2 Timoteo 3 - Triqui de San Juan Copala

Nataꞌ Pabló cheꞌé da̱j quiꞌya̱j nij síí chiꞌi̱i̱ asa̱ꞌ nichrunꞌ caꞌna̱ꞌ uún Cristó a

¹ Neꞌén so̱ꞌ se vaa asa̱ꞌ nichrunꞌ caꞌna̱ꞌ uún Cristó, ne̱ gu̱un ndoꞌo sayuun a.

² ꞌO̱ se ga̱a̱ ꞌe̱e̱ uxrá rá nij yuvii̱ man maꞌa̱n yuvii̱, ne̱ gu̱un ndoꞌo rá nij yuvii̱ quiꞌya̱j canaán nij soꞌ saꞌanj, ne̱ cata̱j uxrá nij soꞌ se vaa si̱j sa̱ꞌ ndoꞌo me maꞌa̱n nij soꞌ, ne̱ síí xta̱ꞌ nimán gu̱un nij soꞌ, ne̱ qui̱j ndoꞌo caꞌmi̱i̱ nij soꞌ cheꞌé Yaꞌanj uún a. Se̱ cuno nij soꞌ caꞌmi̱i̱ rej nij soꞌ do̱ꞌ, nii nij soꞌ do̱ꞌ, uún a̱ maꞌ. Se̱ cataj nij soꞌ guun niꞌya̱j níꞌ cheꞌé rasu̱u̱n, ne̱ se̱ guun rá nij soꞌ canoco̱ꞌ nij soꞌ man Yaꞌanj maꞌ.

³ Se̱ gaa ꞌe̱e̱ rá nij soꞌ man tuviꞌ nij soꞌ, ne̱ ꞌo̱ ra̱ꞌyunj tuviꞌ nij soꞌ, ne̱ nano̱ ndoꞌo nij soꞌ cuentó ne̱ cheꞌé tuviꞌ nij soꞌ, ne̱ se̱ guun naꞌa̱j nij soꞌ ni̱ꞌyaj nij soꞌ man nij soꞌ maꞌ. Ne̱ se̱ guun nucua̱j nij soꞌ caꞌne̱ꞌ rá nij soꞌ ga̱ suun chiꞌi̱i̱ nica̱j nij soꞌ maꞌ. Ina̱nj qui̱j ga̱a̱ nij soꞌ na̱nj ado̱nj. Ne̱ ina̱nj nachri̱ꞌ nij soꞌ ni̱ꞌyaj nij soꞌ se sa̱ꞌ na̱nj á.

⁴ Ne̱ ina̱nj síí tihaꞌ yuꞌunj tuviꞌ gu̱un uún nij soꞌ na̱nj ado̱nj. Ne̱ ina̱nj caꞌne̱j nimán nij soꞌ quiꞌya̱j nij soꞌ chrej chiꞌi̱i̱ na̱nj ado̱nj. Ne̱ ꞌo̱ nda̱a xraan rmaꞌa̱n cuma̱n se nucuiꞌ rá nimán nij soꞌ, ne̱ ina̱nj nano̱ꞌ nij soꞌ rasu̱u̱n me rá maꞌa̱n nij soꞌ a. Se̱ nanoꞌ nij soꞌ a̱ doj man Yaꞌanj a̱ maꞌ.

⁵ Ase vaa yuvii̱ noco̱ꞌ man Yaꞌanj roꞌ, da̱nj ga̱a̱ nij soꞌ, tza̱j ne̱ daj chiha̱a̱ míj se̱ caꞌvej rá nij soꞌ naquiꞌya̱j sa̱ꞌ Yaꞌanj nimán nij soꞌ maꞌ. Naxu̱u̱n yaníj so̱ꞌ mán so̱ꞌ rihaan nij síí vaa da̱nj á.

