Apocalipsis 10 - Triqui de San Juan Copala

Rqué se‑mo̱zó Yaꞌanj yanj cha̱ Juan a

¹ Ga̱a ne̱ queneꞌén ꞌu̱nj ꞌó se‑mo̱zó Yaꞌanj síí nucua̱j ndoꞌo nanij rej xta̱ꞌ, ne̱ nu̱ꞌ anica̱j man soꞌ nique̱e̱ soꞌ ngaa, ne̱ táá xcuáá cuꞌlúú raa̱ soꞌ, ne̱ chuguu̱n rihaan soꞌ nda̱a vaa chuguu̱n güii a. Ne̱ ase vaa chraan acaa vaa tacóó soꞌ a.

² Ne̱ nica̱j raꞌa soꞌ ꞌo̱ yanj cunii, ne̱ vaa yaꞌnúj rihaan yanj yoꞌ a. Ne̱ cutaꞌ soꞌ tacóó soꞌ rej nuva̱ꞌ soꞌ rihaan na yaꞌa̱nj, ne̱ cutaꞌ soꞌ tacóó soꞌ rej nichru̱un soꞌ rihaan yoꞌóó a.

³ Ne̱ nucua̱j ndoꞌo caguáj soꞌ, nda̱ꞌ adi̱ꞌ se aguáj chuvaa̱ aguáj soꞌ a. Ne̱ ga̱a caguáj soꞌ me se chi̱j ya̱ caguáj tuꞌvii cunoj a.

⁴ Ne̱ ga̱a quisíj chi̱j caguáj tuꞌvii, ga̱a ne̱ guun raj cachro̱nj nana̱ caguáj tuꞌvii rihaan yanj, tza̱j ne̱ cunoj nana̱ cavii rej xta̱ꞌ, ne̱ nana̱ cunoj taj a: ―Caꞌne̱j yuve̱ so̱ꞌ nana̱ caguáj tuꞌvii, ne̱ se̱ cachrón so̱ꞌ nana̱ yoꞌ rihaan yanj maꞌ ―taj nana̱ cavii rej xta̱ꞌ cunoj a.

⁵ Ga̱a ne̱ se‑mo̱zó Yaꞌanj síí nicu̱nꞌ tacóó rihaan na yaꞌa̱nj do̱ꞌ, rihaan yoꞌóó do̱ꞌ, me se naxca̱j raꞌa soꞌ rej nuva̱ꞌ soꞌ rej xta̱ꞌ,

⁶ ne̱ cutaꞌ soꞌ raa̱ Yaꞌanj si̱j ca̱yáán nu̱ꞌ cavii nu̱ꞌ caꞌanj síí quiꞌyaj rej xta̱ꞌ ga̱ nu̱ꞌ se ma̱n rej xta̱ꞌ, síí quiꞌyaj chumii̱ ga̱ nu̱ꞌ se ma̱n rihaan chumii̱, síí quiꞌyaj na yaꞌa̱nj ga̱ nu̱ꞌ se ma̱n rque na yaꞌa̱nj, ne̱ cataj soꞌ a: ―Se̱ caꞌvee gu̱un ra̱a̱n a̱ doj a̱ maꞌ.

⁷ Dan me se asa̱ꞌ quisíj güii caꞌya̱nj se‑mo̱zó Yaꞌanj mozó chi̱j chruun aꞌyánj me se quisi̱j nu̱ꞌ nana̱ yuve̱ se vaa guun rá Yaꞌanj quiꞌya̱j soꞌ, nda̱a vaa nataꞌ soꞌ ga̱a naá rihaan nij síí nataꞌ snana̱ soꞌ síí nu̱u̱ rihaan soꞌ ―taj se‑mo̱zó Yaꞌanj yoꞌ a.

⁸ Ga̱a ne̱ cavii doj nana̱ rej xta̱ꞌ, rej cavii nana̱ cunoj asi̱j rque̱ doj, ne̱ cataj nana̱ yoꞌ a: ―Cavi̱i̱ so̱ꞌ ni̱caj so̱ꞌ yanj nica̱j se‑mo̱zó Yaꞌanj síí ta̱j tacóó rihaan na yaꞌa̱nj do̱ꞌ, rihaan yoꞌóó do̱ꞌ á ―taj nana̱ yoꞌ rihanj a.

⁹ Ga̱a ne̱ cuchíꞌ ꞌu̱nj rihaan se‑mo̱zó Yaꞌanj yoꞌ, ne̱ cataj ꞌu̱nj rihaan soꞌ se vaa rque̱ soꞌ yanj cunii yoꞌ rihanj a. Ga̱a ne̱ cataj soꞌ rihanj a: ―Veé yanj nihánj ni̱caj so̱ꞌ, ne̱ cha̱ nu̱ꞌ so̱ꞌ man yoꞌ a. Dan me se tuꞌvá so̱ꞌ roꞌ, ga̱a̱ tzi̱ꞌ ndoꞌo nda̱ꞌ adi̱ꞌ catziꞌ xtaan, tza̱j ne̱ rqué so̱ꞌ me se cunu̱u e̱ꞌ, quiꞌya̱j yanj yoꞌ ado̱nj ―taj se‑mo̱zó Yaꞌanj yoꞌ rihanj a.

¹⁰ Ga̱a ne̱ dan me se nica̱j ꞌu̱nj yanj cunii taꞌaa ꞌu̱nj raꞌa se‑mo̱zó Yaꞌanj yoꞌ, ne̱ chá nu̱ꞌ ꞌu̱nj man yoꞌ, ne̱ ase tzi̱ꞌ catziꞌ xtaan roꞌ, da̱nj vaa tzi̱ꞌ yoꞌ tuꞌvaj a. Ne̱ ga̱a quisíj chaj man yoꞌ, ne̱ cunuu e̱ꞌ rquej, quiꞌyaj yoꞌ a.

¹¹ Ga̱a ne̱ cataj nii rihanj a: ―No̱ xcúún so̱ꞌ caꞌmi̱i̱ natáj uún so̱ꞌ cheꞌé yuvii̱ ma̱n ri̱i̱ ndoꞌo chumanꞌ do̱ꞌ, cheꞌé ri̱i̱ ndoꞌo xꞌneꞌ yuvii̱ ino̱ vaa stucua̱nj do̱ꞌ, cheꞌé ri̱i̱ ndoꞌo xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, cheꞌé ri̱i̱ ndoꞌo síí nica̱j suun rey do̱ꞌ ado̱nj ―taj nii rihanj a.