2 Corintios 8 - Triqui de San Juan Copala

Caꞌmii Pabló cheꞌé saꞌanj rque̱ nij síí ma̱n Corinto rihaan nij síí ma̱n Jerusalén a

¹ Ne̱ cata̱j xnaꞌanj núj rihaan soj cheꞌé se lu̱j quiꞌyaj Yaꞌanj ga̱ nij xꞌneꞌ nij síí noco̱ꞌ man Cristó ma̱n estadó Macedonia, tinu̱j, nocoj.

² Dan me se quiranꞌ uxrá nij soꞌ sayuun, tza̱j ne̱ guun niha̱ꞌ uxrá rá nimán nij soꞌ, ne̱ nda̱ꞌ se síí nique̱ ndoꞌo me nij soꞌ, tza̱j ne̱ guun niha̱ꞌ rá nij soꞌ rque̱ nij soꞌ saꞌanj rihaan tinúú nij soꞌ síí nique̱ a. Nda̱ꞌ rá se ꞌyaj síí ruꞌvee ꞌyaj nij soꞌ na̱nj ado̱nj.

³ Dan me se cavii raa̱ maꞌa̱n nij soꞌ rque̱ nij soꞌ nu̱ꞌ se vaa guun nucua̱j nij soꞌ rque̱ nij soꞌ a. Né si̱j vaa ndoꞌo saꞌanj rihaan me nij soꞌ, tza̱j ne̱ rqué nij soꞌ noco̱o saꞌanj ado̱nj.

⁴ Ne̱ cachíín niꞌya̱j uxrá nij soꞌ rihaan núj se vaa quiꞌya̱j núj se ndoꞌo caꞌve̱j núj quiꞌya̱j nij soꞌ nda̱a vaa quiꞌyaj ꞌó nij tinúú níꞌ síí rqué saꞌanj rihaan ꞌó nij síí noco̱ꞌ man Cristó,

⁵ ne̱ doj a̱ quiꞌyaj nij soꞌ rihaan se vaa me rá núj quiꞌya̱j nij soꞌ na̱nj chugua̱nj. Dan me se asino ya̱a̱n guun rá nij soꞌ quiꞌya̱j nij soꞌ nu̱ꞌ se vaa me rá Síí ꞌNi̱j Raꞌa man níꞌ quiꞌya̱j nij soꞌ, ga̱a ne̱ guun rá uún nij soꞌ quiꞌya̱j nij soꞌ nu̱ꞌ se vaa me rá núj quiꞌya̱j nij soꞌ, ne̱ dan me se sa̱ꞌ uxrá cuno nij soꞌ rihaan Yaꞌanj na̱nj ado̱nj.

⁶ Cheꞌé dan rquee̱ núj rihaan síí cuꞌna̱j Titó se vaa cuchi̱ꞌ soꞌ rihaan soj si̱j ya̱nj chumanꞌ Corinto, ne̱ cata̱j soꞌ se vaa ase vaa quiꞌyaj nij síí ma̱n estadó Macedonia roꞌ, da̱nj ga̱a̱ caꞌve̱e quiꞌya̱j maꞌa̱n nij soj uún, ga̱a ne̱ quisi̱j rqué ta̱ranꞌ soj saꞌanj rihaan nij síí nique̱ yoꞌ á.

⁷ Dan me se ꞌyaj ndoꞌo nij soj nu̱ꞌ suun sa̱ꞌ ado̱nj. ꞌO̱ se veé da̱nj síí nucua̱j ndoꞌo rá man Cristó do̱ꞌ, síí aꞌmii sa̱ꞌ do̱ꞌ, síí avii raa̱ do̱ꞌ, síí niha̱ꞌ rá quiꞌya̱j suun do̱ꞌ, síí ꞌe̱e̱ rá man núj do̱ꞌ, me soj ado̱nj. Ne̱ ase vaa ꞌyaj ndoꞌo nij soj nu̱ꞌ suun sa̱ꞌ yoꞌ roꞌ, taꞌngaꞌ da̱nj quiꞌya̱j soj ga̱ suun rque̱ ndoꞌo saꞌanj rihaan tinúú á.