⁶ Atúj nij soꞌ rá veꞌ tucuá chana̱ ne acaj cuentá, ne̱ tihaꞌ yuꞌunj nij soꞌ man nij chana̱ ata̱ da̱j a̱ cacunꞌ qui̱j avii raa̱ maꞌa̱n nij noꞌ a.

⁷ Niga̱nj tucuꞌyón nij chana̱ yoꞌ nu̱ꞌ nana̱ sa̱ꞌ, tza̱j ne̱ daj chiha̱a̱ míj ne gu̱un nucua̱j nij noꞌ xca̱j nij noꞌ cuentá cheꞌé nana̱ ya̱ yoꞌ a̱ maꞌ.

⁸ Ne̱ xa̱ꞌ nij síí chiꞌi̱i̱ yoꞌ, tza̱j ne̱ nda̱ꞌ rá se vaa quiranꞌ ro̱j síí chru̱u̱n cuꞌna̱j Janes ga̱ Jambres ga̱a quitáá riꞌyunj ro̱j soꞌ man síí cuꞌna̱j Moisés ga̱a naá roꞌ, da̱nj quira̱nꞌ gue̱e̱ nij síí ta̱j riꞌyunj man nana̱ ya̱ ado̱nj. ꞌO̱ se síí ma̱n ina̱nj nana̱ chiꞌi̱i̱ raa̱ me nij soꞌ do̱ꞌ, síí a̱j tanáj xco̱ stucua̱nj Yaꞌanj do̱ꞌ, me nij soꞌ na̱nj á.

⁹ Tza̱j ne̱ se̱ quisíj nij soꞌ xnaꞌa̱nj nana̱ chiꞌi̱i̱ yoꞌ nda̱a ga̱nꞌ ndoꞌo quiꞌya̱j nij soꞌ maꞌ. ꞌO̱ se cunuda̱nj nij yuvii̱ xca̱j cuentá se vaa si̱j nij snúú rmaꞌa̱n me nij soꞌ, ne̱ a̱ doj se̱ cuchumán rá nij yuvii̱ caꞌmi̱i̱ nij soꞌ a̱ maꞌ. ꞌO̱ se nda̱ꞌ rá se vaa quiranꞌ ro̱j síí cuꞌna̱j Janes ga̱ síí cuꞌna̱j Jambres ga̱a ne cuchuma̱n rá yuvii̱ caꞌmii ro̱j soꞌ roꞌ, da̱nj quira̱nꞌ nij síí chiꞌi̱i̱ yoꞌ ado̱nj.

Nda̱ꞌ se quira̱nꞌ níꞌ sayuun, tza̱j ne̱ ꞌo̱ canoco̱ꞌ níꞌ snana̱ Yaꞌanj á

¹⁰ Ne̱ xa̱ꞌ ma̱ꞌán so̱ꞌ, tza̱j ne̱ xcaj ndoꞌo so̱ꞌ cuentá cheꞌé tucuáán tucuꞌyón ꞌu̱nj man yuvii̱ do̱ꞌ, cheꞌé da̱j nocóꞌ ꞌu̱nj tucuáán yoꞌ do̱ꞌ, cheꞌé se vaa guun raj qui̱ꞌyáj rej rihaan níꞌ do̱ꞌ á. Neꞌén so̱ꞌ se vaa nucua̱j ndoꞌo raj man Yaꞌanj do̱ꞌ, se vaa na̱j rá ꞌu̱nj caxri̱i̱ yuva̱a̱ ꞌu̱nj man yuvii̱ do̱ꞌ, se vaa ꞌe̱e̱ raj man tinúj do̱ꞌ, se vaa ꞌo̱ nucua̱j rá ꞌu̱nj rihaan sayuun do̱ꞌ ado̱nj.

