2 Pedro 3 - Triqui de San Juan Copala

Ta̱j niꞌyo̱n caꞌna̱ꞌ uún Cristó rihaan chumii̱ nihánj a

¹ Nihánj me yanj vi̱j caꞌne̱j ꞌu̱nj rihaan soj, tinu̱j, nocoj. Rihaan ro̱j yanj nihánj tinanuj rá ꞌu̱nj snana̱ Yaꞌanj rihaan soj cheꞌé se me raj xca̱j soj cuentá cheꞌé chrej sa̱ꞌ ado̱nj.

² Me raj ninu̱j rá soj nana̱ caꞌmii nij síí sa̱ꞌ síí nataꞌ snana̱ Yaꞌanj ga̱a naá, ne̱ me raj ninu̱j rá soj suun caꞌneꞌ Jesucristó Si̱j ꞌNi̱j Raꞌa man níꞌ, Si̱j Tinanii man níꞌ rihaan Sayuun, suun narqué núj si̱j cuneꞌ soꞌ caꞌa̱nj nata̱ꞌ snana̱ soꞌ rihaan soj a.

³ Tza̱j ne̱ vaa cheꞌé ndoꞌo xca̱j nij soj cuentá se vaa caꞌna̱ꞌ síí aꞌngaꞌ naco̱o̱ ni̱ꞌyaj man soj asa̱ꞌ nichrunꞌ güii caꞌa̱nj niꞌya̱ chumii̱, ne̱ náá guun se nij gu̱un rá nij soꞌ quiꞌya̱j nij soꞌ a.

⁴ Ga̱a ne̱ cata̱j nij soꞌ nana̱ nihánj rihaan soj a: “Cataj nij síí nataꞌ snana̱ Yaꞌanj ga̱a naá rihaan xi̱i níꞌ se vaa caꞌna̱ꞌ Síí Ti̱nanii man níꞌ rihaan Sayuun rihaan chumii̱ nihánj, tza̱j ne̱ ne caꞌna̱ꞌ uún soꞌ xa̱ꞌ. Veé da̱nj vaa caviꞌ xi̱i níꞌ, ne̱ taj va̱j soꞌ caꞌna̱ꞌ maan asânj. Veé ase vaa chumii̱ ga̱ asino curuviꞌ chumii̱ roꞌ, veé da̱nj vaa gue̱e̱ chumii̱ nda̱a cuano̱ na̱nj asânj”, cata̱j nij soꞌ caꞌnga̱ꞌ naco̱o̱ nij soꞌ rihaan soj a.

⁵ Dan me se da̱nj cata̱j nij soꞌ cheꞌé se naꞌvej rá nij soꞌ xca̱j nij soꞌ cuentá nda̱a vaa curuviꞌ chumii̱ ga̱a naá quiꞌyaj Yaꞌanj na̱nj ado̱nj. ꞌO̱ se caꞌmii Yaꞌanj, ne̱ guun rej xta̱ꞌ, ne̱ curiha̱nj yoꞌóó naco̱o̱ rque na yaꞌa̱nj, ne̱ na me se taj yaꞌanj man chumii̱ chugua̱nj.

⁶ Ga̱a ne̱ ga̱a naá me se caꞌanj niꞌya̱ chumii̱, quiꞌyaj maa̱n do̱ꞌ, na yaꞌa̱nj do̱ꞌ a.

⁷ Tza̱j ne̱ xta̱ꞌ ga̱ chumii̱ ma̱n níꞌ cuano̱ me se maꞌa̱n Yaꞌanj caꞌmii, ne̱ cataj Yaꞌanj se vaa quina̱j ro̱j yoꞌ nda̱a se quisi̱j güii caꞌne̱ꞌ Yaꞌanj cacunꞌ cheꞌé nij síí chiꞌi̱i̱, ga̱a ne̱ nu̱ꞌ cheꞌe̱ caca̱a̱ nij soꞌ chugua̱nj. Ne̱ güii yoꞌ me se caꞌne̱j Yaꞌanj yaꞌan, ne̱ caca̱a̱ nu̱ꞌ xta̱ꞌ ga̱ chumii̱ ma̱n níꞌ cuano̱, ne̱ caꞌa̱nj niꞌya̱ nu̱ꞌ yoꞌ ado̱nj.

⁸ Xca̱j soj cuentá cheꞌé nana̱ nihánj, tinu̱j, nocoj. Ase vaa ꞌo̱ míj yoꞌ vaa o̱rúnꞌ güii rihaan Síí ꞌNi̱j Raꞌa man níꞌ, ne̱ ase vaa o̱rúnꞌ güii vaa ꞌo̱ míj yoꞌ rihaan soꞌ ado̱nj.

⁹ Taꞌa̱j nij yuvii̱ me se gu̱un ra̱a̱n ndoꞌo Yaꞌanj quiꞌya̱j Yaꞌanj nda̱a vaa cataꞌ tuꞌva soꞌ ga̱a naá, rá nij soꞌ, tza̱j ne̱ se̱ guun ra̱a̱n Yaꞌanj maꞌ. Ma̱an se ina̱j nimán Yaꞌanj niꞌya̱j Yaꞌanj man soj, ne̱ naꞌvej rá Yaꞌanj cavi̱ꞌ nimán a̱ ꞌó tuviꞌ soj maꞌ. Tana̱nj me rá soꞌ nuchra̱nꞌ nimán ta̱ranꞌ soj ne̱ ta̱náj xco̱ soj tucuáán chiꞌi̱i̱ chugua̱nj.

