2 Pedro 1 - Triqui de San Juan Copala

¹ ꞌU̱nj roꞌ, me síí cuꞌna̱j Simón Pedró, síí nu̱u̱ rihaan Jesucristó, ne̱ síí cuneꞌ soꞌ caꞌa̱nj nata̱ꞌ snana̱ soꞌ rihaan yuvii̱ mej, ne̱ qui̱ꞌyáá ꞌu̱nj yanj nihánj caꞌne̱j ꞌu̱nj rihaan soj si̱j noco̱ꞌ man Cristó, ne̱ dan me se cuya̱a̱n vaa yuꞌvee nó soj ga̱ núj rihaan Yaꞌanj ado̱nj. Dan me se síí nica̱ nimán me Jesucristó, ne̱ amán rá soj ga̱ núj niꞌya̱j soj man Yaꞌanj, ꞌyaj Jesucristó, ne̱ soꞌ roꞌ, me Taꞌanj níꞌ, ne̱ soꞌ me Síí Tinanii man níꞌ rihaan Sayuun ado̱nj.

² Me rá ꞌu̱nj ya̱ queneꞌe̱n soj man Yaꞌanj do̱ꞌ, man Jesús Si̱j ꞌNi̱j Raꞌa man níꞌ do̱ꞌ, ga̱a ne̱ caꞌve̱e quiri̱ꞌ ndoꞌo soj se lu̱j ne̱ ga̱a̱ xe̱j nimán soj, quiꞌya̱j ro̱j soꞌ ado̱nj.

Da̱j quiꞌya̱j níꞌ ne̱ canoco̱ꞌ xraan níꞌ man Cristó a

³ Dan me se niꞌndaj ya̱ veꞌé vaa Yaꞌanj ne̱ niꞌndaj ya̱ sa̱ꞌ rá soꞌ, ne̱ cheꞌé dan canacúún ya̱ soꞌ man níꞌ canoco̱ꞌ níꞌ man soꞌ a. Ne̱ cheꞌé se neꞌen ya̱ níꞌ man soꞌ, ne̱ racuíj snucua̱j soꞌ man níꞌ ca̱yáán sa̱ꞌ níꞌ ga̱ soꞌ, ne̱ veꞌé canoco̱ꞌ níꞌ man soꞌ ado̱nj.

⁴ Ne̱ cheꞌé dan cataꞌ tuꞌva soꞌ cheꞌé niꞌndaj ya̱ nij se lu̱j quiꞌya̱j ndoꞌo soꞌ ga̱ níꞌ, cheꞌé rej caꞌve̱e nani̱i̱ soj rihaan se chiꞌi̱i̱ nu̱u̱ nimán nij síí ma̱n rihaan chumii̱ nihánj, ne̱ ase vaa maꞌa̱n Yaꞌanj roꞌ, da̱nj ga̱a̱ soj a.

⁵ Ne̱ cheꞌé dan soj si̱j amán rá niꞌya̱j man Cristó me se ꞌo̱ naquiꞌya̱j cu̱u soj cheꞌé stucua̱nj Yaꞌanj, ne̱ naquiꞌya̱j sca̱ꞌ ndoꞌo soj nimán soj á. Ne̱ asa̱ꞌ guun sca̱ꞌ nimán soj, ga̱a ne̱ rquee̱ soj xca̱j soj cuentá sa̱ꞌ doj cheꞌé snana̱ Yaꞌanj á.

⁶ Ne̱ asa̱ꞌ queneꞌen sa̱ꞌ soj snana̱ Yaꞌanj, ga̱a ne̱ te̱rquee̱ soj gu̱un soj síí tumé sa̱ꞌ man maꞌa̱n da̱j quiꞌya̱j maꞌa̱n soj á. Ne̱ asa̱ꞌ quisíj tumé sa̱ꞌ soj man maꞌa̱n soj, ga̱a ne̱ te̱rquee̱ soj gu̱un nucua̱j nimán soj rihaan sayuun á. Ne̱ asa̱ꞌ quisíj guun nucua̱j nimán soj rihaan sayuun, ga̱a ne̱ te̱rquee̱ soj quiꞌya̱j soj nda̱a vaa me rá Yaꞌanj quiꞌya̱j soj á.

