2 Corintios 9 - Triqui de San Juan Copala

¹ Taj cheꞌé cachro̱n ꞌu̱nj doj nana̱ rihaan soj cheꞌé saꞌanj rque̱ soj rihaan nij síí noco̱ꞌ man Cristó maꞌ.

² ꞌO̱ se a̱j neꞌén ꞌu̱nj se vaa guun niha̱ꞌ rá soj rque̱ soj saꞌanj rihaan nij soꞌ, ne̱ veꞌé caꞌmii ꞌu̱nj rihaan nij tinúú níꞌ síí ma̱n estadó Macedonia cheꞌé soj, cataj ꞌu̱nj se vaa asi̱j goj a̱j guun cheꞌe̱ nij soj si̱j ma̱n estadó Acaya racuíj nij soj man nij síí noco̱ꞌ man Cristó, ga̱a ne̱ guun niha̱ꞌ doj rá noco̱o doj nij soꞌ rque̱ maꞌa̱n nij soꞌ saꞌanj a.

³ Tza̱j ne̱ caꞌne̱j ꞌu̱nj nij tinúú níꞌ cuchi̱ꞌ nij soꞌ rihaan soj, ne̱ ra̱cuíj nij soꞌ man soj quiꞌya̱j soj nu̱ꞌ se vaa cataj xnaꞌanj ꞌu̱nj cheꞌé soj rihaan nij síí ma̱n estadó Macedonia a. Me rá ꞌu̱nj ra̱cuíj nij soꞌ man soj naquiꞌya̱j chre̱ꞌ soj saꞌanj yoꞌ, ga̱a ne̱ quisi̱j ya̱ nu̱ꞌ nana̱ caꞌmii núj cheꞌé soj, raj a.

⁴ ꞌO̱ se sese cuchi̱ꞌ taꞌa̱j nij síí ma̱n estadó Macedonia chiháán soj ga̱ núj, ne̱ sese xca̱j nij soꞌ cuentá se vaa taj va̱j saꞌanj nuu chre̱ꞌ quiꞌyaj soj, ne̱ gu̱un naꞌa̱j uxrá núj ado̱nj. Ne̱ gu̱un naꞌa̱j doj maꞌa̱n soj cheꞌé nana̱ caꞌmii núj se vaa guun ya̱ rá núj se vaa rque̱ soj saꞌanj ado̱nj.

⁵ Cheꞌé dan guun rá núj se vaa caꞌne̱j núj man nij tinúú níꞌ cuchi̱ꞌ nij soꞌ rihaan soj chugua̱nj. Dan me se asino ya̱a̱n cuchi̱ꞌ nij tinúú níꞌ, ne̱ ra̱cuíj nij soꞌ man soj naquiꞌya̱j chre̱ꞌ soj saꞌanj yoꞌ, ne̱ asa̱ꞌ cuchiꞌ núj, ga̱a ne̱ a̱j cunuu chre̱ꞌ saꞌanj yoꞌ a. ꞌO̱ se da̱nj quiꞌya̱j soj, ga̱a ne̱ se̱ guun rá nij síí ma̱n Macedonia se vaa naꞌvej rá soj quiꞌya̱j soj se vaa cataj soj a. ꞌO̱ se queneꞌe̱n nij soꞌ se vaa ya̱ me rá soj quiꞌya̱j soj nu̱ꞌ suun yoꞌ ado̱nj.

⁶ Dan me se neꞌen soj se vaa síí unô do̱j tzínꞌ ꞌnúú roꞌ, do̱j ꞌnúú quiri̱i̱ soꞌ, ne̱ síí unô noco̱o uxrá ꞌnúú roꞌ, noco̱o uxrá ꞌnúú quiri̱i̱ soꞌ, ne̱ ase vaa ranꞌ síí unô ꞌnúú roꞌ, da̱nj quira̱nꞌ soj cheꞌé saꞌanj rque̱ soj vaa ado̱nj.

⁷ Nuchru̱j ra̱a̱ ꞌo̱ ꞌo̱ soj me daj saꞌanj rque̱ ꞌo̱ soj, ne̱ se̱ quinanó rá soj cheꞌé saꞌanj rque̱ soj maꞌ. Se̱ cataj soj se vaa ma̱an cheꞌé se no̱ xcúún soj rque̱ soj saꞌanj, cheꞌé dan rque̱ soj maꞌ. Cheꞌé dan ina̱nj saꞌanj rii nimán soj roꞌ, rque̱ soj á. ꞌO̱ se síí niha̱ꞌ rá rque̱ saꞌanj rihaan tinúú roꞌ, ꞌe̱e̱ rá Yaꞌanj man soꞌ ado̱nj.