⁸ Se̱ caꞌnéꞌ ꞌu̱nj suun rihaan soj da̱j quiꞌya̱j soj maꞌ. Ma̱an se me rá ꞌu̱nj xca̱j ꞌu̱nj cuentá sese ya̱ ya̱ ꞌe̱e̱ rá soj tinúú soj nda̱a vaa ꞌe̱e̱ rá nij síí ma̱n Macedonia tinúú nij soꞌ a.

⁹ ꞌO̱ se a̱j neꞌen soj se vaa quiꞌyaj ndoꞌo Jesucristó Si̱j ꞌNi̱j Raꞌa man níꞌ se lu̱j ga̱ níꞌ á. Dan me se ruꞌve̱e̱ ndoꞌo soꞌ ga̱a cayáán soꞌ rej xta̱ꞌ, tza̱j ne̱ naquiꞌyaj nique̱ soꞌ man soꞌ ne̱ caꞌnaꞌ soꞌ rihaan chumii̱ nihánj cheꞌé níꞌ, ga̱a ne̱ cheꞌé se da̱nj quiꞌyaj soꞌ roꞌ, cheꞌé dan cavi̱i̱ sa̱ꞌ níꞌ doj na̱nj ado̱nj.

¹⁰ Ma̱an se cata̱j xnaꞌanj ꞌu̱nj se vaa me raj quiꞌya̱j soj á. Neꞌen soj se vaa yoꞌ cachén guun rá soj ra̱cuíj soj man nij síí nique̱, ne̱ guun cheꞌe̱ soj quiꞌyaj soj da̱nj, ne̱ cheꞌé dan cavi̱i̱ sa̱ꞌ soj doj, sese

¹¹ tinavi̱j soj suun guun cheꞌe̱ soj á. Dan me se ase vaa ya̱ ya̱ guun niha̱ꞌ rá soj ra̱cuíj soj asi̱j tacoo ga̱a guun cheꞌe̱ soj roꞌ, veé da̱nj gu̱un rá soj tinavi̱j soj nu̱ꞌ suun yoꞌ, ne̱ rque̱ soj saꞌanj gu̱un nucua̱j soj man nij síí nique̱ á.

¹² Sese ya̱ ya̱ rii nimán soj rque̱ soj saꞌanj yoꞌ, ne̱ cara̱nꞌ rá Yaꞌanj ga̱ saꞌanj gu̱un nucua̱j soj rque̱ soj a. Se̱ cataj Yaꞌanj rque̱ soj doj saꞌanj, sese se̱ guun nucua̱j soj quiꞌya̱j soj da̱nj maꞌ.

¹³ Né cheꞌe̱ se me rá núj cunu̱u nique̱ soj ne̱ cunu̱u ruꞌve̱e̱ ꞌó yuvii̱ me aꞌmii núj da̱nj maꞌ. ꞌO̱ se me rá núj cuya̱a̱n ga̱a̱ nu̱ꞌ nij tinu̱j níꞌ ado̱nj.

¹⁴ Ma̱an se cuano̱ nihánj roꞌ, vaa ndoꞌo saꞌanj rihaan soj, ne̱ nique̱ ndoꞌo ꞌó tinúú níꞌ, ne̱ cheꞌé dan no̱ xcúún soj ra̱cuíj soj man nij soꞌ na̱nj á. Ne̱ xraj, ne̱ vaa güii cachi̱in saꞌanj rihaan soj, ne̱ sese vaa saꞌanj rihaan ꞌó tinúú níꞌ, ne̱ ra̱cuíj nij soꞌ man soj, ga̱a ne̱ cuya̱a̱n ga̱a̱ nij tinu̱j níꞌ a.

¹⁵ Ne̱ ase vaa nana̱ nihánj roꞌ, da̱nj vaa nana̱ no̱ rihaan Danj Yaꞌanj cheꞌé nij yuvii̱ israelitá, taj yoꞌ a: “Ne quina̱j se chá rihaan síí naranꞌ ndoꞌo se chá maꞌ. Da̱nj na̱nj uún, ne̱ ne cachi̱in se chá rihaan síí naranꞌ do̱j se chá maꞌ”, taj nana̱ yoꞌ a.

¹⁶ Taj núj guun niꞌya̱j níꞌ rihaan Yaꞌanj, cheꞌé se ase vaa me ndoꞌo rá núj ra̱cuíj núj man soj roꞌ, da̱nj vaa guun ndoꞌo rá Titó ra̱cuíj soꞌ man soj, quiꞌyaj Yaꞌanj chugua̱nj.

