2 Pedro 2 - Triqui de San Juan Copala

Caꞌmii Pedró cheꞌé nij síí nago̱ꞌ tucuáán ne̱ a

¹ Tza̱j ne̱ cumán uxrá nij síí ne̱ nataꞌ snana̱ Yaꞌanj ga̱a naá rihaan nij síí israelitá, ne̱ nda̱a rá se vaa nij síí ne̱ ga̱a naá roꞌ, taꞌngaꞌ da̱nj vaa nij síí ne̱ cuchi̱ꞌ rihaan soj narque̱ yuve̱ tucuáán ne̱ rihaan soj ado̱nj. Ne̱ sese cuchuma̱n rá soj, ne̱ quiri̱ꞌ nimán soj a. Dan me se Síí ꞌNi̱j Raꞌa man níꞌ roꞌ, caviꞌ soꞌ cheꞌé rej caꞌve̱e nani̱i̱ nij soꞌ rihaan sayuun, tza̱j ne̱ maꞌa̱n nij soꞌ me se ina̱nj nana̱ ne̱ aꞌmii nij soꞌ cheꞌé Cristó, ne̱ cheꞌé dan quira̱nꞌ raꞌya̱nj ya̱ nij soꞌ sayuun, quiꞌya̱j Yaꞌanj a.

² Tza̱j ne̱ canoco̱ꞌ queꞌe̱e̱ ndoꞌo nij síí amán rá niꞌya̱j man Cristó man nij síí ne̱ yoꞌ, ne̱ quiꞌya̱j ndoꞌo nij soꞌ nu̱ꞌ tucuáán chiꞌi̱i̱ uún, ne̱ cheꞌé tucuáán chiꞌi̱i̱ ꞌyaj nij soꞌ roꞌ, cheꞌé dan caꞌmi̱i̱ nij síí ne nocoꞌ man Yaꞌanj nana̱ qui̱j cheꞌé stucua̱nj Yaꞌanj tucuáán ya̱ ado̱nj.

³ Gu̱un rá nij síí narque̱ tucuáán ne̱ yoꞌ quiꞌya̱j canaán ndoꞌo nij soꞌ saꞌanj, ne̱ cheꞌé dan nano̱ꞌ nij soꞌ nana̱ ne̱ caꞌmi̱i̱ nij soꞌ rihaan nij soj cheꞌé yan rque̱ soj saꞌanj man nij soꞌ a. Tza̱j ne̱ asi̱j naá cataj Yaꞌanj se vaa quira̱nꞌ ndoꞌo nij síí vaa da̱nj sayuun vaa güii, ne̱ ya̱ uxrá quira̱nꞌ nij soꞌ sayuun ado̱nj.

⁴ Dan me se a̱j neꞌen soj se vaa ne cara̱a̱ xꞌnaa Yaꞌanj a̱ rihaan maꞌa̱n nij se‑mo̱zó soꞌ ga̱a quiꞌyaj nij soꞌ cacunꞌ a̱ maꞌ. Tana̱nj ya̱ caꞌnéé Yaꞌanj man nij soꞌ rej cunu̱u̱ ndoꞌo quira̱nꞌ nij soꞌ sayuun, ne̱ numíj Yaꞌanj agaꞌ ne̱ꞌ man nij soꞌ, nagoꞌ Yaꞌanj man nij soꞌ rej rmi̱ꞌ quira̱nꞌ nij soꞌ sayuun, ne̱ dan me se da̱nj ga̱a̱ cuma̱n nij soꞌ nda̱a güii caꞌne̱ꞌ Yaꞌanj cacunꞌ cheꞌé nij soꞌ ado̱nj.