⁸ Ne̱ gu̱un nucua̱j Yaꞌanj quiꞌya̱j ndoꞌo Yaꞌanj nu̱ꞌ se lu̱j ga̱ soj, ne̱ niga̱nj ga̱a̱ nu̱ꞌ se cachi̱in man soj, cheꞌé yan gu̱un nucua̱j soj quiꞌya̱j soj nu̱ꞌ suun sa̱ꞌ caꞌne̱ꞌ Yaꞌanj rihaan soj chugua̱nj.

⁹ Ase vaa nana̱ nihánj vaa nana̱ no̱ rihaan Danj Yaꞌanj, taj yoꞌ a: Síí niha̱ꞌ rá ra̱cuíj man nij síí nique̱ roꞌ, daj chiha̱a̱ míj se̱ niꞌyón Yaꞌanj se sa̱ꞌ quiꞌyaj soꞌ a̱ maꞌ, taj Danj Yaꞌanj a.

¹⁰ Dan me se Yaꞌanj me síí rqué ꞌnúú rihaan síí unô naa̱, ne̱ Yaꞌanj me síí rqué se chá rihaan síí naꞌaan rque a. Ne̱ cavi̱i̱ sa̱ꞌ uxrá nij tinúú níꞌ cheꞌé se sa̱ꞌ quiꞌya̱j soj, quiꞌya̱j uún Yaꞌanj ado̱nj.

¹¹ Ne̱ da̱j a̱ se sa̱ꞌ quiꞌya̱j Yaꞌanj ga̱ soj, ga̱a ne̱ gu̱un niha̱ꞌ doj rá soj ra̱cuíj soj man tinúú níꞌ, ne̱ cata̱j tinúú níꞌ guun niꞌya̱j níꞌ rihaan Yaꞌanj cheꞌé se vaa rqué soj saꞌanj man núj ta̱cuachén núj rihaan nij soꞌ a.

¹² Ne̱ xa̱ꞌ suun quiꞌya̱j níꞌ cheꞌé tinúú níꞌ, tza̱j ne̱ né ina̱nj suun quiꞌya̱j cara̱a rque nij síí noco̱ꞌ man Cristó me yoꞌ maꞌ. ꞌO̱ se cheꞌé suun sa̱ꞌ quiꞌya̱j níꞌ roꞌ, cata̱j ndoꞌo yuvii̱ guun niꞌya̱j níꞌ rihaan Yaꞌanj ado̱nj.

¹³ Ne̱ queneꞌe̱n nij yuvii̱ se vaa ya̱ uno soj nana̱ sa̱ꞌ cheꞌé Cristó nana̱ sa̱ꞌ noco̱ꞌ níꞌ, ne̱ queneꞌe̱n nij yuvii̱ se vaa niha̱ꞌ rá soj rque̱ soj siꞌyaj soj man nij síí noco̱ꞌ man Cristó ya̱nj chumanꞌ Jerusalén do̱ꞌ, man ta̱ranꞌ nij tinúú níꞌ do̱ꞌ, ne̱ cheꞌé dan gu̱un ya̱ rá nij soꞌ se vaa ya̱ ya̱ si̱j noco̱ꞌ man Yaꞌanj me soj, ne̱ veꞌé uxrá caꞌmi̱i̱ nij soꞌ cheꞌé Yaꞌanj a.

¹⁴ Ne̱ cunu̱u ꞌe̱e̱ rá maꞌa̱n nij tinúú níꞌ ma̱n chumanꞌ Jerusalén man soj, ne̱ cachi̱nj niꞌya̱j nij soꞌ rihaan Yaꞌanj cheꞌé soj, cheꞌé se uxrá racuíj Yaꞌanj man soj ra̱cuíj soj man nij soꞌ na̱nj á.

¹⁵ Cata̱j uxrá níꞌ guun niꞌya̱j níꞌ rihaan Yaꞌanj cheꞌé se veꞌé uxrá quiꞌyaj Yaꞌanj cheꞌé níꞌ, ne̱ daj chiha̱a̱ míj se̱ guun nucua̱j níꞌ cata̱j níꞌ nu̱ꞌ se vaa quiꞌyaj Yaꞌanj cheꞌé níꞌ a̱ maꞌ.