¹¹ Ne̱ a̱j neꞌén so̱ꞌ da̱j vaa sayuun quiꞌyaj nii manj, ne̱ a̱j neꞌén so̱ꞌ nu̱ꞌ se vaa quiránꞌ ꞌu̱nj chumanꞌ Antioquía do̱ꞌ, chumanꞌ Iconio do̱ꞌ, chumanꞌ Listra do̱ꞌ, uún chugua̱nj. Tza̱j ne̱ Síí ꞌNi̱j Raꞌa man níꞌ me síí tinanii manj rihaan nu̱ꞌ sayuun quiránꞌ ꞌu̱nj ado̱nj.

¹² ꞌO̱ se cunuda̱nj nij yuvii̱ amán rá niꞌya̱j man Cristó Jesús ne̱ me rá canoco̱ꞌ xraan man Yaꞌanj roꞌ, ya̱ uxrá quira̱nꞌ nij soꞌ sayuun ado̱nj.

¹³ Tza̱j ne̱ xa̱ꞌ nij síí tihaꞌ yuꞌunj, tza̱j ne̱ tana̱nj a̱ doj a̱ doj a̱ caꞌa̱nj nij soꞌ tiha̱ꞌ yuꞌunj nij soꞌ man nij yuvii̱ do̱ꞌ, tiha̱ꞌ yuꞌunj nij yuvii̱ man maꞌa̱n nij soꞌ do̱ꞌ na̱nj á.

¹⁴ Ne̱ ma̱ꞌán so̱ꞌ, tza̱j ne̱ ꞌo̱ ca̱nocóꞌ so̱ꞌ nana̱ cuchumán rá so̱ꞌ nana̱ naríꞌ so̱ꞌ á. ꞌO̱ se a̱j neꞌén so̱ꞌ me yuvii̱ tucuꞌyón nana̱ yoꞌ mán so̱ꞌ na̱nj á.

¹⁵ Ne̱ a̱j neꞌén so̱ꞌ se vaa asi̱j neꞌej mé so̱ꞌ, ne̱ queneꞌén so̱ꞌ da̱j taj Danj Yaꞌanj Yanj Gue̱e̱, ne̱ yanj yoꞌ me se aꞌvee ꞌyaj mé so̱ꞌ síí cu̱u raa̱, ne̱ cheꞌé dan cuchumán rá so̱ꞌ niꞌya̱j so̱ꞌ man Cristó Jesús, ne̱ nani̱i̱ so̱ꞌ rihaan sayuun ne̱ cavi̱i̱ sa̱ꞌ so̱ꞌ na̱nj ado̱nj.

¹⁶ ꞌO̱ se maꞌa̱n Yaꞌanj quiꞌyaj cachrón nii nu̱ꞌ nana̱ ma̱n rihaan Danj Yaꞌanj ado̱nj. Ne̱ cheꞌé dan vaa se gu̱un ndoꞌo man nana̱ yoꞌ rihaan níꞌ ado̱nj. ꞌO̱ se vaa ndoꞌo rasu̱u̱n nariꞌ níꞌ uno níꞌ nana̱ ma̱n rihaan yanj yoꞌ, ne̱ taj xnaꞌanj yoꞌ rihaan níꞌ cheꞌé cacunꞌ tumé níꞌ, ne̱ axríj yuva̱a̱ yoꞌ man níꞌ cheꞌé cacunꞌ ꞌyaj níꞌ, ne̱ tucuꞌyón yoꞌ man níꞌ da̱j quiꞌya̱j níꞌ veꞌé canoco̱ꞌ níꞌ man Yaꞌanj, ne̱ taj xnaꞌanj yoꞌ rihaan níꞌ da̱j ga̱a̱ sa̱ꞌ nimán níꞌ uún a.

¹⁷ ꞌO̱ se níꞌ si̱j noco̱ꞌ man Yaꞌanj me se da̱nj ga̱a̱ ya̱ níꞌ, ga̱a ne̱ ꞌo̱ caꞌve̱e cu̱nuû nana̱ sa̱ꞌ nimán níꞌ, ne̱ ꞌo̱ quiꞌya̱j níꞌ da̱j a̱ suun sa̱ꞌ ado̱nj.