan yoꞌóó, quiꞌyaj xoꞌ a. Ne̱ canicunꞌ xcuáá tuꞌvi̱i yoꞌ rihaan chana̱ cuchru̱j neꞌej, cheꞌé rej cha̱ nu̱ꞌ xoꞌ man neꞌej cuchru̱j chana̱ yoꞌ a.

⁵ Ga̱a ne̱ cuchruj noꞌ neꞌej sno̱ꞌo, ne̱ soꞌ roꞌ, me síí ni̱caj vará aga̱ꞌ ne̱ gu̱un chij rihaan nij xꞌneꞌ yuvii̱ ino̱ vaa stucua̱nj a. Ga̱a ne̱ caꞌnéj nii taꞌníí chana̱ yoꞌ, ne̱ caꞌanj nica̱j nii man neꞌej rihaan Yaꞌanj rej táá soꞌ rihaan chruun xlá sa̱ꞌ yoꞌ uun chij soꞌ a.

⁶ Ga̱a ne̱ cunánj chana̱ nda̱a rej tacaan rej quiꞌyaj maꞌa̱n Yaꞌanj ca̱yáán noꞌ, cheꞌé rej caꞌve̱e rque̱ Yaꞌanj se cha̱ noꞌ ꞌo̱ míj táá vi̱j cientó táá vaꞌnu̱j chiha̱a̱ (1260) güii a.

⁷ Ga̱a ne̱ guun cheꞌe̱ nij síí ma̱n rej xta̱ꞌ cunuꞌ nij soꞌ a. Dan me se se‑mo̱zó Yaꞌanj síí cuꞌna̱j Migueé ga̱ ꞌó nij se‑mo̱zó Yaꞌanj nu̱u̱ rihaan soꞌ me se cunuꞌ ndoꞌo nij soꞌ ga̱ xcuáá tuꞌvi̱i a. Ne̱ xcuáá tuꞌvi̱i do̱ꞌ, nij se‑mo̱zó maꞌa̱n xcuáá tuꞌvi̱i do̱ꞌ, cunuꞌ ndoꞌo nij soꞌ ga̱ se‑mo̱zó Yaꞌanj Migueé ga̱ nij tuviꞌ soꞌ,

⁸ tza̱j ne̱ ne gu̱un nucua̱j nij tuvi̱ꞌ xcuáá tuꞌvi̱i quiꞌya̱j canaán nij soꞌ man Migueé a̱ maan ado̱nj. Ne̱ taj rej cuma̱n nij soꞌ rej xta̱ꞌ, quiꞌyaj nij tuvi̱ꞌ Migueé a̱ maan chugua̱nj.

⁹ Ne̱ xcuáá tuꞌvi̱i yoꞌ roꞌ, xcuáá cayáán asi̱j naá tiempó me soꞌ, ne̱ Síí Chre̱e do̱ꞌ, Satanás do̱ꞌ, cuꞌna̱j soꞌ, ne̱ síí tihaꞌ yuꞌunj man cunuda̱nj nij yuvii̱ ma̱n rihaan chumii̱ me uún soꞌ na̱nj ado̱nj. Ne̱ tagüéj nii man xcuáá tuꞌvi̱i xi̱j yoꞌ rihaan chumii̱ ga̱ nij se‑mo̱zó soꞌ a.

¹⁰ Ga̱a ne̱ cunó ꞌu̱nj nana̱ nucua̱j caꞌmii ꞌo̱ soꞌ rej xta̱ꞌ, ne̱ cataj soꞌ a: Nihánj me se a̱j tinanii Yaꞌanj man yuvii̱ rihaan sayuun, ne̱ uun nucua̱j ndoꞌo soꞌ, ne̱ uun chij ndoꞌo soꞌ ado̱nj. Ne̱ uun chij Síí Caꞌnéé Soꞌ Ti̱nanii man Yuvii̱ rihaan Sayuun a. ꞌO̱ se síí utaꞌ cacunꞌ xráá tinúú níꞌ nuvi̱i niga̱nꞌ rihaan Yaꞌanj roꞌ, quirii yaníj nii man soꞌ na̱nj ado̱nj.

