2 Juan 1 - Triqui de San Juan Copala

¹ Síí chii nga̱ mej, ne̱ achrón ꞌu̱nj yanj nihánj naya̱a̱ ta̱ranꞌ soj xꞌneꞌ nij síí narii Yaꞌanj a. Dan me se ꞌe̱e̱ raj man soj, cheꞌé se si̱j noco̱ꞌ nana̱ ya̱ me ta̱ranꞌ níꞌ a. Ne̱ né o̱rúnꞌ ꞌu̱nj me síí ꞌe̱e̱ rá man soj maꞌ. ꞌO̱ se ta̱ranꞌ nij síí neꞌen nana̱ ya̱ ꞌe̱e̱ rá man soj ado̱nj.

² ꞌE̱e̱ rá núj man soj cheꞌé se nu̱u̱ nana̱ ya̱ nimán níꞌ, ne̱ ꞌo̱ cu̱nuû nana̱ ya̱ yoꞌ nimán níꞌ nu̱ꞌ cavii nu̱ꞌ caꞌanj chugua̱nj.

³ Ne̱ me rá ꞌu̱nj quiꞌya̱j Rej níꞌ Yaꞌanj do̱ꞌ, Taꞌníí soꞌ Jesucristó do̱ꞌ, se lu̱j cheꞌé nij soj a. Ne̱ me rá ꞌu̱nj cunu̱u ꞌe̱e̱ rá ro̱j soꞌ ni̱ꞌyaj ro̱j soꞌ man soj, ne̱ me rá ꞌu̱nj ga̱a̱ xe̱j nimán soj quiꞌya̱j ro̱j soꞌ, ne̱ ꞌo̱ canoco̱ꞌ soj nana̱ ya̱ ne̱ ga̱a̱ ꞌe̱e̱ rá soj man tuviꞌ soj á.

ꞌO̱ cuno̱ níꞌ suun caꞌneꞌ Yaꞌanj rihaan níꞌ, ne̱ ga̱a̱ ꞌe̱e̱ rá níꞌ man tuviꞌ níꞌ á

⁴ Guun niha̱ꞌ uxrá raj, cheꞌé se xcaj ꞌu̱nj cuentá se vaa taꞌa̱j nij soj me síí ꞌo̱ nocoꞌ tucuáán ya̱, nda̱a vaa suun caꞌneꞌ Rej níꞌ Yaꞌanj rihaan níꞌ cuno̱ níꞌ chugua̱nj.

⁵ Ne̱ nihánj me se achíín ni̱ꞌyáá ꞌu̱nj rihaan soj se vaa quiꞌya̱j nij soj nda̱a vaa caꞌneꞌ Yaꞌanj suun rihaan níꞌ a. Ne̱ né su̱u̱n naca̱ me suun nihánj maꞌ. Tana̱nj suun caꞌneꞌ Yaꞌanj rihaan níꞌ asi̱j guun cheꞌe̱ níꞌ canocoꞌ níꞌ man soꞌ me se vaa ga̱a̱ ꞌe̱e̱ rá níꞌ man tuviꞌ níꞌ a.

⁶ Sese ꞌo̱ ꞌe̱e̱ rá níꞌ man tuviꞌ níꞌ, ne̱ síí ꞌyaj nda̱a vaa taj suun caꞌneꞌ Yaꞌanj rihaan me níꞌ ado̱nj. Ne̱ yoꞌ me suun caꞌneꞌ soꞌ rihaan níꞌ asi̱j guun cheꞌe̱ níꞌ canocoꞌ níꞌ man soꞌ, ne̱ me rá soꞌ ꞌo̱ quiꞌya̱j níꞌ suun yoꞌ ado̱nj.

⁷ ꞌO̱ se ya̱j me se curiha̱nj ndoꞌo nij síí tihaꞌ yuꞌunj rihaan chumii̱ nihánj, ne̱ cataj nij soꞌ se vaa né si̱j guun yuvii̱ me Jesucristó a. Síí aꞌmii da̱nj me se síí tihaꞌ yuꞌunj aꞌmii nana̱ ne̱ do̱ꞌ, síí ta̱j riꞌyunj man Cristó do̱ꞌ, me soꞌ a.

⁸ Tu̱mé ndoꞌo soj man soj se̱ gaa na̱nj caꞌanj niꞌya̱ nu̱ꞌ nij suun sa̱ꞌ quiꞌyaj canaán soj á. Tana̱nj veꞌé na̱ruꞌvee Yaꞌanj rihaan soj ado̱nj.

⁹ Ne̱ me maꞌa̱n síí tanáj stucua̱nj Cristó roꞌ, nuviꞌ Yaꞌanj yáán ga̱ soꞌ maꞌ. Tza̱j ne̱ síí noco̱ꞌ xraan stucua̱nj Cristó me se soꞌ me síí ꞌo̱ yáán ro̱j Taꞌni̱j Yaꞌanj ga̱ soꞌ ado̱nj.

¹⁰ Ne̱ sese caꞌna̱ꞌ ꞌo̱ síí tucuꞌyón ꞌó tucuáán rej ya̱nj soj, ne̱ se̱ caꞌvej rá soj catu̱u̱ soꞌ rihaan soj, ne̱ se̱ caꞌmii sa̱ꞌ soj ga̱ soꞌ maꞌ.

¹¹ ꞌO̱ se síí aꞌmii sa̱ꞌ ga̱ soꞌ me síí racuíj man soꞌ quiꞌya̱j soꞌ se chiꞌi̱i̱ ado̱nj.

Me rá Juan cuchi̱ꞌ soꞌ rej ya̱nj nij soꞌ a

¹² Vaa ndoꞌo nana̱ me rá ꞌu̱nj cata̱j xnaꞌanj ꞌu̱nj rihaan soj, tza̱j ne̱ naꞌvej rá ꞌu̱nj cachro̱n ꞌu̱nj cunuda̱nj nij nana̱ rihaan yanj maꞌ. Tza̱j ne̱ me raj cuchi̱j rihaan soj, ga̱a ne̱ caꞌve̱e caꞌmi̱i̱ rihaan tuviꞌ ya̱ níꞌ, ga̱a ne̱ gu̱un niha̱ꞌ uxrá rá nimán níꞌ ga̱a nari̱ꞌ tuviꞌ níꞌ chugua̱nj.

¹³ Ne̱ nij síí narii Yaꞌanj ya̱nj chumanꞌ nihánj roꞌ, me rá ta̱ranꞌ nij soꞌ se vaa veꞌé ca̱yáán ta̱ranꞌ soj na̱nj á.