2 Tesalonicenses 3 - Triqui de San Juan Copala

Me rá nij tuvi̱ꞌ Pabló cachi̱nj niꞌya̱j nij síí noco̱ꞌ man Cristó rihaan Yaꞌanj cheꞌé nij soꞌ a

¹ Dan me se vaa ꞌó nana̱ me rá núj caꞌne̱j núj rihaan soj, tinu̱j, nocoj. ꞌO̱ se me rá núj cachi̱nj niꞌya̱j soj rihaan Yaꞌanj se vaa xnaꞌa̱nj uxrá nij síí cuno̱ snana̱ Síí ꞌNi̱j Raꞌa man níꞌ, ne̱ cata̱j yuvii̱ se vaa sa̱ꞌ uxrá vaa nana̱ yoꞌ, nda̱a vaa cataj soj cheꞌé nana̱ yoꞌ ga̱a cuno maꞌa̱n soj a.

² Ne̱ cachi̱nj niꞌya̱j soj cheꞌé núj se vaa nani̱i̱ núj rihaan nij síí chiꞌi̱i̱ uún á. ꞌO̱ se vaa yuvii̱ ne amán rá niꞌya̱j man Cristó a̱ maan ado̱nj.

Vaa cheꞌé ga̱a̱ nucua̱j rá níꞌ man Síí ꞌNi̱j Raꞌa man níꞌ a

³ ꞌO̱ se vaa cheꞌé ndoꞌo ga̱a̱ nucua̱j rá níꞌ man Síí ꞌNi̱j Raꞌa man níꞌ, ne̱ soꞌ me síí quiꞌya̱j nari̱ꞌ nucuaj rá soj, ne̱ tu̱mé soꞌ man soj se vaa se̱ quiꞌyaj canaán Síí Chre̱e man soj ado̱nj.

⁴ Ne̱ nucua̱j rá núj man Síí ꞌNi̱j Raꞌa man níꞌ se vaa ꞌo̱ ꞌyaj ya̱ soj nu̱ꞌ se vaa cataj núj rihaan soj, ne̱ dan me se veé ꞌo̱ da̱nj ya̱ quiꞌya̱j soj á.

⁵ Ne̱ me rá núj se vaa ra̱cuíj Síí ꞌNi̱j Raꞌa man níꞌ man maꞌa̱n soj da̱j quiꞌya̱j soj, cara̱a̱ cochro̱j soj rihaan Yaꞌanj, ne̱ ꞌo̱ canoco̱ꞌ soj man Yaꞌanj nda̱a vaa quiꞌyaj maꞌa̱n Cristó, ne̱ se̱ caꞌneꞌ rá soj ga̱ suun ꞌyaj da̱nj maꞌ.

Se̱ gaa rmi̱i̱ níꞌ maꞌ

⁶ Cheꞌé se‑chuvi̱i Jesucristó Si̱j ꞌNi̱j Raꞌa man níꞌ, aꞌneꞌ núj ꞌó suun rihaan soj, tinu̱j, nocoj. Dan me se gu̱un yaníj soj rihaan nu̱ꞌ nij tinúú níꞌ nij síí noco̱ꞌ chrej rmi̱i̱ naꞌvej rá quiꞌya̱j suun á. ꞌO̱ se si̱j ne nocoꞌ tucuáán cuchruj núj rihaan me nij soꞌ a̱ maꞌ.

⁷ ꞌO̱ se a̱j neꞌen soj se vaa no̱ xcúún soj quiꞌya̱j soj nda̱a vaa quiꞌyaj núj ga̱a cayáán núj ga̱ soj, ne̱ dan me se ne ga̱a̱ rmi̱i̱ núj ga̱a cayáán núj scaꞌnúj soj maꞌ.

⁸ Ne̱ ne cha̱ u̱u̱n núj rihaan soj maꞌ. ꞌO̱ se nu̱ꞌ se chá núj naruꞌvee núj saꞌanj rihaan soj ado̱nj. Tza̱j ne̱ ꞌo̱ se nuvi̱i niga̱nꞌ quiꞌyaj suun uxrá núj quiri̱ꞌ núj cha̱ núj, ne̱ ne quiꞌya̱j suun soj cheꞌé núj, quiꞌyaj núj maꞌ.