¹¹ Ne̱ quiꞌyaj canaán nij tinúú níꞌ man xcuáá tuꞌvi̱i cheꞌé ton cayanj man Matzinj Leꞌe̱j yoꞌ cheꞌé nij tinúú níꞌ, ne̱ cheꞌé se nataꞌ nij soꞌ nana̱ ya̱ sa̱ꞌ rihaan yuvii̱ roꞌ, cheꞌé dan quiꞌyaj canaán nij soꞌ rihaan xcuáá tuꞌvi̱i yoꞌ na̱nj ado̱nj. Ne̱ nij soꞌ me se ne cuchuꞌvi̱ꞌ nij soꞌ sese cavi̱ꞌ nij soꞌ cheꞌé nana̱ sa̱ꞌ nataꞌ nij soꞌ maꞌ.

¹² Cheꞌé dan gu̱un niha̱ꞌ rá nij soj re̱j xta̱ꞌ do̱ꞌ, si̱j ya̱nj rej xta̱ꞌ do̱ꞌ ado̱nj. Tza̱j ne̱ nique̱ ndoꞌo soj si̱j ma̱n rihaan yoꞌóó do̱ꞌ, na yaꞌa̱nj do̱ꞌ na̱nj ado̱nj. ꞌO̱ se quiriꞌíj nii man Síí Chre̱e rihaan nij so̱j, ne̱ cheꞌé dan nuu yuva̱a̱ uxrá rá soꞌ na̱nj chugua̱nj. ꞌO̱ se neꞌen Síí Chre̱e se vaa nichrunꞌ caꞌna̱ꞌ sayuun quira̱nꞌ soꞌ na̱nj á, taj nana̱ caꞌmii ꞌo̱ soꞌ rej xta̱ꞌ a.

¹³ Ga̱a ne̱ dan me se ga̱a xcaj xcuáá tuꞌvi̱i yoꞌ cuentá se vaa quiriꞌíj nii man soꞌ rihaan chumii̱, ga̱a ne̱ canocoꞌ ndoꞌo soꞌ man chana̱ cuchruj neꞌej yoꞌ a.

¹⁴ Tza̱j ne̱ rqué nii vi̱j scache̱e xtaa xi̱j man chana̱, cheꞌé rej caꞌve̱e cavi̱i̱ noꞌ caꞌa̱nj noꞌ rej tacaan rej ya̱nj noꞌ quiꞌyaj Yaꞌanj, ne̱ yoꞌ me rej rque̱ Yaꞌanj se cha̱ noꞌ vaꞌnu̱j yoꞌ táá néé, ne̱ ga̱nꞌ ndoꞌo cunánj noꞌ rihaan xcuáá tuꞌvi̱i a.

¹⁵ Tza̱j ne̱ quirii ndoꞌo xcuáá yoꞌ na tuꞌva soꞌ rej va̱j chana̱, ne̱ ase vaa chráá vaa na caꞌnéé soꞌ rej va̱j chana̱, cheꞌé se guun rá soꞌ nu̱cuaj chráá man chana̱ a.

¹⁶ Ga̱a ne̱ racuíj yoꞌóó man chana̱, ne̱ dan me se nuxraꞌ yoꞌóó tuꞌva yoꞌóó, ne̱ chumánj yoꞌóó nu̱ꞌ chráá quirii xcuáá tuꞌvi̱i tuꞌva soꞌ a.

¹⁷ Ga̱a ne̱ caꞌmaan ndoꞌo rá xcuáá tuꞌvi̱i niꞌya̱j soꞌ man chana̱, ga̱a ne̱ cavii soꞌ cunu̱ꞌ soꞌ ga̱ ꞌó nij taꞌníí noꞌ síí uno nij suun caꞌneꞌ Yaꞌanj rihaan níꞌ, síí nica̱j xraan snana̱ Jesús a.

¹⁸ Ga̱a ne̱ canicunꞌ soꞌ rihaan yoꞌóó chru̱u̱ na̱j tuꞌva na yaꞌa̱nj a.