3 Juan 1 - Triqui de San Juan Copala

¹ Síí chii nga̱ mej, ne̱ achrón ꞌu̱nj yanj nihánj naya̱a̱ so̱ꞌ si̱j cuꞌna̱j Gayo a. ꞌE̱e̱ raj mán so̱ꞌ, cheꞌé se si̱j noco̱ꞌ nana̱ ya̱ me níꞌ a.

² Tinu̱j, me rá ꞌu̱nj se vaa cavi̱i̱ sa̱ꞌ so̱ꞌ ne̱ ga̱a̱ nu̱cuáá so̱ꞌ ase vaa ya̱ ya̱ avii sa̱ꞌ nimán so̱ꞌ na̱nj ado̱nj.

³ ꞌO̱ se guun niha̱ꞌ uxrá rá ꞌu̱nj, cheꞌé se caꞌnaꞌ do̱j tinúú níꞌ rihanj nihánj, ne̱ nataꞌ nij soꞌ rihanj se vaa ꞌo̱ nocóꞌ so̱ꞌ tucuáán ya̱ ado̱nj.

⁴ Ne̱ taj va̱j ꞌó suun caꞌve̱e quiꞌya̱j gu̱un niha̱ꞌ doj raj a̱ maꞌ. Ma̱an se o̱rúnꞌ nana̱ cunó ꞌu̱nj se vaa veꞌé nocoꞌ nij síí guun taꞌníí ꞌu̱nj man tucuáán ya̱ na̱nj ado̱nj.

Veꞌé racuíj síí cuꞌna̱j Gayo man nij síí chéé nataꞌ snana̱ Jesucristó a

⁵ Tinu̱j, veꞌé ꞌyáá so̱ꞌ racuíj so̱ꞌ man nij tinúú níꞌ, ne̱ nda̱a nij síí ꞌnaꞌ ꞌó chumanꞌ ado̱nj.

⁶ Ne̱ a̱j nataꞌ nij soꞌ rihaan xꞌneꞌ nij síí noco̱ꞌ man Cristó ya̱nj chumanꞌ nihánj se vaa cunuu ꞌe̱e̱ rá so̱ꞌ man nij soꞌ chugua̱nj. Ne̱ cuna̱j uxrá sese ꞌo̱ ra̱cuíj so̱ꞌ man nij soꞌ ga̱a chéé nij soꞌ queꞌe̱e̱ chumanꞌ yoꞌ a. ꞌO̱ se síí ꞌyaj se‑su̱u̱n Yaꞌanj me nij soꞌ ado̱nj.

⁷ ꞌO̱ se cavii nij soꞌ nata̱ꞌ nij soꞌ cheꞌé se‑chuvi̱i Jesucristó, ne̱ a̱ ꞌó rasu̱u̱n ne quiri̱ꞌ nij soꞌ raꞌa nij síí yaníj ne nocoꞌ man Cristó a̱ maan chugua̱nj.

⁸ Cheꞌé dan no̱ xcúún níꞌ ra̱cuíj níꞌ man ta̱ranꞌ nij síí ꞌyaj da̱nj, ga̱a ne̱ gu̱un níꞌ tuviꞌ nij soꞌ síí nataꞌ nana̱ ya̱ ado̱nj.

Caꞌmii Juan cheꞌé ꞌo̱ síí chiꞌi̱i̱ nimán a

⁹ Dan me se quiꞌyáj ꞌo̱ yanj cartá caꞌnéé ꞌu̱nj rihaan xꞌneꞌ nij síí noco̱ꞌ man Cristó, tza̱j ne̱ síí cuꞌna̱j Diótrefes roꞌ, me ndoꞌo rá soꞌ gu̱un chij soꞌ rihaan nij soꞌ, ne̱ naꞌvej rá soꞌ cuno̱ soꞌ snana̱j maꞌ.

¹⁰ Cheꞌé dan, sese cuchi̱ꞌ uún ꞌu̱nj, ne̱ cata̱j xnaꞌanj ꞌu̱nj cheꞌé se nij ꞌyaj Diótrefes ga̱a aꞌmii soꞌ nana̱ nij cheꞌé núj ado̱nj. Ne̱ né ina̱nj nana̱ nij aꞌmii soꞌ maꞌ. Dan me se ga̱a uchiꞌ nij tinúú níꞌ, ne̱ ne aꞌmii soꞌ ga̱ nij tinúú níꞌ maꞌ. Da̱nj na̱nj uún, ne̱ me maꞌa̱n síí me rá veꞌé caꞌmi̱i̱ ga̱ tinúú níꞌ, ne̱ aráán soꞌ chrej rihaan nij yuvii̱ se̱ gaa na̱nj veꞌé caꞌmi̱i̱ nij yuvii̱ ga̱ tinúú níꞌ, ne̱ nda̱a rii soꞌ man nij yuvii̱ scaꞌnúj xꞌneꞌ nij síí noco̱ꞌ man Cristó chugua̱nj.

No̱ xcúún níꞌ veꞌé quiꞌya̱j níꞌ a

¹¹ Tinu̱j, se̱ guun qui̱ꞌyáá so̱ꞌ nda̱a vaa ꞌyaj nij síí chiꞌi̱i̱ maꞌ. Tana̱nj qui̱ꞌyáá so̱ꞌ nda̱a vaa ꞌyaj nij síí sa̱ꞌ á. ꞌO̱ se síí ꞌyaj se sa̱ꞌ roꞌ, Yaꞌanj ya̱ me Taꞌanj soꞌ ado̱nj. Ne̱ síí ꞌyaj se chiꞌi̱i̱ roꞌ, ne neꞌen soꞌ man Yaꞌanj a̱ maꞌ.

Caꞌmii Juan cheꞌé síí sa̱ꞌ nimán cuꞌna̱j Demetrio a

¹² Cunuda̱nj nij tinúú níꞌ taj xnaꞌanj cheꞌé síí cuꞌna̱j Demetrio se vaa síí sa̱ꞌ nimán me soꞌ, ne̱ ya̱ ya̱ síí sa̱ꞌ me soꞌ ado̱nj. Yoꞌ me nana̱ taj xnaꞌanj núj rihaan so̱ꞌ, ne̱ a̱j neꞌén so̱ꞌ se vaa nana̱ ya̱ me nij nana̱ taj xnaꞌanj núj rihaan so̱ꞌ a.

Me rá Juan cuchi̱ꞌ soꞌ rej ya̱nj Gayo a

¹³ Vaa ndoꞌo nana̱ guun rá ꞌu̱nj cata̱j xnaꞌanj ꞌu̱nj rihaan so̱ꞌ, tza̱j ne̱ naꞌvej rá ꞌu̱nj cachro̱n ꞌu̱nj nu̱ꞌ nana̱ yoꞌ rihaan yanj nihánj a̱ maan chugua̱nj.

¹⁴ Tza̱j ne̱ uun rá ꞌu̱nj cuchi̱j rihaan so̱ꞌ rque do̱j, ga̱a ne̱ caꞌve̱e caꞌmi̱i̱ níꞌ me maꞌa̱n nana̱ rihaan tuviꞌ níꞌ ado̱nj.

¹⁵ Dínj ga̱a̱ nimán so̱ꞌ raj a. Me rá nij tinúú níꞌ se vaa veꞌé ca̱yáán so̱ꞌ na̱nj ado̱nj. Cata̱j so̱ꞌ rihaan ꞌo̱ ꞌo̱ nij tinúú ꞌu̱nj ya̱nj chiháán so̱ꞌ se vaa veꞌé cuma̱n nij soꞌ raj ado̱nj.