2 Tesalonicenses 2 - Triqui de San Juan Copala

Nataꞌ Pabló cheꞌé síí chiꞌi̱i̱ uxrá caꞌna̱ꞌ rihaan chumii̱ a

¹ Dan me se a̱j neꞌen soj se vaa caꞌna̱ꞌ uún Jesucristó Si̱j ꞌNi̱j Raꞌa man níꞌ, ne̱ cunu̱u chre̱ꞌ níꞌ ga̱ soꞌ, tinu̱j, nocoj. Cheꞌé dan rquee̱ núj rihaan soj cuano̱

² se vaa se̱ guun vi̱j raꞌya̱nj rá soj maꞌ. Se̱ caráyaꞌa̱nj soj nana̱ cuno soj se vaa a̱j quisíj güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ maꞌ. Né na̱na̱ ya̱ me nana̱ yoꞌ maꞌ. Caꞌve̱e se nana̱ caꞌmii Nimán Yaꞌanj me yoꞌ taj nii, caꞌve̱e se da̱nj aꞌmii ꞌo̱ síí aꞌmii natáj taj nii, caꞌve̱e se nana̱ cachrón núj rihaan ꞌo̱ yanj cartá me yoꞌ taj nii, tza̱j ne̱ se̱ cuchumán rá soj maꞌ.

³ Dan me se naꞌvej uxrá raj tiha̱ꞌ yuꞌunj nii a̱ doj man soj a̱ maꞌ. Dan me se asino tucua̱j ndoꞌo yuvii̱ rihaan Yaꞌanj, ne̱ caꞌna̱ꞌ ꞌo̱ síí chiꞌi̱i̱ uxrá rihaan chumii̱, ne̱ síí se̱ caꞌvej rá cuno̱ rihaan Yaꞌanj gu̱un soꞌ a. Dan me se xa̱ꞌ soꞌ, tza̱j ne̱ si̱j a̱j caca̱a̱ gu̱un soꞌ vaa güii ado̱nj.

⁴ Dan me se nachri̱ꞌ soꞌ man cunuda̱nj yaꞌanj, ne̱ a̱ ꞌó rasu̱u̱n se̱ caꞌvej rá soꞌ cara̱a̱ gue̱e̱ yuvii̱ rihaan maꞌ. Dan me se catu̱u̱ maꞌa̱n soꞌ nuvií noco̱o ca̱yáán soꞌ rej aráj gue̱e̱ yuvii̱ rihaan Yaꞌanj, ga̱a ne̱ caꞌmi̱i̱ ne̱ soꞌ cata̱j soꞌ se vaa maꞌa̱n soꞌ me Yaꞌanj ado̱nj.

⁵ Sese nanu̱j rá soj, ne̱ nu̱ꞌ nana̱ nihánj me nana̱ cataj xnaꞌanj ꞌu̱nj rihaan soj asi̱j rque̱ doj ga̱a cayáán ꞌu̱nj ga̱ soj ado̱nj.

⁶ Ne̱ a̱j neꞌen soj me rasu̱u̱n aráán chrej rihaan síí chiꞌi̱i̱ yoꞌ, se vaa se̱ caꞌvee caꞌna̱ꞌ soꞌ cuano̱ maꞌ. Dan me se ca̱ráán chrej rihaan soꞌ nda̱a se quisi̱j güii cachrón Yaꞌanj caꞌna̱ꞌ soꞌ, ga̱a ne̱ caꞌna̱ꞌ soꞌ ado̱nj.

⁷ Cuano̱ nihánj a̱j vaa ndoꞌo cacunꞌ ꞌyaj se nucua̱j yuve̱, tza̱j ne̱ ataa queneꞌe̱n níꞌ da̱j ga̱a̱ nu̱ꞌ cacunꞌ quiꞌya̱j síí chiꞌi̱i̱ yoꞌ á. Ne̱ xa̱ꞌ síí aráán chrej caꞌna̱ꞌ síí chiꞌi̱i̱, tza̱j ne̱ vaa güii naxu̱u̱n Yaꞌanj man maꞌa̱n soꞌ ado̱nj.

⁸ Ga̱a ne̱ caꞌna̱ꞌ síí chiꞌi̱i̱ yoꞌ síí naꞌvej rá cuno̱ rihaan Yaꞌanj, ga̱a ne̱ queneꞌe̱n níꞌ da̱j gu̱un ado̱nj. Tza̱j ne̱ asa̱ꞌ caꞌnaꞌ Jesús Si̱j ꞌNi̱j Raꞌa man níꞌ, ne̱ niꞌndaj ya̱ veꞌé chugu̱u̱n soꞌ, ne̱ caꞌya̱nj u̱u̱n soꞌ man síí chiꞌi̱i̱ yoꞌ, ne̱ quiri̱ꞌ nu̱ꞌ síí chiꞌi̱i̱ yoꞌ ado̱nj.