⁵ Ne̱ a̱j neꞌen soj se vaa ne cara̱a̱ xꞌnaa Yaꞌanj a̱ rihaan nij síí cumán ga̱a naá maꞌ. Ma̱an tu̱nj gue̱e̱ nij tuvi̱ꞌ síí cuꞌna̱j Noé síí caꞌmii natáj nana̱ sa̱ꞌ rihaan yuvii̱ se vaa caꞌve̱e cunu̱u sa̱ꞌ nij yuvii̱ rihaan Yaꞌanj roꞌ, ina̱nj nij soꞌ me nij síí nanii rihaan sayuun quiꞌyaj Yaꞌanj, ga̱a caꞌvej rá Yaꞌanj caꞌna̱ꞌ na yaꞌa̱nj, ne̱ canó xráá nij síí chiꞌi̱i̱ ma̱n rihaan chumii̱ nihánj ado̱nj.

⁶ Da̱nj na̱nj uún, ne̱ neꞌen soj se vaa yu̱u̱n cheꞌe̱ cacaa nu̱ꞌ ro̱j chumanꞌ cuꞌna̱j Sodoma ga̱ Gomorra, quiꞌyaj Yaꞌanj uún, ne̱ ina̱nj yaj quináj a. Da̱nj quiꞌyaj Yaꞌanj cheꞌé se guun rá Yaꞌanj xca̱j níꞌ cuentá da̱j quira̱nꞌ nu̱ꞌ nij síí naꞌvej rá cuno̱ rihaan Yaꞌanj a.

⁷ Tza̱j ne̱ tinanii Yaꞌanj man síí cuꞌna̱j Lot rihaan sayuun yoꞌ, cheꞌé se síí nica̱ nimán me Lot, ne̱ quiriꞌ rá Lot cheꞌé se chiꞌi̱i̱ uxrá quiꞌyaj nij síí tucuáá rihaan Yaꞌanj nij síí cumán ro̱j chumanꞌ yoꞌ a.

⁸ Dan me se ga̱a cayáán síí nica̱ nimán yoꞌ chiháán nij soꞌ, ne̱ da̱j a̱ güii queneꞌen soꞌ se chiꞌi̱i̱ quiꞌyaj nij síí chiꞌi̱i̱ yoꞌ, ne̱ cuno soꞌ nu̱ꞌ nana̱ chiꞌi̱i̱ caꞌmii nij soꞌ a. Dan me se quiriꞌ ndoꞌo rá soꞌ a.

⁹ Tza̱j ne̱ Síí ꞌNi̱j Raꞌa man níꞌ me se nacaj soꞌ man nij síí noco̱ꞌ man soꞌ, ne̱ ti̱nanii soꞌ man nij soꞌ rihaan sayuun, ne̱ veé da̱nj gu̱un nucua̱j soꞌ tu̱mé soꞌ man nij síí chiꞌi̱i̱, ne̱ ꞌo̱ quira̱nꞌ nij síí chiꞌi̱i̱ yoꞌ sayuun nda̱a se quisi̱j güii caꞌne̱ꞌ soꞌ cacunꞌ cheꞌé nij soꞌ ado̱nj.

¹⁰ Dan me se táá a̱ quiꞌya̱j soꞌ man nij síí chéé stucua̱nj maꞌa̱n, ne̱ ꞌyaj nij soꞌ nda̱a vaa me rá nee̱ man maꞌa̱n nij soꞌ, ne̱ nachriꞌ nij soꞌ niꞌya̱j nij soꞌ man nu̱ꞌ nij síí uun chij rihaan nij soꞌ ado̱nj. Síí aꞌmii xta̱ꞌ ndoꞌo me nij soꞌ, ne̱ a̱ ꞌó xcoꞌ ne uno nij soꞌ a̱ maꞌ. Ne̱ ne chuꞌviꞌ nij soꞌ caꞌmi̱i̱ nij soꞌ nana̱ nij cheꞌé nij síí me nana̱ uun chij nucua̱j a̱ maꞌ.

¹¹ Ne̱ nda̱ꞌ se si̱j nucua̱j doj me nij se‑mo̱zó Yaꞌanj nij síí noco̱ꞌ sa̱ꞌ man soꞌ rihaan nij síí narqué tucuáán ne̱, tza̱j ne̱ ne quisi̱j rá nij soꞌ cuchi̱ꞌ nij soꞌ rihaan Síí ꞌNi̱j Raꞌa man níꞌ ne̱ cuta̱ꞌ nij soꞌ cacunꞌ xráá nij nana̱ yoꞌ maꞌ.

