2 Corintios 6 - Triqui de San Juan Copala

¹ Dan me se ꞌyaj núj suun caꞌneꞌ Yaꞌanj rihaan núj, ne̱ cheꞌé dan rquee̱ núj man soj se vaa se̱ quiriꞌíj yaníj soj se lu̱j quiꞌyaj Yaꞌanj cheꞌé soj maꞌ.

² ꞌO̱ se nana̱ nihánj me nana̱ caꞌmii Yaꞌanj ado̱nj: Güii no̱ xcúún cu̱nó ꞌu̱nj me se cunó ꞌu̱nj nana̱ cachíín niꞌya̱j soj rihaan ꞌu̱nj a. Güii nanii yuvii̱ me se racuíj ꞌu̱nj man soj cavi̱i̱ sa̱ꞌ soj a. Da̱nj cataj Yaꞌanj ga̱a naá a. Xca̱j soj cuentá á. Cuano̱ nihánj me güii cunuu ꞌe̱e̱ rá Yaꞌanj man soj, ne̱ cuano̱ nihánj me güii caꞌve̱e cavi̱i̱ sa̱ꞌ soj chugua̱nj.

Tumé ndoꞌo nij tuvi̱ꞌ Pabló man maꞌa̱n nij soꞌ cheꞌé yan cuno̱ yuvii̱ nana̱ aꞌmii nij soꞌ a

³ Ne̱ tumé uxrá núj man núj cheꞌé chrej sa̱ꞌ, cheꞌé se naꞌvej rá núj quiꞌya̱j núj se vaa gu̱un yaníj soj rihaan chrej sa̱ꞌ maꞌ. Da̱nj ꞌyaj núj cheꞌé yan se̱ cata̱j nii se vaa nij vaa suun ꞌyaj núj rihaan Yaꞌanj maꞌ.

^4-5 ꞌO̱ se me rá núj ni̱ꞌyaj nii man núj ne̱ cata̱j nii se vaa ya̱ ya̱ si̱j ꞌyaj se‑su̱u̱n Yaꞌanj me núj, ne̱ cheꞌé dan nda̱ꞌ se ranꞌ núj sayuun, tza̱j ne̱ vaa ina̱j nimán núj na̱nj ado̱nj. Dan me se ranꞌ núj sayuun, ne̱ achiin rasu̱u̱n man núj, ne̱ chuꞌviꞌ nimán núj, ne̱ oꞌ nii cuartá xráá núj, ne̱ axríj nii tagaꞌ man núj, ne̱ nuu chre̱ꞌ nii quiꞌya̱j nii sayuun man núj a. Ne̱ ꞌyaj suun ndoꞌo núj cheꞌé yan quiꞌya̱j canaán núj cha̱ núj, ne̱ vaa güii narii ndoꞌo núj nej, ne̱ vaa güii, ne̱ ne vaa yaꞌnúj rihaan núj cha̱ núj, tza̱j ne̱ vaa ina̱j nimán núj, ne̱ ne aꞌneꞌ rá núj a̱ maꞌ.

⁶ Ne̱ tumé núj man núj cheꞌé yan se̱ quiꞌyaj núj cacunꞌ maꞌ. Ne̱ aꞌnéé nimán núj quiꞌya̱j núj se‑su̱u̱n Yaꞌanj, ne̱ núj roꞌ, ne uun yuva̱a̱ núj man tuviꞌ núj maꞌ. Tana̱nj veꞌé ꞌyaj núj rihaan tuviꞌ núj, ne̱ noco̱ꞌ núj Nimán Yaꞌanj, ne̱ ya̱ ya̱ ꞌe̱e̱ rá núj man tuviꞌ núj ado̱nj.

⁷ Nana̱ ya̱ aꞌmii núj, ne̱ rqué Yaꞌanj se nucua̱j man núj, ne̱ cunuu sa̱ꞌ nimán núj rihaan Yaꞌanj, ne̱ cheꞌé dan aꞌvee unuꞌ núj ga̱ Síí Chre̱e, ne̱ tumé núj man núj se vaa se̱ quiꞌyaj canaán Síí Chre̱e man núj a.

⁸ Vaa yuvii̱ aꞌmii cochro̱j cheꞌé núj ne̱ vaa yuvii̱ aꞌmii nij cheꞌé núj, vaa yuvii̱ taj se vaa se nij ꞌyaj núj ne̱ vaa yuvii̱ taj se vaa se sa̱ꞌ ꞌyaj núj, ne̱ vaa yuvii̱ taj se vaa síí ne̱ me núj, tza̱j ne̱ nana̱ ya̱ aꞌmii núj ado̱nj.

⁹ Ne̱ taj se uun núj, taj uún nii, tza̱j ne̱ si̱j neꞌen uxrá yuvii̱ man me núj a. Ne̱ taj uún nii se vaa da̱j doj cavi̱ꞌ núj, tza̱j ne̱ neꞌen soj se vaa vaa nucua̱j núj a. Ne̱ aꞌvej rá maꞌa̱n Yaꞌanj quira̱nꞌ núj sayuun cheꞌé rej nari̱ꞌ núj cuno̱ núj doj rihaan Yaꞌanj, tza̱j ne̱ ne aviꞌ núj, ꞌyaj Yaꞌanj maꞌ.