¹⁰ Tza̱j ne̱ ta̱j niꞌyo̱n quisi̱j güii caꞌne̱ꞌ Yaꞌanj cacunꞌ cheꞌé yuvii̱ ado̱nj. Dan me se ca̱ri̱i̱n ndoꞌo caꞌa̱nj niꞌya̱ xta̱ꞌ, ne̱ navi̱j nu̱ꞌ nij se ma̱n rej xta̱ꞌ caca̱a̱, ne̱ caꞌa̱nj niꞌya̱ chumii̱ ga̱ nu̱ꞌ se ma̱n rihaan chumii̱ ado̱nj.

¹¹ Cheꞌé se caꞌa̱nj niꞌya̱ chumii̱, cheꞌé dan se̱ guun nano̱ rá soj cheꞌé rasu̱u̱n ma̱n rihaan chumii̱ nihánj maꞌ. Tana̱nj xca̱j soj cuentá cheꞌé da̱j quiꞌya̱j soj canoco̱ꞌ xraan soj man Yaꞌanj á.

¹² Na̱ꞌvi̱j soj quisi̱j güii yoꞌ, ne̱ veꞌé canoco̱ꞌ soj man Yaꞌanj cheꞌé rej raꞌya̱nj doj quisi̱j güii yoꞌ chugua̱nj. Ne̱ güii yoꞌ me se navi̱j nu̱ꞌ xta̱ꞌ caca̱a̱, ne̱ nacune̱ nu̱ꞌ nij rasu̱u̱n ma̱n rej xta̱ꞌ yoꞌ ado̱nj.

¹³ Tza̱j ne̱ a̱j cataꞌ tuꞌva Yaꞌanj se vaa ya̱ ga̱a̱ ꞌó chumii̱ naca̱, ne̱ ga̱a̱ ꞌó rej xta̱ꞌ naca̱, ne̱ ina̱nj se sa̱ꞌ quiꞌya̱j nij síí cuma̱n rej yoꞌ asa̱ꞌ quisíj ado̱nj. Dan me se naꞌvi̱j ndoꞌo níꞌ quisi̱j güii yoꞌ cuaj na̱nj á.

¹⁴ Cheꞌé se naꞌvi̱j níꞌ güii yoꞌ roꞌ, cheꞌé dan doj a̱ te̱rquee̱ soj quiꞌya̱j soj se sa̱ꞌ ina̱nj rihaan Yaꞌanj, ne̱ se̱ gaa na̱nj tu̱mé soj cacunꞌ asa̱ꞌ caꞌnaꞌ uún Cristó na̱nj á. Ne̱ dínj ga̱a̱ nimán soj, tinu̱j, nocoj.

¹⁵ Xca̱j soj cuentá se vaa naꞌvi̱j Yaꞌanj na̱nj cheꞌé se me rá soꞌ nani̱i̱ nij yuvii̱ rihaan chrej chiꞌi̱i̱ do̱ꞌ, rihaan sayuun do̱ꞌ chugua̱nj. Veé da̱nj taj nij nana̱ cachrón tinúꞌ Pabló rihaan yanj caꞌnéé soꞌ rihaan soj, nda̱a vaa chrej cu̱u narqué Yaꞌanj rihaan soꞌ a.

¹⁶ Dan me se da̱j a̱ nij yanj cartá quiꞌyaj Pabló roꞌ, caꞌmii soꞌ cheꞌé rasu̱u̱n nihánj, ne̱ vaa do̱j nana̱ cu̱u sayu̱u̱n cu̱nóꞌ nó rihaan yanj quiꞌyaj soꞌ, ne̱ dan me se nij síí ne neꞌen do̱ꞌ, nij síí uun vi̱j rá me se natuná nij soꞌ snana̱ Pabló, taj nij soꞌ se vaa ino̱ vaa tucuáán tucuꞌyón soꞌ a. Ne̱ da̱nj ꞌyaj nij soꞌ ga̱ ꞌó nij nana̱ no̱ rihaan Danj Yaꞌanj uún, ne̱ cheꞌé dan quira̱nꞌ ndoꞌo nij soꞌ sayuun vaa güii ado̱nj.

¹⁷ A̱j cataj xnaꞌanj ꞌu̱nj rihaan soj cheꞌé nij síí narqué tucuáán ne̱ caꞌna̱ꞌ rihaan soj vaa güii, tinu̱j, nocoj. Cheꞌé dan ta̱dó uxrá soj se̱ gaa na̱nj canoco̱ꞌ soj tucuáán ne̱ narque̱ nij síí naꞌvej rá cuno̱ rihaan Yaꞌanj yoꞌ á. Sese canoco̱ꞌ soj snana̱ nij soꞌ, ne̱ gu̱un vi̱j rá soj, quiꞌya̱j nij soꞌ ado̱nj.

¹⁸ Cheꞌé dan ꞌo̱ gu̱un rá soj ni̱ꞌyaj soj se lu̱j quiꞌyaj Yaꞌanj ga̱ soj, ne̱ ꞌo̱ gu̱un rá soj xca̱j soj cuentá sa̱ꞌ doj cheꞌé Jesucristó Si̱j ꞌNi̱j Raꞌa man níꞌ, Si̱j Tinanii man níꞌ rihaan Sayuun ado̱nj. Cata̱j níꞌ se vaa niꞌndaj ya̱ sa̱ꞌ veꞌé vaa soꞌ cuano̱ do̱ꞌ, nu̱ꞌ cavii nu̱ꞌ caꞌanj do̱ꞌ á. Veé da̱nj ga̱a̱ ya̱ ado̱nj.