⁷ Ne̱ asa̱ꞌ quisíj nariꞌ soj quiꞌya̱j soj nda̱a vaa me rá Yaꞌanj, ga̱a ne̱ te̱rquee̱ soj cunu̱u niꞌya̱nj nimán soj á. Ne̱ asa̱ꞌ quisíj cunuu niꞌya̱nj nimán soj, ga̱a ne̱ te̱rquee̱ soj cunu̱u ꞌe̱e̱ rá soj ni̱ꞌyaj soj tuviꞌ soj á.

⁸ Dan me se sese doj a̱ doj a̱ nari̱ꞌ soj quiꞌya̱j soj nu̱ꞌ da̱nj da̱j a̱ güii, ga̱a ne̱ se̱ caꞌvee gu̱un soj síí niꞌyo̱n síí ne neꞌen quiꞌya̱j se‑su̱u̱n Yaꞌanj a̱ maꞌ. Tana̱nj sa̱ꞌ uxrá doj queneꞌe̱n soj man Jesucristó Si̱j ꞌNi̱j Raꞌa man níꞌ ado̱nj.

⁹ Tza̱j ne̱ síí ataa nari̱ꞌ quiꞌya̱j nu̱ꞌ nda̱a vaa taj ꞌu̱nj nihánj me se ase vaa síí ne ruviꞌ ga̱nꞌ niꞌya̱j vaa soꞌ, ne̱ ase vaa síí tuchri̱i vaa soꞌ, ne̱ nichru̱nꞌ yáj tacúún soꞌ ruviꞌ niꞌya̱j soꞌ, ne̱ taj se ꞌyáꞌ xca̱j soꞌ cuentá cheꞌé nij rasu̱u̱n noco̱o doj a̱ maan ado̱nj. Ne̱ dan me se niꞌyón soꞌ nu̱ꞌ cacunꞌ naruvii xráá soꞌ ga̱a rque̱ na̱nj ado̱nj.

¹⁰ Cheꞌé dan me doj a̱ te̱rquee̱ ndoꞌo soj canoco̱ꞌ xraan soj man Yaꞌanj, tinu̱j, nocoj. Dan, ga̱a ne̱ queneꞌe̱n ya̱ soj se vaa nacúún Yaꞌanj man soj ne̱ narii Yaꞌanj man soj cavi̱i̱ sa̱ꞌ soj ga̱ soꞌ, ne̱ daj chiha̱a̱ míj se̱ quiriꞌ soj rihaan Yaꞌanj maꞌ.

¹¹ Ga̱a ne̱ veꞌé uxrá cuchi̱ꞌ sa̱ꞌ soj rej gu̱un chij Jesucristó Si̱j ꞌNi̱j Raꞌa man níꞌ, Si̱j Tinanii man níꞌ rihaan Sayuun, nu̱ꞌ cavii nu̱ꞌ caꞌanj chugua̱nj.

¹² Cheꞌé dan nda̱ꞌ se a̱j neꞌen soj nana̱ nihánj, ne̱ nda̱ꞌ se a̱j xraan canocoꞌ soj snana̱ Yaꞌanj nana̱ ya̱ vaa rihaan soj, tza̱j ne̱ nano̱ niga̱nj ꞌu̱nj nana̱ nihánj rihaan soj se̱ gaa na̱nj niꞌyo̱n soj ado̱nj.

¹³ Vaa cheꞌé ndoꞌo nano̱j nana̱ nihánj rihaan soj ya̱j ga̱a vaa iꞌna̱ꞌ ꞌu̱nj rihaan chumii̱ nihánj, raj chugua̱nj.