⁹ Síí Chre̱e me síí quiꞌya̱j caꞌna̱ꞌ síí chiꞌi̱i̱ yoꞌ, ne̱ maꞌa̱n Síí Chre̱e quiꞌya̱j gu̱un nucua̱j síí chiꞌi̱i̱ yoꞌ quiꞌya̱j soꞌ da̱j a̱ suun noco̱o ni̱ꞌyaj yuvii̱, cheꞌé yan tiha̱ꞌ yuꞌunj soꞌ man nij yuvii̱ se vaa ya̱ Yaꞌanj me soꞌ a.

¹⁰ Ne̱ nu̱ꞌ se chiꞌi̱i̱ ndoꞌo quiꞌya̱j soꞌ, tiha̱ꞌ yuꞌunj soꞌ man nij yuvii̱ caꞌa̱nj caca̱a̱ nu̱ꞌ cavii nu̱ꞌ caꞌanj a. Ne̱ nij yuvii̱ yoꞌ me se né yuvi̱i̱ aranꞌ rá cuno̱ nana̱ ya̱ nana̱ quiꞌya̱j nani̱i̱ nij soꞌ rihaan sayuun me nij soꞌ maꞌ.

¹¹ Cheꞌé dan maꞌa̱n Yaꞌanj quiꞌya̱j cuchuma̱n rá nij soꞌ nana̱ ne̱, ne̱ canoco̱ꞌ nij soꞌ chrej tihaꞌ yuꞌunj ado̱nj.

¹² Ga̱a ne̱ cata̱j Yaꞌanj se vaa ya̱ síí tumé cacunꞌ me cunuda̱nj nij yuvii̱ ne cuchuma̱n rá nana̱ ya̱, ne̱ ina̱nj chrej chiꞌi̱i̱ niha̱ꞌ rá nij soꞌ canoco̱ꞌ nij soꞌ ado̱nj.

Narii Yaꞌanj man níꞌ canoco̱ꞌ níꞌ man soꞌ a

¹³ Tza̱j ne̱ no̱ xcúún núj niga̱nj cata̱j núj guun niꞌya̱j níꞌ rihaan Yaꞌanj cheꞌé soj si̱j ꞌe̱e̱ rá Síí ꞌNi̱j Raꞌa man níꞌ man, tinu̱j, nocoj. ꞌO̱ se asi̱j tacoo narii Yaꞌanj man soj cunu̱u sa̱ꞌ nimán soj rihaan soꞌ quiꞌya̱j Nimán Yaꞌanj, ne̱ cuchuma̱n rá soj cuno̱ soj nana̱ ya̱ ado̱nj.

¹⁴ Dan me se ga̱a nataꞌ núj nana̱ sa̱ꞌ cheꞌé Cristó rihaan soj, ne̱ canacúún Yaꞌanj man soj se vaa cavi̱i̱ sa̱ꞌ soj ga̱ soꞌ, ne̱ cheꞌé dan da̱j se niꞌndaj ya̱ veꞌé vaa Jesucristó Si̱j ꞌNi̱j Raꞌa man níꞌ roꞌ, da̱nj quisi̱j soj ga̱a̱ soj uún ado̱nj.

¹⁵ Cheꞌé dan canoco̱ꞌ xraan soj tucuáán cuchruj núj rihaan soj ga̱a caꞌmii núj ga̱ soj do̱ꞌ, ga̱a quiꞌyaj núj yanj cartá caꞌnéé núj rihaan soj do̱ꞌ ado̱nj.

^16-17 Ne̱ me rá núj nari̱ꞌ nucuaj nimán soj, quiꞌya̱j maꞌa̱n Jesucristó Si̱j ꞌNi̱j Raꞌa man níꞌ do̱ꞌ, Rej níꞌ Yaꞌanj do̱ꞌ a. Ne̱ Yaꞌanj roꞌ, me síí ꞌe̱e̱ rá man níꞌ, ne̱ quiꞌyaj ndoꞌo soꞌ se lu̱j ga̱ níꞌ se vaa naquiꞌyaj nucua̱j soꞌ nimán níꞌ nu̱ꞌ cavii nu̱ꞌ caꞌanj, ne̱ uun ya̱ rá níꞌ se vaa cavi̱i̱ sa̱ꞌ níꞌ, quiꞌya̱j uún soꞌ ado̱nj. Ne̱ me rá núj gu̱un nucua̱j soj quiꞌya̱j soj nu̱ꞌ suun sa̱ꞌ, ne̱ caꞌmi̱i̱ soj nu̱ꞌ nana̱ sa̱ꞌ, quiꞌya̱j Yaꞌanj ado̱nj.