¹² Ne acaj nij síí narqué tucuáán ne̱ cuentá da̱j vaa nij síí me nana̱ nucua̱j, tza̱j ne̱ aꞌmii nij soꞌ nana̱ nij cheꞌé nij nana̱ nucua̱j yoꞌ ado̱nj. Ase vaa nij xcuu qui̱j ne acaj cuentá vaa nij síí narqué tucuáán ne̱ yoꞌ a. Caꞌngaa nij xcuu qui̱j, na̱nj cheꞌé yan ta̱ꞌaa nii man xcuu ticavi̱ꞌ nii man nij xoꞌ a. Taꞌngaꞌ da̱nj quira̱nꞌ nij soꞌ chugua̱nj.

¹³ Dan me se na̱ruꞌvee Yaꞌanj sayuun rihaan nij soꞌ cheꞌé sayuun quiꞌyaj nij soꞌ man tuviꞌ nij soꞌ ado̱nj. Niha̱ꞌ rá nij soꞌ quiꞌya̱j nij soꞌ se nij rej ranga̱ꞌ, ne̱ veé da̱nj niha̱ꞌ ndoꞌo rá nij soꞌ ga̱a chá nij soꞌ ga̱ soj, ne̱ cheꞌé dan tiriꞌ nij soꞌ man soj ga̱a nuu chre̱ꞌ soj cha̱ soj ado̱nj.

¹⁴ Ina̱nj me rá nij síí narqué tucuáán ne̱ quiꞌya̱j nij soꞌ cacunꞌ ga̱ me maꞌa̱n chana̱ ni̱ꞌyaj nij soꞌ, ne̱ ne aꞌneꞌ rá nij soꞌ ga̱ suun ꞌyaj cacunꞌ a̱ maꞌ. Tihaꞌ yuꞌunj nij soꞌ man nij síí ne nica̱j xraan stucua̱nj Yaꞌanj, ne̱ ꞌo̱ vaa nimán nij soꞌ me rá nij soꞌ ga̱a̱ ndoꞌo rasu̱u̱n rihaan nij soꞌ ado̱nj. Ase vaa xnii mañá ndoꞌo roꞌ, da̱nj vaa nij soꞌ, ne̱ ya̱ quira̱nꞌ ndoꞌo nij soꞌ sayuun vaa güii chugua̱nj.

¹⁵ Tanáj nij soꞌ stucua̱nj Yaꞌanj tucuáán nica̱, ne̱ canocoꞌ nij soꞌ tucuáán ne̱, ne̱ ase vaa quiꞌyaj síí cuꞌna̱j Balaam taꞌníí Beor ga̱a naá roꞌ, da̱nj quiꞌyaj nij soꞌ ado̱nj. Ne̱ Balaam me se cheꞌé se guun rá soꞌ niꞌya̱j soꞌ saꞌanj, ne̱ quiꞌyaj soꞌ cacunꞌ,

¹⁶ tza̱j ne̱ ase vaa aꞌmii yuvii̱ roꞌ, da̱nj caꞌmii daán soꞌ burró rihaan soꞌ, ne̱ cutaꞌ xoꞌ cacunꞌ xráá soꞌ, ne̱ dan me se caráán xoꞌ chrej rihaan soꞌ se̱ quiꞌyaj chiꞌi̱i̱ rmaꞌa̱n soꞌ rihaan Yaꞌanj, quiꞌyaj Yaꞌanj maꞌ.