⁹ Dan me se sese guun rá núj cachi̱nj núj se chá rihaan soj, ne̱ caꞌve̱e quiꞌya̱j núj da̱nj, tza̱j ne̱ ne caꞌve̱j rá núj quiꞌya̱j núj da̱nj maꞌ. Ma̱an se guun rá núj cuchru̱j núj tucuáán rihaan soj da̱j quiꞌya̱j maꞌa̱n soj ado̱nj.

¹⁰ ꞌO̱ se ga̱a cayáán núj ga̱ soj, ne̱ caꞌneꞌ núj suun nihánj rihaan soj caꞌmi̱i̱ soj a: Sese vaa ꞌo̱ síí naꞌvej rá quiꞌya̱j suun, ne̱ se̱ chá soꞌ maꞌ, taj núj rihaan soj ado̱nj.

¹¹ A̱j namán nana̱ rihaan núj se vaa ꞌni̱j síí rmi̱i̱ scaꞌnúj soj, ne̱ nij soꞌ me se naꞌvej rá nij soꞌ quiꞌya̱j suun nij soꞌ, tza̱j ne̱ tiguíj rmaꞌa̱n nij soꞌ nana̱ rihaan tuviꞌ nij soꞌ a.

¹² Cheꞌé Jesucristó Si̱j ꞌNi̱j Raꞌa man níꞌ aꞌneꞌ núj suun cuano̱ rihaan yuvii̱ ꞌyaj da̱nj, se vaa dínj ga̱a̱ tuꞌva nij soꞌ, ne̱ quiꞌya̱j suun nij soꞌ, ne̱ quira̱a̱n maꞌa̱n nij soꞌ se chá cha̱ nij soꞌ á.

¹³ Ne̱ xa̱ꞌ maꞌa̱n soj, tza̱j ne̱ se̱ caꞌneꞌ rá soj quiꞌya̱j soj suun sa̱ꞌ, maan tinu̱j, maan nocoj.

¹⁴ Sese ꞌo̱ tuviꞌ soj naꞌvej rá cuno̱ nana̱ cachrón núj rihaan yanj nihánj, ne̱ xca̱j soj cuentá me síí naꞌvej rá cuno̱ nana̱, ne̱ se̱ nica̱j tuviꞌ rcuaꞌa̱a̱n soj ga̱ soꞌ maꞌ. Nda̱a síj, ga̱a ne̱ gu̱un naꞌa̱j soꞌ a.

¹⁵ Tza̱j ne̱ se̱ nachriꞌ soj ni̱ꞌyaj soj man síí rmi̱i̱ yoꞌ maꞌ. Tana̱nj veꞌé quiꞌya̱j soj, nago̱ꞌ soj chrej nucua̱j man soꞌ á. ꞌO̱ se tinúú soj me soꞌ ado̱nj.

Veꞌé cuma̱n nij síí noco̱ꞌ man Cristó ya̱nj chumanꞌ Tesalónica, rá Pabló a

¹⁶ O̱rúnꞌ Síí ꞌNi̱j Raꞌa man níꞌ neꞌen quiꞌya̱j ga̱a̱ xe̱j nimán níꞌ, ne̱ me rá núj ꞌo̱ quiꞌya̱j soꞌ da̱nj cheꞌé soj a. Ne̱ caꞌve̱e se me maꞌa̱n sayuun quira̱nꞌ soj, tza̱j ne̱ dínj ga̱a̱ nimán soj, quiꞌya̱j soꞌ á. Ne̱ me rá núj ca̱yáán Síí ꞌNi̱j Raꞌa man níꞌ ga̱ ta̱ranꞌ soj ado̱nj.

¹⁷ Ma̱ꞌanj si̱j cuꞌna̱j Pabló roꞌ, raꞌaj ma̱ꞌanj achronj nana̱ nihánj se vaa veꞌé cuma̱n soj raj a. Da̱nj ina̱nj ꞌyáá ꞌu̱nj achronj do̱j nana̱ rihaan cunuda̱nj nij yanj cartá aꞌnéé ꞌu̱nj, ne̱ na̱nj vaa letrá achronj a.

¹⁸ Me rá núj quiꞌya̱j ndoꞌo Jesucristó Si̱j ꞌNi̱j Raꞌa man níꞌ se lu̱j cheꞌé cunuda̱nj soj ado̱nj.