¹⁴ ꞌO̱ se a̱j neꞌenj se vaa nichrunꞌ cavi̱ꞌ ꞌu̱nj, nda̱a vaa cataj Jesucristó Si̱j ꞌNi̱j Raꞌa man níꞌ rihanj,

¹⁵ ne̱ cheꞌé dan ꞌo̱ qui̱ꞌyáj nda̱a da̱j a̱ caꞌve̱e maꞌa̱n, ga̱a ne̱ nda̱ꞌ se cavi̱ꞌ ꞌu̱nj, tza̱j ne̱ ꞌo̱ cu̱nuû rá soj nana̱ sa̱ꞌ nihánj ado̱nj.

Queneꞌen nij tuvi̱ꞌ Pedró se vaa síí uun chij me Cristó a

¹⁶ ꞌO̱ se ga̱a cataj xnaꞌanj núj rihaan soj se vaa caꞌna̱ꞌ uún Jesucristó Si̱j ꞌNi̱j Raꞌa man níꞌ rihaan chumii̱ nihánj ne̱ ga̱a̱ nucua̱j ndoꞌo soꞌ asa̱ꞌ caꞌnaꞌ soꞌ, ne̱ né cue̱ntó avii raa̱ maꞌa̱n núj me yoꞌ maꞌ. Rihaan maꞌa̱n núj queneꞌen núj se vaa niꞌndaj ya̱ veꞌé vaa soꞌ ado̱nj.

¹⁷ Niꞌndaj ya̱ sa̱ꞌ veꞌé cavii soꞌ ne̱ veꞌé uxrá caꞌmii cochro̱j Yaꞌanj cheꞌé soꞌ, ga̱a caꞌmii Yaꞌanj nana̱ nihánj rihaan soꞌ rque ngaa chuguu̱n a: “Taꞌníí ꞌu̱nj síí ꞌe̱e̱ ndoꞌo raj man me soꞌ, ne̱ aranꞌ rá nimanj niꞌya̱j ꞌu̱nj man soꞌ ado̱nj”, taj Yaꞌanj ado̱nj.

¹⁸ Xréé maꞌa̱n núj cuno núj nana̱ nihánj nana̱ cavii rej xta̱ꞌ ga̱a cumán núj xráá quij gue̱e̱ ga̱ soꞌ ado̱nj.

¹⁹ Cheꞌé se vaa queneꞌen núj, cheꞌé dan doj a̱ amán rá núj nana̱ cachrón nij síí nataꞌ snana̱ Yaꞌanj ga̱a naá chugua̱nj. Ne̱ sa̱ꞌ quiꞌya̱j soj, sese xca̱j maꞌa̱n soj cuentá cheꞌé nana̱ caꞌmii nij soꞌ ado̱nj. ꞌO̱ se ase vaa yaꞌan chuguu̱n racuíj man nij síí ya̱nj rej rmi̱ꞌ roꞌ, da̱nj vaa snana̱ nij soꞌ, racuíj yoꞌ man níꞌ ga̱a yáán níꞌ chumii̱ nihánj ado̱nj. Snana̱ nij soꞌ me se racuíj yoꞌ man níꞌ nda̱a neꞌen níꞌ man Cristó, ne̱ ase vaa yatiꞌ xtaꞌngaa chuguu̱n ga̱a nichrunꞌ rá ranga̱ꞌ roꞌ, da̱nj vaa soꞌ ado̱nj.

²⁰ Ma̱an se asino ya̱a̱n xca̱j soj cuentá cheꞌé snana̱ nij síí nataꞌ snana̱ Yaꞌanj ga̱a naá, ne̱ né ra̱a̱ maꞌa̱n nij soꞌ cavii nana̱ cachrón nij soꞌ rihaan yanj maꞌ.

²¹ ꞌO̱ se a̱ ꞌó yuvii̱ ne quiꞌya̱j caꞌnaꞌ snana̱ Yaꞌanj rihaan chumii̱ nihánj cuno̱ ꞌó nij yuvii̱ maꞌ. Ma̱an se narii Yaꞌanj man nij yuvii̱ cata̱j xnaꞌanj nana̱ rqué Nimán Yaꞌanj man nij soꞌ na̱nj ado̱nj.