¹⁷ Ne̱ ase vaa curuj na utunꞌ roꞌ, da̱nj vaa nij soꞌ, ne̱ ase vaa ngaa achén rmaꞌa̱n ꞌyaj nana̱ ne̱ ne amanꞌ maa̱n ꞌyaj roꞌ, da̱nj vaa nij síí narqué tucuáán ne̱ yoꞌ ado̱nj. A̱j cataj Yaꞌanj se vaa cune̱ꞌ Yaꞌanj man nij soꞌ rej rmi̱ꞌ ndoꞌo nu̱ꞌ cavii nu̱ꞌ caꞌanj ado̱nj.

¹⁸ Dan me se aꞌmii xta̱ꞌ ndoꞌo nij soꞌ nana̱ nij rmaꞌa̱n, ne̱ uno nij síí tiha̱j uun yaníj rihaan nij síí ne acaj cuentá ma̱n rihaan chumii̱ nihánj, tza̱j ne̱ nanica̱j nij soꞌ, ne̱ tanáj nij soꞌ chrej sa̱ꞌ, ne̱ ꞌyaj uún nij soꞌ se chiꞌi̱i̱ nda̱a vaa me rá maꞌa̱n nij soꞌ quiꞌya̱j nij soꞌ a.

¹⁹ Ne̱ ataꞌ tuꞌva nij síí narqué tucuáán ne̱ rihaan yuvii̱ a: “Caꞌve̱e quiꞌya̱j soj me maꞌa̱n se me rá soj á”, taj nij síí narqué tucuáán ne̱ rihaan nij síí tiha̱j uun yaníj rihaan nij síí ne acaj cuentá, tza̱j ne̱ maꞌa̱n nij soꞌ me mozó nu̱u̱ rihaan se tiriꞌ ado̱nj. ꞌO̱ se me maꞌa̱n rasu̱u̱n ꞌyaj canaán rihaan yuvii̱ roꞌ, yoꞌ me rasu̱u̱n ꞌyaj suun yuvii̱ rihaan, ne̱ mozó me yuvii̱ rihaan yoꞌ ado̱nj.

²⁰ ꞌO̱ se ga̱a rque̱ me se xcaj nij soꞌ cuentá cheꞌé Jesucristó Si̱j ꞌNi̱j Raꞌa man níꞌ, Si̱j Tinanii man níꞌ rihaan Sayuun, ne̱ nanii nij soꞌ rihaan cunuda̱nj chrej chiꞌi̱i̱ ma̱n rihaan chumii̱ nihánj, quiꞌyaj Jesucristó a. Ne̱ ya̱j nanica̱j nij soꞌ quiꞌyaj uún nij soꞌ se chiꞌi̱i̱, ne̱ nda̱a quiꞌyaj canaán chrej chiꞌi̱i̱ yoꞌ rihaan nij soꞌ a. Dan me se asino ya̱a̱n me se ma̱an taꞌngaꞌ nij vaa nij soꞌ, tza̱j ne̱ ya̱j me se chiꞌi̱i̱ doj vaa nij soꞌ ado̱nj.

²¹ Cavi̱i̱ sa̱ꞌ nij soꞌ doj sese ne queneꞌe̱n nij soꞌ stucua̱nj Yaꞌanj tucuáán nica̱ se vaa ya̱j queneꞌen nij soꞌ stucua̱nj Yaꞌanj, ga̱a ne̱ nanica̱j uún nij soꞌ tanáj nij soꞌ tucuáán gue̱e̱ nagoꞌ Yaꞌanj man nij soꞌ tza̱j ado̱nj.

²² Ase vaa ꞌyaj nij soꞌ vaa nana̱ ya̱ nihánj a: “Uchráán chuvee, ga̱a ne̱ anica̱j uún xoꞌ chá xoꞌ se cuchráán xoꞌ a”, ne̱ vaa ꞌo̱ nana̱ aꞌmii cheꞌé xcáá uún taj a: “Quisíj cane xcáá na sa̱ꞌ, ga̱a ne̱ anica̱j uún xoꞌ natúj xoꞌ rá siguiꞌ a”, vaa ꞌó nana̱ taj xnaꞌanj da̱j ꞌyaj nij síí narqué tucuáán ne̱ yoꞌ a.