¹⁰ Ne̱ nanó rá núj cheꞌé sayuun, tza̱j ne̱ niha̱ꞌ rá núj rihaan Yaꞌanj uún a. Ne̱ síí nique̱ me núj, tza̱j ne̱ avii sa̱ꞌ doj queꞌe̱e̱ ndoꞌo yuvii̱, ꞌyaj núj a. Ne̱ taj siꞌyaj núj, tza̱j ne̱ cunuda̱nj chumii̱ nihánj me siꞌyaj núj a.

Me rá Pabló cunu̱u ꞌe̱e̱ rá nij síí ma̱n Corinto ni̱ꞌyaj nij soꞌ man nij tuvi̱ꞌ Pabló a

¹¹ Dan me se nihánj me cataj xnaꞌanj ꞌu̱nj rihaan soj si̱j ma̱n chumanꞌ Corinto da̱j vaa nimán núj a. Dan me se neꞌen soj se vaa ꞌe̱e̱ ndoꞌo rá núj man soj á.

¹² Nda̱ꞌ se ꞌe̱e̱ rá núj man soj, tza̱j ne̱ ne ꞌe̱e̱ rá soj man núj maꞌ.

¹³ Da̱j se ꞌe̱e̱ rá nii niꞌya̱j nii taꞌníí nii roꞌ, da̱nj vaa ꞌe̱e̱ raj niꞌya̱j man soj, ne̱ cheꞌé dan cata̱j xnaꞌanj ꞌu̱nj rihaan soj se vaa, ase vaa quiꞌyaj núj ga̱ soj roꞌ, da̱nj quiꞌya̱j uún soj ga̱ núj á.

No̱ xcúún níꞌ ta̱náj níꞌ chrej chiꞌi̱i̱, ne̱ cunu̱u sa̱ꞌ nimán níꞌ rihaan Yaꞌanj a

¹⁴ Se̱ guun gu̱un tuvi̱ꞌ soj ga̱ nij síí ne nocoꞌ man Cristó maꞌ. Se̱ guun quiꞌya̱j soj nda̱a vaa ꞌyaj nij soꞌ maꞌ. Asa̱ꞌ caꞌve̱e cuya̱a̱n ga̱a̱ rej ranga̱ꞌ ga̱ rej rmi̱ꞌ, rá soj ga̱. Cheꞌé dan, asa̱ꞌ caꞌve̱e gu̱un tuvi̱ꞌ síí me rá quiꞌya̱j sa̱ꞌ ga̱ síí me rá quiꞌya̱j cacunꞌ, rá soj ga̱.

¹⁵ Asa̱ꞌ caꞌve̱e cuya̱a̱n ga̱a̱ rá Cristó ga̱ Síí Chre̱e, rá soj ga̱. Ne̱ caꞌve̱e cuya̱a̱n ga̱a̱ rá síí noco̱ꞌ man Cristó ga̱ síí naꞌvej rá canoco̱ꞌ man Cristó, rá soj naꞌ. Taj maꞌ.

¹⁶ Ne̱ xa̱ꞌ níꞌ si̱j noco̱ꞌ man Yaꞌanj, tza̱j ne̱ asa̱ꞌ caꞌve̱e cunu̱u chre̱ꞌ níꞌ ga̱ yaꞌanj quiꞌyaj maꞌa̱n yuvii̱, rá soj ga̱. Ne̱ xa̱ꞌ Yaꞌanj, tza̱j ne̱ síí vaa iꞌna̱ꞌ me soꞌ, ne̱ ya̱nj soꞌ nimán níꞌ ado̱nj. ꞌO̱ cuya̱a̱n vaa nana̱ nihánj ga̱ nana̱ caꞌmii Yaꞌanj ga̱a naá ga̱a cataj Yaꞌanj a: Ca̱yáán ꞌu̱nj ga̱ nij soꞌ, ne̱ cache̱e̱ ꞌu̱nj ga̱ nij soꞌ, ne̱ guún ꞌu̱nj Taꞌanj nij soꞌ, ne̱ gu̱un nij soꞌ se‑chuma̱nꞌ ꞌu̱nj a, taj Yaꞌanj ga̱a naá a.

¹⁷ Ne̱ cataj uún Yaꞌanj rihaan níꞌ si̱j noco̱ꞌ man soꞌ a: Cheꞌé dan gu̱un yaníj soj rihaan nij síí chiꞌi̱i̱ yoꞌ, ne̱ a̱ ꞌó se chiꞌi̱i̱ se̱ quiꞌyaj soj, ga̱a ne̱ naca̱j ꞌu̱nj man soj a.

¹⁸ Ne̱ gu̱un Re̱j soj manj, ne̱ gu̱un soj taꞌníj, taj ꞌu̱nj Si̱j ꞌNi̱j Raꞌa man soj Síí Uun Nucua̱j ꞌYaj Cunuda̱nj a. Da̱nj taj uún Yaꞌanj rihaan níꞌ a.