¹⁷ Dan me se cuno soꞌ nana̱ rquee̱ núj rihaan soꞌ se vaa caꞌa̱nj soꞌ chiháán soj, tza̱j ne̱ guun niha̱ꞌ rá maꞌa̱n soꞌ ra̱cuíj soꞌ man soj, ne̱ cheꞌé dan quirii nimán maꞌa̱n soꞌ caꞌa̱nj soꞌ, ne̱ dan me se caꞌa̱nj soꞌ chiháán soj a.

¹⁸ Ne̱ cuchi̱ꞌ ꞌó tinúú níꞌ ga̱ Titó, ne̱ ꞌó soꞌ roꞌ, me síí aꞌmii natáj ndoꞌo nana̱ sa̱ꞌ cheꞌé Cristó, ne̱ cheꞌé dan veꞌé aꞌmii ta̱ranꞌ nij xꞌneꞌ nij síí noco̱ꞌ man Cristó niꞌya̱j nij soꞌ man soꞌ a.

¹⁹ Ne̱ caꞌneꞌ nij xꞌneꞌ nij síí noco̱ꞌ man Cristó suun rihaan soꞌ caꞌa̱nj soꞌ ga̱ núj ra̱cuíj soꞌ man núj ta̱cuachén núj saꞌanj yoꞌ rihaan nij síí nique̱ yoꞌ, ga̱a ne̱ uxrá veꞌé caꞌmi̱i̱ yuvii̱ cheꞌé Síí ꞌNi̱j Raꞌa man níꞌ, ne̱ gu̱un niha̱ꞌ doj rá maꞌa̱n núj quiꞌya̱j núj suun yoꞌ chugua̱nj.

²⁰ Tza̱j ne̱ naꞌvej rá núj cata̱j yuvii̱ se vaa caxríj yuve̱ núj taꞌa̱j saꞌanj noco̱o yoꞌ maꞌ.

²¹ ꞌO̱ se nuchruj ra̱a̱ núj da̱j quiꞌya̱j núj ne̱ cara̱nꞌ rá Síí ꞌNi̱j Raꞌa man níꞌ ni̱ꞌyaj soꞌ man núj, ne̱ cara̱nꞌ rá yuvii̱ uún ni̱ꞌyaj nij yuvii̱ man núj ado̱nj.

²² Ne̱ caꞌne̱j núj man ꞌó tinúú níꞌ ga̱ ro̱j soꞌ a. Guun queꞌe̱e̱ uxrá queneꞌen núj se vaa si̱j ya̱ ya̱ me rá quiꞌya̱j suun me soꞌ, ne̱ ya̱j roꞌ, guun ya̱ rá soꞌ se vaa ya̱ ya̱ ra̱cuíj soj man nij síí nique̱, ne̱ cheꞌé dan niha̱ꞌ doj rá soꞌ quiꞌya̱j suun soꞌ cheꞌé soj na̱nj ado̱nj.

²³ Dan me se xa̱ꞌ tinúꞌ Titó, tza̱j ne̱ síí ꞌyaj se‑su̱u̱n Cristó ga̱ ꞌu̱nj cheꞌé maꞌa̱n soj me soꞌ a. Ne̱ yavíj ro̱j tinúú níꞌ roꞌ, síí cuneꞌ nij xꞌneꞌ nij síí noco̱ꞌ man Cristó tu̱mé saꞌanj yoꞌ me ro̱j soꞌ, ne̱ veꞌé aꞌmii yuvii̱ cheꞌé Cristó, cheꞌé nu̱ꞌ se sa̱ꞌ ꞌyaj ro̱j soꞌ na̱nj ado̱nj.

²⁴ Cheꞌé dan ga̱a̱ ꞌe̱e̱ rá soj man nij soꞌ, ne̱ veꞌé ndoꞌo quiꞌya̱j soj ga̱ nij soꞌ, ga̱a ne̱ quisi̱j ya̱ nu̱ꞌ nana̱ veꞌé caꞌmii núj cheꞌé soj rihaan nij soꞌ, ne̱ queneꞌe̱n nij xꞌneꞌ nij síí noco̱ꞌ man Cristó da̱j quiꞌya̱j soj ado̱nj.